Pahimulsi hin Maopay an Imo Pagin Solo
“An makahimo pagkarawat hini, kumarawat hiya.”—MAT. 19:12.
1, 2. (a) Ano an panhunahuna ni Jesus, ni Pablo, ngan han iba mahitungod han pagin solo? (b) Kay ano nga an iba bangin diri maghunahuna nga regalo an pagin solo?
WARAY ruhaduha nga an pag-asawa usa han pinakabirilhon nga mga regalo han Dios ha katawohan. (Prob. 19:14) Kondi damu nga solo nga Kristiano an malipayon ngan tagbaw liwat ha ira kinabuhi. Hi Harold, usa nga 95-anyos nga bugto nga waray mag-asawa, nagsiring: “Bisan kon nalilipay ako nga makaupod an iba ngan abiabihon hira, kon nag-uusahan ako diri ako nasusubo. Salit masisiring ko gud nga regalo ha akon an pagin solo.”
2 Oo, gin-unabi ni Jesu-Kristo ngan ni apostol Pablo nga pariho han pag-asawa, an pagin solo usa nga hatag o regalo tikang ha Dios. (Basaha an Mateo 19:10, 11; 1 Korinto 7:7.) Kondi syempre, diri ngatanan nga solo an waray mag-asawa tungod kay nadiri hira. Usahay tungod han kahimtang makuri an pakabiling hin angayan nga padis. O an iba bangin diri-ginlalaoman nga nagin solo tungod han pagdiborsyo o kamatay han ira padis katapos hin mga tuig nga pag-asawa. Kon sugad, ha ano nga paagi mahimo magin regalo an pagin solo? Ngan paonan-o mapapahimulsan hin maopay han waray asawa nga mga Kristiano an ira pagin solo?
Maopay Gud nga Regalo
3. Ano an mga kaopayan nga napapahimulsan han solo nga mga Kristiano?
3 Agsob nga mas daku an panahon ngan kagawasan han usa nga solo kay han inasaw-an. (1 Kor. 7:32-35) Tungod hini mas daku an iya higayon nga magbuhat hin labaw pa ha ministeryo, pahaluagon an iya gugma ha iba, ngan magin mas duok kan Jehova. Salit gin-aapresyar gud han damu nga Kristiano an mga kapulsanan han pagin solo ngan nagdesisyon nga ‘karawaton ito’ nga regalo bisan ha pipira la ka panahon. An iba bangin waray magplano nga magin solo, kondi han nagbag-o an ira kahimtang, ira ito igin-ampo ngan ginpamalandong ngan nasantop nira nga pinaagi han bulig ni Jehova mahimo liwat hira magpabilin nga solo. Salit, ginkarawat nira an ira nabag-o nga kahimtang ngan waray na mag-asawa.—1 Kor. 7:37, 38.
4. Kay ano nga an solo nga mga Kristiano diri sadang umabat nga may kulang ha ira samtang nag-aalagad ha Dios?
4 Maaram an solo nga mga Kristiano nga diri hira kinahanglan mag-asawa basi pabilhan ni Jehova o han iya organisasyon. Hinigugma kita han Dios sugad nga indibiduwal. (Mat. 10:29-31) Waray bisan hin-o o bisan ano nga makakagbulag ha aton ha gugma han Dios. (Roma 8:38, 39) Inasaw-an man kita o solo, damu gud an aton hinungdan nga umabat nga waray kulang ha aton samtang nag-aalagad kita ha iya.
5. Ano an ginkikinahanglan basi mapahimulsan hin maopay an pagin solo?
5 Kondi, pariho han regalo han Dios nga abilidad ha musika o isport, ginkikinahanglan an pangalimbasog basi mapahimulsan hin maopay an pagin solo. Salit paonan-o an solo nga mga Kristiano yana—lalaki man o babaye, batan-on man o edaran na, tinuyo man nga nagpabilin nga solo o tungod han kahimtang—makakapahimulos hin maopay han ira pagin solo? Hisgotan naton an makapadasig nga mga ehemplo ha Kristiano nga kongregasyon ha siyahan nga siglo ngan aton kitaon kon ano nga leksyon an aton hibabaroan.
Solo Samtang Batan-on Pa
6, 7. (a) Ano nga pribilehiyo ha pag-alagad ha Dios an nakarawat han mga anak nga daraga ni Felipe? (b) Ha ano nga mga paagi ginpahimulsan hin maopay ni Timoteo an iya pagin solo, ngan ano nga bendisyon an iya nakarawat tungod kay andam hiya mag-alagad samtang batan-on pa?
6 An ebanghelisador nga hi Felipe may upat nga anak nga daraga nga madasigon ha pag-ebanghelyo pariho ha iya. (Buh. 21:8, 9) Usa han milagroso nga regalo han baraan nga espiritu amo an panagna, ngan gin-gamit nira ito sugad nga katumanan han Joel 2:28, 29.
7 Ginpahimulsan hin maopay han batan-on nga hi Timoteo an iya pagin solo. Tikang ha kabata gintutdoan hiya han iya nanay nga hi Eunice ngan han iya lola nga hi Loida han “Baraan nga mga Surat.” (2 Tim. 1:5; 3:14, 15) Kondi posible nga han mga 47 K.P. na hira nagin Kristiano, durante han siyahan nga pagbisita ni Pablo ha Listra, an bungto nga ira inuukyan. Paglabay hin duha ka tuig, ha ikaduha nga pagbisita ni Pablo, posible nga mga 20 anyos na hi Timoteo. Bisan kon batan-on pa hiya ngan bag-ohan, ‘maopay an iya bantog’ ha mga tigurang ha Listra ngan ha kahirani nga kongregasyon ha Ikonio. (Buh. 16:1, 2) Salit gin-imbitar hiya ni Pablo nga magin kaupod ha pagbiyahe sugad nga misyonero. (1 Tim. 1:18; 4:14) Diri kita sigurado kon hi Timoteo nagpabilin nga solo. Kondi maaram kita nga sugad nga batan-on, kinaburut-on nga ginkarawat niya an imbitasyon ni Pablo, ngan katapos hito damu ka tuig nga nag-alagad hiya sugad nga olitawo nga misyonero ngan paramangno.—Fil. 2:20-22.
8. Ano an nakabulig kan Juan Markos nga magkab-ot hin espirituwal nga mga tumong, ngan ano nga mga bendisyon an iya nakarawat tungod hito?
8 Han batan-on pa hi Juan Markos, ginpahimulsan liwat niya hin maopay an iya pagin solo. Hiya ngan an iya nanay nga hi Maria ngan an iya patod nga hi Bernabe an pipira han siyahan nga mga membro han kongregasyon ha Jerusalem. Posible liwat nga maopay an ira kahimtang ha kinabuhi tungod kay may kalugaringon hira nga balay ha syudad ngan surugoon. (Buh. 12:12, 13) Kondi bisan han batan-on pa hiya, waray hiya magpatagbaw ha kalugaringon o magin makikalugaringon; waray liwat niya pilia nga mag-asawa na la ngan magpamilya. Posible nga tungod han iya pakig-upod ha mga apostol han batan-on pa hiya, nagkaada hiya hingyap nga magmisyonero. Salit malipayon nga inupod hiya kanda Pablo ngan Bernabe ha ira siyahan nga pagbiyahe sugad nga misyonero ngan nagin ira kabulig. (Buh. 13:5) Ha urhi, inupod hiya kan Bernabe, ngan ha paglabay han panahon nag-alagad hiya upod ni Pedro ha Babilonya. (Buh. 15:39; 1 Ped. 5:13) Diri kita maaram kon tubtob san-o hi Markos nagpabilin nga solo. Kondi nagin kilala gud hiya nga andam magserbi ha iba ngan magbuhat hin labaw pa ha pag-alagad ha Dios.
9, 10. Ano nga mga oportunidad an abrido ha mga solo nga batan-on nga Kristiano ha pagpauswag han ira ministeryo? Paghatag hin ehemplo.
9 Damu nga batan-on nga Kristiano yana an malipayon liwat nga nagbubuhat hin labaw pa ha ira pag-alagad ha Dios samtang solo. Pariho kanda Markos ngan Timoteo, nasasabtan nira nga an pagin solo naghahatag ha ira hin higayon nga ‘mag-alagad ha Ginoo ha waray kalingawan.’ (1 Kor. 7:35) Daku ini nga bentaha. Damu an oportunidad nga abrido ha ira sugad han pagpayunir, pag-alagad ha mga lugar nga mas daku an panginahanglan hin magwarali, pag-aram hin iba nga yinaknan, pagbulig ha pagtukod hin Kingdom Hall o sanga nga opisina, pag-eskwela ha Ministerial Training School, ngan pag-alagad ha Bethel. Kon batan-on ka pa ngan waray asawa, ginpapahimulsan mo ba an mga oportunidad nga abrido ha imo?
10 An bugto nga hi Mark nagtikang pagpayunir antes hiya mag-20 anyos, ineskwela ha Ministerial Training School, ngan nagkaada iba-iba nga toka ha magkalain-lain nga nasud. Ha paghinumdom han iya 25 ka tuig ha bug-os-panahon nga pag-alagad, hiya nagsiring: “Nangangalimbasog ako nga makaupod an ngatanan ha kongregasyon pinaagi ha pakig-upod ha ira ha ministeryo, pagbisita ha ira sugad nga pagmangno, pag-imbitar ha ira nga kumaon ha balay, ngan paghikay pa ngani hin makapadasig nga pagturotarampo. Ini ngatanan nakakapalipay gud ha akon.” Sugad han iginpapakita han ginsiring ni Mark, an gidadakui nga kalipay nagtitikang ha paghatag, ngan damu an aton higayon ha pagbuhat hito kon sagipo kita ha pag-alagad ha Dios. (Buh. 20:35) Sugad nga batan-on, anoman an imo hilig, abilidad, o eksperyensya, damu an imo mahihimo ha buruhaton han Ginoo.—1 Kor. 15:58.
11. Ano an pipira nga kapulsanan han diri pag-apura ha pag-asawa?
11 Bisan kon kadam-an han mga batan-on an karuyag mag-asawa ha urhi, may mag-opay nga hinungdan nga diri mag-apura ha pag-asawa. Gindasig ni Pablo an mga batan-on nga diri anay mag-asawa tubtob nga lumabay an ira “pagkamakaruruyag,” an panahon nga makusog gud an seksuwal nga mga hingyap. (1 Kor. 7:36) Nagkikinahanglan hin panahon an pagkilala han imo kalugaringon ngan pagkaada eksperyensya ha kinabuhi nga importante basi makapili hin angayan nga padis. An saad durante han kasal seryoso nga butang, ngan sadang ito tumanon tubtob nga buhi ka.—Ekles. 5:2-5.
Solo nga Edaran Na
12. (a) Ano an ginbuhat ni Ana han nabag-o an iya kahimtang? (b) Ano an iya nagin pribilehiyo?
12 Hi Ana nga gin-unabi ha Ebanghelyo ni Lukas sigurado nga nasubo gud han diri-ginlalaoman nga namatay an iya bana katapos hin pito ka tuig la nga pag-asawa. Diri kita maaram kon may mga anak hira o kon naghunahuna hiya nga mag-asawa utro. Kondi an Biblia nasiring nga han 84 anyos hiya, balo pa gihapon hiya. Ha aton nababasa ha Biblia, makakasiring kita nga ginpahimulsan ni Ana an iya nabag-o nga kahimtang basi magin mas duok kan Jehova. Hiya “waray bumulag ha templo, ngan nag-alagad ha Dios ha mga pagpuasa ngan pag-inampo.” (Luk. 2:36, 37) An pagsingba ha Dios an pinakaimportante ha iya kinabuhi. Nagkinahanglan ito hin determinasyon ngan pangalimbasog, kondi hura nga ginbendisyonan hiya. Nakapribilehiyo hiya nga makita an minasus-an nga hi Jesus, ngan iginsumat niya ha iba an mahitungod han katalwasan nga igpapahinabo pinaagi hinin tiarabot nga Mesias.—Luk. 2:38.
13. (a) Kay ano nga masisiring naton nga aktibo hi Dorkas ha kongregasyon? (b) Paonan-o ginbalosan hi Dorkas tungod han iya pagkamaopay ngan pagkabuotan?
13 Hi Dorkas o Tabita naukoy ha Jope, usa nga duruongan nga syudad hadto ha norte-weste han Jerusalem. Tungod kay waray gin-unabi ha Biblia nga may bana hiya, posible nga solo pa hiya hito nga panahon. Hi Dorkas “puno hin mag-opay nga mga buhat, ngan han panlimos.” Matin-aw nga naghimo hiya hin damu nga bado para ha pobre nga mga balo ngan ha iba pa, ngan tungod hini ginhigugma gud nira hiya. Salit han tigda nga nagkasakit hiya ngan namatay, an bug-os nga kongregasyon naghangyo kan Pedro nga kumadto ngan banhawon an ira hinigugma nga hi Dorkas. An sumat nga nabanhaw hiya nagsarang ha bug-os nga Jope salit damu an nagin tumuroo. (Buh. 9:36-42) Hi Dorkas mismo bangin nakabulig ha pipira ha ira pinaagi han iya mag-opay nga buhat.
14. Ano an nagpapagios ha solo nga mga Kristiano nga magin mas duok kan Jehova?
14 Pariho kanda Ana ngan Dorkas, damu nga kabugtoan yana an may edad na nga solo pa o nagin solo na liwat. An iba bangin waray makabiling hin angayan nga padis. An iba mga diborsyado o balo. Tungod kay waray hira asawa o bana nga masusumatan han ira pagbati, kasagaran na nga nahibabaro hira nga mas sumarig kan Jehova. (Prob. 16:3) Para kan Silvia, usa nga solo nga bugto nga nag-aalagad ha Bethel hin sobra 38 na ka tuig, an pagin solo usa nga bendisyon. “Usahay ginkakapoy na ako nga ako an marig-on,” siring niya. “Naghuhunahuna ako kon hin-o an magpaparig-on ha akon.” Kondi nagsiring liwat hiya: “An pagsarig nga mas maaram hi Jehova han akon ginkikinahanglan nabulig ha akon nga mas magin duok ha iya. Ngan an pagparig-on pirme naabot, usahay an gintitikangan hito diri gud ginlalaoman.” Ha kada panahon nga nagigin mas duok kita kan Jehova, pirme hiya nabulig ha aton ha mahigugmaon ngan nakakaliaw gud nga paagi.
15. Paonan-o mapapahaluag han solo nga mga Kristiano an ira gugma?
15 An pagin solo maopay nga higayon ha mga Kristiano nga “managku,” o magpahaluag han gugma. (Basaha an 2 Korinto 6:11-13.) Hi Jolene, usa nga solo nga bugto nga babaye nga 34 ka tuig na ha bug-os-panahon nga pag-alagad, nagsiring: “Nangangalimbasog gud ako nga magkaada duok nga mga sangkay, diri la ha akon mga kaedad, kondi ha ngatanan. An pagin solo maopay gud nga higayon ha paghatag kan Jehova, ha pamilya, ha kabugtoan, ngan ha igkasi-tawo. Samtang nagtitikalagas ako, mas nagigin malipayon ako ha pagin solo.” Ginpapabilhan gud han mga lagas, masakit, solo nga kag-anak, batan-on, ngan iba pa ha kongregasyon an pagsakripisyo han solo nga kabugtoan para ha ira. Oo, ha kada panahon nga iginpapakita naton an gugma ha iba, nagigin mas tagbaw kita. Mahimo ka ba liwat magpahaluag han imo gugma ha iba?
Solo ha Bug-os nga Kinabuhi
16. (a) Kay ano nga hi Jesus nagpabilin nga solo? (b) Paonan-o ginpahimulsan hin maopay ni Pablo an iya pagin solo?
16 Hi Jesus waray mag-asawa; kinahanglan mag-andam hiya para ha ministeryo nga igintoka ha iya ngan tumanon ito. Nagbiyahe hiya ha higrayo nga lugar, nagbuhat temprano pa ha aga tubtob nga gab-i na hinduro, ngan ha urhi iginhalad an iya kinabuhi. Ha iya kahimtang bentaha gud an pagin solo. Hi apostol Pablo nagbiyahe hin yinukot ka kilometro ngan nakaeksperyensya hin duro nga kakurian ha ministeryo. (2 Kor. 11:23-27) Bisan kon bangin inasaw-an hiya hadto, ginpili niya nga magpabilin nga solo han nagin apostol hiya. (1 Kor. 7:7; 9:5) Tungod han ministeryo, gindasig ni Jesus ngan ni Pablo an iba nga kon posible subaron hira ha pagpabilin nga solo. Kondi, waray hira magsiring nga an mga alagad han Dios kinahanglan diri mag-asawa.—1 Tim. 4:1-3.
17. Paonan-o ginsusubad han iba yana hi Jesus ngan hi Pablo, ngan kay ano nga makakasiguro kita nga ginpapabilhan ni Jehova an mga nagbubuhat hin sugad hito nga pagsakripisyo?
17 Yana, an iba tinuyo liwat nga nagdidesisyon nga magpabilin nga solo basi mas makapokus ha ira pag-alagad. Hi Harold nga gin-unabi na, malipayon nga nag-aalagad ha Bethel hin sobra 56 ka tuig na. Hiya nagsiring: “Han napulo ka tuig na ako ha Bethel, naobserbaran ko nga damu nga mag-asawa an nabaya ha Bethel tungod kay nagkasakit hira o kinahanglan magmangno ha ira lagas na nga mga kag-anak. Patay na an akon mga kag-anak. Pero hinigugma ko gud an Bethel salit nadiri ako nga bangin mawara an akon pribilehiyo kon mag-asawa ako.” Mga tuig na an naglabay, hi Margaret nga maiha na nga payunir nagsiring liwat: “May mga higayon nga puydi unta ako mag-asawa kondi waray ako mag-asawa. Lugod, nagamit ko an akon mas daku nga kagawasan basi pirme magin sagipo ha ministeryo, ngan tungod hini malipayon gud ako.” Sigurado nga diri gud hingangalimtan ni Jehova an bisan hin-o nga nagbubuhat hin sugad hito nga pagsakripisyo para ha tinuod nga pagsingba.—Basaha an Isaias 56:4, 5.
Pahimulsi hin Maopay an Imo Kahimtang
18. Paonan-o madadasig ngan masusuportahan han iba an solo nga kabugtoan?
18 An ngatanan nga solo nga Kristiano nga nagbubuhat han ira gimaopayi ha pag-alagad kan Jehova takos gud han aton sinsero nga kumendasyon ngan pagdasig. Hinigugma naton hira sugad nga indibiduwal ngan ginpapabilhan naton an ira mag-opay nga kalidad ngan an ngatanan nga ira ginbubuhat para ha kongregasyon. Diri gud hira masusubo kon kita magigin tinuod nira nga espirituwal nga “kabugtoan nga kalalakin-an, ngan mga kabugtoan nga kababayin-an, ngan mga iroy, ngan mga anak.”—Basaha an Markos 10:28-30.
19. Ano an imo mahihimo basi mapahimulsan hin maopay an imo pagin solo?
19 Solo ka man tungod kay karuyag mo o tungod la han imo kahimtang, hinaot an aton ginhisgotan nga mga ehemplo ha Kasuratan ngan ha aton panahon magpasarig ha imo nga puydi ka magin malipayon ngan tagbaw ha imo kinabuhi. May mga regalo nga ginhihingyap gud, pero an iba diri gud ginlalaoman. May mga regalo nga gin-aapresyar dayon, pero an iba naaapresyar la ha paglabay han panahon. Salit nadepende gud ito ha aton disposisyon. Ano an imo mahihimo basi mapahimulsan hin maopay an imo pagin solo? Magin mas duok kan Jehova, magin sagipo ha pag-alagad ha iya, ngan pahaluaga an imo gugma ha iba. Pariho han pag-asawa, an pagin solo mahimo magin makapatagbaw kon gintatagad naton ito pariho han pagtagad han Dios ngan ginagamit naton hin maopay ito nga regalo.
Nahinunumdoman Mo Ba?
• Ha ano nga mga paagi mahimo magin regalo an pagin solo?
• Paonan-o an pagin solo mahimo magin bendisyon samtang batan-on pa?
• Ano an mga oportunidad han solo nga kabugtoan ha pagin mas duok kan Jehova ngan ha pagpahaluag han ira gugma?
[Mga Retrato ha pahina 18]
Ginpapahimulsan mo ba hin maopay an mga oportunidad ha pag-alagad ha Dios nga abrido ha imo?