Magin Mas Malipayon Pinaagi ha Paghatag ha Iba

1-2. Kay ano nga ginlarang kita ni Jehova nga umabat hin kalipay kon naghahatag ha iba?

HAN ginlarang ni Jehova an mga tawo, gindisenyo niya hira nga may abilidad nga mas malipay ha paghatag kay ha pagkarawat. (Buh. 20:35) Nagpapasabot ba ini nga diri kita maabat hin kalipay ha pagkarawat? Diri. Kita ngatanan nalilipay kon nakakakarawat hin regalo. Pero naabat kita hin mas daku nga kalipay kon kita an naghahatag. Maopay gud nga gindisenyo kita ni Jehova ha sugad hini nga paagi. Kay ano?

² Tungod kay sugad hini an pagkalarang ha aton ni Jehova, mahimo madugangan an aton kalipay. Puydi kita magin mas malipayon kon maghuhunahuna kita hin mga paagi nga mahimo kita makahatag ha iba ngan kon bubuhaton ito. Pagkamaopay gud nga ginhimo kita ni Jehova ha sugad hini nga paagi.​—Sal. 139:14.

3. Kay ano nga maihuhulagway hi Jehova sugad nga an “malipayon nga Dios”?

³ Ginpapasarig kita han Kasuratan nga an paghatag nakakapalipay, salit diri urusahon nga iginhuhulagway han Biblia hi Jehova sugad nga an “malipayon nga Dios.” (1 Tim. 1:11) Hiya an pinakauna ngan pinakalabaw nga Humaratag. Tungod ha iya, “may kinabuhi kita ngan nagkikiwa ngan naeksister,” sugad han ginsiring ni apostol Pablo. (Buh. 17:28) Ngani, tikang kan Jehova “an tagsa nga maopay nga regalo ngan an tagsa nga perpekto nga hatag.”​—San. 1:17.

4. Ano an mabulig ha aton basi magin mas malipayon?

⁴ Kita ngatanan posible nga naruruyag nga magin mas malipayon nga resulta han paghatag. Mahihimo ta ito pinaagi ha pagsubad han pagin mahinatagon ni Jehova. (Efe. 5:1) Samtang ginhihisgotan ta ini, tigamnan naton kon ano an aton mahihimo kon inaabat naton nga an aton paghatag diri gin-aapresyar. Ini nga mga pahinumdom mabulig ha aton nga matipigan ngan madugangan pa ngani an kalipay nga aton inaabat tungod ha paghatag.

SUBARA AN PAGIN MAHINATAGON NI JEHOVA

5. Ano nga materyal nga mga butang an iginhahatag ha aton ni Jehova?

⁵ Ano an pipira nga paagi nga iginpapakita ni Jehova nga mahinatagon hiya? Pansina inin pipira nga ehemplo. Naghahatag hi Jehova ha aton hin materyal nga mga butang. Bisan kon diri ni Jehova pirme ginhihimo nga sobra ka komportable an aton kinabuhi, ginsisiguro niya nga may-ada kita pirme han aton panginahanglan. Pananglitan, ginhihimo niya nga posible para ha aton nga magkaada kita pagkaon, bado, ngan mauukyan. (Sal. 4:8; Mat. 6:​31-33; 1 Tim. 6:​6-8) Nagtatagana la ba hi Jehova han aton pisikal nga mga panginahanglan tungod kay obligasyon niya ito? Diri gud! Kay ano nga ginbubuhat ini ni Jehova para ha aton?

6. Ano an aton mahibabaroan nga leksyon ha Mateo 6:​25, 26?

⁶ Nagtatagana hi Jehova ha aton mga panginahanglan ha pisikal kay hinigugma kita niya. Pansina an ginsiring ni Jesus nga mababasa ha Mateo 6:​25, 26. (Basaha.) Naggamit hi Jesus hin mga ehemplo tikang ha mga linarang. Mahitungod ha mga tamsi, hi Jesus nagsiring: “Diri hira nagsasabwag hin binhi o nag-aani o nagtitirok han mga inani ngadto ha mga bodega.” Pero pansina an sunod niya nga ginsiring: “Ginpapakaon hira han iyo Amay ha langit.” Katapos, nagpakiana hi Jesus: “Diri ba mas birilhon kamo kay ha ira?” Ano an leksyon? Para kan Jehova, an iya mga magsiringba mas birilhon gud kay ha mga linarang nga hayop. Kon iginhahatag ni Jehova an mga panginahanglan han mga hayop, makakasiguro kita nga magtatagana hiya ha aton! Pariho ha mahigugmaon nga amay, hi Jehova nagtatagana ha iya pamilya tungod han gugma.​—Sal. 145:16; Mat. 6:32.

7. Ano an usa nga paagi nga masusubad naton an pagin mahinatagon ni Jehova? (Kitaa liwat an piktyur.)

⁷ Pariho kan Jehova, kita liwat mahimo maghatag hin materyal tungod han gugma. Pananglitan, may kilala ka ba nga bugto nga nagkikinahanglan hin pagkaon o bado? Puydi ka gamiton ni Jehova nga ihatag ito nga iya ginkikinahanglan. An katawohan ni Jehova kilala gud nga nabulig kon may mga kalamidad. Pananglitan, ha panahon han COVID-19 nga pandemya, an kabugtoan naghatag hin pagkaon, bado, ngan iba pa nga mga suplay ha mga nanginginahanglan hito. Damu liwat an nagdudonar ha worldwide work. Nakabulig ito nga mapundohan an panhatag hin mga ayuda ha bug-os nga kalibotan. Igin-aplikar nira an mga pulong nga mababasa ha Hebreo 13:16: “Ayaw hingalimot ha pagbuhat han maopay ngan ha pagpaangbit ha iba han anoman nga may-ada ka, kay nalilipay gud an Dios ha sugad nga mga halad.”

8. Ha ano nga mga paagi nagpapahimulos kita ha gahum ni Jehova? (Filipos 2:13)

⁸ Naghahatag hi Jehova hin kusog. An gahum ni Jehova waray limitasyon ngan nalilipay hiya ha paghatag hin kusog ha iya matinumanon nga mga magsiringba. (Basaha an Filipos 2:13.) Nag-ampo ka na ba nga magkaada kusog basi maatohan an pagsulay o mailob an makuri nga problema? Bangin nag-ampo ka liwat nga magkaada kusog basi makapadayon hito nga adlaw. Kon ginbaton an imo pag-ampo nga magkaada kusog, posible nga umuyon ka kan apostol Pablo, nga nagsurat: “Ha ngatanan nga butang may kusog ako pinaagi ha iya nga naghahatag ha akon hin gahum.”​—Fil. 4:13.

9. Ano an pipira nga paagi nga masusubad naton hi Jehova pinaagi ha paggamit han aton kusog ha pagbulig ha iba? (Kitaa liwat an piktyur.)

⁹ Bisan kon diri kita perpekto, puydi naton masubad hi Jehova pinaagi ha paggamit han aton kusog nga buligan an iba. Ha literal, diri naton maihahatag ha iba an aton kusog. Pero mahimo naton gamiton an aton kusog para ha ira. Pananglitan, puydi naton buligan an mga lagas o may sakit nga kabugtoan ha pagpanginano ha mga buruhaton ha ira balay o ha pagpalit han ira mga kinahanglan. Kon igintutugot han aton kahimtang puydi kita magboluntaryo nga bumulig ha paglimpyo ngan pagmintinar han Kingdom Hall. Kon gagamiton naton an aton kusog hito nga mga paagi nagpapahimulos an iba nga nagsisingba kan Jehova.

10. Paonan-o naton mapapakusog an iba pinaagi han aton mga pulong?

¹⁰ Ayaw liwat hingalimti nga an aton mga pulong nakakapakusog. May nahuhunahuna ka ba nga mahimo madasig han sinsero nga kumendasyon? May kilala ka ba nga nagkikinahanglan hin pagliaw? Hain man hito nga kahimtang, puydi ka ba mag-una ha pakiistorya hito nga indibiduwal? Puydi mo hiya bisitahon hin personal, tawagan, o kon posible pagpadara hin kard, pag-email, o pag-text. Diri man kinahanglan maopay hinduro an imo iyayakan. An imo halipot ngan simple nga mga pulong nga sinsero bangin amo an ginkikinahanglan gud han imo igkasi-tumuroo basi magpabilin nga matinumanon ha usa pa ka adlaw o basi magin mas maopay an iya inaabat.​—Prob. 12:25; Efe. 4:29.

11. Paonan-o ginagamit ni Jehova an iya kinaadman?

¹¹ Hi Jehova naghahatag hin kinaadman. An disipulo nga hi Santiago nagsurat: “Kon may bisan hin-o ha iyo nga kulang hin kinaadman, padayon nga mangaro hiya ha Dios, kay hura nga nahatag hiya ha ngatanan ngan diri nagbibiling hin sayop.” (San. 1:5; ftn.) Sugad han iginpapakita hini nga mga pulong, diri ni Jehova gintatago an iya kinaadman nga ha iya la. Hura nga iginhahatag niya ito ha iba. Pansina liwat nga kon hi Jehova naghahatag hin kinaadman iya ito iginhahatag nga “diri nasisina,” o “diri nagbibiling hin sayop.” Diri gud niya karuyag nga umabat kita hin kasubo kon nangangaro kita han iya giya. Ngani, gin-aaghat kita niya nga pangaroon ito ha iya.​—Prob. 2:​1-6.

12. Ano nga mga oportunidad an may-ada kita basi maitutdo ha iba an aton kinaadman?

¹² Kumusta naman kita? Puydi ba naton subaron hi Jehova pinaagi ha pagtutdo ha iba han aton nahibabaroan? (Sal. 32:8) An katawohan ni Jehova may damu nga oportunidad nga isumat kon ano an ira nahibaroan. Pananglitan, agsob nga may-ada kita ginti-train nga mga bag-ohan ha ministeryo. An mga tigurang mapailubon nga nabulig ha mga ministeryal nga mga surugoon ngan ha bawtismado nga mga brother basi mahibaro kon paonan-o bubuhaton an ira asaynment ha kongregasyon. Adton may eksperyensya ha pagpanukod ngan pagmintinar nabulig ha pag-train hadton kulang hin eksperyensya basi mahimo an mga buruhaton ha teokratiko nga mga pasilidad.

13. Kon nagti-train ha iba, paonan-o naton masusubad an paagi ni Jehova ha paghatag hin kinaadman?

¹³ Adton nagti-train ha iba, nagsusubad hin maopay han paagi ni Jehova ha paghatag han iya kinaadman. Hi Jehova hura nga naghahatag hin kinaadman. Sugad man, igintututdo naton ha mga nag-aaram an aton nahibabaroan ngan eksperyensya. Diri naton igintatago an aton pipira nga nahibabaroan tungod la kay nahahadlok kita nga bangin kita saliwnan han aton iti-train. O diri naton susubaron an panhunahuna nga: ‘Waray nag-train ha akon! Salit dapat hiya mahibaro nga hiya la.’ Ito nga disposisyon diri gud puydi ha katawohan ni Jehova. Lugod, nalilipay kita maghatag han aton mga ginti-train diri la hin kahibaro “kondi pati an [aton] mismo kalugaringon.” (1 Tes. 2:8) Naglalaom kita nga ‘hira liwat magigin kwalipikado gud ha pagtutdo ha iba.’ (2 Tim. 2:​1, 2) Kon kita ngatanan hura nga nagtututdo ha iba han aton kinaadman, magigin mas maaramon kita ngan malipayon ngan an iba.

KON AN ATON PAGHATAG BAGA HIN DIRI GIN-AAPRESYAR

14. Ano an reaksyon han kadam-an han aton pagin mahinatagon?

¹⁴ Kon mahinatagon kita labi na ha aton kabugtoan, agsob nga ira ito gin-aapresyar. Bangin maghatag hira hin kard o ipakita an ira pagpasalamat ha iba nga paagi. (Col. 3:15) An pakakarawat han sugad nga mga ekspresyon han apresasyon nakakadugang han aton kalipay.

15. Ano an dapat naton hinumdoman kon an iba diri nagpapahayag han ira apresasyon?

¹⁵ Pero ha reyalidad an pipira diri pirme nagpapakita o nagpapahayag hin pag-apresyar. Bangin danay naghahatag kita han aton panahon, kusog, o panag-iya pero naghuhunahuna kita kon naruyagan ba ito han aton gintagan. Kon nahitatabo ito, ano an puydi naton buhaton basi diri mawara an aton kalipay o masubo? Hinumdumi an mga pulong han aton tema nga teksto ha Buhat 20:35. An aton kalipay ha paghatag diri nakadepende ha reaksyon han aton gintatagan. Puydi naton pilion nga magin malipayon ha paghatag bisan kon baga hin diri ito gin-aapresyar han iba. Paonan-o? Hisgotan naton an pipira nga paagi.

16. Ha ano kita dapat magpokus kon naghahatag?

¹⁶ Pagpokus ha pagsubad kan Jehova. Naghahatag hiya hin mag-opay nga butang ha mga tawo apresyaron man nira ito o diri. (Mat. 5:​43-48) Nagsasaad hi Jehova nga kon maghahatag liwat kita nga “diri naglalaom hin bisan ano nga kabalyo,” “daku an [aton] magigin balos.” (Luc. 6:35) An “bisan ano” mahimo mag-upod hin ekspresyon han apresasyon. Makakarawat man kita o diri, hi Jehova pirme nagbabalos ha aton maopay nga ginbubuhat nga bulig para ha iba tungod han aton ‘malipayon nga paghatag.’—Prob. 19:17; 2 Cor. 9:7.

17. Ano an pinakaimportante nga rason kon kay ano nga naghahatag kita ha iba? (Lucas 14:​12-14)

¹⁷ An usa pa nga butang nga aton mahihimo basi masubad hi Jehova kon naghahatag amo an pag-aplikar han ginsiring ni Jesus ha Lucas 14:​12-14. (Basaha.) Diri sayop an pagin maabiabihon o pagin mahinatagon hadton makakahimo liwat hito ha aton. Pero ano man kon napansin naton nga agsob kita maghatag ha iba kay naglalaom kita nga babalosan kita nira? Maopay gud nga sundon naton an ginsiring ni Jesus. Mahimo kita magin maabiabihon ha usa nga maaram kita nga waray kapasidad nga makabalos ha aton. Ngan magigin malipayon kita kay ginsusubad naton hi Jehova. Ito nga pariho nga panhunahuna mabulig liwat ha aton nga matipigan an aton kalipay kon an iba diri nag-aapresyar.

18. Ano an dapat naton siguruhon nga diri buhaton, ngan kay ano?

¹⁸ Likyi an pagkwestyon han mga motibo han iba. (1 Cor. 13:7) Kon an iba diri nagpapahayag hin pag-apresyar, mahimo naton pakianhan an aton kalugaringon: ‘Diri gud ba hira maapresyaron, o nahingalimot la hira ha pagpahayag han ira apresasyon?’ Bangin may iba nga mga rason kon kay ano nga waray nira maipakita an ira apresasyon sugad han aton ginlalaoman. An iba bangin nag-aapresyar gud pero nakukurian hira nga ipahayag ito. Bangin naaawod hira ha pagkarawat hin bulig, labi na kon ha una hira an nabulig ha iba. Anoman an kahimtang, an Kristiano nga gugma magpapagios ha aton nga diri maghunahuna hin sayop ha aton igkasi-tumuroo ngan padayon kita nga maghahatag nga may kalipay.​—Efe. 4:2.

19-20. Ano pa an makakabulig ha aton nga magin malipayon kon naghahatag ha iba? (Kitaa liwat an piktyur.)

¹⁹ Magin pasensyoso. May kalabotan ha pagin mahinatagon, an maaramon nga hi Hadi Solomon nagsurat: “Ilabog an imo tinapay ha katubigan, kay katapos han damu ka adlaw maaagian mo ito utro.” (Ecles. 11:1) Ini nga mga pulong nagtututdo ha aton nga danay an iba nga tawo bangin magpahayag la han ira apresasyon “katapos han damu ka adlaw.” Pansina an usa nga eksperyensya nga nagpapakita hito.

²⁰ Damu ka tuig na an naglabay, an asawa han paramangno han sirkito naghimo hin makapadasig nga surat para ha bag-o pa la nga nabawtismohan nga sister, nga gin-aaghat hiya nga magpabilin nga matinumanon. Paglabay hin walo ka tuig, an sister nagbalos ha surat nga nasiring: “Inabat ko nga kinahanglan ko magsurat ngan isumat ha imo nga nabuligan mo ako hini nga naglabay nga mga tuig bisan kon diri ka hito maaram.” Nagsiring pa hiya: “[An imo surat] mahigugmaon gud, pero an teksto an nakabantad ha akon kasingkasing, ngan waray ko gud ito mahingalimti.”a Katapos isumat an pipira nga problema nga iya gin-atubang, an sister nagsiring: “May mga panahon nga karuyag ko bumaya, bumaya ha kamatuoran, bumaya ha mga responsabilidad—basta bumaya gud la. Pero an teksto nga imo ginsurat amo an nakabantad gud ha akon kasingkasing, ngan . . . nakapadayon ako.” Nagsiring liwat hiya: “Ha sulod hito nga walo ka tuig, waray gud iba nga may sugad hito nga epekto ha akon.” Imadyina la an kalipay han asawa han paramangno han sirkito han nakarawat niya ini nga surat “katapos han damu ka adlaw”! Kita liwat bangin makakarawat hin mga ekspresyon han apresasyon katapos han maiha nga panahon tikang han iginhatag naton an aton kalugaringon ha pipira nga paagi.

21. Kay ano nga determinado ka nga padayon nga subaron an pagin mahinatagon ni Jehova?

²¹ Sugad han gin-unabi na, ginlarang kita ni Jehova nga may espesyal nga abilidad. Bisan kon nag-i-enjoy kita ha pagkarawat, mas nalilipay kita kon naghahatag kita ha iba. Nalilipay kita kon nakakabulig kita ha aton mga igkasi-tumuroo. Ngan nalilipay kita kon ira iginpapahayag an ira apresasyon. Pero ipahayag man o diri han gintagan an iya apresasyon, mahimo kita magin malipayon nga ginbuhat naton an tama. Ayaw gud hingalimti nga anoman an imo iginhahatag, “hi Jehova makakaghatag ha imo hin mas damu pa.” (2 Cron. 25:9) Salit mas damu gud an naihahatag ni Jehova ha imo kay ha aton naihahatag ha iba! Ngan kon ginbabalosan kita ni Jehova, ito an pinakamaopay gud nga balos. Salit magin determinado kita nga padayon nga subaron an aton mahinatagon nga Amay ha langit.