Deuteronomy
10 “That time, Jehovah tell me say, ‘Carve two stone slates for yourself like the first ones, and come meet me for up of the mountain; you must use wood make ark* for yourself too. 2 And I go write ontop the slates the words wey be dey the first slates wey you scatter, and make you put them for inside the ark.’ 3 So I use acacia wood make ark and carve two stone slates like the first ones and I go up of the mountain with the two slates for my hand. 4 Then ontop the slates, e write the words wey e be write before, the Ten Commandments,* wey Jehovah be tell una ontop the mountain from the fire, for the day wey una gather;* and Jehovah give them to me. 5 Then I turn and go down from the mountain, and put the slates for inside the ark wey I don make, and them continue to dey there, just as Jehovah don command me.
6 “Then Israel people comot from Be·er′oth Ben′e-ja′a·kan and go Mo·se′rah. Aaron die for there and them bury-am, and im son El·e·a′zar start to serve for im position as priest. 7 From there them comot go Gud′go·dah, and from Gud′go·dah them comot go Jot′ba·thah, land wey rivers of water* de flow for inside.
8 “That time, Jehovah separate the tribe of Le′vi make them de carry the ark of Jehovah agreement, make them de stand for front of Jehovah so that them go do their work for-am, and make them de use im name bless the people,* as them de do come reach today. 9 Na im make e no give Le′vi share or property together with im brothers. Na Jehovah be im property, just as Jehovah your God don tell-am. 10 I stay for the mountain just as I do the first time, for 40 days and 40 nights, and Jehovah listen to me that time too. Jehovah no want destroy you. 11 Then Jehovah tell me say, ‘Go front of the people and prepare to comot, so that them fit go inside and take the land as their own wey I don swear to their papa-papa them to give them.’
12 “Now, O Israel, wetin Jehovah your God de ask from you? Na only this thing: to fear Jehovah your God, to do all the things wey e want, to love-am, to serve Jehovah your God with all your heart and all your soul,* 13 and to obey the commandments and laws of Jehovah wey I de command you today for your own gain. 14 See, na Jehovah your God get the heavens, even the heavens of the heavens,* and the earth with everything wey dey for inside. 15 But na only your papa-papa them na im Jehovah come near and show im love to, and e don choose una wey be their children out of all the people, as una be today. 16 Now una must clean* una heart and stop to dey stubborn.* 17 Jehovah una God na the God of gods and the Lord of lords, the God wey dey great, wey get power, and dey wonderful, wey no de treat anybody with partial, and no de accept bribe. 18 For pikin wey no get papa* and widow, e de judge their matter well, and e love stranger wey de live for the land, e de give-am food and cloths. 19 Una must love stranger too because una be strangers for the land of Egypt before.
20 “Na Jehovah your God you go fear, na im you go serve, and na im you go dey tight with, and na im name you go use swear. 21 Na im be the Person wey you go praise. Na your God e be, wey don do all this great and wonderful things for you, wey your own eyes don see. 22 Na 70 people* your papa-papa them carry go down to Egypt, and now, Jehovah your God don make you plenty like the stars of the heavens.