Leviticus

2 “‘Now if person* give grain offering to Jehovah, im offering must be better flour,* and e go pour oil ontop-am and put frankincense ontop-am. 2 Then e go bring-am to the sons of Aaron wey be the priests, and the priest go take one full hand of the better flour and oil and all im frankincense, and e go burn-am to make smoke comot from ontop the altar as something wey stand for the whole offering,* offering wey them make with fire wey get better smell* to Jehovah. 3 Na Aaron and im sons go get anything wey remain from the grain offering as something wey really dey holy from Jehovah offerings wey them make with fire.

4 “‘If you give grain offering wey them don bake for oven as offering, make e be better flour, bread wey no get yeast wey them mix with oil and wey get ring shape or wafers wey no get yeast and wey them put oil.

5 “‘If your offering na grain offering wey them prepare for flat pan,* make e be better flour wey no get yeast and wey them mix with oil. 6 You go break-am to pieces, and you go pour oil ontop-am. Na grain offering.

7 “‘If your offering na grain offering wey them prepare for pan, make you use better flour with oil make-am. 8 Make you bring the grain offering wey you make with this things to Jehovah, and you go give-am to the priest wey go bring-am near the altar. 9 And the priest go take some of the grain offering comot, as something wey stand for the whole offering,* and e go burn-am to make smoke comot from ontop the altar as offering wey them make with fire wey get fine smell* to Jehovah. 10 Na Aaron and im sons go get anything wey remain from the grain offering as something wey really dey holy from Jehovah offerings wey them make with fire.

11 “‘Make una no give grain offering wey get yeast as offering to Jehovah, because una no go burn any flour wey them mix with water and yeast, or honey to make smoke come out as offering wey them make with fire to Jehovah.

12 “‘Una fit bring them to Jehovah as offering from the firstfruits, but make una no ever bring-am come the altar as something wey get better smell.*

13 “‘Make you put salt for every grain offering wey you make, and make you no ever allow the salt of the agreement of your God to miss from your grain offering. Every offering wey you give, you go give-am together with salt.

14 “‘If you give the grain offering from the first ripe fruits to Jehovah, make you give new grain* wey them don roast with fire, new grain wey them no grind make e smooth, as the grain offering of your first ripe fruits. 15 You go put oil ontop-am and put frankincense ontop-am. Na grain offering. 16 The priest go burn-am to make smoke come out as something wey stand for the whole offering,* wey be some of the grain wey them no grind make e smooth and oil together with all im frankincense, as offering wey them make with fire to Jehovah.