Judges

15 After some time, for the time wey them de harvest wheat, Samson go visit im wife and e carry one young goat go. E talk say: “I want go inside go meet my wife for inside the bedroom.”* But the woman papa no allow-am go inside. 2 The woman papa talk say: “I be think-am say, ‘You surely hate-am.’ So I give-am to one of the men wey be follow you.* Im younger sister no fine pass-am? Abeg take im younger sister instead of-am.” 3 But Samson tell them say: “This time Phi·lisʹti·a people no go blame me say I do them bad thing.”

4 So Samson go catch 300 fox.* Then e take fire sticks, e join the tail of one fox together with the tail of another fox, and put one torch between each of the two tails wey e don join. 5 Then e light fire for the torch them and send the fox them go inside Phi·lisʹti·a people farm where them plant grain.* E light fire for everything, from the bundle of grain wey them tie go reach the grain wey them never cut,* together with the vine farms and the olive farms.

6 Phi·lisʹti·a people ask say: “Who do this thing?” Them tell them say: “Na Samson, the son-in-law of the Timʹnah person, because e take im wife give one of the young men wey follow-am.”* So Phi·lisʹti·a people go up and them burn the woman and im papa with fire. 7 Then Samson tell them say: “If na like this una de behave, I no go stop until I do una back.” 8 Then e kill plenty of them one by one,* after, e go down and stay for inside one cave* wey dey one rock wey them de call Eʹtam.

9 After, Phi·lisʹti·a people come up and put their camp for Judah and them start to waka around for Leʹhi. 10 Then the men of Judah talk say: “Why una come up to fight us?” and them answer say: “We come up make we catch* Samson, so that we go do-am the same thing wey e do us.” 11 So 3,000 men from Judah go down to the cave* wey dey the rock wey them de call Eʹtam and them tell Samson say: “You no know say na Phi·lisʹti·a people de rule us? So why you do us this thing?” E tell them say: “Na as them do me, na so I do them.” 12 But them tell-am say: “We come catch* you to give Phi·lisʹti·a people.” Then Samson talk say: “Make una swear to me say no be una go attack me.” 13 Them tell-am say: “No, we go only tie you and carry you give them, but we no go kill you.”

So them tie-am with two new ropes and carry-am from the rock come up. 14 When e reach Leʹhi, Phi·lisʹti·a people start to shout and de happy as them see-am. Then Jehovah spirit give-am power, and the ropes for im hand come be like linen threads wey them burn with fire, and wetin them take tie im hands melt comot. 15 Then e see one fresh jawbone of male donkey; e stretch im hand grab-am and use-am kill 1,000 men. 16 Then Samson talk say:

“With the jawbone of one donkey—one heap of dead body, two heaps of dead body!

With the jawbone of one donkey I kill 1,000 men.”

17 When e talk finish, e troway the jawbone and call that place Raʹmath-leʹhi.* 18 Then water come hungry-am no be small, and e call Jehovah and talk say: “Na you make your servant win for this big way. But now you go leave me make I die because of water wey de hungry me and fall for the hands of people wey no circumcise?” 19 So God make one deep place for ground wey dey Leʹhi to open, and water flow come out from inside. When e drink-am, im power* come back and e strong again. Because of that one, e call the place En-hak·korʹe,* wey dey for Leʹhi till today.

20 And e judge Israel for 20 years, the time wey Phi·lisʹti·a people de rule them.