Kon Ano Kaimportante ha Aton an Ngaran ni Jehova

1-2. Kay ano nga makakasiring kita nga importante kan Jesus an ngaran ni Jehova?

AN NGARAN ni Jehova amo an pinakaimportante kan Jesus. Hiya an nangunguna nga persona nga nagpakilala han ngaran han iya Amay. Sugad han iginpakita ha naglabay nga artikulo, kinaburut-on hi Jesus nga namatay para ha ngaran ni Jehova ngan ha ngatanan nga ginrirepresentaran hito. (Mar. 14:36; Heb. 10:​7-9) Ngan katapos han Usa ka Yukot ka Tuig nga Pagmando ni Jesus, kinaburut-on nga ibabalik niya an ngatanan nga awtoridad tungod kay karuyag niya nga ihatag kan Jehova an ngatanan nga himaya. (1 Cor. 15:​26-28) An gugma liwat ni Jesus ha ngaran han Dios nagsusumat hin damu mahitungod ha iya relasyon ha iya Amay. Iginpapakita hito nga sigurado gud nga hinigugma ni Jesus an Persona nga ginrirepresentaran hito nga ngaran.

² Kinanhi hi Jesus ha tuna ha ngaran han iya Amay. (Juan 5:43; 12:13) Iginpakilala niya ha iya mga sumurunod an ngaran han iya Amay. (Juan 17:​6, 26) Nagtutdo hiya ha ngaran ni Jehova ngan naghimo hin mga milagro pinaagi hito nga ngaran. (Juan 10:25) Ngani, naghangyo hi Jesus kan Jehova nga bantayan an iya mga disipulo “para ha [Iya] mismo ngaran.” (Juan 17:11) Klaro nga para kan Jesus, mas importante kay ha bisan ano an ngaran ni Jehova. Salit paonan-o an usa makakasiring nga nasunod hiya kan Jesus nga diri ngani hiya maaram o nagamit han ngaran han Amay ni Jesus?

3. Ano an aton pag-aadman hini nga artikulo?

³ Sugad nga mga Kristiano, nga naniningkamot nga sundon an mga pitad ni Jesus, importante ha aton an ngaran han iya Amay. (1 Ped. 2:21) Hini nga artikulo, mahibabaroan naton kon kay ano nga iginhatag ni Jehova an iya ngaran ha mga nagsasangyaw han “maopay nga sumat han Ginhadian.” (Mat. 24:14) Pag-aadman ta liwat kon ano dapat kaimportante ha aton sugad nga indibiduwal an ngaran ni Jehova.

“KATAWOHAN NGA MAGDADARA HAN IYA NGARAN”

4. (a) Ano an ginsiring ni Jesus ha iya mga disipulo antes hiya bumalik ha langit? (b) Ano nga pakiana an nabangon tungod hito nga iya ginsiring?

⁴ Antes gud la bumalik hi Jesus ha langit, nagsiring hiya ha iya mga disipulo: “Makarawat kamo hin gahum kon an baraan nga espiritu kumada na ha iyo, ngan magigin mga saksi ko kamo ha Jerusalem, ha bug-os nga Judea ngan Samaria, ngan ngadto ha pinakahirayo nga bahin han tuna.” (Buh. 1:8) Salit an maopay nga sumat isasangyaw ha bisan diin, diri la kay ha Israel. Ha urhi, an mga tawo ha ngatanan nga nasud magkakaada oportunidad nga magin mga sumurunod ni Jesus. (Mat. 28:​19, 20) Pero nagsiring hi Jesus: “Magigin mga saksi ko kamo.” Kinahanglan pa ba hini nga bag-o nga mga disipulo nga mahibaro han ngaran ni Jehova, o magigin mga saksi la hira ni Jesus? An mga panhitabo nga gin-unabi ha Buhat kapitulo 15 mabulig ha aton nga mabaton ito nga pakiana.

5. Paonan-o iginpakita han mga apostol ngan han katigurangan ha Jerusalem nga an ngatanan nga katawohan dapat kumilala han ngaran ni Jehova? (Kitaa liwat an piktyur.)

⁵ Han 49 C.E., an mga apostol ngan katigurangan ha Jerusalem nagkatirirok basi pag-iristoryahan kon ano an dapat buhaton han diri turi nga mga Hentil basi karawaton sugad nga mga Kristiano. Han matatapos na an ira pag-iristorya, hi Santiago, nga bugto ni Jesus ha nanay, nagsiring: “Iginsumat hin bug-os ni [Pedro] kon paonan-o an Dios naghatag hin atensyon ha mga nasud ha siyahan nga higayon basi magkuha ha ira hin katawohan nga magdadara han iya ngaran.” Kan kanay ngaran an ginsisiring ni Santiago? Ginkotar niya an ginsiring ni propeta Amos: “Basi an nanhibilin nga mga tawo mamiling gud kan Jehova, upod an mga tawo han ngatanan nga nasud, an mga tawo nga gintatawag ha akon ngaran, nasiring hi Jehova.” (Buh. 15:​14-18) Labot la ha paghibaro mahitungod kan Jehova, ini nga bag-o nga mga disipulo dapat liwat ‘tawagon ha iya ngaran.’ Nagpapasabot ito nga gindadara nira an ngaran han Dios ngan ginrirepresentaran nira ito nga ngaran.

6-7. (a) Kay ano nga kinanhi hi Jesus ha tuna? (b) Ano an iba pa nga mas importante nga rason nga kinanhi hi Jesus ha tuna?

⁶ An ngaran ni Jesus nagpapasabot hin “Hi Jehova an Katalwasan,” ngan iya ginpamatud-an nga hiya an gin-gamit ni Jehova basi matalwas an ngatanan nga nagpapakita hin pagtoo. Kinanhi hi Jesus ha tuna basi ihatag an iya kalugaringon ha katawohan. (Mat. 20:28) Pinaagi ha pagbayad han lukat, ginhimo niya nga posible para ha katawohan nga matalwas ngan magkaada kinabuhi nga waray kataposan.​—Juan 3:16.

⁷ Pero kay ano man nga an mga tawo nagkikinahanglan hin lukat? Tungod han nahitabo ha garden han Eden. Sugad han gin-unabi ha nauna nga artikulo, an orihinal nga mga kag-anak han katawohan, hira Adan ngan Eva, nagrebelde kan Jehova salit nawara nira an oportunidad nga mabuhi ha waray kataposan. (Gen. 3:​6, 24) Pero labot ha katalwasan han magpakasasala nga katawohan, may-ada pa mas importante nga rason. Ginpakaraot an ngaran ni Jehova. (Gen. 3:​4, 5) Salit an katalwasan han mga tulin nira Adan ngan Eva konektado ha mas daku nga isyu—an pagbaraan han ngaran ni Jehova. Tungod kay nagrepresentar hi Jesus kan Jehova ngan nagdadara hiya han Iya ngaran, may importante hiya nga papel ha pagbaraan han ngaran ni Jehova.

8. Ano an dapat akseptaron han ngatanan nga natoo kan Jesus?

⁸ An ngatanan nga nagpapakita hin pagtoo kan Jesus, Judio man o Hentil, dapat kumilala han gintitikangan han ira katalwasan nga amo an Amay ni Jesus, hi Jehova nga Dios. (Juan 17:3) Pariho kan Jesus, tatawagon liwat hira ha ngaran ni Jehova. Dapat liwat nira kilalahon an pagkaimportante han pagbaraan hito nga ngaran, kay nakadepende hito an ira katalwasan. (Buh. 2:​21, 22) Salit an ngatanan nga matinumanon nga sumurunod ni Jesus dapat mahibaro mahitungod kan Jehova, pati kan Jesus. Makikita naton kon kay ano nga gintapos ni Jesus an iya pag-ampo nga nakarekord ha Juan 17 ha sugad hini nga paagi: “Iginpakilala ko ha ira an imo ngaran ngan igpapakilala ko pa ito, basi magkaada hira han gugma nga iginpakita mo ha akon ngan ako magin kahiusa nira.”​—Juan 17:26.

“KAMO AN AKON MGA SAKSI”

9. Paonan-o naton maipapakita nga importante ha aton an ngaran ni Jehova?

⁹ An ngatanan nga tinuod nga sumurunod ni Jesus dapat magin interesado ha pagbaraan han ngaran ni Jehova. (Mat. 6:​9, 10) Dapat nira hunahunaon nga an ngaran ni Jehova amo an pinakaimportante ha ngatanan. Dapat nakikita ito ha ira buhat. Pero paonan-o kita magkakaada bahin ha pagbaraan han ngaran ni Jehova, o ha pagpamatuod nga buwa an pakaraot ni Satanas?

10. Ano nga simboliko nga kaso ha korte an mababasa ha kapitulo 42 tubtob 44 ha libro han Isaias? (Isaias 43:9; 44:​7-9) (Kitaa liwat an piktyur.)

¹⁰ An pagkaimportante han aton papel ha pagbaraan ha ngaran ni Jehova ginpapabug-atan ha kapitulo 42 tubtob 44 ha libro han Isaias. Iginsasaysay hito nga mga kapitulo an usa nga simboliko nga kaso ha korte nga an isyu mahitungod ha pagkadios. Nangangayat hi Jehova ha mga tawo nga diri nagsisingba ha iya nga pamatud-an nira nga buhi an ira dios. Pariho ha usa nga kaso ha korte, nagpapakiana hiya kon may mga testigo ba nga makakapamatuod hini. Pero waray gud!—Basaha an Isaias 43:9; 44:​7-9.

11. Ano an ginsiring ni Jehova ha iya katawohan nga mababasa ha Isaias 43:​10-12?

¹¹ Basaha an Isaias 43:​10-12. Nagsiring hi Jehova ha iya katawohan: “Kamo an akon mga saksi, . . . ngan ako an Dios.” Ginpapakianhan hira ni Jehova: “May-ada ba lain nga Dios labot ha akon?” (Isa. 44:8) Salit may pribilehiyo kita nga batunon ito nga pakiana. Pinaagi han aton mga pulong ngan buhat, nagtitestigo kita nga hi Jehova gud la an Dios. An iya ngaran labaw ha ngatanan nga ngaran. Ginpapamatud-an naton ha aton kinabuhi nga hinigugma gud naton hi Jehova ngan maunungon kita ha iya—anoman nga pagpresyur an himoon ni Satanas ha aton. Hini nga paagi, may oportunidad kita nga bumulig ha pagbaraan han Iya ngaran.

12. Paonan-o natuman an tagna nga mababasa ha Isaias 40:​3, 5?

¹² Kon ginsusuportaran naton an ngaran, o reputasyon, ni Jehova, ginsusubad naton hi Jesu-Kristo. Igintagna liwat ni Isaias nga may-ada ‘maghahawan [o, ‘mag-aandam,’ ftn.] han dalan ni Jehova.’ (Isa. 40:3) Paonan-o ito natuman? Hi Juan Bawtista an nag-andam han dalan para kan Jesus, nga kinanhi ha ngaran ni Jehova ngan nagyakan ha ngaran ni Jehova. (Mat. 3:3; Mar. 1:​2-4; Luc. 3:​3-6) An pariho nga tagna nasiring: “An himaya ni Jehova maipapahayag.” (Isa. 40:5) Paonan-o? Han kinanhi hi Jesus ha tuna, ginrepresentaran niya hi Jehova ha perpekto gud nga paagi nga baga hin an kinanhi ha tuna hi Jehova mismo.​—Juan 12:45.

13. Paonan-o naton masusubad hi Jesus?

¹³ Mga testigo kita, o saksi, ni Jehova pariho kan Jesus. Gindadara naton an ngaran ni Jehova ngan iginsusumat ha ngatanan nga aton nakikilala an mahitungod ha iya urusahon gud nga mga buhat. Pero basi mahimo ito hin epektibo, dapat maaram liwat kita han importante nga papel ni Jesus ha pagbaraan han ngaran ni Jehova. (Buh. 1:8) Hi Jesus an pinakamaopay nga Saksi ni Jehova, ngan ginsusunod naton an iya ehemplo. (Pah. 1:5) Pero ano dapat kaimportante an ngaran ni Jehova ha kada tagsa ha aton?

ANO KAIMPORTANTE HA ATON AN NGARAN NI JEHOVA?

14. Sugad han ginpapabug-atan ha Salmo 105:​3, ano an aton inaabat mahitungod ha ngaran ni Jehova?

¹⁴ Proud kita ha ngaran ni Jehova. (Basaha an Salmo 105:3.) Nalilipay gud hi Jehova kon iginhahambog naton an iya ngaran. (Jer. 9:​23, 24; 1 Cor. 1:31; 2 Cor. 10:17) An “ighambog . . . hi Jehova” nagpapasabot hin pagin proud nga hi Jehova an aton Dios. Ginhuhunahuna naton nga pribilehiyo an pagpasidungog ha iya ngaran ngan pagsuporta ha iya reputasyon. Dapat diri kita maawod ha pagsumat nga mga Saksi kita ni Jehova ha aton mga katrabaho, klasmeyt, amyaw, ngan ha iba pa. Karuyag han Yawa nga umundang kita ha pag-istorya ha iba mahitungod ha ngaran ni Jehova. (Jer. 11:21; Pah. 12:17) Ngani, karuyag ni Satanas ngan han iya buwa nga mga propeta nga mahingalimtan han mga tawo an ngaran ni Jehova. (Jer. 23:​26, 27) Pero tungod han aton gugma ha ngaran ni Jehova padayon kita nga nagrarayhak ha “bug-os nga adlaw.”​—Sal. 5:11; 89:16.

15. Ano an karuyag sidngon han pagtawag ha ngaran ni Jehova?

¹⁵ Padayon kita nga natawag ha ngaran ni Jehova. (Joel 2:32; Roma 10:​13, 14) An pagtawag ha ngaran ni Jehova labaw pa kay ha basta la paghibaro ngan paggamit han personal nga ngaran han Dios. Nakilala naton an Dios sugad nga usa nga Persona, nasarig kita ha iya, ngan nangangaro ha iya hin bulig ngan paggiya. (Sal. 20:7; 99:6; 116:4; 145:18) Iginpapahibaro ta liwat ha iba an iya ngaran ngan mga kalidad, ngan gin-aaghat hira nga magbasol ngan gumios basi makakarawat hira han pag-uyon ni Jehova.​—Isa. 12:4; Buh. 2:​21, 38.

16. Paonan-o naton mapapamatud-an nga buwaon hi Satanas?

¹⁶ Andam kita mag-antos para ha ngaran ni Jehova. (San. 5:​10, 11) Kon nagpapabilin kita nga maunungon kan Jehova bisan pa ha mga pag-antos, ginpapamatud-an naton nga buwaon hi Satanas. Ha panahon ni Job, naghimo hi Satanas hin akusasyon mahitungod ha mga nag-aalagad kan Jehova: “Ihahatag han usa nga tawo an ngatanan niya nga gintatag-iya basi panalipdan an iya kinabuhi.” (Job 2:4) Nagsiring hi Satanas nga an mga tawo nag-aalagad la kan Jehova kon maopay an ira kahimtang ngan babayaan nira hi Jehova kon umatubang hin mga kakurian. Ginpamatud-an han matinumanon nga hi Job nga buwa ito nga akusasyon. Kita liwat may pribilehiyo nga pamatud-an nga diri gud kita mabaya kan Jehova anoman nga pag-atake an himoon ha aton ni Satanas. Makakasarig gud kita nga padayon kita nga babantayan ni Jehova tungod han iya ngaran.​—Juan 17:11.

17. Ano an iba pa nga paagi nga mahihimaya naton an ngaran ni Jehova, sugad han ginsisiring ha 1 Pedro 2:12?

¹⁷ Ginrirespeto naton an ngaran ni Jehova. (Prob. 30:9; Jer. 7:​8-11) Tungod kay nagrirepresentar kita ha ngaran ni Jehova ngan nagdadara hito, mahimo naton madayaw ito nga ngaran o diri mapasidunggan. (Basaha an 1 Pedro 2:12.) Salit karuyag naton buhaton an ngatanan nga aton mahihimo basi madayaw hi Jehova pinaagi han aton pulong ngan buhat. Hito nga paagi, mahihimaya naton an iya ngaran ha pinakamaopay nga paagi bisan kon diri kita mga perpekto.

18. Ano an iba pa nga paagi nga mapapamatud-an naton nga importante ha aton an ngaran ni Jehova? (Kitaa liwat an footnote.)

¹⁸ Mas importante ha aton an ngaran ni Jehova kay ha aton kalugaringon nga reputasyon. (Sal. 138:2) Kay ano nga importante gud ito? Tungod han aton gugma ha ngaran ni Jehova, bangin madaot an aton reputasyon ha mga nakapalibot ha aton.a Basi mapasidunggan an ngaran ni Jehova, andam hi Jesus nga mamatay ha makaarawod nga paagi sugad nga kriminal. “Ginbalewaray [niya] an pakaalo,” salit waray hiya sobra nga mabaraka ha kon ano an huhunahunaon ha iya han iba. (Heb. 12:​2-4) Nagpokus hiya ha pagbuhat han kaburut-on han Dios.​—Mat. 26:39.

19. Ano an imo inaabat mahitungod ha ngaran ni Jehova, ngan kay ano?

¹⁹ Proud kita ha ngaran ni Jehova ngan usa nga dungog nga tawagon nga mga Saksi ni Jehova. Tungod hito, andam kita nga ilubon an bisan ano nga pakaraot nga bangin naton atubangon. Mas importante ha aton an ngaran ni Jehova kay han aton kalugaringon nga reputasyon. Salit magin determinado kita nga padayon nga dayawon an ngaran ni Jehova anoman an buhaton ni Satanas ha aton. Hito nga paagi, mapapamatud-an naton nga an ngaran ni Jehova amo an pinakaimportante ha aton, sugad la nga ito an pinakaimportante kan Jesu-Kristo.