Maaramon nga Giya Para ha mga Mag-asawa
“Mga asawa nga kababayin-an, magpasakop kamo ha iyo mga asawa, sugad nga ha Ginoo. Mga asawa nga kalalakin-an, higugmaa niyo an iyo mga asawa nga kababayin-an.”—Efeso 5:22, 25.
1. Ano an husto nga pagtagad ha pag-asawa?
HI Jesus nagsiring nga an pag-asawa amo an kahikayan diin gintitig-ob han Dios an usa nga lalaki ngan usa nga babaye basi magin “usa nga unod.” (Mateo 19:5, 6) Pagkaupod ito han duha nga tawo nga magkaiba an mga personalidad nga nahibabaro ha pagkultibar hin mga magkapariho nga interes ngan magkaupod nga nagbubuhat basi madangat an magkapariho nga mga tumong. An pag-asawa amo an bug-os-kinabuhi nga pagtampo, diri temporaryo la nga ginkasabotan nga masayon la bayaan. Ha damu nga mga nasud, masayon la an pagdiborsyo, kondi para ha usa nga Kristiano, sagrado an relasyon ha pag-asawa. Natatapos la ito tungod ha seryoso hinduro nga hinungdan.—Mateo 19:9.
2. (a) Ano nga bulig an magagamit han mga mag-asawa? (b) Kay ano nga importante nga mangalimbasog basi maglampos an pag-asawa?
2 Usa nga magsaragdon ha pag-asawa an nagsiring: “An malampuson nga pag-asawa usa nga proseso han padayon nga pagbag-o samtang nagkakaada ito bag-o nga mga isyu, nagdudumara han mga problema nga naabot, ngan nagpapahimulos han mga bulig nga magagamit ha tagsa nga kahimtang han kinabuhi.” Para ha Kristiano nga mga mag-asawa, ito nga mga bulig nag-uupod han maaramon nga sagdon tikang ha Biblia, suporta tikang ha mga igkasi-Kristiano, ngan han duok nga relasyon kan Jehova pinaagi han pag-ampo. An malampuson nga pag-asawa nagpapadayon bisan pa han mga kakurian, ngan ha paglabay han mga katuigan, naghahatag ito hin kalipayan ngan kakontento ha mag-asawa. Labaw ha ngatanan, nagpapasidungog ito kan Jehova nga Dios, an Nagpatikang han pag-asawa.—Genesis 2:18, 21-24; 1 Korinto 10:31; Efeso 3:15; 1 Tesalonika 5:17.
Subara hi Jesus Ngan an Iya Kongregasyon
3. (a) Isumaryo an sagdon ni Pablo ha mga mag-asawa. (b) Ano nga maopay nga susbaranan an ipinakita ni Jesus?
3 Duha ka yukot ka tuig na an naglabay, hi apostol Pablo naghatag hin maaramon nga sagdon ha Kristiano nga mga mag-asawa han hiya nagsurat: “Sugad nga iton singbahan sakop ni Kristo, sugad man an mga asawa nga babaye magpasakop ha ngatanan nga mga bagay ha ira asawa nga lalaki. Mga asawa nga kalalakin-an, higugmaa niyo an iyo mga asawa nga kababayin-an, sugad man nga hi Kristo naghigugma ha singbahan ngan igintubyan niya an iya kalugaringon tungod hito.” (Efeso 5:24, 25) Pagkamaopay nga pagtanding an iginpahayag dinhi! An Kristiano nga mga asawa nga mapainubsanon nga nagpapasakop pirme ha ira mga bana nagsusubad ha kongregasyon ha pagkilala ngan pagsunod ha prinsipyo han pagkaulo. An tumuroo nga mga bana nga padayon nga nahigugma ha ira mga asawa, ha maopay man o ha makuri nga mga panahon, nagpapakita nga ginsusunod gud nira an susbaranan ni Kristo han paghigugma ha kongregasyon ngan pagmangno hito.
4. Paonan-o masusubad han mga bana an susbaranan ni Jesus?
4 An Kristiano nga mga bana amo an mga ulo han ira mga pamilya, kondi may-ada liwat hira ulo, hi Jesus. (1 Korinto 11:3) Salit, sugad la nga hi Jesus nagmangno ha iya kongregasyon, sugad man an mga bana mahigugmaon nga nagmamangno ha ira mga pamilya ha espirituwal ngan ha pisikal nga paagi, bisan kon nagkikinahanglan ito hin pagsakripisyo ha kalugaringon. Inuuna nira an kaopayan han ira mga pamilya kay ha ira kalugaringon nga mga hingyap ngan mga karuyag. Hi Jesus nagsiring: “Busa, an ngatanan nga mga butang, nga buot niyo ipapagbuhat han mga tawo ha iyo, buhata man niyo ha ira.” (Mateo 7:12) Ito nga prinsipyo naaplikar labi na ha pag-asawa. Ipinakita ini ni Pablo han hiya nagsiring: “An mga asawa nga kalalakin-an kinahanglan man nga mahigugma ha ira mga asawa nga babaye sugad ha ira mga kalugaringon nga lawas. . . . Bisan san-o waray tawo nga nangalas ha iya kalugaringon nga unod; kondi nga gin-aataman ngan ginmamangnoan niya ito.” (Efeso 5:28, 29) Sadang atamanon ngan mangnoan han bana an iya asawa sugad han iya pag-ataman ngan pagmangno ha iya kalugaringon.
5. Paonan-o masusubad han mga asawa an Kristiano nga kongregasyon?
5 An mga asawa nga nagsisingba ha Dios nagsusubad ha Kristiano nga kongregasyon sugad nga modelo. Han hi Jesus nakanhi ha tuna, malipayon nga binayaan han iya mga sumurunod an ira naglabay nga mga pangabuhi ngan nagsunod ha iya. Han namatay hiya, nagpadayon hira ha pagpasakop ha iya, ngan ha naglabay nga haros 2,000 ka tuig, an totoo nga Kristiano nga kongregasyon padayon nga nagpapasakop kan Jesus ngan nasunod ha iya pagkalider ha ngatanan nga mga butang. An Kristiano nga mga asawa liwat diri nagtatamay ha ira mga bana o diri ginmiminos an Kasuratanhon nga kahikayan han pagkaulo ha pag-asawa. Lugod, nabulig ngan nagpapasakop hira ha ira mga bana, nakooperar ha ira, ngan hito nga paagi nagdadasig ha ira. Kon an bana ngan asawa pariho nagios ha mahigugmaon nga paagi, maglalampos gud an ira pag-asawa ngan hira nga duha magmamalipayon ha ira relasyon.
Padayon nga Mag-ukoy Kamo Kaupod Nira
6. Ano an iginsagdon ni Pedro ha mga bana, ngan kay ano nga importante ito?
6 Hi apostol Pedro nagsagdon liwat ha mga mag-asawa, ngan mapwersa gud an iya mga pulong labi na ha mga bana. Hiya nagsiring: “Mag-ukoy kamo upod ha iyo mga asawa sugad ha kinaadman, nga naghahatag kamo hin dungog ha babaye, sugad hin ngadto ha maluroluya nga surudlan, ngan sugad nga iyo mga igkasi-manurunod han grasya han kinabuhi; ha tinutuyo nga an iyo mga pag-ampo mawaray kaulangan.” (1 Pedro 3:7) An pagkaseryoso han sagdon ni Pedro iginsasaysay ha kataposan nga mga pulong hito nga bersikulo. Kon mapakyas an bana ha pagpasidungog ha iya asawa, maaapektohan an iya relasyon kan Jehova. An iya mga pag-ampo mauulang.
7. Paonan-o sadang pasidunggan han bana an iya asawa?
7 Paonan-o man mapapasidunggan han mga bana an ira mga asawa? An pagpasidungog ha asawa han usa nangangahulogan hin pagtagad ha iya ha mahigugmaon nga paagi, nga may pagtahod ngan dignidad. Para ha damu nga tawo, an sugad kaopay nga pagtagad ha asawa baga in urusahon. Usa nga Griego nga eskolar an nagsurat: “Sumala ha balaud han Roma, waray mga katungod an babaye. Ha balaud, an iya legal nga mga katungod sugad la han kanan bata. . . . Bug-os nga sakop hiya han iya bana, ngan bug-os nga kontrolado niya.” Kabaliktaran gud ini han Kristiano nga mga katutdoan! An Kristiano nga bana nagpapasidungog ha iya asawa. An iya pakig-upod ha iya ginigiyahan han Kristiano nga mga prinsipyo, diri han kalugaringon nga kapritso. Dugang pa, makonsiderasyon hiya ha iya asawa ‘sumala ha kinaadman,’ gintatagad hiya sugad nga maluroluya nga surudlan.
“Maluroluya nga Surudlan” ha Ano nga Paagi?
8, 9. Ha ano nga mga paagi nga an kababayin-an katupong han kalalakin-an?
8 Ha pagsiring nga an babaye usa nga “maluroluya nga surudlan,” diri iginpapasabot ni Pedro nga an kababayin-an maluruloya kay ha kalalakin-an ha talento o ha espirituwal. Oo, damu nga Kristiano nga kalalakin-an an may-ada mga pribilehiyo ha kongregasyon nga diri makakarawat han kababayin-an, ngan dida ha pamilya an kababayin-an sakop han ira mga bana. (1 Korinto 14:35; 1 Timoteo 2:12) Kondi, an pariho nga pagtoo, pagpailob, ngan hitaas nga mga suruklan ha moral ginkikinahanglan ha ngatanan, kalalakin-an ngan kababayin-an. Ngan sugad han ginsiring ni Pedro, an bana ngan an asawa pariho ‘mga manurunod han grasya han kinabuhi.’ Kon mahitungod han kaluwasan, may-ada hira pariho nga kahimtang ha atubangan ni Jehova nga Dios. (Galasia 3:28) Hi Pedro nagsurat ha dinihogan nga mga Kristiano ha siyahan nga siglo. Pinaagi hito, an iya mga pulong nagpahinumdom ha Kristiano nga mga bana nga sugad nga “mga manurunod upod ni Kristo,” hira ngan an ira mga asawa may-ada pariho nga langitnon nga paglaom. (Roma 8:17) Pag-abot han panahon, pariho hira mag-aalagad sugad nga mga saserdote ngan mga hadi ha langitnon nga Ginhadian han Dios!—Pahayag 5:10.
9 An dinihogan nga Kristiano nga kababayin-an diri gud ubos ha ira dinihogan nga Kristiano nga mga bana. Ngan sumala ha prinsipyo, sugad liwat hito adton tunan-on an paglaom. An kalalakin-an ngan kababayin-an han “daku nga panon” nagbubunak han ira mga panapton ngan ginpapabusag ito ha dugo han Kordero. An kalalakin-an ngan kababayin-an nakikigbahin ha “adlaw ngan gab-i” ha bug-os-kalibotan nga pagsinggit hin pagdayaw ngadto kan Jehova. (Pahayag 7:9, 10, 14, 15, NW) An kalalakin-an ngan kababayin-an pariho naglalaom ha pagpahimulos han ‘mahimayaon nga kaluwasan han mga anak han Dios,’ kon makarawat na nira “an kinabuhi nga totoo.” (Roma 8:21; 1 Timoteo 6:19) Dinihogan man o kaupod han iba nga mga karnero, an ngatanan nga mga Kristiano magkaupod nga nag-aalagad kan Jehova sugad nga ‘usa nga panon’ ilarom han ‘uusa la nga paramangno.’ (Juan 10:16) Makakombinse gud ito nga rason para han Kristiano nga bana ngan asawa nga magpasidungog ha usa kag usa!
10. Ha ano nga paagi ‘maluroluya nga mga surudlan’ an kababayin-an?
10 Ha ano nga paagi masisiring nga ‘maluroluya nga mga surudlan’ an kababayin-an? Bangin gin-uunabi ni Pedro an kamatuoran nga, ha kabug-osan, an kababayin-an mas gutiay ngan mas maluya ha pisikal nga kusog kay ha kalalakin-an. Dugang pa, ha aton diri-hingpit nga kahimtang, an urusahon nga pribilehiyo han pagpanganak nakakaapekto gud ha pisikal nga kahimsog han kababayin-an. An kababayin-an nga mahimo manganak pa bangin mag-antos hin regular nga kakurian ha pisikal. Nagkikinahanglan gud hira hin espesyal nga pagmangno ngan konsiderasyon kon nakakaeksperyensya han sugad nga mga kakurian o nag-iilob han kasakit han pagburod ngan panganak. An bana nga nagpapasidungog ha iya asawa, nga maaram han emosyonal nga suporta nga ginkikinahanglan niya, makakabulig gud ha kalamposan han pag-asawa.
Ha Panimalay nga Magkaiba an Relihiyon
11. Ha ano nga paagi mahimo maglampos an pag-asawa bisan kon magkaiba an relihiyon han mag-asawa?
11 Kondi, ano man kon magkaiba an relihiyon han mag-asawa tungod kay an usa ha ira nagkarawat han Kristiano nga kamatuoran mga pipira ka panahon katapos han ira kasal ngan an usa nga padis waray kumarawat? Mahimo ba maglampos an sugad nga pag-asawa? An eksperyensya han damu nasiring nga oo. An bana ngan asawa nga magkaiba an relihiyon mahimo pa gihapon magkaada malampuson nga pag-asawa ha paagi nga mahimo ito magpadayon ngan maghatag hin kalipayan ha ira nga duha. Gawas pa, an ira pag-asawa matadong pa gihapon ha mga mata ni Jehova; “usa nga unod” pa gihapon hira. Salit, an Kristiano nga mga bana o mga asawa ginsasagdonan nga magpabilin upod han diri-tumuroo nga padis kon tumugot ito nga padis. Kon may-ada mga anak, magpapahimulos hira ha pagkamaunungon han Kristiano nga ginikanan.—1 Korinto 7:12-14.
12, 13. Ha pagsunod ha sagdon ni Pedro, paonan-o makakabulig an Kristiano nga mga asawa ha diri-tumuroo nga mga bana?
12 Hi Pedro mahigugmaon nga nagsagdon ha Kristiano nga kababayin-an nga nag-uukoy ha mga panimalay nga magkaiba an relihiyon. An prinsipyo han iya mga pulong mahimo liwat iaplikar han Kristiano nga mga bana ha pariho nga sitwasyon. Hi Pedro nagsurat: “Mga kaasaw-an nga kababayin-an, magpasakop kamo ha iyo mga kaasaw-an nga kalalakin-an; nga, basi, kon may-ada iba nga diri masinugtanon ha pulong, pagdad-on unta hira ha waray pulong, pinaagi han mga batasan han ira mga kaasaw-an; nga hikit-an nira an iyo mauray nga gawi nga may kahadlok.”—1 Pedro 3:1, 2.
13 Kon an asawa mataktika nga makakagsaysay han iya pagtoo ha iya bana, maopay ito. Kondi, ano man kon diri naruruyag mamati an bana? Ito an iya karuyag. Kondi, diri kay waray na ito paglaom, tungod kay an Kristiano nga paggawi naghahatag liwat hin epektibo nga pamatuod. Damu nga mga bana nga ha siyahan diri interesado o nakontra pa ngani ha pagtoo han ira mga asawa an nagin “mga tinunguran han kinabuhi nga waray kataposan” katapos makita an maopay nga paggawi han ira mga asawa. (Buhat 13:48) Bisan kon an bana diri nakarawat han Kristiano nga kamatuoran, bangin maruyagan pa gihapon niya an paggawi han iya asawa, tungod hito mapaparig-on an bugkos han pag-asawa. Usa nga bana nga an asawa usa han mga Saksi ni Jehova an nagsiring nga diri gud niya masusunod an ira hitaas nga mga suruklan. Kondi, gintawag niya an iya kalugaringon nga “an malipayon nga bana han makaruruyag nga asawa” ngan sinsero nga gindayaw niya an iya asawa ngan an iya mga igkasi-Saksi ha iya surat ha usa nga pahayagan.
14. Paonan-o makakabulig an mga bana ha diri-tumuroo nga mga asawa?
14 An Kristiano nga mga bana nga nag-aaplikar han mga prinsipyo han mga pulong ni Pedro nakadasig liwat ha ira mga asawa pinaagi han ira paggawi. Nakikita han diri-tumuroo nga mga asawa an ira mga bana nga nagbubuhat han ira responsabilidad, diri nagkakarag han kwarta tungod ha pagsigarilyo, pag-inom, ngan paghuygo ngan diri na nagamit hin nakakasakit nga mga pulong. An iba hito nga mga asawa nakakilala hin iba pa nga mga membro han Kristiano nga kongregasyon. Nadasig hira han mahigugmaon nga Kristiano nga pagminagburugto, ngan an naobserbahan nira ha kabugtoan nakabulig ha ira nga magin duok kan Jehova.—Juan 13:34, 35.
“An Tinago nga Tawo ha Kasingkasing”
15, 16. Ano nga klase hin paggawi han Kristiano nga asawa an bangin makadasig ha diri-tumuroo nga bana?
15 Ano nga klase hin paggawi an bangin makadasig ha usa nga bana? Ha pagkamatuod, amo ito an paggawi nga ginpapatubo han Kristiano nga kababayin-an. Hi Pedro nasiring: “Iton iyo pagrayandayan diri magin ha gowa ha pagsalapid han buhok, ngan paggamit hin mga alahas nga bulawan, o pagsul-ot hin panapton. Kondi maasya unta an tinago nga tawo ha kasingkasing, ha panapton nga waray pagkadunot han maaghop ngan mabuot nga espiritu, nga amo an mahal gud ha atubangan han Dios. Kay amo man ini nga paagi hadton una nga panahon nga an mga baraan nga kababayin-an, nga nagsarig ha Dios, rinayandayanan ha ira ngahaw, nga nagpasakop ha ira mga kaasaw-an; sugad nga hi Sara nagsugot kan Abraham, nga nagtawag ha iya nga ginoo; ngan niyan mga anak kamo niya kon kamo magbuhat hin maopay, ngan diri kamo mahadlok hin bisan ano nga kahadlokan.”—1 Pedro 3:3-6.
16 Hi Pedro nagsasagdon ha Kristiano nga babaye nga diri sumarig ha pan-gawas nga hitsura. Lugod, sadang niya ipakita ha iya bana an epekto han mga katutdoan han Biblia ha iya totoo nga pagkatawo pinaagi han iya paggawi. Makikita han bana nga inaaplikar han iya asawa an iya bag-o nga personalidad. Bangin makikita niya an kaibahan hito ha daan nga personalidad hadto han iya asawa. (Efeso 4:22-24) Sigurado nga maoobserbahan niya nga an “maaghop ngan mabuot nga espiritu” han iya asawa nakakarepresko ngan nakakadani. Ito nga espiritu diri la kay makaruruyag ha bana kondi ito an “mahal gud ha atubangan han Dios.”—Kolosas 3:12.
17. Kay ano nga maopay nga susbaranan hi Sara para ha Kristiano nga mga asawa?
17 Gin-unabi hi Sara sugad nga modelo, ngan takos hiya nga susbaranan para ha Kristiano nga mga asawa, tumuroo man o diri an ira mga bana. Sigurado nga gintagad ni Sara hi Abraham sugad nga iya ulo. Bisan ha iya kasingkasing, iya tinawag hiya nga iya “ginoo.” (Genesis 18:12, NW) Kondi, waray ito makaiban han iya dignidad. Marig-on ha espirituwal hiya nga babaye tungod han iya marig-on nga pagtoo kan Jehova. Oo, bahin hiya han “daku nga dampog han mga testigo” nga an susbaranan han pagtoo sadang magpagios ha aton nga ‘dalaganon ha mapailubon an rumba nga ibinutang ha aton atubangan.’ (Hebreo 11:11; 12:1) An pagin pariho kan Sara diri nakakaminos ha Kristiano nga asawa.
18. Ano nga mga prinsipyo an sadang iaplikar ha panimalay nga magkaiba an relihiyon?
18 Ha panimalay nga magkaiba an relihiyon han mag-asawa, an bana pa gihapon an ulo. Kon an bana an tumuroo, magigin makonsiderasyon hiya ha mga tinotoohan han iya asawa kondi diri iginkukompromiso an iya pagtoo. Kon an asawa an tumuroo, diri liwat niya ikukompromiso an iya pagtoo. (Buhat 5:29) Kondi, diri hiya makontra ha pagkaulo han iya bana. Pasisidunggan han asawa an katungdanan han iya bana ngan magpapabilin hiya nga nagpapasakop ‘ha Kasugoanan han iya asawa.’—Roma 7:2.
An Maaramon nga Giya han Biblia
19. Ano an pipira nga mga pag-ipit nga nakakadaot ha mga bugkos han pag-asawa, kondi paonan-o maaatohan an sugad nga mga pag-ipit?
19 Yana, damu nga mga butang an nakakadaot ha bugkos han pag-asawa. An iba nga kalalakin-an diri nagbubuhat han ira mga responsabilidad. An iba nga kababayin-an magdudumiri ha pagkaulo han ira mga bana. Ha pipira nga mga pag-asawa, inaabuso han usa an iya padis. Para ha mga Kristiano, an mga problema ha panginabuhi, pagkadiri-hingpit han tawo, ngan an espiritu han kalibotan upod na an imoralidad hito ngan baliko nga pagsabot ha mga prinsipyo mahimo magsari han pagkamaunungon. Ha gihapon, an Kristiano nga kalalakin-an ngan kababayin-an nga nasunod ha mga prinsipyo han Biblia, anoman an ira sitwasyon, nakarawat han bendisyon ni Jehova. Bisan kon usa la han mag-asawa an nag-aaplikar han mga prinsipyo han Biblia, mas maopay an kahimtang kay ha kon waray nag-aaplikar hito. Dugang pa, hi Jehova nahigugma ngan nabulig ha iya mga surugoon nga nagpapabilin nga maunungon ha ira iginsaad ha pag-asawa bisan ha makuri nga mga sitwasyon. Diri niya hinngangalimtan an ira pagkamaunungon.—Salmo 18:25; Hebreo 6:10; 1 Pedro 3:12.
20. Ano an iginsagdon ni Pedro ha ngatanan nga mga Kristiano?
20 Katapos sagdonan an inasaw-an nga kalalakin-an ngan kababayin-an, gintapos ito ni apostol Pedro pinaagi han mahigugmaon nga mga pulong ha pagdasig. Hiya nagsiring: “Ha kataposan, magkaurosa kamo ngatanan ha hunahuna, mga malolooyon, mga mahigugmaon sugad ha magburugto, mga mapuanguron, mga mapainubsanon; diri niyo pagbalosan an maraot hin maraot, o an pasipara hin pasipara; kondi lugod an pagbendisyon; kay tungod hini mga gintawag kamo, basi kamo makapanunod hin bendisyon.” (1 Pedro 3:8, 9) Maaramon gud ito nga sagdon para ha ngatanan, labi na ha mga mag-asawa!
Nahinunumdoman Mo Ba?
• Paonan-o ginsusubad han Kristiano nga mga bana hi Jesus?
• Paonan-o ginsusubad han Kristiano nga mga asawa an kongregasyon?
• Ha ano nga paagi mapapasidunggan han mga bana an ira mga asawa?
• Ano an pinakamaopay nga sadang buhaton han Kristiano nga asawa nga diri-tumuroo an bana?
[Retrato ha pahina 16]
An Kristiano nga bana nahigugma ngan nagmamangno ha iya asawa
An Kristiano nga asawa natahod ngan nagpapasidungog ha iya bana
[Retrato ha pahina 17]
Diri sugad ha balaud han Roma, an Kristiano nga mga katutdoan nagsusugo ha bana nga pasidunggan an iya asawa
[Retrato ha pahina 18]
An kalalakin-an ngan kababayin-an han “daku nga panon” pariho naglalaom han kinabuhi nga waray kataposan ha Paraiso
[Retrato ha pahina 20]
Gintagad ni Sara hi Abraham sugad nga iya ginoo