Pamalandonga Kon Ano an Ginbuhat Na ni Jehova Para ha Imo

WARAY pag-iha katapos mabanhaw hi Jesus, duha han iya mga disipulo an nagbabaktas tikang ha Jerusalem tipakadto ha Emaus. An Ebanghelyo ni Lukas nasiring: “Han naghurohimangraw hira, ngan nagpinakianahay, . . . hi Jesus ngahaw napahirani ha ira ngan binunyog ha ira. Kondi an ira mga mata nakulangan ha pagkilala ha iya.” Katapos, hi Jesus nagsiring: “Ano ba ini nga mga pulong, nga iyo ginyiyinakan ha usa kag usa, han naglilinakat kamo? Ngan nagkabakdaw hira nga magsurub-on.” Kay ano nga masurub-on hira? Kay naghuhunahuna hira nga hito nga panahon tatalwason ni Jesus an Israel ha pagmando han mga Hentil, kondi waray ito mahitabo. Lugod, ginpatay hi Jesus. Salit masurub-on hira.—Luk. 24:15-21; Buh. 1:6.

Hi Jesus nangatadongan ha mga disipulo. “Tumikang kan Moises, ngan ha ngatanan nga mga manaragna, iginsaysay niya ha ira an ngatanan nga mga bagay ha Santos nga Surat ha nahitutungod ha iya ngahaw.” Ha pagkamatuod, damu an makatirigamnan ngan makaparig-on ha pagtoo nga mga panhitabo durante han ministeryo ni Jesus! Samtang namamati an mga disipulo ha iya, nawara an ira kasubo ngan nalipay na hira. Han gab-i na, hira nagsiring: “Waray ba magpaso an aton mga kasingkasing ha aton, han nagyiyinakan hiya ha aton ha dalan, ngan han pagbuklari niya ha aton ha Santos nga Surat?” (Luk. 24:27, 32) Ano nga leksyon an aton hibabaroan ha reaksyon han mga disipulo ni Jesus?

Ano an Aton Inaabat kon Diri Natutuman an Aton Ginlalaoman?

Nasubo an duha nga disipulo nga nagbabaktas tipakadto ha Emaus tungod kay waray mahitabo an ira ginlalaoman. Inabat nira an gin-unabi ha Proberbios 13:12: “An paglaom nga ginlangan-langan nakakasakit han kasingkasing.” Ha pariho nga paagi, an iba ha aton nga matinumanon nga nag-aalagad kan Jehova hin damu na ka tuig naghunahuna nga nahitabo na unta an “daku nga kagol-anan.” (Mat. 24:21; Pah. 7:14) Pero tungod kay waray pa ito matuman, bangin magin hinungdan ito han ira kasubo.

Kondi, hinumdumi nga adton duha nga disipulo nagmalipayon utro han ginbuligan hira ni Jesus nga pamalandungon an mga tagna nga natuman na, nga an iba hito nahitabo ha ira mismo panahon. Makakapabilin kita nga malipayon ngan malalamposan naton an pag-abat hin kapakyasan kon bubuhaton liwat naton ito. Hi Michael nga maiha na nga tigurang nagsiring: “Ayaw paghinunahunaa an waray pa buhata ni Jehova. Lugod, pamalandonga an iya na ginbuhat.” Maopay gud ito nga sagdon!

Kon Ano an Ginbuhat Na ni Jehova

Tagda an pipira han makatirigamnan nga ginbuhat na ni Jehova. Hi Jesus nagsiring: “An natoo ha akon, magbubuhat man han mga buruhaton, nga akon ginbubuhat; ngan durodaku nga buruhaton hini, nga iya bubuhaton.” (Juan 14:12) Yana, ginbubuhat han mga alagad han Dios an pinakadaku nga buruhaton han mga Kristiano. Sobra 7 ka milyon an naglalaom nga maluwas ha daku nga kagol-anan. Hunahunaa ini. Yana pa gud la nagkaada sugad hini kadamu nga magtinumanon nga alagad ni Jehova nga aktibo nga nagsasangyaw ha damu hinduro nga nasud! Oo, ginbuligan ni Jehova an iya mga alagad nga buhaton an “durodaku nga buruhaton,” sugad han igintagna ni Jesus.

Ano pa an ginbuhat na ni Jehova para ha aton? Ginbuligan niya an mga tangkod an kasingkasing nga simboliko nga makagawas ha maraot nga kalibotan ngan sumulod ha espirituwal nga paraiso nga iya ginhimo. (2 Kor. 12:1-4) Paggahin hin panahon ha pamalandong han pipira nga bahin hito nga paraiso nga napapahimulsan naton. Pananglitan, kitaa an imo librarya o an librarya ha Kingdom Hall. Paklia an mga pahina han Watch Tower Publications Index, o pagsaliksik ha CD nga Watchtower Library. Pamatii an nakarekord nga drama ha Biblia. Hunahunaa utro an imo inabat, nakita, ngan nabatian ha bag-o la nga kombensyon. Ngan pamalandonga an makalilipay nga pakig-upod ha aton Kristiano nga kabugtoan. Mahinatagon gud hi Jehova tungod kay nagtatagana hiya ha aton hin hura nga espirituwal nga pagkaon ngan mahigugmaon nga kabugtoan. Oo, espirituwal nga paraiso gud ini!

An salmista nga hi David nagsiring: “O Jehova, nga akon Dios, damu an mga urusahon nga buhat nga imo ginhimo, ngan an imo mga hunahuna nga ngadi ha amon.” (Sal. 40:5) Oo, kon aton pirme huhunahunaon an mag-opay nga butang nga ginbuhat na ni Jehova para ha aton ngan pamamalandungon an iya mahigugmaon nga paghunahuna ha aton, mapaparig-on kita nga magpabilin nga matinumanon ha bug-os-kasingkasing nga pag-alagad ha aton langitnon nga Amay, hi Jehova.—Mat. 24:13.

[Retrato ha pahina 31]

Ginbuligan ni Jesus an iya mga disipulo nga pamalandungon an ginbuhat na ni Jehova para ha ira

[Mga Retrato ha pahina 32]

Hunahunaa utro an imo inabat, nakita, ngan nabatian ha bag-o la nga kombensyon