Exodus

35 After, Moses gather all Israel people together and tell them say: “This na the things wey Jehovah don command us to do: 2 Una go fit work for six days, but the seventh day go be something wey dey holy for una. E go be sabbath of complete rest to honor Jehovah. Them go kill anybody wey de do work that day. 3 Make una no ever light fire for the Sabbath day for any place wey una de stay .”

4 Then Moses tell all Israel people say: “This one na wetin Jehovah don command, 5 ‘Make una bring contribution for Jehovah from among una. Make everybody wey im heart ready bring contribution for Jehovah: gold, silver, copper, 6 blue thread, purple wool, red material, quality linen, goat hair, 7 ram skins wey them dye with red color, sealskins, acacia wood, 8 oil wey them go use for the lamps, balsam wey them go use for the anointing oil and for the perfume incense, 9 onyx stones and other stones wey them go put for the eph′od* and for the breastpiece.*

10 “‘Make everybody wey sabi handwork* among una come, and make everything wey Jehovah don command, 11 wey be, the tabernacle with im tent and im cover, im hooks and im frames, im long sticks, im pillars, and im base them; 12 the Ark and im poles, the cover, and the curtain wey de block-am; 13 the table and im poles and all the things wey them de use for the table and the showbread; 14 the lampstand for light and the things wey them de use for the lampstand and im lamps and the oil wey you go use for the light; 15 the altar of incense and im poles; the anointing oil and the perfume incense; the screen* for the domot of the tabernacle; 16 the altar of offering wey them de burn and im copper net, im poles and all the things wey them de use for the altar; the basin and the basin stand; 17 the curtains wey de hang for the compound, im pillars and im base them; the screen* for the domot of the compound; 18 the tent pins of the tabernacle and the tent pins wey them de use for the compound and their ropes; 19 the cloths wey them really weave well to use do work for the holy place, the holy cloths for Aaron the priest and the cloths for im sons wey them go use serve as priests.’”

20 So all Israel people comot from where Moses dey. 21 Then everybody wey im heart move-am and everybody wey im spirit move-am come, and bring their contribution for Jehovah make them use-am for the tent of meeting, for all the work for there and for the holy cloths. 22 Them continue to come, the men together with the women, each person wey im heart ready de bring pins,* earrings, rings, and other jewelry, together with different-different kind of things wey them make with gold. All of them bring their offerings* wey them make with gold to Jehovah. 23 And everybody wey get blue thread, purple wool, red material, quality linen, goat hair, ram skins wey them dye with red color, and sealskins bring them. 24 Everybody wey de contribute silver and copper bring Jehovah contribution, and everybody wey get acacia wood wey them go use for any part of the work bring-am.

25 All the women wey sabi handwork sew with their hands, and them bring wetin them don sew: blue thread, purple wool, red material, and quality linen. 26 And all the women wey sabi handwork wey their heart move them, sew the goat hair.

27 And the chiefs bring onyx stones and other stones wey them go put for the eph′od and the breastpiece, 28 and the balsam and the oil for the light and for the anointing oil and for the perfume incense. 29 All the men and women wey their heart move them bring something for the work wey Jehovah don command them through Moses to do; Israel people bring-am as offering wey person de give from im heart to Jehovah.

30 Then Moses tell Israel people say: “See, Jehovah don choose Bez′al·el the son of U′ri wey be the son of Hur wey come from the tribe of Judah. 31 E don make-am dey full with the spirit of God, wey go give-am sense, make-am understand things, and make-am know all kind of handwork 32 to make fine-fine designs, to work with gold, silver, and copper, 33 to de cut and de set stones, and to make all kind of fine-fine design from wood. 34 And e don put-am inside im heart to teach, im and O·ho′li·ab the son of A·his′a·mach wey come from the tribe of Dan. 35 E don make their heart full with sense to fit use hand do all kind of work, to be person wey sabi design things for cloth, and person wey de weave with blue thread, purple wool, red material, and quality linen, and person wey de use wood weave cloth. This men go do all kind of work and prepare all kind of design.