Leviticus

24 Jehovah continue to talk to Moses say: 2 “Command Israel people say make them bring pure oil from olive wey them pound come give you for the lights, so that the lamps go continue to shine everytime. 3 For outside the curtain* of the Testimony for the tent of meeting, make Aaron arrange for the lamps to continue to shine from evening go reach morning for front of Jehovah everytime. This one na law wey go dey for long time for all una generations. 4 Make e set the lamps to arrange well ontop the lampstand of pure gold for front of Jehovah everytime.

5 “Make you take better flour* and use-am bake 12 bread wey get ring shape. Use two tenth of one e′phah* of flour to make each of the bread. 6 You go arrange them for two sets ontop each other, six of them go dey one set, ontop the table of pure gold, for front of Jehovah. 7 Make you put pure frankincense ontop each set, and e go serve as the bread wey stand for the whole offering* wey them make with fire to Jehovah. 8 For each Sabbath day, make e always arrange-am for front of Jehovah. Na agreement with Israel people wey go last. 9 The bread go be for Aaron and im sons, and them go chop-am for inside holy place, because na something wey really dey holy for-am from Jehovah offerings wey them make with fire, as law wey go last.”

10 Now e get one son wey one Israel woman and one Egypt man born among Israel people, so fight start between this son and one Israel man for the camp. 11 The son of the Israel woman start to talk bad about the Name* and to curse-am.* So them bring-am come meet Moses. And e come be say, im mama name na She·lo′mith, wey be the daughter of Dib′ri from the tribe of Dan. 12 Them arrest-am until Jehovah decision don dey clear to them.

13 Then Jehovah tell Moses say: 14 “Bring the person wey curse God come outside the camp, and all the people wey hear-am must put their hands ontop im head, and then the whole group wey gather must stone-am. 15 And make you tell Israel people say, ‘If any person curse im God, e go answer for im sin. 16 So make una no fail to kill the person wey talk bad about Jehovah name. Make the whole group wey gather no fail to stone-am. Make una kill the stranger wey de live for the land the same way wey una go kill the person wey come from the land because of the Name wey e talk bad about.

17 “‘If person kill another person,* make una no fail to kill the person too. 18 Anybody wey hit animal wey fit live with people and kill-am,* make the person pay for-am, life for life.* 19 If person wound im neighbor, then make una do the person the same thing wey e do. 20 Bone for bone,* eye for eye, teeth for teeth, make una give-am the same kind of wound wey e give another person. 21 Make the person wey hit animal and kill-am pay for-am, but make una kill the person wey hit and kill another person.

22 “‘Una go follow the same decision wey I don make, whether na stranger wey de live for the land or na person wey come from the land, because I be Jehovah una God.’”

23 Then Moses talk to Israel people, and them bring the person wey curse God come outside the camp and them stone-am. So Israel people do just as Jehovah don command Moses.