Felipe—An Madasigon nga Ebanghelisador
AN KASURATAN nagsusulod hin damu nga mga asoy mahitungod han kalalakin-an ngan kababayin-an nga takos subaron an pagtoo. Tagda hi Felipe, usa nga Kristiano nga misyonero han siyahan-nga-siglo. Diri hiya usa nga apostol, kondi ginamit gud hiya ha pagpasarang han mensahe han Ginhadian. Ha pagkamatuod, nagin kilala hi Felipe sugad “nga ebanghelista.” (Buhat 21:8) Kay ano nga gintawag hi Felipe nga sugad hito? Ngan ano an aton mahibabaroan tikang ha iya?
Mababasa ha mga rekord ha Biblia an mahitungod kan Felipe katapos gud han Pentekostes 33 K.P. Hito nga panahon nagtikang magreklamo an nagyayakan-hin-Griego nga mga Judio kontra ha nagyayakan-hin-Hebreo nga mga Judio, nasiring nga ginbabalewaray an ira mga balo ha adlaw-adlaw nga panaltag han pagkaon. Basi masulbad an problema, an mga apostol nagpili hin ‘pito awtorisado nga kalalakin-an.’ Usa hadton pinili hi Felipe.—Buhat 6:1-6.
‘Awtorisado’ inin pito nga kalalakin-an. An hubad ni James Moffatt nasiring nga hira “may maopay nga dungog.” Oo, ha panahon han pagpilia ha ira, bantogan na hira sugad nga espirituwal nga kalalakin-an nga may praktikal nga abilidad ha panhunahuna. Pariho ito hadton nag-aalagad sugad nga Kristiano nga mga paramangno yana nga adlaw. An sugad nga kalalakin-an diri dinalian nga ginpili. (1 Timoteo 5:22) Kinahanglan mayada hira “maopay nga bantog tikang ha mga aadto ha gowa,” ngan an mga igkasi-Kristiano sadang mahibaro nga makatadunganon hira ngan maaghop.—1 Timoteo 3:2, 3, 7; Filipos 4:5.
Matin-aw nga gintuman hin maopay ni Felipe an iya toka ha Jerusalem. Kondi, waray pag-iha, usa nga mapait nga pagtimaraot an inabot ngan nagpasarang han mga sumurunod ni Kristo. Pariho han iba, ginbayaan ni Felipe an siyudad, kondi diri pa tapos an iya ministeryo. Waray pag-iha, nagin sibot hiya ha pagwali ha bag-o nga teritoryo—ha Samaria.—Buhat 8:1-5.
Pag-abri hin Bag-o nga mga Teritoryo
Nagtagna hi Jesus nga an iya mga disipulo magwawali “ha Jerusalem, ngan ha bug-os nga Judea, ngan ha Samaria, ngan ngadto ha sidsid gud han kalibotan.” (Buhat 1:8) Pinaagi han pagwali ha Samaria, nakikiangbit hi Felipe ha katumanan hito nga mga pulong. Ha kabug-osan gintatamay han mga Judio an mga Samaritano. Kondi waray hukmi ni Felipe ini nga mga tawo, ngan ginbendisyonan an iya pagkawaray-dinadapigan. Ha pagkamatuod, damu nga mga Samaritano an nabawtismohan, upod na an tamyawan hadto nga hi Simon.—Buhat 8:6-13.
Ha urhi, gingiyahan han anghel ni Jehova hi Felipe nga kumadto ha disyerto nga dalan nga nagtitikang ha Jerusalem ngadto ha Gasa. Didto nakita ni Felipe an usa nga karomata nga may sakay nga opisyal nga taga-Etiopia nga nagbabasa ha daku nga tingog han tagna ni Isaias. Dinalagan hi Felipe ha ligid han karomata ngan nagtikang pakiistorya. Bisan kon usa nga proselita an Etiopiano nga mayada kahibaro ha Dios ngan ha Kasuratan, mapainubsanon nga ginkarawat niya nga kinahanglan niya an bulig ha pagsabot ha iya ginbabasa. Salit, ginpasakay niya hi Felipe ha karomata ngan pinalingkod ha iya sapit. Katapos magwali, inabot hira ha katubigan. “Ano pa an nakakaulang pagbaptis ha akon?” nagpakiana an Etiopiano. Ha kadagmitan ginbawtismohan hiya ni Felipe, ngan an taga-Etiopia linakat nga malipayon. Sigurado, ginpasarang hinin bag-o nga disipulo an maopay nga sumat didto ha iya natawohan nga tuna.—Buhat 8:26-39.
Ano an aton mahibabaroan ha ministeryo ni Felipe may kalabotan han mga Samaritano ngan han opisyal nga Etiopiano? Diri naton sadang hunahunaon nga diri maiinteres han maopay nga sumat an mga indibiduwal tikang ha espisipiko nga nasyonalidad, rasa, o kahimtang ha sosiedad. Lugod, sadang naton ipahayag an mensahe han Ginhadian ha “ngatanan nga mga tawo.” (1 Korinto 9:19-23) Kon iginpapagamit naton an aton kalugaringon pinaagi han pagwali ha ngatanan, magagamit kita ni Jehova ha buruhaton nga ‘paghimo hin mga disipulo han mga tawo ha ngatanan nga mga nasud’ antes umabot an kataposan hinin maraot nga sistema.—Mateo 28:19, 20.
Dugang nga mga Pribilehiyo ni Felipe
Katapos magwali ha Etiopiano nga opisyal, nagwali hi Felipe ha Asoto, “ngan han naagi, iya ipinanumat an Maopay nga Sumat ha ngatanan nga kaburobungtohan tubtob han iya pag-abot ha Cesarea.” (Buhat 8:40) Ha siyahan nga siglo, damu an umurukoy nga mga Hentil hinin duha nga siyudad. Ha iya gin-aagian tipakadto ha Cesarea, hi Felipe posible nga nagwali ha prominente nga mga sentro han Judio, sugad ha Lida ngan ha Jopa. Bangin ito an hinungdan kon kay ano nga ha urhi mayada mga disipulo nga nabilngan dinhi hini nga mga lugar.—Buhat 9:32-43.
An ultimo nga pag-unabi kan Felipe nahitabo mga 20 ka tuig ha urhi. Ha kataposan han iya ikatulo nga pagbiyahe sugad nga misyonero, hinaw-as hi Pablo ha Tolemayda. “Han pagkabuwas,” siring ni Lukas nga kaupod ha pagbiyahe ni Pablo, “kami linakat, ngan inabot ha Cesarea; ngan han pagsulod ngadto ha balay ni Felipe, nga ebanghelista.” Hini nga panahon, mayada hi Felipe “upat nga anak nga kababayin-an, ngan mga uray nga nananagna.”—Buhat 21:8, 9.
Matin-aw, inukoy hi Felipe ha Cesarea. Kondi waray mawara an iya espiritu ha pagmisyonero, kay gintawag hiya ni Lukas nga “an ebanghelista.” Ini nga ekspresyon agsob nga nagpapasabot nga nabaya an usa ha iya panimalay basi magwali han maopay nga sumat ha waray-kawalihi nga mga rehiyon. An kamatuoran nga hi Felipe mayada upat nga anak nga babaye nga nananagna nagpapasabot nga ginsunod nira an susbaranan han ira madasigon nga amay.
Sadang hinumduman han Kristiano nga mga ginikanan ha presente nga adlaw nga an ira mga anak an ira pinakaimportante nga mga disipulo. Bisan kon kinahanglan talikdan han sugad nga mga ginikanan an pipira teokratiko nga mga pribilehiyo tungod han mga responsabilidad ha pamilya, pariho kan Felipe mahimo hira magpabilin nga mga surugoon han Dios ngan susbaranan nga mga ginikanan.—Efeso 6:4.
An pagbisita ni Pablo ngan han iya mga kaupod naghatag ha pamilya ni Felipe hin maopay nga higayon ha pag-abiabi. Handurawa an pagbarobalyo hin pagdasig! Bangin hini nga okasyon gintirok ni Lukas an mga detalye mahitungod han mga buruhaton ni Felipe, nga igin-upod ha urhi ha Mga Buhat kapitulo 6 ngan 8.
Ginamit gud ni Jehova nga Dios hi Felipe ha pagpahaluag han mga interes han Ginhadian. An kadasig ni Felipe nagpagios ha iya ha pagpasarang han maopay nga sumat ha bag-o nga mga teritoryo ngan ha pagdasig han maopay nga espiritu ha palibot han iya panimalay. Karuyag mo ba magpahimulos hin pariho nga mga pribilehiyo ngan mga bendisyon? Niyan maopay nga imo subaron an mga kuwalidad nga iginpakita ni Felipe nga ebanghelisador.