Usa nga Eskwelahan nga an mga Naggradwar Nakakabulig ha mga Tawo ha Bug-os nga Kalibotan

HA SOBRA 98,000 nga kongregasyon han mga Saksi ni Jehova ha sobra 200 nga katunaan, gintututdoan han Dios an mga tawo han ngatanan nga kahimtang ha kinabuhi. An nangunguna nga aradman nga libro amo an Biblia, ngan an katuyoan hini nga edukasyon amo an pagbulig ha mga indibiduwal nga mag-uswag ha espirituwal pinaagi han paghibaro kon ano an kaburut-on han Dios ngan kon paonan-o magkikinabuhi uyon hito. Adton nakarawat hini nga edukasyon nabubuligan hin daku. An ira hinbabaroan, ira liwat iginsusumat ha iba, uyon ha sugo ni Jesu-Kristo nga manhimo hin mga disipulo.—Mateo 28:19, 20.

Dugang pa ha nagpapadayon nga programa han pagtutdo ha ira mga kongregasyon, an mga Saksi ni Jehova nag-establisar hin pipira nga eskwelahan nga may espisipiko nga katuyoan. Usa hini amo an Ministerial Training School. Nagtikang ito han Oktubre 1987 ha Pittsburgh, Pennsylvania, E.U.A. An siyahan nga klase ginkompwesto hin 24 nga estudyante nga nagyayakan hin Ingles. Tikang hito nga panahon, an mga kurso gindudumara na ha 21 nga yinaknan ha 43 nga katunaan. Tubtob yana, nakagpalista na an solo nga mga tigurang ngan ministeryal nga surugoon tikang ha sobra 90 nga nasud. Kahuman han walo-ka-semana nga kurso, an mga naggradwar igintutoka ha pag-alagad ha lugar diin may panginahanglan, ha ira kalugaringon nga nasud o ha iba nga nasud. Ha kataposan han 2005, sobra 22,000 nga Kristiano nga ministro an nakatapos na han kurso. Hura nga ginbibendisyonan an ira mapainubsanon nga mga pangalimbasog ha pagpauswag han mga interes han Ginhadian ngan ha pagbulig ha iba.—Proberbios 10:22; 1 Pedro 5:5.

Pagpangandam Basi Makaeskwela

Basi makaeskwela ha Ministerial Training School, kadam-an nga estudyante an kinahanglan maghangyo hin bakasyon ha ira sekular nga trabaho. Usahay nagigin problema ini. Ha Hawaii, duha nga Kristiano nga gin-imbitar nga umiskwela an kinahanglan maghangyo hin bakasyon ha ira trabaho sugad nga mga maestro. Tungod kay nasarig kan Jehova, iginpasa nira an ira hangyo, iginsasaysay kon kay ano nga karuyag nira makaeskwela ngan kon paonan-o hira mabubuligan hito. Hira nga duha gintugotan nga magbakasyon.

Ha damu nga kahimtang, an mga Saksi nga naghangyo hin bakasyon ha trabaho ginsumatan nga mawawad-an hira hin trabaho ha ira pagbalik. Ira ginpili nga kumarawat hin pagbansay tikang ha organisasyon ni Jehova, bisan kon nangahulogan ito hin kawara han ira trabaho. An iba hini nga mga indibiduwal ha urhi nakakarawat hin mga imbitasyon tikang ha ira mga manidyer nga bumalik ha trabaho kahuman han pag-eskwela. An sugad nga determinasyon ha pag-eskwela maihuhulagway hini nga paagi: Ipasa an imo hangyo, pag-ampo para han bulig ni Jehova, ngan tuguti hiya nga buhaton an iba pa.—Salmo 37:5.

‘Tinutdoan ni Jehova’

An walo-ka-semana nga kurso han eskwelahan usa nga detalyado nga pag-aram ha Biblia. An mga estudyante nahibabaro kon paonan-o an katawohan ni Jehova inorganisa ha pagbuhat han kaburut-on han Dios ngan kon paonan-o nira personal nga magagamit an Biblia hin mas epektibo ha ira ministeryo ha kanataran, ha mga katirok han kongregasyon, ngan ha mga asembleya.

Usa nga mapasalamaton nga naggradwar an nagsurat hini ha usa nga estudyante nga waray pa makaeskwela: “Too ha akon, maieksperyensyahan mo an gimaopayi nga edukasyon nga makakarawat mo. An teksto nga nag-uunabi han pagin ‘tinutdoan ni Jehova’ nagigin mas makahuluganon gud. An bug-os nga eksperyensya usa nga pagmolde ngan pagputli han kasingkasing ngan personalidad basi makapahiuyon hin mas maopay ha susbaranan ni Kristo Jesus. Makakarawat mo an gimaopayi nga eksperyensya ha imo kinabuhi.”—Isaias 54:13.

Mga Ebanghelisador, Magbarantay, Ngan Magturutdo

An mga naggradwar ha Ministerial Training School nag-aalagad yana ha 117 nga katunaan. Upod hini an mga isla ha Atlantiko, Caribbean, ngan Pasipiko sugad man an kadam-an han mga nasud diin may-ada mga sanga nga opisina han mga Saksi ni Jehova. An mga sanga nagrireport nga an maopay nga pagbansay nga nakarawat han mga estudyante nakikita ha ira mga buruhaton ha pag-ebanghelyo, pagbantay, ngan pagtutdo. An pagbansay nagsasangkap ha ira nga magin mas epektibo ha paggamit han Biblia ha ministeryo ha kanataran. (2 Timoteo 2:15) Kon binabaton an mga pakiana han mga tagbalay, agsob liwat nga ginagamit nira an libro nga Reasoning From the Scripturesa ngan ginbabansay an iba nga magwarali han Ginhadian nga buhaton liwat ito. An kadasig han mga naggradwar nakakaaghat, ngan an ira mga buruhaton nagpaparig-on han mga kongregasyon.

An mga tigurang ha kongregasyon may-ada pribilehiyo ha ‘pagpasabsab ha panon,’ nabulig ha pagmangno ha espirituwal nga mga panginahanglan han iba. (1 Pedro 5:2, 3) Usa nga tigurang an nagsiring mahitungod han kahikayan: “Mapasalamaton kami nga an sanga nga opisina nagpapadara hin binansay hin maopay nga kabugtoan basi buligan kami ha pagtuman han responsabilidad ha pagbantay ha panon han Dios.” Usa nga sanga ha Hirayo nga Sinirangan an nagsiring liwat: “An mga naggradwar mapinairon hinduro. Maduruto hira ngan nakarawat han pagtahod han kongregasyon. An ira pagkamapainubsanon, pagkamakisangkayon, ngan kadasig hinbabaroan han kadam-an ngan pinabibilhan gud. Kinaburut-on nga nagsasakripisyo hira ngan malipayon nga nabalhin ha mga kongregasyon nga nagkikinahanglan hin mga magbarantay.” (Filipos 2:4) An sugad nga kalalakin-an nagpaparig-on ha ira mga igkasi-tumuroo ngan takos han kumendasyon.—1 Korinto 16:18.

Dugang pa, an mga magturutdo han Ministerial Training School nabulig ha mga estudyante nga mapauswag an ira mga kaabtik sugad nga mga mamumulong ha publiko. Pinaagi han pag-aplikar han mga suhestyon ngan sagdon nga ira nakakarawat, damu han mga naggradwar an magagamit dayon ha mga programa han sirkito nga asembleya ngan distrito nga kombensyon. Usa nga paramangno han sirkito an nakaobserba nga an mga naggradwar naghahatag hin “ekselente nga mga pahayag ngan nag-aaplikar han materyal pinaagi han paggamit hin maopay nga pangatadongan.”—1 Timoteo 4:13.

Nag-uswag gud an kalidad han pagtutdo ha mga katirok han kongregasyon ha usa nga nasud ha Aprika katapos dumarahon didto an Ministerial Training School ngan an mga naggradwar igintoka ha kanataran. An mga tigurang nga iginpadara han eskwelahan nabulig ha pag-ebanghelyo, pagbantay, ngan pagtutdo, nga hito nga paagi ginpaparig-on an espirituwalidad han mga kongregasyon.—Efeso 4:8, 11, 12.

Napauswag nga Pagmangno ha Kongregasyon

Ha damu nga lugar, may-ada panginahanglan hin dugang nga mga tigurang ngan ministeryal nga surugoon. An iba nga kongregasyon waray gud unta mga tigurang kon an usa nga naggradwar ha Ministerial Training School waray igpadara ha ira. Salit damu nga naggradwar an igintutoka nga mag-alagad ha mga lugar diin may-ada han sugad nga mga panginahanglan.

Damu nga sanga an nagrireport nga ini nga kalalakin-an “maaram gud han mga kahikayan han organisasyon,” “seryoso nga nagbubuhat han ira mga responsabilidad,” “nabulig ha iba nga apresyaron ngan tahuron an organisasyon ni Jehova,” ngan “nabulig ha pagpauswag han kapaso ngan espirituwalidad han ira mga kongregasyon.” Tungod ini kay an mga naggradwar ha eskwelahan nasunod ha nahisurat ha Pulong han Dios ngan diri nasarig ha ira kalugaringon nga pagsabot o nagigin maaramon ha ira kalugaringon nga paniplatan. (Proberbios 3:5-7) An sugad nga kalalakin-an nagigin espirituwal nga mga bendisyon ha mga kongregasyon diin hira igintutoka.

Pag-alagad ha Nabubulag nga mga Teritoryo

An iba nga naggradwar nga igintutoka sugad nga mga espesyal payunir nabulig ha nabubulag nga mga grupo nga magin mga kongregasyon. Ha pagpahayag hin apresasyon ha ira bulig, usa nga tigurang ha hirayo nga lugar ha Guatemala an nagsiring: “Ha sulod hin 20 ka tuig nababaraka ako kon paonan-o mamangnoan inin daku hinduro nga teritoryo. Agsob ako mag-ampo mahitungod hito. An kabugtoan tikang ha Ministerial Training School binansay hin maopay ha pagyakan sugad man ha mga butang nga may kalabotan ha organisasyon, ngan mapasalamaton ako nga makita nga an lugar nakarawat na yana hin mahigugmaon nga atensyon.”

An mga naggradwar nahibaro na ha pagin epektibo ha mga teritoryo diin kinahanglan magbiyahe hira hin hirayo ha bukiron nga tuna basi madangat an nagsasarang nga gudtiay nga baryo. Didto madagmit nga nag-iestablisar ngan nag-oorganisa hira hin nabubulag nga mga grupo, bisan kon an iba nga magwarali waray makahimo hito. Pananglitan, usa nga tigurang ha Niger an naghangyo han bulig han mga naggradwar tungod kay inaabat niya nga daku gud an ira mahihimo ha lugar nga iya inuukyan. Labi na ha higrayo nga lugar, bangin mas masayon para han solo nga kalalakin-an an pag-alagad sugad nga mga espesyal payunir ngan paramangno han sirkito. Pariho kan apostol Pablo, kinahanglan atubangon nira an ‘mga kakurian ha mga salog ngan mga kawatan, mga kakurian ha kamingawan,’ ngan personal nga mga kakurian sugad man an kabaraka ha mga kongregasyon nga ira ginsiserbihan.—2 Korinto 11:26-28.

Pagbulig ha mga Batan-on

An Kasuratan nagsasagda ha mga batan-on nga hinumdoman an ira Maglalarang. (Eklesiastes 12:1) An madasigon nga mga naggradwar ha Ministerial Training School mag-opay nga mga susbaranan para ha Kristiano nga mga batan-on. Han an duha nga naggradwar inabot ha usa nga kongregasyon ha Estados Unidos, nadoble an kabug-osan nga kadamu han oras han kabugtoan ha ministeryo. Dugang pa, an kadamu han mga regular payunir, o bug-os-panahon nga mga parasamwak han Ginhadian, nag-uswag tikang ha 2 ngadto ha 11. Sugad hini an nahitatabo ha damu nga kongregasyon.

Gindadasig liwat han mga naggradwar an mas batan-on nga kalalakin-an nga maghunahuna ha pag-eskwela ha Ministerial Training School. Nagpapagios ini ha iba nga diri pa mga ministeryal nga surugoon nga mangalimbasog ha pagkab-ot hito nga pribilehiyo. Ha sanga han Netherlands, tinatawag an mga naggradwar ha Ministerial Training School sugad nga “buhi nga mga susbaranan para ha mas batan-on nga kalalakin-an nga naghuhunahuna kon ano an ira bubuhaton ha ira kinabuhi.”

Pag-alagad ha mga Kongregasyon nga Langyaw an Yinaknan

Ha damu nga katunaan, nag-uuswag an mga pangalimbasog ha pagsangyaw han maopay nga sumat ha mga tawo ha ira kalugaringon nga yinaknan. An mga naggradwar ha Ministerial Training School agsob nga nag-aaram hin iba nga yinaknan ngan nag-aalagad ha mga teritoryo diin damu an mga dayo. Pananglitan, ha Belgium, ginkikinahanglan an dugang nga mga parasangyaw han Ginhadian ha mga nagyayakan hin Albaniano, Persiano, ngan Ruso. An mga kongregasyon ngan grupo nga langyaw an yinaknan ha Alemanya, Britanya, Estados Unidos, Italya, Mexico, ngan iba nga katunaan nabubuligan na gud han mga nagbibiyahe nga paramangno, tigurang ngan ministeryal nga surugoon nga naggradwar ha Ministerial Training School. An sanga ha Korea nagreport nga “sobra 200 nga naggradwar an may-ada daku nga bahin ha pagbulig ha mga kongregasyon ngan grupo nga langyaw an yinaknan.”

Mapainubsanon nga Pag-alagad ha Iba Pa nga Kapasidad

Dugang pa ha pag-alagad ha mga grupo ngan kongregasyon nga langyaw an yinaknan, adton naggradwar ha Ministerial Training School nag-aalagad sugad nga mga tigurang, ministeryal nga surugoon, ngan nagbibiyahe nga paramangno. An iba nakarawat hin mga toka ha iba nga katunaan, bangin para ha apurado nga mga panginahanglan ha Service Department ha usa nga sanga. Adton nagkaada na mga kaabtik ha pagtukod mahimo makigbahin ha programa han pagtukod hin mga Kingdom Hall.

An bug-os-kalibotan nga pagdamu han mga kongregasyon ngan sirkito nangangahulogan nga padayon nga ginkikinahanglan an damu pa nga nagbibiyahe nga mga paramangno. Basi makabulig ha pagtagana hini nga panginahanglan, an pinili nga mga naggradwar ha Ministerial Training School nakarawat hin napulo ka semana nga pagbansay ha pagbiyahe nga buruhaton ngan katapos, nag-aalagad sugad nga kasaliwan o regular nga mga paramangno han sirkito. Mga 1,300 nga naggradwar an nag-aalagad yana sugad nga nagbibiyahe nga mga paramangno ha 97 nga nasud. Ha usa nga nasud ha Aprika, 55 porsyento han nagbibiyahe nga mga paramangno an naggradwar ha Ministerial Training School. Ha usa pa nga nasud ha Aprika, 70 porsyento an kadamu.

Ha Australia, Canada, Estados Unidos, Europa, ngan Hirayo nga Sinirangan, ginatos nga naggradwar ha eskwelahan an iginpadara ha iba nga katunaan para ha espisipiko nga mga panginahanglan didto. Hini nga paagi, an mga kapulsanan han eskwelahan nakakaabot ha bug-os nga kalibotan.

Pinaagi han iya Anak, hi Jesu-Kristo, nagpabangon hi Jehova hin mga ebanghelisador, magbarantay, magturutdo, ngan iba pa nga nagpapauswag han mga interes han Ginhadian durante hinin kataposan nga mga adlaw. May-ada ba posibilidad nga magdadamu pa gud an katawohan han Dios? Sigurado ito! Salit nagdudugang gud an panginahanglan hin dedikado nga kalalakin-an nga magtitinguha hin darodaku nga responsabilidad. (Isaias 60:22; 1 Timoteo 3:1, 13) An Ministerial Training School naghahatag ha mga tigurang ngan ministeryal nga surugoon hin higayon nga masangkapan ha pagpahaluag han ira ministeryo, nga daku nga kapulsanan ha ira kalugaringon ngan ha iba ha bug-os-kalibotan nga kanataran.

[Footnote]

[Mga Retrato ha pahina 10]

Ginpapauswag han Ministerial Training School an mga interes han Ginhadian ha bug-os nga kalibotan

[Mga Retrato ha pahina 13]

Naglalaom ka ba nga magpalista ha Ministerial Training School ngan buligan an iba?