Ira Ginbuhat an Kaburut-on ni Jehova

Ginbawtismuhan ni Felipe an Usa ka Etiopiano nga Opisyal

SAMTANG nasakay ha iya karumata, maaramon nga gingamit han usa nga Etiopiano an iya panahon. Nagbabasa hiya ha daku nga tingog—an komon nga batasan butnga han siyahan-siglo nga mga biyahero. Ini nga tawo usa nga opisyal “ha gahum ilarom ni Kandase nga reyna han mga Etiopiano.”a Hiya an “tinubyanan han ngatanan nga mga manggad hito”—salit, usa hiya nga ministro ha pinansiyal. Ini nga opisyal nagbabasa han Pulong han Dios basi magkaada kahibaro.—Buhat 8:27, 28.

Hirani hito nga lugar an ebanghelisador nga hi Felipe. An anghel nagtugway ha iya hini nga lugar, ngan hito hiya ginsumatan: “Paharani ngan tumig-ob ka ngahaw hadto nga kotse (karumata).” (Buhat 8:26, 29) Aton mahahanduraw nga hi Felipe nagpapakiana ha iya kalugaringon, ‘Hin-o ini nga tawo? Ano an iya ginbabasa? Kay ano nga gintugwayan ako ha iya?’

Samtang nagdadalagan hi Filipe ha ligid han karumata, nahibatian niya an pagbasa han Etiopiano hini nga mga pulong: “Hiya sugad han karnero gindara ha kamatayon; ngan sugad han nati nga karnero nga nangula ha atubangan han iya paraarot, amo in diri pagbuka han iya baba. Ha iya pagpaubos, kinuha ha iya an iya paghukom, ngan hin-o man an magsusumat han iya katumanan? Kay an iya kinabuhi kinuha ha tuna.”—Buhat 8:32, 33.

Hinsabtan dayon ni Felipe an kasuratan. Tikang ito ha sinurat ni Isaias. (Isaias 53:7, 8) Nagugupong an Etiopiano mahitungod ha iya ginbabasa. Nagtikang hi Felipe makiistorya pinaagi ha pagpakiana: “Nasabot ka ba hit imo ginbabasa?” Binaton an Etiopiano: “Oonan-on ko, kon waray usa nga magmando [‘magtutdo,’ NW] ha akon?” Ngan ginhangyo niya hi Felipe nga makisakay ha iya ha karumata.—Buhat 8:30, 31.

“Ano an Nakakaulang ha Akon ha Pagpabawtismo?”

“Ako nakikimalooy ha imo,” siring han Etiopiano kan Felipe, “kon kanay hitutungod nga iginyakan ini han manaragna? Nahatutungod ha iya ngahaw, o nahatutungod ha iba?” (Buhat 8:34) Diri urusahon an kawurok han Etiopiano, kay an pangirilal-an han “karnero,” o “surugoon,” han tagna ni Isaias maiha na nga usa ka misteryo. (Isaias 53:11) Nagin matin-aw gud han iginsaysay ni Felipe ngadto ha Etiopiano “an maopay nga sumat mahitungod kan Jesus”! Katapos hin pipira ka dali an Etiopiano nagsiring: “Kitaa, iini na in tubig, ano pa an nakakaulang pagbaptis ha akon?” Salit ginbawtismuhan hiya ni Felipe hiton mismo nga panahon hiton nga lugar.—Buhat 8:35-38.

Dinagmit ba ini nga buhat? Diri gud! An Etiopiano usa ka Judio nga proselita.b Salit magsiringba na hiya ni Jehova nga mayada kahibaro ha Kasuratan, upod na an Mesianiko nga mga tagna. Kondi, diri pa kompleto an iya kahibaro. Yana nga nakarawat na niya inin importante nga impormasyon mahitungod han bahin ni Jesu-Kristo, nahisabtan han Etiopiano kon ano an ginkikinahanglan han Dios ha iya ngan andam ha pagpahiuyon. Husto an pagpabawtismo.—Mateo 28:18-20; 1 Pedro 3:21.

Katapos, “gin-agaw hi Felipe han espiritu han Ginoo.” Kinadto hiya ha lain nga toka. An Etiopiano “nagpadayon nga malipayon.”—Buhat 8:39, 40.

Leksion Para ha Aton

Sugad nga mga surugoon ni Jehova ha moderno nga panahon, mayada kita obligasyon ha pagbulig ha tangkod-an-kasingkasing nga mga indibiduwal basi mahibaro ha kamatuoran han Pulong han Dios. Damu an naglampos ha pagpresentar ha iba han maopay nga sumat samtang nagbibiyahe o ha diri-pormal nga mga kahimtang. Sugad nga resulta han pagwali-han-Ginhadian nga buruhaton, kada tuig ginatos ka yukot an nagpapabawtismo sugad nga simbolo han ira dedikasyon ngadto kan Jehova nga Dios.

Siyempre, an mga bag-ohan, diri sadang padalion ha pagpabawtismo. Siyahan kinahanglan magkaada hira husto nga kahibaro mahitungod kan Jehova nga Dios ngan ha iya Anak, hi Jesu-Kristo. (Juan 17:3) Ngan kinahanglan magbasol hira, ginbabayaan an sayop nga paggawi ngan bumirik basi mapahiuyon ha mga suruklan han Dios. (Buhat 3:19) Nagkikinahanglan ini hin panahon, labi na kon an sayop nga panhunahuna ngan paggawi nakadulot hin hilarom. Samtang an mga bag-ohan sadang magtagad hin seryoso ha sakripisyo nga nahiuupod ha Kristiano nga disipulo, daku nga bendisyon an resulta ha pagsulod ha dedikado nga relasyon kan Jehova nga Dios. (Itanding an Lukas 9:23; 14:25-33.) An mga Saksi ni Jehova madasigon nga nagtutugway ha mga bag-ohan ngadto ha organisasyon nga ginagamit han Dios ha pagtuman han iya kaburut-on. (Mateo 24:45-47) Pariho han Etiopiano, hira maglilipay ha paghibaro ngan pagpahiuyon ha ginkikinahanglan ha ira han Dios.

[Mga footnote]

[Kahon ha pahina 8]

Kay Ano nga Gintawag nga Yunuko?

Ha bug-os nga asoy ha Buhat kapitulo 8, an Etiopiano gintatawag sugad nga “yunuko.” Kondi, tungod kay an Mosaiko nga Balaud diri nakarawat han kinapon nga lalaki ngadto ha kongregasyon, ini nga tawo matin-aw nga diri usa ka yunuko ha literal nga paagi. (Deuteronomio 23:1) An Griego nga pulong para ha “yunuko” mahimo magtudlok ha usa nga tawo nga hitaas an ranggo. Salit, an Etiopiano usa nga opisyal ilarom han reyna han Etiopia.