Ecclesiastes

10 Just as flies wey don die de make the oil of person wey de produce perfume to smell and foam, na so small foolishness de spoil the sense and glory wey person get.

2 The heart of person wey get sense de direct-am to follow the correct road,* but the heart of stupid person de direct-am to follow the wrong road.* 3 No matter the road wey foolish person waka pass, e no get better sense,* and e de let everybody know say e be foolish person.

4 If person wey de rule vex for you, make you no comot from where you dey, because cool mind de calm big-big sins.

5 E get something wey de worry person wey I don see under the sun, the kind mistake wey people wey get authority de make: 6 Them de put foolish people for plenty high positions, but people wey qualify* continue to dey for low positions.

7 I don see servants wey dey ontop horse, but prince them de waka with leg just like servant.

8 Person wey de dig pit fit fall inside-am, and snake fit bite person wey de break wall wey them make with stone.

9 Stones fit wound person wey de cut stones come out from big-big stones, and person wey de break wood fit put imself for danger because of the wood.*

10 If iron tool no sharp and person no sharp im edge, e go need to use plenty power to fit use-am work. But sense de help person succeed.

11 If snake bite person before them charm the snake, the person wey sabi charm snake* no gain anything.

12 The words wey de come out from the mouth of person wey get sense de make-am get favor, but the lips of stupid person de put-am for trouble. 13 The first words wey de come out from im mouth na foolish things, and the last words wey e de talk na mad man talk and e de cause problem. 14 But foolish person de continue to talk.

Man no know wetin go happen; who fit tell-am wetin go come after-am?

15 The hard work of stupid person de make-am tire, because e no even know how to find road go the city.

16 E really bad for any land wey the king na boy and the leaders* de start their party for morning! 17 Happiness go full the land when the king na person wey come from important family and the leaders de chop for the correct time to get power, no be to dey drunk.

18 Na too much laziness de make the woods for the roof to want fall, and na hands wey no de do anything de make house de leak.

19 Them make food* to make person laugh, and wine de make person enjoy life; but na money person de use get everything wey e need.

20 Even for wetin you de think,* make you no curse* the king, and make you no curse rich person for your bedroom, because bird* fit carry the sound go,* or animal wey get wings fit repeat wetin you don talk.