Diri Gud Kita Nag-uusahan

1-2. (a) Kay ano nga makakasiring kita nga diri gud kita nag-uusahan ha pag-atubang han mga problema? (b) Ano an aton pag-aadman hini nga artikulo?

KON naatubang kita hin magkuri nga problema bangin umabat kita nga baga hin nag-uusahan la kita ha usa nga gutiay nga sakayan ha mabagyo nga dagat. Pero diri gud kita nag-uusahan ha pag-atubang han aton mga problema. An aton Amay ha langit diri la kay nakakakita han aton mga problema kondi nagsasaad liwat hiya nga bubuligan kita niya. Mahigugmaon nga ginpapasarig ni Jehova an iya maunungon nga mga alagad: “Bubuligan ko ikaw.”​—Isa. 41:10.

² Pag-aadman naton hini nga artikulo kon paonan-o kita ginbubuligan ni Jehova (1) pinaagi ha paggiya ha aton, (2) pinaagi ha paghatag han aton mga panginahanglan, (3) pinaagi ha pagprotektar ha aton, ngan (4) pinaagi ha pagliaw ha aton. Ginpapasarig kita ni Jehova nga anoman nga problema an aton atubangon, diri gud kita niya kakalimtan. Ngan diri gud kita niya papabay-an. Salit diri gud kita nag-uusahan.

GIN-GIGIYAHAN KITA NI JEHOVA

3-4. Paonan-o kita gin-gigiyahan ni Jehova? (Salmo 48:14)

³ Basaha an Salmo 48:14. Maaram hi Jehova nga diri naton kaya giyahan an aton kalugaringon. Paonan-o niya gin-gigiyahan yana an iya maunungon nga mga magsiringba? An usa nga paagi nga iya ito ginbubuhat pinaagi han Biblia. (Sal. 119:105) Pinaagi han giniyahan nga Pulong ni Jehova, ginbubuligan kita niya nga makahimo hin mga desisyon ngan magkaada mga kalidad nga mabulig ha aton nga magin mas malipayon yana ngan ha tiarabot nga kinabuhi nga waray kataposan.a Halimbawa, gintututdoan kita niya nga diri magdumot, magin tangkod ha ngatanan naton nga ginbubuhat, ngan higugmaon gud an iba tikang ha kasingkasing. (Sal. 37:8; Heb. 13:18; 1 Ped. 1:22) Kon ipapakita naton ito nga mga kalidad, magigin mas maopay kita nga mga kag-anak, mga asawa, ngan kasangkayan.

⁴ Dugang pa, iginparekord ni Jehova ha iya Pulong an eksperyensya han mga tawo nga may mga problema ngan mga pagbati nga pariho ha aton. (1 Cor. 10:13; San. 5:17) Kon ginbabasa naton ito ngan gin-aaplikar an mga leksyon nga aton nahibaroan, nagpapahimulos kita ha duha nga paagi. Siyahan, nari-realize naton nga diri kita nag-uusahan. Gin-aatubang liwat han iba an pariho nga mga sitwasyon ngan malampuson nga gin-ilob nira ito. (1 Ped. 5:9) Ngan ikaduha, nahibabaro kita nga kayahon an aton mga problema.​—Roma 15:4.

5. Hin-o an gin-gagamit ni Jehova basi giyahan kita?

⁵ Gin-gagamit liwat ni Jehova an aton kabugtoan basi giyahan kita.b Halimbawa, regular nga ginbibisita han mga paramangno han sirkito an mga kongregasyon basi parig-unon kita. An ira mga pahayag nagpaparig-on han aton pagtoo ngan nabulig ha aton nga matipigan an aton pagkaurosa. (Buh. 15:40–16:5) An mga tigurang liwat ha kongregasyon interesado gud ha kaopayan han tagsa nga magwarali. (1 Ped. 5:​2, 3) Gin-gigiyahan naman han mga kag-anak an ira mga anak nga higugmaon hi Jehova ngan kon paonan-o makakahimo hin maaramon nga mga desisyon ngan magkakaada maopay nga pamatasan. (Prob. 22:6) Ngan ginbubuligan han hamtong nga Kristiano nga kababayin-an an burobata nga mga sister pinaagi ha pagpakita hin maopay nga ehemplo, paghatag hin praktikal nga sagdon, ngan pagdasig ha ira.​—Tito 2:​3-5.

6. Ano an dapat naton buhaton basi magpahimulos ha giya ni Jehova?

⁶ Ginbubuhat ni Jehova an iya papel pinaagi ha paghatag ha aton hin giya nga aton kinahanglan. Paonan-o naton maipapakita nga gin-aapresyar naton an iya ginbubuhat para ha aton? An Proberbios 3:​5, 6 nasiring: “Sarig kan Jehova ha imo bug-os nga kasingkasing, ngan ayaw pagtapod ha imo kalugaringon nga pagsabot.” Kon bubuhaton ta ito, “iya tatadungon an [aton] mga aragian.” Karuyag sidngon, bubuligan kita niya nga malikyan an damu nga problema ngan magin mas malipayon. Mapasalamaton gud kita nga gintatagan kita ni Jehova hin mahigugmaon nga giya nga kinahanglan han kada tagsa ha aton!—Sal. 32:8.

GINHAHATAG NI JEHOVA AN ATON MGA PANGINAHANGLAN

7. Ano an pipira nga paagi nga ginhahatag ni Jehova an aton mga panginahanglan? (Filipos 4:19)

⁷ Basaha an Filipos 4:19. Labot pa ha paggiya ha aton ha espirituwal, ginbibendisyonan ni Jehova an aton mga paningkamot nga magkaada pagkaon, bado, ngan mauukyan. (Mat. 6:33; 2 Tes. 3:12) Bisan kon natural la nga mabaraka mahitungod ha aton mga panginahanglan ha pisikal, gin-aaghat kita ni Jehova nga diri sobra nga mabaraka mahitungod hito. (Kitaa an study note ha Mateo 6:25.) Kay ano? Kay diri gud papabay-an han aton Amay an iya matinumanon nga mga magsiringba ha panahon nga nanginginahanglan hira hin bulig. (Mat. 6:8; Heb. 13:5) Bug-os nga makakasarig kita ha iya pulong kon nasiring hiya nga ihahatag niya an aton mga panginahanglan.

8. Ano an ginbuhat ni Jehova para kan David?

⁸ Hunahunaa kon paonan-o ginbuligan ni Jehova hi David. Ha magkuri nga panahon nga nagkikinabuhi hi David sugad nga takas, gintagan hiya ni Jehova ngan an iya mga tawo han ira kinahanglan basi mabuhi. Kon ginhihinumdom ni David an pag-ataman ha iya ni Jehova hito nga panahon, nasiring hiya: “Hadto batan-on pa ako ngan yana lagas na ako, pero waray ako nakita nga bisan hin-o nga matadong nga ginpabay-an, waray liwat magpinamiling hin tinapay an iya mga anak.” (Sal. 37:25) Posible nga nakita mo na liwat kon paonan-o mahigugmaon nga iginhatag ni Jehova an panginahanglan han iya mga alagad.

9. Paonan-o ginhahatag ni Jehova an mga panginahanglan han iya katawohan yana kon may mga kalamidad? (Kitaa liwat an mga piktyur.)

⁹ Ginhahatag liwat ni Jehova an panginahanglan han iya katawohan kon may mga kalamidad. Halimbawa, han nagkaada gutom ha siyahan nga siglo, an mga Kristiano ha iba-iba nga lugar nagpadara hin ayuda ha ira kabugtoan nga nanginginahanglan. (Buh. 11:​27-30; Roma 15:​25, 26) Ginbubuligan liwat yana han katawohan han Dios an ira kabugtoan nga nanginginahanglan. Kon may kalamidad, ginpapagios ni Jehova an iya katawohan basi ihatag an mga ginkikinahanglan sugad han pagkaon, tubig, bado, ngan medisina para hadton naukoy ha apektado nga mga lugar. Gin-aayad han mga team han konstruksyon an naruba nga mga balay ngan Kingdom Hall. Ngan ginhahatag dayon han mga alagad ni Jehova an panginahanglan ha emosyon ngan espirituwal han mga nawad-an hin balay o namatyan hin hinigugma.c

10-11. Ano nga leksyon an imo mahibabaroan ha eksperyensya ni Borys?

¹⁰ Mahinatagon liwat hi Jehova bisan hadton diri nagsisingba ha iya. Ha pariho nga paagi, namimiling kita hin mga oportunidad nga magin buotan bisan ha diri naton igkasi-tumuroo. (Gal. 6:10) Tungod hito, bangin mabuligan naton hira nga mas mahibaro pa mahitungod ha aton ngan kan Jehova. Pansina an eksperyensya ni Borys, usa nga prinsipal ha eskwelahan, nga taga-Ukraine. Bisan kon diri Saksi hi Borys, pirme niya gintatratar hin buotan an iya mga estudyante nga Saksi ngan ginrirespeto an ira mga gintotoohan. Tungod han girra, nagdesisyon hi Borys nga bumaya ha iya gin-uukyan ngan bumalhin ha mas safe nga lugar han nasud, ngan ginbuligan hiya han aton kabugtoan. Ha urhi, inatender hi Borys ha Memoryal han kamatayon han Kristo. Han ginhihinumdom ni Borys an iya eksperyensya, nagsiring hiya: “Buotan gud an mga Saksi ngan gin-ataman nira ako. Nagpapasalamat gud ako ha mga Saksi ni Jehova.”

¹¹ Masusubad liwat naton an aton maloloy-on nga Amay ha langit pinaagi ha pagpakita hin gugma ha mga nanginginahanglan, igkasi-tumuroo man naton hira o diri. (Luc. 6:​31, 36) Naglalaom kita nga an aton mga paningkamot nga higugmaon an mga tawo magriresulta nga magin mga disipulo hira han Kristo. (1 Ped. 2:12) Pero anoman an magin resulta, magigin malipayon kita tungod ha pagin mahinatagon.​—Buh. 20:35.

GINPUPROTEKTARAN KITA NI JEHOVA

12. Ano nga proteksyon an ginsaad ni Jehova ha iya katawohan sugad nga grupo? (Salmo 91:​1, 2, 14)

¹² Basaha an Salmo 91:​1, 2, 14. Yana, nagsasaad hi Jehova nga puproteksyonan kita niya ha espirituwal. Diri gud niya tutugotan hi Satanas nga hugawan an tinuod nga pagsingba. (Juan 17:15) Ngan kon umabot na an “daku nga kasakitan,” makakasiguro gud kita nga tutumanon ni Jehova an iya saad ha pagprotektar ha iya katawohan diri la kay ha espirituwal kondi pati liwat ha pisikal.​—Pah. 7:​9, 14.

13. Ha ano nga mga paagi ginpuproteksyonan ni Jehova an kada usa ha aton?

¹³ Paonan-o ginpuproteksyonan ni Jehova an kada usa ha aton? Pinaagi han Biblia, ginbubuligan kita ni Jehova nga masabtan kon ano an tama ngan sayop. (Heb. 5:14) Kon nagkikinabuhi kita ha mga prinsipyo nga mababasa ha Pulong han Dios, ginpuprotektaran naton an aton kalugaringon ha espirituwal ngan ha pisikal nga kadaot. (Sal. 91:4) Ginpuprotektaran liwat kita ni Jehova pinaagi han kongregasyon. (Isa. 32:​1, 2) Pinaagi han aton pakig-upod ha mga nahigugma kan Jehova ngan nagkikinabuhi uyon ha iya mga prinsipyo, nakakakarawat kita hin pagdasig ngan napaparig-on nga isalikway an maraot nga mga impluwensya.​—Prob. 13:20.

14. (a) Kay ano nga diri kita ginpuprotektaran ni Jehova ha ngatanan naton nga problema? (b) Ano an iginpapasarig ha aton han Salmo 9:10? (Kitaa liwat an footnote.)

¹⁴ Han naglabay, may mga panahon nga ginpuprotektaran ni Jehova an iya mga magsiringba. Pero diri ito niya pirme ginbubuhat. Usahay, nagigin biktima kita han “diri ginlalaoman nga mga hitabo.” (Ecles. 9:11) Gintugotan liwat ni Jehova nga pagtimarauton ngan mamatay pa ngani an iya mga surugoon hadto basi mapamatud-an nga buwaon hi Satanas. (Job 2:​4-6; Mat. 23:34) Tinuod liwat ito yana. Bisan kon bangin diri man tanggalon ni Jehova an aton mga problema, makakasiguro kita nga diri gud niya papabay-an an mga nahigugma ha iya.d—Sal. 9:10.

GINLILIAW KITA NI JEHOVA

15. Paonan-o kita naliliaw pinaagi han pag-ampo, han Pulong han Dios, ngan han aton mga igkasi-Kristiano? (2 Corinto 1:​3, 4, ftn.)

¹⁵ Basaha an 2 Corinto 1:​3, 4, ftn. Danay nabibido kita, nababaraka, o nai-istres. Posible nga naatubang ka yana hin nakakaistres nga sitwasyon nga tungod hito inaabat mo nga nag-uusahan ka la. May nakakaintindi ba han imo inaabat? May-ada, hi Jehova. Diri la kay inaabat niya an aton kasakit, kondi “nagliliaw [liwat hiya] ha aton ha ngatanan naton nga kasakitan.” Paonan-o? Kon nangangamuyo kita kan Jehova, tatagan kita niya han “kamurayawan han Dios nga labaw ha ngatanan nga pagsabot.” (Fil. 4:​6, 7) Naliliaw liwat kita kon ginbabasa naton ha Biblia an mga pulong ni Jehova para ha aton. An iya gugma, kinaadman, ngan paglaom nga iginsusumat hito nakakaliaw ha aton. Ngan an aton mga katirok nagliliaw liwat ha aton kay nakakaupod naton an aton kabugtoan ngan nakakabati kita hin mga pagdasig tikang ha Biblia.

16. Ano nga leksyon an imo mahibabaroan ha eksperyensya nira Nathan ngan Priscilla?

¹⁶ Makikita naton kon paonan-o hi Jehova nagliliaw ngan nagdadasig pinaagi ha Biblia ha eksperyensya nira Nathan ngan Priscilla, nga taga-United States. Mga tuig na an naglabay, nagdesisyon hira nga bumalhin ha lugar diin may mas daku nga panginahanglan hin mga magwarali. “Sinarig kami nga bibendisyonan ni Jehova an amon mga paningkamot,” siring ni Nathan. Pero han nakadto na hira ha ira bag-o nga asaynment, inatubang hira hin diri ginlalaoman nga mga problema ha kahimsog ngan ha pinansyal. Ha urhi, inuli hira pero padayon la gihapon hira nga nagkaada problema ha pinansyal. “Nahunahuna ko kon kay ano nga waray kami bendisyoni han Dios sugad han amon ginlalaoman,” siring ni Nathan. “Naghunahuna lugod ako kon may nabuhat ba ako nga sayop.” Pero paglabay han panahon, na-realize nira Nathan ngan Priscilla nga waray hira pabay-i han Dios han nanginginahanglan hira hin bulig. “Hiton magkuri nga panahon, an Biblia nagin sugad hin maaramon nga sangkay nga nagdadasig ngan naggigiya ha amon,” siring ni Nathan. “An pagpokus ha kon paonan-o kami ginbuligan ni Jehova nga mailob an mga kakurian nag-andam ha amon nga atubangon an tiarabot nga mga kakurian nga may pagtoo imbes nga magpokus ha mga kakurian mismo.”

17. Paonan-o naliaw an sister nga hi Helga? (Kitaa liwat an piktyur.)

¹⁷ Maliliaw liwat kita han aton kabugtoan. Paonan-o? Pansina an eksperyensya ni Helga, nga taga-Hungary. Ha sulod hin damu ka tuig, inatubang hiya hin iba-iba nga problema salit inabat hiya hin kabaraka ngan kawaray-pulos. Pero kon ginhihinumdom niya ito, nakikita niya kon paonan-o hiya ginliaw ni Jehova pinaagi han kongregasyon. Hiya nagsurat: “Pirme ako ginbubuligan ni Jehova kon nakikita niya nga nanluluya ako tungod han akon trabaho, pag-ataman ha akon anak nga may sakit, ngan iba pa nga problema. Waray bisan usa ka adlaw hito nga 30 ka tuig nga waray niya tumana an iya saad nga liliawon niya ako. Agsob niya ako parig-unon pinaagi han mga pulong tikang ha iba. Agsob ako makakarawat hin text, kard, o kumendasyon ha panahon nga kinahanglan ko gud ito.”

18. Paonan-o naton maliliaw an iba?

¹⁸ May-ada kita pribilehiyo nga subaron an aton Dios pinaagi ha pagliaw ha iba. Paonan-o naton ito mahihimo? Puydi naton hira pasensyoso nga pamatian, kaistoryahon, ngan buligan ha praktikal nga mga paagi. (Prob. 3:27) Naniningkamot kita nga liawon an ngatanan nga nag-aantos, upod na adton diri nag-aalagad ha Dios. Kon an aton igkasi-tawo nabibido, may sakit, o nababaraka, aton hira ginbibisita, ginpapamatian, ngan ginpaparig-on pinaagi han mga teksto ha Biblia. Kon ginsusubad naton hi Jehova, “an Dios han ngatanan nga pagliaw,” unta buligan naton diri la an aton mga igkasi-tumuroo nga mailob an ira mga problema kondi pati liwat an mga diri nag-aalagad ha Dios basi maruyag hira nga mahibaro mahitungod ha iya.​—Mat. 5:16.

PIRME AADA HI JEHOVA PARA HA ATON

19. Ano an ginbubuhat ni Jehova para ha aton, ngan paonan-o naton hiya masusubad?

¹⁹ Interesado gud hi Jehova ha ngatanan nga nahigugma ha iya. Diri kita niya ginpapabay-an kon may-ada kita mga problema. Sugad la nga mahigugmaon nga gin-aataman han kag-anak an iya anak, gin-aataman liwat ni Jehova an iya matinumanon nga mga magsiringba. Iya kita gin-gigiyahan, gintatagan han aton mga panginahanglan, ginpuprotektaran, ngan ginliliaw. Ginsusubad naton an aton mahigugmaon nga Amay ha langit kon ginbubuligan ngan ginpaparig-on naton an iba kon may mga problema hira. Bisan pa kon makaeksperyensya kita hin mga problema ngan mga kasakit, makakasiguro kita nga kaupod naton hi Jehova. Ngani, nagsasaad hiya: “Ayaw kahadlok, kay kaupod mo ako.” (Isa. 41:10) Nagpapasarig gud ini ha aton! Diri gud kita nag-uusahan.