Leviticus

21 Jehovah continue to talk to Moses say: “Talk to the priests, wey be sons of Aaron and tell them say, ‘Make nobody dirty imself because of person wey don die* among im people. 2 But e fit do like that for im close family member,* for im mama, im papa, im son, im daughter, im brother, 3 and e fit dirty imself because of im sister if im sister na virgin wey near-am and wey never marry. 4 Make e no dirty imself and make imself no dey holy for woman wey get husband among im people. 5 Make them no get bald head or shave the beard-beard comot for the side of their face or cut their body. 6 Make them dey holy to their God and make them no spoil the name of their God, because them de bring Jehovah offerings wey them make with fire, the bread* of their God, and them must dey holy. 7 Make them no marry prostitute, woman wey another man don sleep with, or woman wey don divorce im husband, because the priest dey holy to im God. 8 You must make-am holy, because na im be the person wey de bring the bread of your God. Make e dey holy to you because me, Jehovah, the person wey de make una dey holy, I dey holy.

9 “‘Now if priest daughter make imself no dey holy as e do prostitute work, e de make im papa no dey holy. Make them burn-am for fire.

10 “‘The high priest among im brothers, the one wey them pour anointing oil for im head and wey them don appoint* to wear the priest cloth no go allow im hair scatter anyhow or tear im cloths. 11 Make e no near any person wey don die;* e no go dirty imself even for im papa or im mama. 12 Make e no comot from the holy place and make e no make the holy place of im God no dey holy, because the sign of dedication, the anointing oil of im God dey ontop-am. I be Jehovah.

13 “‘E must marry woman wey be virgin as im wife. 14 Make e no marry woman wey im husband don die, woman wey divorce im husband, woman wey another man don sleep with, or prostitute; but make e marry virgin from im people as im wife. 15 Make e no make im children* no dey holy among im people, because I be Jehovah, wey de make-am dey holy.’”

16 Jehovah continue to talk to Moses say: 17 “Tell Aaron say, ‘No man from your children* for all their generation wey part of im body no complete go come near, to bring the bread of im God. 18 If any man dey wey part of im body no complete, make e no come near: man wey blind or e no fit waka or get problem for face* or one leg long pass the other one, 19 man wey im foot break* or wey im hand break,* 20 wey get hunchback or wey overshort,* or man wey get problem for eye or e get eczema or ringworm or the seeds for im private part get problem. 21 No man among the children* of Aaron the priest wey part of im body no complete fit bring Jehovah offerings wey them make with fire. Because part of im body no complete, e no go bring the bread of im God. 22 E fit chop the bread of im God from the things wey holy pass and from the things wey holy. 23 But, make e no come near the curtain, and make e no near the altar because part of im body no complete; and make e no make my holy place no dey holy, because I be Jehovah wey de make them dey holy.’”

24 So Moses talk to Aaron and im sons and all Israel people.