Joshua

20 Then Jehovah tell Joshua say: 2 “Tell Israel people say, ‘Make una select cities of protection for unaself wey I use Moses tell una about, 3 so that the person wey kill another person* and e no plan-am or e do-am by mistake* fit run go there. And them go be place of protection for una from the person wey get the right to pay back.* 4 E must run go one of this cities and stand for front of the city gate and tell the elders of that city wetin happen make them hear. Then, them must welcome-am inside the city and give-am place to stay and e go live with them. 5 If the person wey get the right to pay back* pursue-am, make them no give the person wey kill another person to-am, because e kill another person by mistake* and e no hate the person before. 6 E must stay for that city until them judge-am for front of the people and e go dey there until the high priest wey de serve that time don die. Then the person wey kill person fit go back to the city wey e run come from, and e fit enter im city and im house.’”

7 So them make this places holy:* Keʹdesh for Galʹi·lee wey dey the area wey mountains dey for Naphʹta·li, Sheʹchem wey dey the area wey mountains dey for Eʹphra·im, and Kirʹi·ath-arʹba, wey be Hebʹron, wey dey the area wey mountains dey for Judah. 8 For the area of River Jordan, for the east side of Jerʹi·cho, them choose Beʹzer wey dey wilderness ontop the flat land from the tribe of Reuʹben, them choose Raʹmoth wey dey Gilʹe·ad from the tribe of Gad, and them choose Goʹlan wey dey Baʹshan from the tribe of Ma·nasʹseh.

9 This ones come be the cities wey them choose for all Israel people and for the strangers wey de live among them, so that anybody wey kill person* and e no plan-am fit run go there and the person wey get the right to pay back* no go kill-am before them go judge-am for front of the people.