“Kamo an Pagpili . . . Kon kan Kanay Kamo Mag-aalagad”

1. Ano an dapat naton buhaton basi magin tinuod nga malipayon, ngan kay ano? (Isaias 48:​17, 18)

HINIGUGMA gud kita han aton Amay ha langit, ngan karuyag niya nga magkaada kita malipayon nga kinabuhi yana ngan ha tiarabot. (Ecles. 3:​12, 13) Ginlarang kita niya nga may mag-opay nga talento, pero waray kita niya tagi hin abilidad nga mandoan an aton kalugaringon o magdesisyon para ha aton kalugaringon kon ano an tama ngan sayop. (Ecles. 8:9; Jer. 10:23) Maaram hiya nga basi magin tinuod kita nga malipayon, dapat kita mag-alagad ha iya, ngan magkinabuhi uyon ha iya mga prinsipyo.​—Basaha an Isaias 48:​17, 18.

2. Ano an karuyag ni Satanas nga toohan naton, pero ano an ginbuhat ni Jehova?

² Karuyag ni Satanas nga tumoo kita nga puydi kita magin malipayon bisan kon waray hi Jehova, nga puydi magin malampuson an mga tawo ha pagmando ha ira kalugaringon. (Gen. 3:​4, 5) Ginbaton ni Jehova ito nga kabuwaan pinaagi ha pagtugot ha rebelyoso nga mga tawo nga mandoan an ira kalugaringon ha limitado nga panahon. Klaro nga nakikita naton nga pakyas an pagmando han tawo. Ha luyo nga bahin, damu an ehemplo ha Biblia han kalalakin-an ngan kababayin-an nga nagin malipayon ha pag-alagad kan Jehova. An pinakamalipayon ha ira amo hi Jesu-Kristo. Siyahan, kitaon naton an mga rason kon kay ano nga ginpili niya nga mag-alagad kan Jehova. Katapos, uusisahon naton kon kay ano nga dapat naton singbahon an aton langitnon nga Amay. Ha urhi, rirepasuhon naton an pipira nga rason kon kay ano nga ginpili naton nga mag-alagad kan Jehova.

KON KAY ANO NGA GINPILI NI JESUS NGA MAG-ALAGAD KAN JEHOVA

3. Ano an ihahatag ni Satanas kan Jesus kon magsingba hiya ha iya, ngan ano an ginpili ni Jesus?

³ Han nakadi hi Jesus ha tuna, kinahanglan hiya magpili kon hin-o an iya sisingbahon. Waray pag-iha katapos han bawtismo ni Jesus, nagsiring hi Satanas ha iya nga ihahatag ha iya an ngatanan nga ginhadian ha tuna kon maghihimo hiya hin bisan usa la nga buhat han pagsingba kan Satanas. Binaton hi Jesus: “Iwas, Satanas! Kay nahisurat na: ‘Hi Jehova nga imo Dios an kinahanglan mo singbahon, ngan hiya gud la an kinahanglan mo tagan hin sagrado nga pag-alagad.’” (Mat. 4:​8-10) Kay ano nga ito an ginpili ni Jesus? Kitaon ta an pipira nga rason.

4-5. Ano an pipira nga rason nga ginpili ni Jesus nga mag-alagad kan Jehova?

⁴ An nangunguna nga rason nga ginpili ni Jesus nga mag-alagad kan Jehova amo an gugma. May-ada hi Jesus hilarom nga gugma ha iya Amay ngan presyoso ha iya an iya Amay. (Juan 14:31) Dugang pa, nag-aalagad hi Jesus kan Jehova kay ito an tama. (Juan 8:​28, 29; Pah. 4:11) Maaram hiya nga hi Jehova an gintitikangan han kinabuhi ngan masasarigan Hiya ngan mahinatagon. (Sal. 33:4; 36:9; San. 1:17) Hi Jehova pirme nagyayakan hin kamatuoran kan Jesus ngan gintagan niya hi Jesus han ngatanan nga may-ada hiya. (Juan 1:14) Ha kabaliktaran naman, tungod kan Satanas nagkaada kamatayon. Buwaon hiya kay hakog hiya ngan makikalugaringon. (Juan 8:44) Tungod kay maaram hi Jesus hito nga mga kamatuoran, waray gud hiya maghunahuna nga subaron hi Satanas ha pagrebelde kan Jehova.​—Fil. 2:​5-8.

⁵ An usa pa nga rason nga ginpili ni Jesus nga mag-alagad kan Jehova kay ginpapamulat niya an magigin resulta han iya maunungon nga pag-alagad. (Heb. 12:2) Maaram hiya nga kon magpapabilin hiya nga matinumanon, mababaraan niya an ngaran han iya Amay ngan mawawara an sala ngan kamatayon.

KON KAY ANO NGA DAPAT NATON SINGBAHON HI JEHOVA

6-7. Kay ano nga damu yana an diri nag-aalagad kan Jehova, pero kay ano nga dapat naton hiya singbahon?

⁶ Damu yana an diri nag-aalagad kan Jehova kay waray pa nira mahibaroi an iya magpakaruruyag nga kalidad, ngan diri hira maaram han ngatanan nga ginbuhat na niya para ha ira. Tinuod ito, pariho ha mga ginsangyawan ni Pablo ha Atenas.​—Buh. 17:​19, 20, 30, 34.

⁷ Iginsaysay ni Pablo ha iya mga mamarati nga an tinuod nga Dios “naghahatag ha ngatanan nga tawo hin kinabuhi ngan gininhawa ngan han ngatanan nga butang.” Nagsiring pa hiya: “Pinaagi ha iya may kinabuhi kita ngan nagkikiwa ngan naeksister.” An Dios an Maglalarang, nga “tikang ha usa nga tawo ginhimo niya an tagsa nga nasud han mga tawo,” salit hiya gud la an dapat naton singbahon.​—Buh. 17:​25, 26, 28.

8. Ano an diri gud bubuhaton ni Jehova? Isaysay.

⁸ Sugad nga Maglalarang ngan Soberano ha bug-os nga uniberso, puydi piriton ni Jehova nga mag-alagad ha iya an mga tawo. Pero diri gud ito bubuhaton ni Jehova. Lugod, gintagan kita niya hin damu nga ebidensya nga tinuod hiya, ngan hinigugma gud niya an kada tagsa ha aton. Karuyag niya magin sangkay an pinakadamu nga tawo tubtob nga posible ha waray kataposan. (1 Tim. 2:​3, 4) Salit gin-train kita niya nga tutdoan an iba mahitungod han iya mga katuyoan ngan sumatan hira mahitungod han mag-opay nga butang nga iya hihimoon para ha mga tawo. (Mat. 10:​11-13; 28:​19, 20) Ngan nag-organisar hiya hin mga kongregasyon diin puydi kita magsingba ha iya ngan makarawat an bulig tikang ha mahigugmaon nga mga tigurang.​—Buh. 20:28.

9. Ha ano nga mga paagi iginpapakita ni Jehova an iya gugma ha ngatanan nga tawo?

⁹ An gugma ni Jehova klaro nga nakikita ha paagi han iya pagtratar ha mga diri natoo nga tinuod hiya. Hunahunaa ini: Ha bug-os nga kasaysayan, binilyon nga tawo an nagdesisyon nga buhaton an ira ginhuhunahuna nga tama ngan sayop. Bisan pa hito, mahigugmaon nga gintagan hira ni Jehova han ira kinahanglan basi mabuhi ngan malipay. (Mat. 5:​44, 45; Buh. 14:​16, 17) Gintagan niya hira hin kapasidad nga magkaada mahigugmaon nga kasangkayan ngan pamilya, ngan magkaada mga anak, trabaho, ngan ma-enjoy an ira kinabuhi. (Sal. 127:3; Ecles. 2:24) Klaro nga iginpapakita hito nga ebidensya nga hinigugma han aton Amay ha langit an ngatanan nga tawo. (Ex. 34:6) Yana, hunahunaon naton an pipira nga rason kon kay ano nga ginpili naton nga mag-alagad kan Jehova ngan kon paonan-o kita niya ginbibendisyonan.

KON KAY ANO NGA GINPILI NATON NGA MAG-ALAGAD KAN JEHOVA

10. (a) Ano an nangunguna nga rason nga nag-aalagad kita kan Jehova? (Mateo 22:37) (b) Paonan-o ka nagpapahimulos ha pagin pasensyoso ni Jehova? (Salmo 103:​13, 14)

¹⁰ Pariho kan Jesus, an nangunguna nga rason nga nag-aalagad kita kan Jehova amo an aton hilarom nga gugma ha Iya. (Basaha an Mateo 22:37.) Inaabat naton nga nagigin duok kita kan Jehova kon nahibabaroan naton an iya mga kalidad. Halimbawa, pasensyoso ha aton hi Jehova. Han waray hiya sugta han mga Israelita, nakimalooy hiya ha ira: “Alayon bayai niyo an iyo magraot nga mga panggawi.” (Jer. 18:11) Nahinunumdoman ni Jehova nga diri kita perpekto, nga tapotapo kita. (Basaha an Salmo 103:​13, 14.) Kon ginhuhunahuna mo hin maopay an pagin pasensyoso ni Jehova ngan an iba pa niya nga mag-opay nga kalidad, di’ ba napapagios ka nga mag-alagad ha iya ha waray kataposan?

11. Ano an iba pa nga rason nga ginpili naton nga mag-alagad ha aton Amay ha langit?

¹¹ Napapagios liwat kita nga mag-alagad kan Jehova kay ito an tama. (Mat. 4:10) Dugang pa, maaram kita nga an aton maunungon nga pag-alagad magkakaada mag-opay nga resulta. An aton matinumanon nga pag-alagad kan Jehova makakabulig nga mabaraan an iya ngaran, mapalipay hiya, ngan mapamatud-an nga buwaon an Yawa. Ngan kon pilion naton yana nga mag-alagad kan Jehova, may paglaom kita nga mag-alagad ha iya ha waray kataposan!—Juan 17:3.

12-13. Ano nga leksyon an aton mahibabaroan ha eksperyensya nira Jane ngan Pam?

¹² Samtang bata pa, puydi kita magkaada hilarom nga gugma kan Jehova—an gugma nga nagtitikahilarom samtang nagtitikalagas kita. Pansina an eksperyensya han magbugto nga hira Jane ngan Pam.a Hi Jane 11 anyos ngan hi Pam naman 10 anyos han nagpa-Bible study hira. Bisan kon an ira mga kag-anak diri interesado magpa-study, ira gintugotan hira Jane ngan Pam nga makig-upod ha mga Saksi basta masingba la gihapon hira kada weekend kaupod an ira pamilya. Hi Jane nagsiring: “An igintutdo han mga Saksi nga tikang ha Biblia nakabulig ha akon nga diri magpapresyur ha akon kasangkayan nga magdroga ngan mag-imoral.”

¹³ Paglabay hin pipira ka tuig, nagin magwarali hira. Ha urhi, nagpayunir hira samtang ira gin-aataman an ira nagtitikalagas na nga mga kag-anak. Han ginhihinumdom nira an ira eksperyensya, nagsiring hi Jane: “Nahibaroan ko mismo nga matinumanon nga gin-aataman ni Jehova an iya kasangkayan sugad han ginsisiring han 2 Timoteo 2:​19, ‘Kilala ni Jehova kon hin-o an iya.’” Klaro nga gin-aataman ni Jehova adton nagpili nga higugmaon ngan singbahon hiya!

14. Paonan-o an aton mga pulong ngan buhat mabulig nga mawara an pagpasipara ha ngaran ni Jehova? (Kitaa liwat an mga piktyur.)

¹⁴ Karuyag naton nga bumulig nga mawara an ngatanan nga pagpasipara ha ngaran ni Jehova. Hunahunaa ini nga sitwasyon: May duok ka nga sangkay nga buotan, mahinatagon, ngan mapinasayloon. Pero usa ka adlaw, may nabatian ka nga nag-akusar ha imo sangkay nga madarahog hiya ngan buwaon. Ano an imo bubuhaton? Didepensahan mo hiya. Ha pariho nga paagi, kon makabati kita hin mga buwa mahitungod kan Jehova, didepensahan naton hiya pinaagi ha pagsumat hin kamatuoran mahitungod ha iya. (Sal. 34:1; Isa. 43:10) Iginpapakita naton nga karuyag naton mag-alagad kan Jehova ha bug-os nga kalag pinaagi han aton mga pulong ngan buhat.

15. Paonan-o nagpahimulos hi apostol Pablo han naghimo hiya hin mga pagbag-o ha iya kinabuhi? (Filipos 3:​7, 8)

¹⁵ Andam kita nga maghimo hin mga pagbag-o ha aton kinabuhi basi mapalipay hi Jehova o mas damu an mahimo ha pag-alagad ha iya. Halimbawa, ginpili ni Pablo nga bayaan an iya maopay nga posisyon ha iya komunidad basi magin disipulo han Kristo ngan mag-alagad kan Jehova. (Gal. 1:14) Salit nagkaada hiya malampuson nga kinabuhi ngan nakarawat an oportunidad nga magmando kaupod han Kristo ha langit. Waray gud niya pagbasuli an iya desisyon nga mag-alagad kan Jehova, ngan diri liwat kita magbabasol.​—Basaha an Filipos 3:​7, 8.

16. Ano an aton mahibabaroan nga leksyon ha eksperyensya ni Julia? (Kitaa liwat an mga piktyur.)

¹⁶ Kon an aton nangunguna nga pokus amo an pag-alagad kan Jehova, magkakaada kita malipayon nga kinabuhi yana ngan ha tiarabot. Pansina an eksperyensya han sister nga hi Julia. Han bata pa hi Julia, antes hiya mahibaro han kamatuoran, kaapi hiya ha choir han singbahan. Usa nga propesyonal nga opera singer an nakapansin han iya talento ngan gin-train hiya. Waray pag-iha, nagin sikat hi Julia ngan nagkanta hiya ha kilalá nga mga music hall. Samtang naeskwela hiya ha sikat nga music school, may klasmeyt hiya nga nakiistorya ha iya mahitungod ha Dios ngan iginsaysay ha iya nga may ngaran an Dios, hi Jehova. Waray pag-iha katapos hito, nagpa-study hi Julia hin duha ka beses kada semana. Ha urhi, nagdesisyon hiya nga magpokus ha pag-alagad kan Jehova imbes nga abuton an iya pangarap nga magin opera singer. Diri masayon ito nga desisyon. “Damu nga tawo an nasiring ha akon nga ginkakaragan ko la an akon talento,” siring niya, “pero karuyag ko gamiton an akon bug-os nga kinabuhi ha pag-alagad kan Jehova.” Ano an iya inaabat yana mahitungod han iya nagin desisyon sobra 30 ka tuig na an naglabay? “Malipayon ako nga ginpili ko nga mag-alagad kan Jehova, ngan maaram ako nga ha tiarabot ihahatag niya an ngatanan nga hingyap han akon kasingkasing.”​—Sal. 145:16.

PADAYON NGA MAG-ALAGAD KAN JEHOVA

17. Tungod kay nabubuhi kita ha sistema nga hirani na an kataposan, paonan-o ito nakakaapekto hadton nagpili nga mag-alagad ha Dios ngan hadton waray pa?

¹⁷ Nabubuhi kita ha sistema nga hirani na gud an kataposan. Hi apostol Pablo nagsurat: “Kay ha ‘diri na gud mag-iiha,’ ngan ‘hiya nga tipakanhi maabot ngan diri maglalangan.’” (Heb. 10:37) Paonan-o ito nakakaapekto ha aton? Gutiay na la nga panahon an nahibibilin para ha mga tawo nga pilion nga mag-alagad kan Jehova. (1 Cor. 7:29) Bisan kon nagdesisyon na kita nga mag-alagad ha Dios, maaram kita nga mag-iilob kita hin mga problema pero ‘diri gud la ito mag-iiha.’

18. Ano an karuyag ipabuhat ni Jesus ngan ni Jehova ha aton?

¹⁸ Gin-aghat ni Jesus an iya mga disipulo nga diri la nga basta sumunod ha iya, kondi padayon liwat nga sumunod ha iya. (Mat. 16:24) Salit kon maiha na kita nga nag-aalagad kan Jehova, unta magin determinado kita nga magpadayon. Kinahanglan maningkamot kita nga padayon nga magkinabuhi uyon ha aton desisyon nga mag-alagad ha iya. Bangin diri ito masayon, pero bisan yana mahimo kita magin malipayon ngan mapahimulsan an damu nga bendisyon!—Sal. 35:27.

19. Ano nga leksyon an aton mahibabaroan ha eksperyensya ni Gene?

¹⁹ Inaabat han iba nga an pag-alagad kan Jehova nagkikinahanglan hin daku nga sakripisyo. Kon usa ka nga batan-on, inaabat mo ba nga may mawawara ha imo kon mag-aalagad ka kan Jehova? An batan-on nga brother nga hi Gene nagsiring: “Inabat ko nga damu an bawal han pagin usa han mga Saksi ni Jehova. Baga hin damu nga kaedad ko an nag-i-enjoy han mga butang sugad han pag-party, pakig-date, o pag-uyag hin bayolente nga video game, pero ako naman kinahanglan umatender ha mga katirok ngan magsangyaw.” Paonan-o ito nakaapekto kan Gene? Siring niya, “Nagkaada ako doble nga pagkinabuhi ngan nagin malipayon hin madaliay. Pero waray ako magin tinuod nga malipayon. Nahunahuna ko an mga kamatuoran ha Biblia nga ginbalewaray ko hadto, ngan nagdesisyon ako nga mag-alagad kan Jehova hin bug-os-kasingkasing. Katapos tikang hito, baga hin ginbaton ni Jehova an tanan ko nga pag-ampo.”

20. Ano an dapat naton magin determinasyon?

²⁰ An salmista nagkanta kan Jehova: “Malipayon hiya nga imo ginpipili ngan ginpapahirani ha imo basi umukoy ha imo mga bungsaran.” (Sal. 65:4) Unta padayon kita nga magkaada determinasyon pariho han ginsiring ni Josue: “Para ha akon ngan ha akon panimalay, mag-aalagad kami kan Jehova.”​—Jos. 24:15.