Mga Kalalakin-an, Nagpapasakop ba Kamo ha Pagkaulo ni Kristo?
“An ulo han ngatanan nga mga tawo amo hi Kristo.”—1 KOR. 11:3.
1. Ano an nagpapamatuod nga hi Jehova organisado nga Dios?
“ATON Ginoo, ngan aton Dios, takos ikaw ha pagkarawat han himaya, ngan han dungog ngan han gahum,” siring han Pahayag 4:11, “kay ikaw an nagbuhat han ngatanan nga mga bagay, ngan tungod ha imo kaburut-on nagkahihimo, ngan pinanmuhat hira.” Tungod kay hi Jehova nga Dios an Maglalarang, hiya an Supremo nga Soberano han uniberso ngan may awtoridad ha ngatanan nga iya linarang. Ginpapamatud-an han iya pag-organisa ha iya mga anghel nga hiya “diri Dios ha kasamokan, kondi ha paghidait.”—1 Kor. 14:33; Isa. 6:1-3; Heb. 12:22, 23.
2, 3. (a) Hin-o an siyahan nga ginlarang ni Jehova? (b) Ano an posisyon han suhag nga Anak kon itanding ha Amay?
2 Antes maglarang, an Dios naeksister na hin diri maihap nga katuigan. An iya siyahan nga ginlarang amo an espiritu nga gintawag nga “an Pulong” tungod kay hiya an Tagapagyakan ni Jehova.a Pinaagi han Pulong iniksister an ngatanan iba pa nga butang. Ha urhi, kinanhi hiya ha tuna sugad nga hingpit nga tawo ngan nakilala nga hi Jesu-Kristo.—Basaha an Juan 1:2, 3, 14.
3 Ano an ginsisiring han Kasuratan mahitungod ha posisyon han Dios kon itanding ha iya suhag nga Anak? Ha paggiya han Dios, hi apostol Pablo nagsiring: “Buot ko nga iyo hibaroan, nga an ulo han ngatanan nga mga tawo amo hi Kristo; ngan an ulo han babaye amo an lalaki; ngan an ulo ni Kristo amo an Dios.” (1 Kor. 11:3) Hi Kristo sakop han pagkaulo han iya Amay. Importante an pagkaulo ngan pagpasakop basi magin mamurayawon ngan mahapsay an intelihente nga mga linarang. Bisan an usa nga “tungod ha iya ginbuhat an ngatanan” kinahanglan magpasakop ha pagkaulo han Dios.—Kol. 1:16.
4, 5. Ano an panhunahuna ni Jesus ha iya posisyon kon itanding kan Jehova?
4 Ano an panhunahuna ni Jesus ha pagpasakop ha pagkaulo ni Jehova ngan ha pagkanhi ha tuna? An Kasuratan nasiring: “[Hi] Kristo Jesus . . . dagway han Dios, waray niya pag-isipa an hinugad han Dios, butang nga aragawon, kondi gin-ula niya an iya kalugaringon, nga nagpariho hin dagway han uripon, kay ginhimo nga ladawan han mga tawo; ngan nga sugad na hiya ha bayhon han tawo, nagpaubos hiya ha iya ngahaw, nga nagmasinugtanon tubtob ha kamatayon.”—Fil. 2:5-8.
5 Hi Jesus mapainubsanon nga nagpasakop ha kaburut-on han iya Amay ha ngatanan nga panahon. Hiya nagsiring: “Diri ako sadang makahimo ha akon ngahaw hin bisan ano. . . . An akon paghukom matadong, kay diri ko ginbibiling an akon kalugaringon nga kaburut-on, kondi an kaburut-on niya han nagpakanhi ha akon.” (Juan 5:30) “Ako nagbubuhat gihapon han [kanan akon Amay] naruruyagan,” siring niya. (Juan 8:29) Han hirani na hiya mamatay, hi Jesus nag-ampo ha iya Amay: “Ginhihimaya ko ikaw ha tuna; ngan natuman na an buhat nga imo ihinatag ha akon.” (Juan 17:4) Matin-aw nga waray kurii hi Jesus ha pagkilala ngan pagkarawat ha pagkaulo han Dios.
An Pagpasakop ha Amay Mapulsanon ha Anak
6. Ano nga mag-opay hinduro nga kalidad an iginpakita ni Jesus?
6 Han hi Jesus nakanhi ha tuna, nagpakita hiya hin damu nga mag-opay hinduro nga kalidad. Usa hito an iya daku nga gugma ha iya Amay. Hiya nagsiring: “Ako nahigugma ha Amay.” (Juan 14:31) Daku liwat an iya gugma ha mga tawo. (Basaha an Mateo 22:35-40.) Buotan hiya ngan makonsiderasyon, diri mapintas o dominante. “Kadi ngatanan kamo ha akon, nga nagbubuhat ngan binubug-atan,” siring niya, “ngan akon kamo tatagan hin pagpahuway. Pas-ana niyo an akon yugo, ngan magtoon kamo ha akon, kay ako maaghop ngan mapainubsanon ha kasingkasing, ngan kamo makakaagi hin pagpahuway ha iyo mga kalag. Kay an akon yugo masayon, ngan an akon pinas-an magaan.” (Mat. 11:28-30) An sugad-karnero nga mga tawo—anoman an ira edad—labi na adton ginraraugdaog ngan gintatalumpigos narepreskohan ha makaruruyag nga personalidad ngan makaparig-on nga mensahe ni Jesus.
7, 8. Sumala ha Balaud, ano an igindidiri ha babaye nga gin-aagasan hin dugo, kondi paonan-o hiya gintratar ni Jesus?
7 Tagda kon paonan-o gintratar ni Jesus an kababayin-an. Ha bug-os nga kasaysayan, damu nga kalalakin-an an maraot gud an pagtratar ha kababayin-an. Sugad hito an mga lider han relihiyon ha kadaan nga Israel. Kondi hi Jesus may pagtahod ha kababayin-an. Nakita ito ha iya pagtratar ha usa nga babaye nga 12 ka tuig na nga gin-aagasan hin dugo. Hiya “nag-antos hin daku” ha mga parapanambal ngan naubos an ngatanan nga iya panag-iya basi la maopay. Bisan pa hito ngatanan, “nagtikaraot la” an iya kahimtang. Sumala ha Balaud, gintatagad hiya nga mahugaw. Bisan hin-o nga kumapot ha iya magigin mahugaw liwat.—Leb. 15:19, 25.
8 Han hinbaroan han babaye nga nananambal hi Jesus han magsakit, inupod hiya ha katawohan nga nakapalibot kan Jesus ngan nagsiring: “Kon akon la makamkam an iya mga panapton, maluluwas ako.” Ginkaptan niya an bado ni Jesus ngan naopay dayon. Maaram hi Jesus nga diri niya sadang buhaton ito. Kondi, waray hiya isgi ni Jesus. Lugod, hi Jesus nagpakita hin kalooy. Nasabtan niya an inaabat han babaye ha damu ka tuig nga pag-inantos hin sakit ngan maaram hiya nga karuyag gud han babaye nga matambal. Mapinairon nga siniring hiya ha babaye: “Anak an imo pagtoo nagluwas ha imo; lakat ka ha kamurayawan, ngan mag-opay ka han imo sakit.”—Mar. 5:25-34.
9. Han gindid-an han mga disipulo ni Jesus an kabataan nga dumaop ha iya, ano an iya reaksyon?
9 Bisan an kabataan komportable kan Jesus. Makausa, han an mga tawo nagdara ha iya hin kabataan, ginsaway hira han iya mga disipulo. Matin-aw nga naghuhunahuna hira nga nadiri hiya nga madisturbo han kabataan. Kondi diri sugad hito an panhunahuna ni Jesus. An asoy ha Biblia nasiring: “Ha pagkita hito ni Jesus, nasina hiya, ngan siniring ha [mga disipulo]: Tuguti an mga kabataan pagkadi ha akon, ngan ayaw hira pagdid-i, kay an ginhadian han Dios ira han mga sugad ha ira.” Dugang pa, ‘iya pinangugos ngan pinanbendisyonan hira, ngan ipinanduon an iya mga kamot ha ira.’ Diri la kay gintugotan ni Jesus nga dumaop ha iya an kabataan; mahigugmaon nga gin-abiabi niya hira.—Mar. 10:13-16.
10. Paonan-o hi Jesus nagkaada han mga kalidad nga iya iginpakita?
10 Paonan-o hi Jesus nagkaada han mga kalidad nga iya iginpakita han nakanhi hiya ha tuna? Antes magin tawo, naobserbahan niya an iya langitnon nga Amay ha sulod hin hilawig hinduro nga panahon ngan ginsubad an Iya personalidad. (Basaha an Proberbios 8:22, 23, 30.) Ha langit, naobserbahan ni Jesus an mahigugmaon nga pagpakita ni Jehova han Iya pagkaulo ha ngatanan nga Iya linarang ngan ginsubad ito. Masusubad ba ito ni Jesus kon waray hiya magpasakop? Nalipay hiya pagpasakop ha iya Amay, ngan nalipay hi Jehova ha pagkaada hin sugad hito nga Anak. Han nakanhi hi Jesus ha tuna, hingpit nga ginsubad niya an mag-opay hinduro nga kalidad han iya langitnon nga Amay. Daku gud nga pribilehiyo an pagpasakop kan Kristo, an pinili han Dios nga Magmarando ha langitnon nga Ginhadian!
Subara an mga Kalidad ni Kristo
11. (a) Hin-o an sadang naton pangalimbasogan nga subaron? (b) Kay ano nga an Kristiano nga kalalakin-an labi na nga sadang mangalimbasog pagsubad kan Jesus?
11 An ngatanan nga Kristiano, labi na an kalalakin-an, kinahanglan padayon nga mangalimbasog gud nga subaron an mga kalidad ni Kristo. Sugad han gin-unabi na, an Biblia nasiring: “An ulo han ngatanan nga mga tawo amo hi Kristo.” Sugad la nga ginsubad ni Kristo an iya Ulo, an tinuod nga Dios, an Kristiano nga kalalakin-an sadang liwat mangalimbasog pagsubad han ira ulo—hi Kristo. Ito an ginbuhat ni apostol Pablo han nagin Kristiano hiya. Gin-aghat niya an iya mga igkasi-Kristiano: “Magsubad kamo ha akon, sugad nga hi ako nasubad kan Kristo.” (1 Kor. 11:1) Ngan hi apostol Pedro nagsiring: “Tungod hini mga gintawag kamo: kay hi Kristo nag-antos man tungod ha iyo, nga gintagan kamo hin susbaranan, basi kamo magsunod ha iya mga pagpitad.” (1 Ped. 2:21) May usa pa nga hinungdan nga sadang sundon labi na han kalalakin-an an sagdon nga subaron hi Kristo. Tungod ito kay hira an nagigin mga tigurang ngan ministeryal. Sugad la nga nalipay hi Jesus ha pagsubad kan Jehova, sadang liwat malipay an Kristiano nga kalalakin-an ha pagsubad kan Kristo ngan ha iya mga kalidad.
12, 13. Paonan-o sadang trataron han mga tigurang an mga karnero nga ira ginmamangnoan?
12 An mga tigurang ha Kristiano nga kongregasyon obligado nga subaron hi Kristo. Hi Pedro nagsagdon ha mga tigurang: “Pasabsaba niyo an panon han Dios nga aada ha iyo, pagbantayan niyo, diri nga sugad hin linugos, kondi ha iyo kalugaringon nga kaburut-on, sumala ha kaburut-on han Dios; diri tungod ha mahugaw nga salapi, kondi ha maandaman nga painoino. Diri mga agaron han mga igintubyan ha iyo, kondi nga magin susbaranan kamo ha panon.” (1 Ped. 5:1-3) An mga tigurang diri sadang magin diktador, dominante, diri makatadunganon, o mapintas. Ha pagsubad kan Kristo, nangangalimbasog hira nga magin mahigugmaon, makonsiderasyon, mapainubsanon, ngan buotan ha mga karnero nga ginpamangnoan ha ira.
13 An mga nangunguna ha kongregasyon diri hingpit, ngan sadang nira ito hinumdoman pirme. (Roma 3:23) Salit kinahanglan magin interesado gud hira nga mahibaro mahitungod kan Jesus ngan subaron an iya gugma. Kinahanglan pamalandungon nira an pagtratar han Dios ngan ni Kristo ha mga tawo ngan mangalimbasog nga subaron hira. Hi Pedro nagsagdon ha aton: “An ngatanan ha iyo magpanapton ha pagpaubos basi ha pagminangnoay ha usa kag usa: kay an Dios nasuwahi ha palabilabihon, kondi nahatag hin grasya ha mapaubsanon.”—1 Ped. 5:5.
14. Ha ano nga paagi maipapakita han mga tigurang nga ginpapasidunggan nira an iba?
14 Ha pagtratar ha panon han Dios, an pinili nga kalalakin-an ha kongregasyon sadang magpakita hin mag-opay nga kalidad. An Roma 12:10 nasiring: “Pagsighigugmaay gud kamo hin minagburugto an usa kag usa . . . palabihon niyo an usa kag usa ha kadungganan.” An mga tigurang ngan ministeryal nagpapasidungog ha iba. Sugad han ngatanan nga Kristiano, kinahanglan ‘diri hira magbuhat hin bisan ano tikang ha pagkabahin-bahin o tungod hin padayaw, kondi ha pagpaubos ha hunahuna mag-isip han iba nga maoroopay pa ha ira.’ (Fil. 2:3) Sadang gud tagdon han mga nangunguna nga an iba maoroopay ha ira. Ha pagbuhat hito, ginsusunod nira an sagdon ni Pablo: “Kita, nga mga marig-on, kinahanglan aton pagdad-on an mga kaluyahan han mga magluya, ngan diri la kita maglipay ha aton kalugaringon. An tagsa-tagsa ha aton maglipay ha iya amyaw tungod ha maopay, ngan karig-onan. Kay hi Kristo waray man liwat malipay ha iya kalugaringon.”—Roma 15:1-3.
‘Paghatag hin Dungog ha Asawa’
15. Paonan-o sadang trataron han bana an iya asawa?
15 Hisgotan naton yana an sagdon ni Pedro ha inasaw-an nga kalalakin-an. Hiya nagsurat: “Kamo mga asawa nga kalalakin-an, mag-ukoy kamo upod ha iyo mga asawa sugad ha kinaadman, nga naghahatag kamo hin dungog ha babaye, sugad hin ngadto ha maluroluya nga surudlan.” (1 Ped. 3:7) An pagpasidungog ha usa nangangahulogan hin pagpabili gud ha iya. Salit gintatagad mo an iya opinyon, panginahanglan, ngan karuyag ngan bangin sundon ito kon makatadunganon. Ito an sadang magin pagtratar han bana ha iya asawa.
16. Ano an iginpahamangno han Pulong han Dios ha mga bana may kalabotan ha pagpasidungog ha ira asawa?
16 Han nagsagdon hi Pedro ha mga bana nga pasidunggan an ira asawa, hiya nagpahamangno: “Nga an iyo mga pag-ampo mawaray kaulangan.” (1 Ped. 3:7) Matin-aw nga iginpapakita hito kon mationan-o kaseryoso kan Jehova an paagi han pagtratar han bana ha iya asawa. Kon diri pasidunggan han bana an iya asawa, mahimo maulang an iya mga pag-ampo. Dugang pa, kon ginpapasidunggan han bana an iya asawa, diri ba kasagaran na nga malipayon ngan murayaw an ira pag-asawa?
17. Tubtob diin sadang higugmaon han bana an iya asawa?
17 May kalabotan ha paghigugma ha asawa, an Pulong han Dios nagsagdon: “An mga asawa nga kalalakin-an kinahanglan man nga mahigugma ha ira mga asawa nga babaye sugad ha ira mga kalugaringon nga lawas. . . . Kay bisan san-o waray tawo nga nangalas ha iya kalugaringon nga unod; kondi nga gin-aataman ngan ginmamangnoan niya ito sugad man nga hi Kristo ha singbahan; . . . an tagsa-tagsa ha iyo maghigugma ha iya kalugaringon nga asawa sugad ha iya ngahaw.” (Efe. 5:28, 29, 33) Tubtob diin sadang higugmaon han bana an iya asawa? Hi Pablo nagsiring: “Mga asawa nga kalalakin-an, higugmaa niyo an iyo mga asawa nga kababayin-an, sugad man nga hi Kristo naghigugma ha singbahan ngan igintubyan niya an iya kalugaringon tungod hito.” (Efe. 5:25) Oo, an bana kinahanglan andam nga mamatay pa ngani para ha iya asawa, sugad han ginbuhat ni Kristo para ha katawohan. Kon an Kristiano nga bana malumo, makonsiderasyon, buotan, ngan mahunahunaon han panginahanglan han iya asawa, mas masayon para ha iya asawa nga magpasakop ha iya pagkaulo.
18. Ano nga bulig an iginhahatag ni Jehova basi mapasidunggan han bana an iya asawa?
18 Sobra ba ini nga paagi han pagpasidungog ha asawa nga ginkikinahanglan ha mga bana? Diri. Hi Jehova diri gud magsusugo hin labaw han ira maaakos. Labot pa, an mga magsiringba ni Jehova makakaaro han bulig han pinakagamhanan nga pwersa ha uniberso—an baraan nga espiritu han Dios. Hi Jesus nagsiring: ‘Kon kamo nga magraot mahibabaro paghatag hin mag-opay nga hatag ha iyo kabataan, labi pa gud an iyo Amay nga langitnon, nga mahatag han espiritu ha mga nangangaro ha iya.’ (Luk. 11:13) An mga bana mahimo mag-ampo nga buligan hira han espiritu ni Jehova ha ira pagtratar ha iba, pati na ha ira asawa.—Basaha an Buhat 5:32.
19. Ano an hihisgotan ha sunod nga artikulo?
19 Oo, daku nga responsabilidad han kalalakin-an nga hibaroan kon paonan-o magpapasakop kan Kristo ngan subaron an iya pagkaulo. Kondi kumusta man an kababayin-an, labi na an mga inasaw-an? Hihisgotan han sunod nga artikulo kon paonan-o nira sadang tagdon an ira bahin ha kahikayan ni Jehova.
[Footnote]
a An Juan 1:1 (NW) nasiring: “Ha tinikangan amo an Pulong, ngan an Pulong upod han Dios, ngan an Pulong usa nga dios.”
Nahinunumdoman Mo Ba?
• Ano nga mga kalidad ni Jesus an sadang naton subaron?
• Paonan-o sadang trataron han mga tigurang an mga karnero?
• Paonan-o sadang trataron han bana an iya asawa?
[Mga Retrato ha pahina 10]
Subara hi Jesus pinaagi ha pagpasidungog ha iba