The Second Book of Chronicles

5 Na so Sol′o·mon take complete all the work wey e suppose do for the house of Jehovah. Then e bring the things wey im papa David don make holy come inside, and e put the silver, the gold, and all the other things for inside the place them wey them de keep better-better things for the house of the true God. 2 That time, Sol′o·mon gather the elders of Israel, all the heads of the tribes, the chiefs of the family groups for Israel. Them come Jerusalem so that them go bring the ark of the agreement of Jehovah from the City of David, wey be, Zion. 3 All the men of Israel gather for front of the king for the festival* wey them de do for the seventh month.

4 When all the elders of Israel come, the Levites carry the Ark. 5 Them bring the Ark, the tent of meeting, and all the holy things wey be dey inside the tent. The priests and the Levites* carry them come. 6 King Sol′o·mon and all the people of Israel wey them call to come meet-am dey for front of the Ark. The sheep and cow wey them use do sacrifice plenty sotey them no fit count them or know the number. 7 Then the priests bring the ark of the agreement of Jehovah come where them arrange for-am, for the room wey dey inside-inside for the house, wey be the Most Holy Room, and put-am under the wings of the cherubs. 8 So the wings of the cherubs stretch cover the place wey the Ark dey, this one come make the cherubs cover the Ark and im poles, from up. 9 The poles long sotey person fit dey the Holy Room, wey dey the front of the room wey dey inside-inside, de see the mouth of the poles, but person wey dey outside no fit see them. And them dey there till today. 10 Nothing be dey inside the Ark apart from the two slates wey Moses put for inside for Horʹeb, when Jehovah make agreement with Israel people for the time wey them de come out from Egypt.

11 When the priests come out from the holy place, (because all the priests wey dey there don make theirself holy, no matter the group wey them come from), 12 all the Levite people wey de sing wear fine cloth, them hold cymbals, music instrument wey get strings, and harps, and them stand for the east side of the altar, together with 120 priests wey de blow trumpets, and na A′saph, He′man, Je·du′thun, and their sons and their brothers de direct them. 13 For the time when the people wey de sing and the people wey de blow trumpet de praise and thank Jehovah with one voice, the sound de go up from the trumpets, the cymbals, and the other music instruments. Then cloud gather full the house, the house of Jehovah, as them de praise Jehovah, “because e good; im love wey no de fail de last forever.” 14 The priests no fit stand there to do their work, because of the cloud. This na because the glory of Jehovah cover the house of the true God.