Himoa an Iyo Pag-asawa nga Nagpapadayon nga Pagtampo

“An gintig-ub han Dios diri pagbulagon han tawo.”—MATEO 19:6, NW.

1. Ano an basihanan han kalamposan ha pag-asawa ha totoo nga mga Kristiano yana nga adlaw?

DAMU ka yukot han katawohan ni Jehova yana nga adlaw an nagpapahimulos han makapatagbaw ngan nagpapadayon nga mga pag-asawa. Kondi, an sugad nga kalamposan ha bisan diin, diri kay aksidente la. An Kristiano nga mga pag-asawa naglalampos kon an mga bana ngan mga asawa pariho nga (1) natahod ha panhunahuna han Dios ha pag-asawa ngan (2) nangangalimbasug ha pagkinabuhi ha mga prinsipyo han iya Pulong. Tungod ini kay, an Dios mismo an nagtikang han kahikayan han pag-asawa. Hiya an Usa nga ‘ha iya an ngatanan nga pamilya ha tuna ginngaranan.’ (Efeso 3:14, 15) Tungod kay maraam hi Jehova kon ano an ginkikinahanglan ha malampuson nga pag-asawa, magpapahimulos kita ha aton kalugaringon pinaagi ha pagsunod ha iya giya.—Isaias 48:17.

2. Ano an mga resulta han kapakyas ha pagbuhat han mga prinsipyo ha pag-asawa?

² Ha kabaliktaran, an kapakyas ha pagbuhat han mga prinsipyo han Biblia magreresulta ha kabidoan ha pag-asawa. An iba nga mga eksperto natoo nga mga duha han tulo ka bahin hadton nag-aasawa yana nga adlaw ha Estados Unidos ha kataposan an makuha hin diborsiyo. Bisan an mga Kristiano diri nahigagawas hini nga mga kakurian ngan mga kasakitan hinin “magpakalilisang nga mga panahon nga makuri pakibagayan.” (2 Timoteo 3:1) An mga kaguol ha pangabuhi ngan mga pag-ipit ha lugar han trabaho mahimo magkaada nakakadaut nga epekto ha bisan ano nga pag-asawa. An iba nga mga Kristiano nagmabidoon gud ha kapakyas han ira mga padis ha pagbuhat han mga prinsipyo han Biblia. “Nahigugma ako kan Jehova,” siring han usa Kristiano nga asawa, “kondi an akon pag-asawa puno hin mga problema ha 20 ka tuig. Hakog an akon bana ngan diri karuyag nga magbag-o. Naabat ako nga nahilit-ag.” Labaw kay han pipira Kristiano nga mga bana o mga asawa an nagpahayag hin pariho nga mga pagbati. Ano an sayop? Ngan ano an makakapugong han pag-asawa tikang ha kaanod ngadto ha matugnaw nga kawaray-interes o dayag nga pagdumot?

An Pagkapermanente han Pag-asawa

3, 4. (a) Ano an suruklan han Dios para ha pag-asawa? (b) Kay ano nga matadong ngan mapulsanon an pagkapermanente han pag-asawa?

³ Bisan ilarum han gimaopayi nga mga kahimtang, an pag-asawa amo an pagtampo han diri-hingpit nga mga indibiduwal. (Deuteronomio 32:5) Salit hi apostol Pablo nagsiring nga “adton [nag-aasawa] magkakaada kagol-anan ha ira unod.” (1 Korinto 7:28) An pipira sobra nga mga kahimtang bangin magresulta pa ngani ha pagbulag o diborsiyo. (Mateo 19:9; 1 Korinto 7:12-15) Kondi, ha kadak-an nga mga kaso, inaaplikar han mga Kristiano an sagdon ni Pablo: “An asawa diri sadang bumulag ha iya bana . . . , ngan diri sadang bayaan han bana an iya asawa.” (1 Korinto 7:10, 11, NW) Tinuod, an pag-asawa gintuyo nga magin permanente nga bugkos, kay hi Jesu-Kristo nagpahayag: “An gintig-ub han Dios diri pagbulagon han tawo.”—Mateo 19:6, NW.

⁴ Ha usa nga naabat nga nahilit-ag hiya ha nagdudumot o waray-gugma nga pag-asawa, an suruklan ni Jehova bangin baga in mapintas ngan diri-makatadonganon. Kondi diri. An pagkapermanente han bugkos han pag-asawa nagpapagios ha mahadlukon-ha-Dios nga mag-asawa nga mag-istorya ngan sulbaron an ira mga problema, imbes nga madagmit nga bayaan an ira mga obligasyon ha siyahan nga tigaman han problema. Usa nga lalaki nga inasaw-an ha sobra 20 ka tuig an nagpahayag sugad hini: “Diri mo malilikyan an maproblema nga mga panahon. Diri kamo magmamalipayon ha usa kag usa ha ngatanan nga panahon. Totoo ito kon an ginsaaran tinuod nga importante.” Siyempre, an Kristiano nga mga mag-asawa naabat han siyahan nga obligasyon kan Jehova nga Dios, an Tinikangan han pag-asawa.—Itanding an Eklesiastes 5:4.

Pagkaulo Ngan Pagpasakop

5. Ano an pipira han sagdon ni Pablo para ha mga bana ngan mga asawa?

⁵ Salit, kon nabangon an mga problema, panahon ito ha pamiling, diri pagpalagiw, kondi maoroopay nga paagi ha pagbuhat han sagdon han Pulong han Dios. Pananglitan, tagda ini nga mga pulong ni Pablo, ha Efeso 5:22-25, 28, 29: “An mga asawa magpasakop ha ira mga bana sugad nga ngadto ha Ginoo, kay an bana amo an ulo han iya asawa sugad nga hi Kristo liwat an ulo han kongregasyon, hiya sugad nga manluluwas hini nga lawas. Ha pagkamatuod, sugad la nga an kongregasyon nagpapasakop kan Kristo, sugad man an mga asawa kinahanglan magpasakop ha ira mga bana ha ngatanan nga butang. Mga bana, padayon nga higugmaon niyo an iyo mga asawa, sugad la kan Kristo nga naghigugma han kongregasyon ngan igintubyan an iya kalugaringon tungod hito. Hini nga paagi kinahanglan higugmaon han mga bana an ira mga asawa sugad nga ira kalugaringon nga mga lawas. Hiya nga nahigugma ha iya asawa nahigugma ha iya kalugaringon, kay bisan san-o waray tawo nga nangalas ha iya kalugaringon nga unod; kondi pinakakaon niya ngan ginmamangnoan ito, sugad la han ginbubuhat ni Kristo ha kongregasyon.”

6. Paonan-o an Kristiano nga mga bana kaiba tikang ha kalalakin-an ha kalibotan?

⁶ Agsub nga inaabuso han kalalakin-an an ira awtoridad sugad nga bana ngan ginmamandoan an ira mga asawa. (Genesis 3:16) Kondi, ginsagda ni Pablo an Kristiano nga mga bana nga magin kaiba tikang ha kalalakin-an ha kalibotan, nga magin Kristohanon, diri mabangis nga ginmamandoan an tagsa nga detalye han pag-eksister han ira mga asawa. Sigurado, an tawo nga hi Jesu-Kristo diri gud mabangis o dominante. Iya gintrato an iya mga sumuronod nga may dungog ngan pagtahod, nasiring: “Kadi ha akon, ngatanan kamo nga nagbubuhat ngan binubug-atan, ngan akon kamo tatagan hin pagpahuway. Pas-ana niyo an akon yugo ngan mahibaro kamo ha akon, kay ako maaghup ngan mapainubsanon ha kasingkasing.”—Mateo 11:28, 29.

7. Paonan-o an lalaki makakahatag hin dungog ha iya asawa kon kinahanglan hiya magtrabaho ha sekular?

⁷ An Kristiano nga bana naghahatag hin dungog ha iya asawa sugad ha usa nga maluroluya nga surudlan. (1 Pedro 3:7) Pananglitan, kinahanglan magtrabaho ha sekular an asawa. Sadang pagtagdon ini han bana, sugad nga mabinuligon ngan makonsiderasyon. An usa daku nga hinungdan nga an kababayin-an nahihilig ha diborsiyo amo an pagpasibaya han ira bana ha kabataan o ha panimalay. Salit, an Kristiano nga bana nangangalimbasug nga makabulig ha iya asawa ha panimalay ha makahuloganon nga mga paagi nga mapulsanon ha bug-os nga pamilya.

8. Ano an ginkikinahanglan han pagpasakop para ha Kristiano nga mga asawa?

⁸ Tungod kay gintatrato nga may dungog nakakahimo ito nga masurusayon para han Kristiano nga mga asawa nga magpasakop ha ira mga bana. Kondi, diri ini nangangahulogan hin makalolooy nga pagkauripon. An Dios nagsugo nga an asawa, diri kay magigin uripon, kondi usa nga “komplemento” (“katugbang,” footnote), nagpapasabut hin usa ka butang nga angayan para han lalaki. (Genesis 2:18) Ha Malakias 2:14, an asawa ginsisiring sugad nga “padis” han lalaki. Sugad nga padis, an mga asawa ha mga panahon han Biblia nagpahimulos hin daku nga kagawasan ngan pagpili. Mahitungod han “may kapas nga asawa,” an Biblia nasiring: “An kasingkasing han iya bana nasarig ha iya.” Tinuod, tinapuran hiya han mga butang sugad han pagmangno ha panimalay, pagmangno ha pamalit han pagkaon, paghikay han mga butang han propredad nga tuna, ngan pagmangno han gutiay nga negosyo.—Proberbios 31:10-31.

9. (a) Paonan-o ipinapakita an totoo nga pagpasakop han mahadlukon-ha-Dios nga kababayin-an ha mga panahon han Biblia? (b) Ano an makakabulig ha Kristiano nga asawa nga magpabilin nga nagpapasakop yana nga adlaw?

⁹ Kondi, kinikilala han mahadlukon-ha-Dios nga asawa an awtoridad han iya bana. Pananglitan, hi Sarah “nasugot kan Abraham, tinatawag hiya nga ‘ginoo,’” diri sugad nga matinalahuron nga pormalidad, kondi sugad nga sinsero nga pagpakita han iya pagpasakop. (1 Pedro 3:6; Genesis 18:12) Kinaburut-on nga binayaan liwat niya an iya mahimyang nga panimalay ha siyudad han Ur basi mag-ukoy ha mga tolda upod han iya bana. (Hebreo 11:8, 9) Kondi an pagpasakop diri nangahulogan nga an asawa diri kinahanglan magbuhat hin responsable nga buhat kon kinahanglanon. Han napakyas hi Moises ha pagsunod ha balaud han Dios ha sirkumsisyon, inunahan han iya asawa, hi Sipora, an kalamidad pinaagi ha pagbuhat hin marig-on. (Eksodo 4:24-26) Labaw pa an nahiuupod kay ha pagpalipay ha diri-hingpit nga tawo. An mga asawa kinahanglan “magpasakop ha ira mga bana sugad nga ha Ginoo.” (Efeso 5:22) Kon an Kristiano nga asawa naghuhunahuna may kalabutan han iya relasyon ha Dios, nabulig ini ha iya ha pagbalewaray han gudtiay nga mga sayop ngan mga kaluyahan han iya bana, sugad la han sadang pagbuhaton niya ha iya pakig-upod ha iya asawa.

Komunikasyon—Importante ha Pag-asawa

10. Mationan-o kaimportante an komunikasyon ha pag-asawa?

¹⁰ Han ginpakianhan kon ano an usa gidadakui nga hinungdan nga nagbubulag an mga mag-asawa, usa nga abogado han diborsiyo an binaton: “An kawaray abilidad ha pagyakan hin tangkod ha usa kag usa, pagpahayag han ira mga panhunahuna ha sulud ngan pagtrato ha usa kag usa sugad nga ira duok nga sangkay.” Oo, importante an komunikasyon ha usa ka marig-on nga pag-asawa. Sugad han siring han Biblia, “napapakyas an mga plano kon waray masasarigan nga istorya.” (Proberbios 15:22) An mga bana ngan mga asawa kinahanglan magin ‘masasarigan nga magsangkay,’ nagpapahimulos hin mapaso, duok nga relasyon. (Proberbios 2:17) Kondi, damu nga mga mag-asawa an nakukurian ha pagkomunikar, ngan salit nagdadaku an kasina tubtub nga nahitatabu an pagbuto han makabungkag nga kasina. O bangin magtago an mag-asawa ha luyo han manipis nga tabon han pagtahod, nagpapahirayo ha usa kag usa ha emosyon.

11. Paonan-o mapapauswag an komunikasyon han bana ngan asawa?

¹¹ An bahin han problema baga in an kalalakin-an ngan kababayin-an agsub nga mayada magkaiba nga mga estilo han komunikasyon. Kadam-an nga kababayin-an an baga in mahimyang ha paghisgut han mga pagbati, samtang an kalalakin-an ha kabug-osan baga in karuyag paghisgutan an mga kamatuoran. An kababayin-an labaw nga mahilig ha pagpakita hin empatiya ngan paghatag hin suporta ha emosyon, samtang an kalalakin-an nahihilig ha pamiling ngan paghatag hin mga kasulbaran. Ha gihapon, an posibilidad para han maopay nga komunikasyon naeksister kon an mag-asawa determinado nga magin “madagmit ha pamati, mahinay ha pagyakan, mahinay ha kasina.” (Jakobo 1:19) Pagtan-aw ha mata ngan pamati gud. Hibaroi an aada ha sulud han usa kag usa pinaagi han makonsiderasyon nga mga pakiana. (Itanding an 1 Samuel 1:8; Proberbios 20:5.) Imbes nga mangalimbasug ha paghatag hin madagmit nga kasulbaran kon an imo padis nagpapahayag han usa nga problema, pamati hin maopay samtang nangangalimbasug ka ha pagsulbad han mga butang. Ngan mapainubsanon nga mag-ampo kamo nga tampo, namimiling han baraan nga giya.—Salmo 65:2; Roma 12:12.

12. Paonan-o masasalingabut an panahon han Kristiano nga mga padis para ha usa kag usa?

¹² Usahay an mga kaguol ngan mga kasakit han kinabuhi baga in nagbibilin ha mag-asawa hin gutiay nga panahon o kusug para han makahuloganon nga pag-istorya. Kondi, kon karuyag han mga Kristiano nga tipigan an ira pag-asawa nga dungganon ngan panalipdan ito kontra han kahugaw, kinahanglan magpabilin hira nga duok ha usa kag usa. Kinahanglan tagdon nira an ira pagtampo sugad nga usa ka butang nga presyoso, birilhon, ngan kinahanglan salingabuton an panahon para hito ngan para ha usa kag usa. (Itanding an Kolosas 4:5.) Ha pipira nga mga kahimtang an kasulbaran ha pagbiling hin panahon para han maopay nga pag-istorya bangin simple la nga pagsarado han TV. An regular nga paglingkod nga tampo para ha usa ka tasa nga semente o kape makakabulig ha mag-asawa nga padayon nga nagkokomunikar ha emosyon. Ha sugad nga mga okasyon mahimo hira ‘magkonsulta nga tampo’ ha magkalainlain nga mga butang han pamilya. (Proberbios 13:10) Ngan maaramon gud an pagpatubo han batasan nga pag-istorya mahitungod han gudtiay nga mga kasina ngan diri-pagsinabtanay antes magin daku ito nga gintitikangan han kaguol!—Itanding an Mateo 5:23, 24; Efeso 4:26.

13. (a) Ano nga susbaranan an ipinakita ni Jesus ha pagkasinsero ngan katangkod? (b) Ano an pipira nga mga paagi nga an mag-asawa makakahirani ha usa kag usa?

¹³ Usa nga lalaki an nagtug-an: “Agsub, nga makuri para ha akon an pagpahayag han akon mga panhunahuna ngan isumat [ha akon asawa] an eksakto nga inaabat ko.” Kondi, an pagpahayag-ha-kalugaringon, amo an importante nga yawi ha pagpatubo han pagkaduok. Tigamni kon mationan-o kasinsero ngan katangkod hi Jesus ha magigin mga membro han iya nobya nga klase. Hiya nagsiring: “Ako diri na natawag ha iyo nga mga uripon, kay an uripon diri maaram han ginbubuhat han iya agaron. Kondi ako natawag ha iyo nga mga sangkay, kay an ngatanan nga mga butang nga akon hinbabatian tikang ha akon Amay akon iginpahibaro ha iyo.” (Juan 15:15, NW) Salit isipa an imo bana o asawa sugad nga sangkay. Itapod ha imo padis an imo mga pagbati. Pangalimbasug ha paghimo hin simple, tangkod nga “mga pulong han gugma.” (Kanta ni Salomon 1:2) An abrido nga komunikasyon bangin usahay baga in makaaralo, kondi kon an magpadis nangangalimbasug gud, daku an madadangat ha paghimo han pag-asawa nga nagpapadayon nga pagtampo.

Pagsulbad han Diri-pag-uroyon

14, 15. Paonan-o malilikyan an araway?

¹⁴ An tangkod nga diri-pag-uroyon sigurado nga mabangon usahay. Kondi an iyo panimalay diri kinahanglan magin ‘balay nga puno hin araway.’ (Proberbios 17:1) Pag-ikmat nga diri paghisgutan an delikado nga mga butang kon hibabatian han kabataan, ngan ipakita an konsiderasyon ha mga pagbati han imo padis. Han magpahayag hin kasakitan hi Rachel tungod han iya kabaw-as ngan naghangyo kan Jakob nga tagan hiya hin mga anak, may kasina hiya nga binaton: “Liwan ba ako han Dios, nga magpugong ha imo han bunga han arangkan?” (Genesis 30:1, 2) Kon nabangon an mga problema ha panimalay, atakeha an problema, diri an tawo. Durante han pribado nga paghisgut, likyi an “pagyakan nga waray-paghunahuna” o nasabad ha usa kag usa.—Proberbios 12:18.

¹⁵ Totoo, bangin mayada ka makusog nga mga pagbati mahitungod han imo panhunahuna, kondi mahimo ini igpahayag nga waray “nakakadaut nga kapaitan ngan kasina ngan kangalas ngan pagbosa ngan maraut nga yakan.” (Efeso 4:31) “Hisguti an iyo mga problema ha normal nga tingog,” siring han usa nga bana. “Kon an usa ha iyo nagtitikang ha pagyakan ha durudaku nga tingog tungod ha kasina, hunong ha paghisgut. Balik katapos han haliput nga peryodo han panahon. Pagtikang utro.” An Proberbios 17:14 naghahatag hinin maopay nga sagdon: “Bayai an pakiglantugi nga waray pa an away.” Sarihi an paghisgut utro han mga butang kon kamo kalmado na.

Pagpabilin nga Matinumanon ha Usa kag Usa

16. Kay ano nga usa ka seryoso nga butang an pag-adulteryo?

¹⁶ An Hebreo 13:4 nasiring: “Magin dungganon an pag-asawa ha ngatanan, ngan an higdaan diri paghugawan, kay an mga makihihilawason ngan an mga paralibog paghuhukman han Dios.” An pag-adulteryo usa nga sala kontra ha Dios. Nakakadaut liwat ito ha pag-asawa. (Genesis 39:9) An usa nga magsaragdon ha pag-asawa nagsurat: “Katapos nga hinbaroan ito, an pag-adulteryo nahampak ha bug-os nga pamilya sugad hin makusog nga bagyo, binubungkag an mga panimalay, naguguba an pagsarig ngan pagtahod-ha-kalugaringon, nadadaut an batan-on.” Bangin magresulta ha pagmabdos o sakit nga iginbabalhin han sekso.

17. Paonan-o malilikyan o isasalikway an adulteroso nga mga hilig?

¹⁷ Pinatutubo han iba nga mga tawo an adulteroso nga mga hilig pinaagi ha pagkarawat han mahugaw nga panhunahuna han kalibotan ha sekso sugad han ipinapakita ha mga libro, telebisyon, ngan ha mga pelikula. (Galasia 6:8) Kondi, an mga mananaliksik nasiring, nga an pag-adulteryo kasagaran na nga resulta diri la tikang ha hingyap han sekso kondi tikang ha ginhunahuna nga panginahanglan ha pagpamatuod nga an usa nakakadani pa gihapon o tikang ha hingyap ha pag-abat hin labaw nga hinigugma. (Itanding an Proberbios 7:18.) Anoman an hinungdan, kinahanglan isalikway han Kristiano an imoral nga mga imahinasyon. Tangkod nga hisguti an imo mga pagbati ha imo padis. Kon kinahanglanon, pamilnga an bulig tikang ha mga tigurang han kongregasyon. An pagbuhat hito bangin makapugong ha kahulog ha sala. Dugang pa, kinahanglan magin maikmat an mga Kristiano ha pakig-upod ha mga membro ha diri kapariho nga sekso. Magigin kontra ha Kasuratanhon nga mga prinsipyo an pagin inasaw-an ha usa ka tawo kondi nagtatan-aw nga may kaipa ha iba. (Job 31:1; Mateo 5:28) An mga Kristiano sadang mag-ikmat labi na mahitungod han pagpatubo han pagkaduok ha emosyon ha mga katrabaho. Tipigi an sugad nga mga relasyon nga masinangkayon kondi pormal.

18. Ano an agsub nga gamut han mga problema ha sekso ha pag-asawa, ngan paonan-o masusulbad ini?

¹⁸ An durudaku pa gud nga panalipod amo an mapaso, sinsero nga relasyon ha padis han usa. Damu nga mga mananaliksik an nasiring nga an mga problema ha sekso ha pag-asawa talagsa la nga pisikal kondi kasagaran na nga resulta han kakulang hin komunikasyon. Talagsa la an mga problema hini nga bahin kon an mag-asawa nagkokomunikar hin sinsero ngan naghahatag han igo han pag-asawa sugad nga pagpahayag han gugma imbes nga obligasyon.a Ilarum han sugad husto nga mga kahimtang, an duok nga mga relasyon makakag-alagad ha pagparig-on han bugkos han pag-asawa.—1 Korinto 7:2-5; 10:24.

19. Ano an “hingpit nga bugkos han pagtampo,” ngan ano an epekto hito ha pag-asawa?

¹⁹ Gugma an “hingpit nga bugkos han pagtampo” ha sulud han Kristiano nga kongregasyon. Pinaagi ha pagpatubo han gugma, an diosnon nga mag-asawa nakakahimo ha ‘pagpadayon ha pag-inantusay ha usa kag usa ngan pagpinasayloay ha usa kag usa.’ (Kolosas 3:13, 14) An may prinsipyo nga gugma namimiling han kaopayan han iba. (1 Korinto 13:4-8) Patuboa an sugad nga gugma. Mabulig ito ha iyo nga maparig-on an bugkos han iyo pag-asawa. Buhata an mga prinsipyo ha iyo kinabuhi sugad nga mag-asawa. Kon iyo buhaton ito, an iyo pag-asawa magigin nagpapadayon nga pagtampo ngan magdadara hin pagdayaw ngan dungog kan Jehova nga Dios.

[Mga footnote]

Paonan-o Mo Babatunon?

◻ Kay ano nga sadang magin permanente nga bugkos an pag-asawa?

◻ Ano an panhunahuna han Biblia ha pagkaulo ngan pagpasakop?

◻ Paonan-o mapapauswag han mga mag-asawa an komunikasyon?

◻ Paonan-o masusulbad han mga mag-asawa ha Kristiano nga paagi an diri-pag-uroyon?

◻ Ano an mabulig ha pagparig-on ha bugkos han pag-asawa?

[Retrato ha pahina 12]

Kon an iya asawa kinahanglan magtrabaho ha sekular, diri hiya tutugotan han Kristiano nga bana nga mabug-atan hinduro