Aradman 34

Makaparig-on Ngan Positibo

Ano an kinahanglan mo buhaton?

Imbes nga mag-inistorya hin maiha mahitungod han negatibo nga mga butang, mag-istorya mahitungod han mga butang nga nagpapauswag han kahimtang o nakakahatag hin kompyansa.

Kay ano nga importante ito?

An katawohan naguguol tungod han waray-gugma nga kalibotan. Damu an may-ada makuri nga personal nga mga problema. An mensahe han Biblia, kon husto nga iginpipresenta, nakakahatag hin makalilipay nga paglaom ha tangkod-an-kasingkasing nga mga tawo.

AN MENSAHE nga igintoka ha aton nga isangyaw amo an maopay nga sumat. Hi Jesus nagsiring: “An maopay nga sumat kinahanglan nga igwali anay ha ngatanan nga mga nasud.” (Mar. 13:10) Hi Jesus mismo nagpakita hin susbaranan pinaagi han pagpahayag han “maopay nga sumat han ginhadian han Dios.” (Luk. 4:43) An iginsangyaw han mga apostol iginsaysay liwat sugad nga an “maopay nga sumat han Dios” ngan an “maopay nga sumat ni Kristo.” (1 Tes. 2:2; 2 Kor. 2:12) An sugad nga mensahe makaparig-on ngan positibo.

Uyon ha kapahayagan han “waray kataposan nga maopay nga sumat” han “anghel nga naglulupadlupad ha ginkakatungaan han langit,” gin-aaghat naton an mga tawo: “Kahadluki niyo an Dios, ngan tagi hiya niyo hin himaya.” (Pah. 14:​6, 7) Nagsusumat kita ha mga tawo ha bisan diin mahitungod han totoo nga Dios, han iya ngaran, han iya darayawon nga mga kalidad, han iya urusahon nga mga buhat, han iya mahigugmaon nga katuyoan, han aton baratunon ha iya, ngan han iya ginkikinahanglan ha aton. An maopay nga sumat nag-uupod han kamatuoran nga bubungkagon ni Jehova nga Dios an magraot, nga nagpapakaalo ha iya ngan duro nga nagdadaot han kinabuhi han iba nga mga tawo. Kondi diri naton responsabilidad an paghukom ha mga indibiduwal nga aton ginsasangyawan. An aton sinsero nga hingyap amo nga karawaton han damu nga mga tawo tubtob nga mahihimo an mensahe han Biblia basi mapamatud-an nga maopay gud ito nga sumat para ha ira.​—Prob. 2:20-22; Juan 5:22.

Limitahi an Negatibo nga mga Topiko. Siyempre, may-ada diri-maopay nga mga bahin ha kinabuhi. Diri naton ginbabalewaray ini. Ha pagtikang hin pakiistorya, mahimo ka mag-unabi hin problema nga ginhuhunahuna han mga tawo ha iyo teritoryo ngan paghisgotan ito hin madaliay. Kondi gutiay la an bili han padayon nga pag-inistorya mahitungod hito. An mga tawo agsob makabati hin nakakaguol nga mga sumat, salit an pag-inistorya mahitungod han diri makalilipay nga mga butang mahimo magin hinungdan nga sarahan nira an ira purtahan o an ira mga talinga. Ha pagtikang han iyo pag-istorya, pangalimbasog nga madara an atensyon ngadto ha makarepresko nga mga kamatuoran ha Pulong han Dios. (Pah. 22:17) Katapos, bisan kon an tawo diri maruyag magpadayon ha pakiistorya, nakabilin ka na ha iya hin impormasyon nga makaparig-on hunahunaon. Tungod hini mahimo hiya magin mas disidido mamati ha lain nga higayon.

Ha pariho nga paagi, kon ginhangyo ka ha pagpahayag, ayaw pagpasobrahi an mamarati hin negatibo nga impormasyon tungod la kay damu an reperensya mahitungod hito. Kon an mamumulong naghihisgot hin maiha mahitungod ha kapakyasan han tawhanon nga mga magmarando, han mga sumat mahitungod han krimen ngan kamadarahog, ngan han nakakaalarma nga pagkaylap han imoralidad, mahimo magin makapaluya an epekto hito. Isaysay an negatibo nga mga bahin han tema kon may-ada la ito mapulsanon nga katuyoan. An gutiay nga pag-unabi han sugad nga materyal mahimo magpabug-at han pagin napapanahon han imo pahayag. Mahimo liwat ito magpakilala han importante nga mga hinungdan nga nagriresulta ha usa nga kahimtang ngan salit mahimo gamiton ha pagpatin-aw kon kay ano nga praktikal an solusyon nga iginsasaysay han Biblia. Kon posible, magin espisipiko nga diri ginhihisgotan hin maiha an mga problema.

Kasagaran nga imposible ngan diri maopay nga kuhaon an ngatanan nga negatibo nga impormasyon tikang ha usa nga pahayag. An ayat amo an pagpresenta han maopay ngan han maraot ha paagi nga positibo an kabug-osan nga epekto. Basi madangat ini, kinahanglan siguruhon mo kon ano an iuupod, kon ano an kukuhaon, ngan kon diin an pabubug-atan. Ha Sermon ha Bukid, ginsagdonan ni Jesus an iya mga mamarati nga likyan an maki-kalugaringon nga mga paagi han mga eskriba ngan mga Pariseo, ngan nag-unabi hiya hin pipira nga mga ehemplo ha pagpatin-aw han punto. (Mat. 6:​1, 2, 5, 16) Kondi, imbes nga mag-inistorya mahitungod han maraot nga mga buhat hadton relihiyoso nga mga lider, ginpabug-atan ni Jesus an pagsabot ha totoo nga mga paagi han Dios ngan pagkinabuhi uyon hini. (Mat. 6:​3, 4, 6-15, 17-34) Mapulsanon gud an epekto.

Tipigi nga Positibo an Paagi han Pagyakan. Kon igintoka ka ha pagpahayag ha iyo kongregasyon mahitungod han usa nga bahin han Kristiano nga buruhaton, pangalimbasog nga magin makapadasig imbes nga magin kritiko. Siguroha nga imo ginbubuhat an imo igin-aaghat nga buhaton han iba. (Roma 2:​21, 22; Heb. 13:7) Tuguti nga an gugma, diri an kaaringit, an magpagios ha imo isisiring. (2 Kor. 2:4) Kon nasarig ka nga karuyag han imo mga igkasi-tumuroo nga lipayon hi Jehova, ito nga pagsarig makikita ha imo ginsisiring, ngan magkakaada ini mapulsanon nga epekto. Tigamni kon paonan-o iginpahayag ni apostol Pablo an sugad nga pagsarig, sugad han nahirekord ha 1 Tesalonika 4:1-12; 2 Tesalonika 3:​4, 5; ngan Filemon 4, 8-14, 21.

Usahay kinahanglan magpahamangno an mga tigurang kontra han diri-maaramon nga paggawi. Kondi an pagpaubos mabulig ha ira nga makig-upod ha ira kabugtoan ha maaghop nga paagi. (Gal. 6:1) An paagi han pagyakan sadang magpakita nga adton aada ha kongregasyon matinalahuron nga gintatagad. (1 Ped. 5:​2, 3) An Biblia nagsasagdon ha batan-on nga kalalakin-an nga magin mahunahunaon gud hini. (1 Tim. 4:12; 5:​1, 2; 1 Ped. 5:5) Kon ginkikinahanglan an pagsaway, pagdisiplina, pagtadong han mga butang, sadang ini buhaton sumala ha ginsisiring mismo han Biblia. (2 Tim. 3:16) An pag-aplikar han Kasuratan diri gud sadang pasobrahan o balikoon basi suportahan an usa nga ideya nga bangin marig-on nga gintotoohan han mamumulong. Bisan kon ginkikinahanglan an sagdon ha pagtadong, an estilo han pahayag mahimo matipigan nga positibo kon labi na nga pabubug-atan kon paonan-o malilikyan an kahidabi ha sayop nga buhat, kon paonan-o an pagsulbad ha mga problema, kon paonan-o malalamposan an mga kakurian, kon paonan-o tatadungon an sayop nga pagkinabuhi, ngan kon paonan-o kita napapanalipdan han mga iginpapatuman ni Jehova.​—Sal. 119:​1, 9-16.

Kon nag-aandam han imo pahayag, hunahunaa hin maopay kon paonan-o mo tatapuson an tagsa nga nangunguna nga punto ngan an pahayag ha kabug-osan. An kataposan nga imo ginsisiring amo an agsob nga nahinunumdoman hin maiha. Magigin positibo ba ito?

Kon Nakikiistorya ha mga Igkasi-Tumuroo. Ginpapabilhan han mga surugoon ni Jehova an mga higayon ha pagtarotarampo ha Kristiano nga mga katirok. Mga panahon ini han espirituwal nga karepresko. An Biblia nag-aaghat ha aton nga hunahunaon an ‘pagdinasigay ha usa kag usa’ kon kita nagkakatirok ha aton mga lugar han pagsingba. (Heb. 10:25) Ginhihimo ito diri la pinaagi han mga pahayag ngan mga komento durante han mga katirok kondi pinaagi liwat han pag-iristorya antes ngan katapos han mga katirok.

Bisan kon normal la nga pag-istoryahan an aton adlaw-adlaw nga pagkinabuhi, an gidadakui nga pagdasig nagtitikang ha paghisgot mahitungod han espirituwal nga mga butang. Nag-uupod ini han mga eksperyensya nga aton ginpapahimulsan ha sagrado nga pag-alagad. Makapadasig liwat an pagpakita hin maopay nga pagtagad ha usa kag usa.

Kinahanglan magin mabinantayon kita basi diri maimpluwensyahan han kalibotan ha aton palibot. Han nagsusurat ha mga Kristiano ha Efeso, hi Pablo nagsiring: “Bayai niyo an buwa, magyakan kamo an tagsatagsa hin kamatuoran ha iya amyaw.” (Efe. 4:25) An pagyakan han kamatuoran imbes nga han buwa nag-uupod hin diri paghimaya han mga butang ngan mga tawo nga gin-iidolo han kalibotan. Sugad man, nagpahamangno hi Jesus kontra ha “limbong han mga manggad.” (Mat. 13:22) Salit kon nag-iiristorya kita, sadang kita mag-ikmat nga diri iaghat ito nga limbong pinaagi han pagdani ha pagtag-iya hin materyal nga mga butang.​—1 Tim. 6:​9, 10.

Han nagsasagdon mahitungod han panginahanglan nga magin makaparig-on, hi apostol Pablo nagsasagda ha aton nga diri hukman o minuson an usa nga bugto nga bangin naglilikay ha pipira nga mga butang tungod han ‘mga kaluyahan ha iya pagtoo,’ tungod kay diri niya hinsasabtan an bug-os nga kahaluag han Kristiano nga kagawasan. Oo, basi magin makapadasig an aton pakiistorya ha iba, kinahanglan tagdon naton an ira gintikangan ngan an sukol han ira espirituwal nga pag-uswag. Makasurubo gud nga “magbutang dida ha dalan han iya bugto hin hiparakdolan, o [han] kahigayonan hin pagkahulog”!​—Roma 14:1-4, 13, 19.

Adton nangangalimbasog ha paglampos han seryoso nga personal nga mga problema​—pananglitan, han maiha na nga sakit—​naapresyar han makaparig-on nga iristorya. An sugad nga tawo bangin nangangalimbasog gud ha pagtambong ha mga katirok. Adton maaram han iya kahimtang bangin magpakiana: “Kumusta an imo pag-abat?” Sigurado nga aapresyaron niya an ira pagtagad. Kondi, an kahimtang han iya kahimsog bangin diri amo an tema nga karuyag gud niya pag-istoryahan. An mga pulong han apresasyon ngan kumendasyon bangin may-ada mas daku nga mahihimo ha pagbantad han iya kasingkasing. Nakikita mo ba an pamatuod han iya padayon nga gugma kan Jehova ngan han iya pagpailob ha makuri nga kahimtang? Nadadasig ka ba kon nagkukomento hiya? Diri ba mas makaparig-on an pagsentro han atensyon ha iya mga abilidad ngan ha iya mga naibubulig ha kongregasyon imbes nga ha iya mga kaluyahan?​—1 Tes. 5:11.

Basi makaparig-on an aton pakiistorya, importante gud nga tagdon an panhunahuna ni Jehova ha kon ano an ginhihisgotan. Ha kadaan nga Israel, adton nagyakan kontra ha mga representante ni Jehova ngan nagreklamo mahitungod han manna nakaeksperyensya han duro nga kasina han Dios. (Num. 12:1-16; 21:​5, 6) Pinamamatud-an naton nga nakakapahimulos kita tikang hito nga mga ehemplo kon aton gintatahod an mga tigurang ngan gin-aapresyar an espirituwal nga pagkaon nga igintatagana pinaagi han matinumanon ngan maaramon nga uripon nga klase.​—1 Tim. 5:17.

Diri gud problema an pamiling hin mapulsanon nga mga butang nga pag-iristoryahan kon kaupod an aton Kristiano nga kabugtoan. Kondi, kon an usa nagyayakan hin sobra kakritiko, mag-una ha pagbalhin han iristorya ngadto ha makaparig-on nga topiko.

Nagsasangyaw man kita ha iba, nagpapahayag ha entablado, o nakikiistorya ha mga igkasi-tumuroo, hinaot magin maaramon kita basi maipagawas tikang ha aton mga kasingkasing “an maopay sugad nga kinahanglan ha pagparig-on, basi nga makahatag hin grasya ha mga nakakabati.”​—Efe. 4:29.

KON PAONAN-O BUBUHATON ITO

Hinumdumi nga an aton toka amo an pagsangyaw han maopay nga sumat.

Magin makaparig-on imbes nga magin kritiko.

Patuboa an positibo nga panhunahuna mahitungod hadton imo kaistorya.

Ha pakiistorya, tagda kon paonan-o an imo isisiring makakaapekto ha iba nga tawo.

PAGBANSAY: Bisitaha an usa nga baldado o diri nakakagawas ha iya balay. Pag-una ha makaparig-on nga pakiistorya. Magin mapinairon, kondi tipigi nga positibo an imo mga komento. Abanse nga magplano basi mabuhat ini.