Judges
12 Then the men of E′phra·im gather together and them cross go Za′phon* and tell Jeph′thah say: “Why you no call us make we follow you when you cross go fight Am′mon people? We go burn your house together with you for inside.” 2 But Jeph′thah tell them say: “My people follow me go fight serious fight with Am′mon people. I call una make una come help me, but una no save me from their hand. 3 When I see say una no want come save me, then I decide to put my life for danger* and go fight Am′mon people, and Jehovah put them for my hand. So why una come today to fight me?”
4 Then Jeph′thah gather all the men of Gil′e·ad, and them fight E′phra·im; the men of Gil′e·ad win E′phra·im, wey be talk say: “Una just be people wey run comot from E′phra·im, this Gil′e·ad people wey dey inside E′phra·im and Ma·nas′seh.” 5 Gil′e·ad take over the parts of River Jordan wey no too deep before E′phra·im people;* and when the men of E′phra·im de try escape, them go talk say, “Allow me make I cross go the other side”; then the men of Gil′e·ad go ask each of them say, “Na E′phra·im person you be?” When e talk, “No!” 6 them go tell-am say, “Abeg talk Shib′bo·leth.” But e go talk, “Sib′bo·leth,” as e no fit call the word well. Then, them go hold-am and kill-am for the part wey no too deep for River Jordan. So 42,000 E′phra·im people die that time.
7 Jeph′thah judge Israel for six years, then after, Jeph′thah wey be Gil′e·ad person die and them bury-am for im city wey dey Gil′e·ad.
8 After-am, Ib′zan from Beth′le·hem judge Israel. 9 E get 30 sons and 30 daughters. E send im daughters to go marry men wey no come from im family group, and e bring 30 women come marry im sons. E judge Israel for seven years. 10 Then Ib′zan die and them bury-am for Beth′le·hem.
11 After-am, E′lon wey be Zebʹu·lun person judge Israel; e judge Israel for ten years. 12 Then E′lon wey be Zebʹu·lun person die and them bury-am for Ai′ja·lon for the land of Zeb′u·lun.
13 After-am, Ab′don the son of Hil′lel wey be Pir′a·thon person judge Israel. 14 E get 40 sons and 30 grandsons wey de ride 70 donkeys. E judge Israel for eight years. 15 Then Ab′don the son of Hil′lel wey be Pir′a·thon person die and them bury-am for Pir′a·thon wey dey the land of E′phra·im for the mountain of Am′a·lek people.