The First Book of Samuel
7 So the men of Kir′i·ath-je′a·rim come and them carry the Ark of Jehovah go the house of A·bin′a·dab wey dey ontop hill. And them make im son El·e·a′zar holy so that e go guard the Ark of Jehovah.
2 From the day wey the Ark come Kir′i·ath-je′a·rim, many years pass, e complete 20 years, before all Israel people come start to find* Jehovah. 3 Samuel come tell all Israel people say: “If una want come back to Jehovah with all una heart, make una troway all the lie-lie gods and the Ash′to·reth idols wey una get, and make una use all una heart follow Jehovah and serve only-am. And e go save una from Phi·lisʹti·a people hand.” 4 So Israel people troway the idols of Ba′al and Ash′to·reth, and them serve only Jehovah.
5 Then Samuel talk say: “Gather all Israel people for Miz′pah, and I go pray to Jehovah for una.” 6 So them gather together for Miz′pah, and them fetch water and pour-am for front of Jehovah, and them do fasting that day. Them come talk for there say: “We don sin against Jehovah.” And Samuel start to judge Israel people for Miz′pah.
7 When Phi·lisʹti·a people hear say Israel people don gather together for Miz′pah, the lords of Phi·lisʹti·a people come gather* to go fight Israel people. When Israel people hear-am, them come de fear because of Phi·lisʹti·a people. 8 So Israel people tell Samuel say: “No stop to beg Jehovah our God to help us and save us from Phi·lisʹti·a people hand.” 9 Then Samuel carry one small sheep wey still de suck breast and e use-am do offering wey them de burn finish to Jehovah; Samuel come beg Jehovah make e help Israel people, and Jehovah answer-am. 10 As Samuel de do the offering wey them de burn, Phi·lisʹti·a people come de near where Israel people dey, to come fight them. Then Jehovah make loud thunder strike against Phi·lisʹti·a people that day, and E make them confuse, Israel people come win them. 11 Na so Israel people come out from Miz′pah and pursue Phi·lisʹti·a people and just de kill them, go reach the south side for Beth-car. 12 Then Samuel carry one stone and put-am for middle of Miz′pah and Jesh′a·nah. And e name the stone Eb·en·e′zer,* because e talk say: “Jehovah don help us come reach this time.” 13 Na so them take win Phi·lisʹti·a people and them no come the land of Israel again; and Jehovah hand continue to dey against Phi·lisʹti·a people all the time wey Samuel dey alive. 14 Apart from that one, Israel people collect the cities wey Phi·lisʹti·a people be don collect from their hand, from Ek′ron go reach Gath, and them still collect the land wey surround the cities back from Phi·lisʹti·a people hand.
Peace come still dey between Israel people and Amʹor·ite people.
15 Samuel continue to judge Israel people for im whole life. 16 Every year, e de travel round go Beth′el, Gil′gal, and Miz′pah, and e judge Israel people for all this place them. 17 But e de normally go back to Ra′mah, because na there im house dey, and e de judge Israel people for there too. E build one altar to Jehovah for there.