An Dios Ba an Siyahan ha Iyo Pamilya?
“Higugmaon mo hi Jehova nga imo Dios ha bug-os mo nga kasingkasing.”—MARKOS 12:29, 30.
1. Mationan-o kaimportante nga aton higugmaon hi Jehova?
“ANO ba nga sugo an siyahan ha ngatanan?” nagpakiana an usa nga eskriba kan Jesus. Imbes nga ihatag an iya kalugaringon nga opinyon, ginbaton ni Jesus an iya pakiana pinaagi ha pagkotar tikang ha Pulong han Dios ha Deuteronomio 6:4, 5 ( NW). Hiya binaton: “An siyahan, ‘Pamati, O Israel, hi Jehova nga aton Dios usa nga Jehova, ngan higugmaon mo hi Jehova nga imo Dios ha bug-os mo nga kasingkasing ngan ha bug-os mo nga kalag ngan ha bug-os mo nga hunahuna ngan ha bug-os mo nga kusog.’”—Markos 12:28-30.
2. (a) Ano nga pagkontra an kinahanglan atubangon ni Jesus? (b) Ano an bangin makahimo nga makuri an pagpalipay kan Jehova?
2 An pagsugot ha tinatawag ni Jesus nga siyahan nga sugo—an pinaka importante—nagkikinahanglan nga pirme naton pagbuhaton an nakakalipay kan Jehova. Ginbuhat ito ni Jesus, bisan kon ha usa nga okasyon nagdumiri hi apostol Pedro ha ginbuhat ni Jesus, ngan ha lain nga okasyon an iya kalugaringon duok nga mga paryente nagdumiri liwat. (Mateo 16:21-23; Markos 3:21; Juan 8:29) Ano daw la kon hiagian mo an imo kalugaringon ha pariho nga kahimtang? Pananglitan karuyag han mga membro han imo pamilya nga humunong ka ha imo pag-aram ha Biblia ngan ha imo pakig-upod ha mga Saksi ni Jehova. Uunahon mo daw an Dios pinaagi ha pagbuhat han nakakalipay ha iya? An Dios ba an siyahan, bisan kon an mga membro han pamilya bangin kumuntra ha imo mga pangalimbasog ha pag-alagad ha iya?
An Lit-ag han Pagkontra han Pamilya
3. (a) Ano an mahimo nga mga resulta han mga katutdoan ni Jesus ha pamilya? (b) Paonan-o maipapakita han mga membro han pamilya kon hin-o an sadang magkaada han ira labi nga gugma?
3 Waray minosa ni Jesus an kakurian nga bangin magin resulta kon an iba ha pamilya nakontra ha membro nga nakarawat han iya mga katutdoan. “An mga kaaway han tawo maaamo an mga tawo nga aada ha iya kalugaringon nga panimalay,” siring ni Jesus. Kondi, bisan pa hiton makasurubo nga resulta, ipinakita ni Jesus kon hin-o an siyahan pinaagi ha pagsiring: “Hiya nga nahigugma hin labi ha iya amay o iroy kay ha akon diri takos ha akon; ngan hiya nga nahigugma hin labi ha iya anak nga lalaki o anak nga babaye kay ha akon diri takos ha akon.” (Mateo 10:34-37) Inuuna naton hi Jehova nga Dios pinaagi ha pagsunod ha mga katutdoan han iya Anak, hi Jesu-Kristo, nga amo “an eksakto nga dagway han kahimtang [han Dios].”—Hebreo 1:3, NW; Juan 14:9.
4. (a) Ano an ginsiring ni Jesus nga nahidabi ha pagin iya sumurunod? (b) Ha ano nga paagi magdudumot an mga Kristiano ha mga membro han pamilya?
4 Ha lain nga okasyon han ginhihisgutan ni Jesus kon ano gud an nahidadabi ha pagin iya totoo nga sumurunod, hiya nagsiring: “Kon an bisan hin-o dumaraon ha akon ngan diri pagdumtan an iya amay ngan iroy ngan asawa ngan mga anak ngan kabugtoan nga kalalakin-an ngan kabugtoan nga kababayin-an, oo, ngan bisan an iya kalugaringon nga kalag, diri hiya mahimo magin disipulo ko.” (Lukas 14:26, NW) Matin-aw nga diri karuyag sidngon ni Jesus nga an iya mga sumurunod literal nga sadang magdumot ha ira mga membro han pamilya, tungod kay iya ginsusugo an mga tawo nga higugmaon bisan an ira mga kaaway. (Mateo 5:44) Lugod, karuyag sidngon dinhi ni Jesus nga an iya mga sumurunod kinahanglan higugmaon nira an mga membro han pamilya nga guruguti kay han ira paghigugma ha Dios. (Itanding an Mateo 6:24.) Ha pagsunod hiton nga pagsabot, an Biblia nasiring nga hi Jakob “nagdumot” kan Lea ngan naghigugma kan Rakel, nga nangahulogan diri hiya nahigugma kan Lea labaw kay ha iya paghigugma ha iya bugto, hi Rakel. (Genesis 29:30-32) Bisan an aton kalugaringon nga “kalag,” o kinabuhi, siring ni Jesus, sadang pagdumtan, o higugmaon hin guruguti, kay ha kan Jehova!
5. Paonan-o tuso nga ginagamit ni Satanas an kahikayan han pamilya?
5 Sugad nga Maglalarang ngan Humaratag-Kinabuhi, takos hi Jehova han bug-os nga debosyon tikang ha ngatanan nga iya mga surogoon. (Pahayag 4:11) “Ilinuluhod ko an akon mga tuhod ha Amay,” nagsurat hi apostol Pablo, “nga amo an naghatag han ngaran han tagsa nga pamilya ha langit ngan ha tuna.” (Efeso 3:14, 15, NW) Ginlarang ni Jehova an kahikayan han pamilya ha urosahon nga paagi nga an mga membro han pamilya mayada kinaiya nga gugma ha usa kag usa. (1 Hadi 3:25, 26; 1 Tesalonika 2:7) Kondi, hi Satanas nga Yawa, tuso nga ginagamit inin kinaiya nga pagbati ha pamilya, nga nag-uupod han hingyap ha pagpalipay ha mga hinigugma. Iya ginpapadaku an pagkontra han pamilya, ngan damu an nakukurian ha pagtindog hin marig-on para ha kamatuoran han Biblia kon naatubang hito.—Pahayag 12:9, 12.
Paglampos ha Ayat
6, 7. (a) Paonan-o mabubuligan an mga membro han pamilya nga apresyaron an bili han pag-aram ha Biblia ngan Kristiano nga pakig-upod? (b) Paonan-o naton maipapakita nga totoo nga nahigugma kita ha aton mga membro han pamilya?
6 Ano an bubuhaton mo kon pinipirit ka ha pagpili butnga han pagpalipay ha Dios o pagpalipay ha membro han pamilya? Mangangatadongan ka ba nga an Dios diri naglalaom ha aton nga mag-aram ha iya Pulong ngan iaplikar an mga prinsipyo hito kon an pagbuhat hito naghihimo hin kasamok ha pamilya? Kondi hunahunaa ito. Kon sumunod ka ngan humunong ha imo pag-aram ha Biblia o pakig-upod ha mga Saksi ni Jehova, paonan-o makakasabot an mga hinigugma nga an husto nga kahibaro ha Biblia amo an kinabuhi-ngan-kamatayon nga butang?—Juan 17:3; 2 Tesalonika 1:6-8.
7 Mahimo naton iilustrar an kahimtang hini nga paagi: Bangin an usa nga membro han pamilya mayada sobra nga hingyap ha alkohol. An pagbalewaray ba o pagtugot han iya problema ha pag-inom mayada totoo nga kapulsanan ha iya? Maoroopay ba an pagtipig han kamurayawan pinaagi ha pagsunod ngan diri magbuhat hin bisan ano mahitungod han iya problema? Diri, bangin mauyon ka nga gimaopayi an pagsari ha pagbulig ha iya nga malamposan an iya problema ha pag-inom, bisan kon nangangahulogan ito hin pag-atubang ha iya kasina ngan mga pagtarhog. (Proberbios 29:25) Sugad man, kon totoo nga nahigugma ka ha imo mga membro han pamilya, diri ka masunod ha ira mga pangalimbasog ha pagpahunong ha imo ha pag-aram ha Biblia. (Buhat 5:29) Pinaagi la ha pagtindog hin marig-on bangin mabuligan mo hiya nga apresyaron nga an pagkinabuhi ha mga katutdoan ni Kristo nangangahulogan han aton kinabuhi mismo.
8. Paonan-o kita nagpapahimulos tikang ha kamatuoran nga hi Jesus matinumanon nga nagbuhat han kaburut-on han Dios?
8 Usahay bangin makuri hinduro nga inuuna an Dios. Kondi hinumdumi, ginhimo liwat ni Satanas nga makuri para kan Jesus an pagbuhat han kaburut-on han Dios. Kondi waray gud humunong hi Jesus; gin-ilob niya bisan an kasakit han pasakitan nga kahoy para ha aton. “Hi Jesu-Kristo [amo an] aton Manluluwas,” siring han Biblia. “Hiya namatay para ha aton.” (Tito 3:6; 1 Tesalonika 5:10) Diri ba kita mapasalamaton nga hi Jesus waray humunong tungod han pagkontra? Tungod kay gin-ilob niya an halad nga kamatayon, mayada kita paglaom han kinabuhi nga waray kataposan ha mamurayawon bag-o nga kalibotan han pagkamatadong pinaagi ha pagbuhat hin pagtoo ha iya iginbubo nga dugo.—Juan 3:16, 36; Pahayag 21:3, 4.
Usa ka Posible Hura nga Balos
9. (a) Paonan-o makakaambit an mga Kristiano ha pagluwas ha iba? (b) Ano an kahimtang han pamilya ni Timoteo?
9 Maaram ka ba nga ikaw liwat mahimo magkaada kaangbitan ha pagluwas ha iba, upod na an hinigugma nga mga paryente? Hi apostol Pablo nagsagda kan Timoteo: “Magpabilin ka hini nga mga butang [nga igintutdo ha imo], kay ha pagbuhat hini maluluwas mo an imo kalugaringon ngan adton namamati ha imo.” (1 Timoteo 4:16, NW) Hi Timoteo nag-ukoy ha nababahin nga panimalay, an iya Griego nga amay diri-matinoohon. (Buhat 16:1; 2 Timoteo 1:5; 3:14) Bisan kon diri kita maaram kon an amay ni Timoteo nagin matinoohon, may posibilidad nga nagin matinoohon hiya tungod han matinumanon nga paggawi han iya asawa, hi Eunice ngan ni Timoteo.
10. Ano an mahihimo han mga Kristiano para ha ira diri-magtinoohon nga mga padis?
10 Iginpapahayag han Kasuratan nga an mga bana ngan mga asawa nga marig-on nga nasunod ha kamatuoran han Biblia mahimo makaamot ha pagluwas ha ira diri-Kristiano nga mga padis pinaagi ha pagbulig ha ira nga magin magtinoohon. Hi apostol Pablo nagsurat: “Kon an bisan hin-o nga bugto nga may asawa nga diri-matinoohon, ngan naruruyag hiya ha pagpuyo upod ha iya, diri niya bayaan hiya; ngan an babaye nga may bana nga diri-matinoohon, ngan naruruyag hiya ha pagpuyo upod ha iya, diri niya bayaan an iya bana. Kay, asawa, paonan-o mo mahibabaroan nga maluluwas mo an imo bana? O, bana, paonan-o mo mahibabaroan nga maluluwas mo an imo asawa?” (1 Korinto 7:12, 13, 16, NW) Iginsaysay ni apostol Pedro kon paonan-o maluluwas han mga asawa, an ira mga bana, nagsasagda: “Magpasakop kamo ha iyo kalugaringon nga mga bana, basi nga, kon an bisan hin-o diri masinugtanon ha pulong, madaog hira nga waray pulong pinaagi han paggawi han ira mga asawa.”—1 Pedro 3:1, NW.
11, 12. (a) Ano nga balos an nakakarawat han yinukot nga mga Kristiano, ngan ano an ira ginbubuhat basi makarawat ito? (b) Isaysay an usa nga eksperiensia han usa nga membro han pamilya nga ginbalusan tungod han matinumanon nga pagpailob.
11 Ha bag-o la naglabay nga mga tuig damu ka yukot an nagin mga Saksi ni Jehova katapos hin mga bulan ngan mga tuig pa ngani han pagkontra ha Kristiano nga buruhaton han ira Saksi nga mga paryente. Daw ano nga balos ini para ha mga Kristiano nga nagpapabilin nga marig-on, ngan daw ano nga bendisyon ha mga parakontra hadto! May emosyon ha iya tingog, usa nga 74-anyos nga Kristiano nga tigurang an nagsaysay: “Agsob nga nagpapasalamat ako ha akon asawa ngan mga anak tungod ha pagpabilin ha kamatuoran durante han mga tuig nga nakontra ako ha ira.” Siring niya nga ha sulod hin tulo ka tuig matig-a nga nagdumiri hiya bisan pagtugot ha iya asawa nga mag-istorya ha iya mahitungod han Biblia. “Kondi nagpili hiya hin panahon nga mamamati gud ako,” siring niya, “ngan nagtikang magtestigo ha akon samtang minamasahe an akon mga tiil. Mapasalamaton gud ako nga waray hiya humunong ha akon pagkontra!”
12 Usa pa nga bana nga nakontra ha iya pamilya an nagsurat: ‘Ako an girarauti nga kaaway han akon asawa tungod kay katapos nga kinarawat niya an kamatuoran, gintarhog ko hiya, ngan nag-aaway kami kada adlaw; nga ako pirme an nagtitikang han away. Kondi napakyas ini ngatanan; an akon asawa nagpabilin ha Biblia. Dose ka tuig an naglabay ha akon mapintas nga pakig-away kontra han kamatuoran ngan kontra ha akon asawa ngan anak. Para ha ira, baga in ako an Yawa.’ Ha kataposan nagtikang an lalaki paghunahuna han iya paggawi. ‘Hinsabtan ko nga nakakaaringit gud ako,’ siring niya. ‘Ginbasa ko an Biblia, ngan salamat ha instruksion hito, bawtisado nga Saksi na ako yana.’ Hunahunaa an daku nga balos ha asawa, oo, nakabulig nga ‘maluwas an iya bana’ pinaagi han matinumanon nga pag-ilob han iya pagkontra ha 12 ka tuig!
Paghibaro Tikang kan Jesus
13. (a) Ano an importante nga leksion nga sadang hibaroan han mga bana ngan mga asawa tikang ha kinabuhi ni Jesus? (b) Paonan-o magpapahimulos tikang ha susbaranan ni Jesus an mga tawo nga nakukurian ha pagpasakop ha kaburut-on han Dios?
13 An siyahan nga leksion nga sadang hibaroan han mga bana ngan mga asawa tikang ha kinabuhi ni Jesus amo an pagkamasinugtanon ha Dios. “Ginbubuhat ko pirme an nakakalipay ha iya,” siring ni Jesus. “Ginbibiling ko, diri an akon kalugaringon nga kaburut-on, kondi an kaburut-on niya nga nagsugo ha akon.” (Juan 5:30, NW; 8:29, NW) Bisan han hin-agian ni Jesus an usa nga bahin han kaburut-on han Dios nga diri-makaruruyag, nagmasinugtanon hiya. “Kon karuyag mo, kuhaa ini nga irinman tikang ha akon,” nag-ampo hiya. Kondi hiya nagdugang dayon: “Kondi, matuman unta, diri an akon kaburut-on, kondi an imo.” (Lukas 22:42, NW) Hi Jesus waray maghangyo ha Dios nga bag-ohon an Iya kaburut-on; ipinakita niya nga totoo nga nahigugma hiya ha Dios pinaagi han masinugtanon nga pagpasakop anoman an kaburut-on han Dios para ha iya. (1 Juan 5:3) Inuuna pirme an kaburut-on han Dios, sugad han ginbuhat ni Jesus, importante ito ha kalamposan diri la ha solo nga kinabuhi kondi liwat ha kinabuhi han inasaw-an ngan han pamilya. Tagda kon kay ano nga sugad hini.
14. Paonan-o nangangatadongan hin sayop an iba nga mga Kristiano?
14 Sugad han iginsaysay kanina, kon inuuna han magtinoohon an Dios, nangangalimbasog hira ha pagpabilin upod han ira diri-magtinoohon nga mga padis ngan agsob nga nabubuligan hira nga magin kalipikado para han kaluwasan. Bisan kon an magpadis pariho magtinoohon, an ira pag-asawa bangin diri susbaranan. Tungod han makasasala nga mga hilig, an mga bana ngan mga asawa diri pirme mayada mahigugmaon nga mga hunahuna ha usa kag usa. (Roma 7:19, 20; 1 Korinto 7:28) An iba nagbibiling pa ngani hin lain nga padis, bisan kon waray hira Kasuratanhon nga mga hinungdan para han diborsiyo. (Mateo 19:9; Hebreo 13:4) Nangangatadongan hira nga para ha ira ini an gimaopayi, nga makuri hinduro an kaburut-on han Dios para ha mga bana ngan mga asawa nga magpabilin nga tampo. (Malakias 2:16; Mateo 19:5, 6) Sigurado nga ini an usa pa nga kaso han paghunahuna han tawhanon nga mga hunahuna imbes nga mga hunahuna han Dios.
15. Kay ano nga usa nga panalipod an pag-una han Dios?
15 Usa gud nga panalipod kon inuuna an Dios! An mga mag-asawa nga nagbubuhat hito mangangalimbasog nga magpabilin nga tampo ngan sulbaron an ira mga problema pinaagi ha pag-aplikar han sagdon han Pulong han Dios. Salit nalilikyan nira an ngatanan nga klase han mga kasub-anan nga resulta kon ginbabalewaray an iya kaburut-on. (Salmo 19:7-11) Ipinakita ito han usa ka batan-on nga mag-asawa nga, han hirani na magdiborsiyo, nagdesisyon nga sundon an sagdon han Biblia. Mga tuig an naglabay han ipinakita han asawa an iya kalipay ha iya pag-asawa, hiya nagsiring: “Liningkod ako ngan nagtangis han ginhuhunahuna ko an posibilidad nga bangin mag-ukoy ako nga bulag ha akon bana ha ngatanan hini nga mga tuig. Ngan nag-ampo ako kan Jehova nga Dios ngan nagpasalamat ha iya tungod han iya sagdon ngan giya nga nagtampo ha amon ha sugad malipayon nga relasyon.”
Mga Bana, mga Asawa—Subara hi Kristo!
16. Ano nga susbaranan an ipinakita ni Jesus para ha mga bana ngan mga asawa?
16 Hi Jesus, nga pirme inuuna an Dios, nagpakita hin urosahon nga susbaranan para ha mga bana ngan mga asawa, ngan kinahanglan maghatag hira hin atension ngada hito. An mga bana ginsasagda nga subaron an paagi han pagpakita ni Jesus han mahigugmaon nga pagkaulo ha mga membro han Kristiano nga kongregasyon. (Efeso 5:23) Ngan an Kristiano nga mga asawa mahibabaro tikang ha maopay nga susbaranan ni Jesus han pagpasakop ha Dios.—1 Korinto 11:3.
17, 18. Ha ano nga mga paagi ipinakita ni Jesus an maopay nga susbaranan para ha mga bana?
17 An Biblia nagsusugo: “Mga bana, padayon nga higugmaon niyo an iyo mga asawa, sugad han Kristo nga naghigugma liwat ha kongregasyon ngan igintubyan an iya kalugaringon tungod hito.” (Efeso 5:25, NW) An importante nga paagi nga ipinakita ni Jesus an iya gugma para ha iya kongregasyon han mga sumurunod amo an pinaagi han ira pagin duok nga mga sangkay. “Tinatawag ko kamo nga sangkay,” siring ni Jesus, “kay an ngatanan nga mga butang nga akon hinbatian tikang ha akon Amay akon iginsumat na ha iyo.” (Juan 15:15, NW) Hunahunaa an ngatanan nga panahon nga ginasto ni Jesus ha pakiistorya ha iya mga disipulo—an iya damu, damu nga mga paghisgot upod nira—ngan an pagsarig niya ha ira! Diri ba ekselente ito nga susbaranan para ha mga bana?
18 Hi Jesus nagpakita hin totoo nga interes ha iya mga disipulo ngan mayada totoo nga gugma ha ira. (Juan 13:1) Kon an iya mga katutdoan diri-matin-aw ha ira, mapailubon nga nagasto hiya hin panahon ha pribado ha pagpatin-aw han mga butang. (Mateo 13:36-43) Mga bana, importante ba liwat ha iyo an espirituwal nga kaopayan han iyo asawa? Nagasto ba ka hin panahon upod ha iya, sinisiguro nga matin-aw ha iyo hunahuna ngan kasingkasing an mga kamatuoran han Biblia? Inupdan ni Jesus an iya mga apostol ha ministeryo, bangin ginbabansay an kada usa ha ira. Inuupdan ba niyo an iyo asawa ha ministeryo, nga nakikiambit ha balay-balay nga mga pagbisita ngan ha pagdumara hin mga pag-aram ha Biblia?
19. Paonan-o an paagi han pag-ilob ni Jesus ha paulit-ulit nga mga kaluyahan han iya apostol nagpapakita hin susbaranan para ha mga bana?
19 Labi na ha pag-ilob ha pagkadiri-hingpit han iya mga apostol nga ipinakita ni Jesus an maopay nga susbaranan para ha mga bana. Durante han iya ultimo nga panihapon upod han iya mga apostol, inabat niya nga nahitatabo utro an espiritu han pagpalabawlabaw. Mapintas ba nga ginpakaraot niya hira? Waray, kondi mapainubsanon nga ginhugasan niya an mga tiil han kada usa. (Markos 9:33-37; 10:35-45; Juan 13:2-17) Ipinapakita mo ba an sugad nga pagpailob ha imo asawa? Imbes nga magreklamo mahitungod han paulit-ulit nga kaluyahan, mapailubon ba nga nangangalimbasog ka ha pagbulig ha iya ngan mabantad an iya kasingkasing han imo susbaranan? An mga asawa sigurado nga mabaton ha sugad mahigugmaon nga pagpaid, sugad han ginbuhat han mga apostol ha kataposan.
20. Ano an diri gud sadang hingalimtan han Kristiano nga mga asawa, ngan hin-o an susbaranan para ha ira?
20 Kinahanglan hunahunaon liwat han mga asawa hi Jesus, nga waray gud malimot nga “an ulo han Kristo amo an Dios.” Pirme hiya nga nagpapasakop ha iya langitnon nga Amay. Sugad man, diri sadang hingalimtan han mga asawa nga “an ulo han babaye amo an lalaki,” oo, nga an ira bana amo an ira ulo. (1 Korinto 11:3; Efeso 5:23) Ginsagda ni apostol Pedro an Kristiano nga mga asawa nga hunahunaon an susbaranan han “baraan nga kababayin-an” han siyahan nga mga panahon, labi na hi Sara, nga “nagsugot kan Abraham, tinatawag hiya nga ‘ginoo.’”—1 Pedro 3:5, 6.
21. Kay ano nga malampuson an pag-asawa ni Abraham ngan Sara kondi kapakyasan an kan Lot ngan ha iya asawa?
21 Matin-aw nga igintubyan ni Sara an mahimyang nga panimalay ha mainuswagon nga siyudad basi mag-ukoy ha mga tolda ha iba nga tuna. Kay ano? Tungod ba kay ginpili niya iton nga estilo-han-kinabuhi? Diri gud. Tungod ba kay ginhangyo hiya han iya bana nga umupod? Sigurado nga usa ka butang ini, tungod kay hi Sara nahigugma ngan natahod kan Abraham tungod han iya diosnon nga mga kalidad. (Genesis 18:12) Kondi an siyahan nga hinungdan nga inupod hiya ha iya bana amo an iya gugma kan Jehova ngan han iya kinasingkasing nga hingyap ha pagsunod ha pagtugway han Dios. (Genesis 12:1) Nalipay hiya ha pagsugot ha Dios. An asawa ni Lot, ha luyo nga bahin, nag-alang-alang ha pagbuhat han kaburut-on han Dios ngan salit liningi nga naghihingyap han mga butang nga iya binayaan ha iya bungto ha Sodoma. (Genesis 19:15, 25, 26; Lukas 17:32) Kamakasurubo nga kataposan hiton nga pag-asawa—an ngatanan tungod han iya pagtalapas ha Dios!
22. (a) Ano nga pag-usisa-ha-kalugaringon an maaramon nga sadang himoon han mga membro han pamilya? (b) Ano an aton paghihisgutan ha aton masunod nga artikulo?
22 Salit sugad nga bana ngan asawa, importante nga pakianhan niyo an iyo kalugaringon, ‘An Dios ba an siyahan ha amon pamilya? Totoo ba nga nangangalimbasog gud ako ha pagtuman han bahin han pamilya nga iginhatag ha akon han Dios? Naghihimo ba ako hin totoo nga pangalimbasog ha paghigugma ha akon padis ngan pagbulig hiton nga usa nga magkaada o magpabilin ha maopay nga relasyon kan Jehova?’ Ha kadam-an nga mga pamilya mayada liwat mga anak. Sunod nga paghihisgutan naton an bahin han mga ginikanan ngan an panginahanglan para ha ira ngan ha ira mga anak nga unahon an Dios.
Nahinunumduman Mo Ba?
◻ Ano an mahimo magin mga resulta han mga katutdoan ni Jesus ha damu nga mga pamilya?
◻ Ano nga balos an nakakarawat han yinukot marig-on nga mga Kristiano?
◻ Ano an mabulig ha mga padis nga malikyan an imoralidad ngan diborsiyo?
◻ Ano an mahimo mahibaroan han mga bana tikang ha susbaranan ni Jesus?
◻ Paonan-o makakaamot an mga asawa ha malipayon nga pag-asawa?
[Retrato ha pahina 10]
Paonan-o nakaamot hi Sara ha kalamposan han iya pag-asawa?