Exodus

36 “Bez′al·el go work with O·ho′li·ab and every man wey sabi handwork,* wey Jehovah don give sense and e don make to understand things, to fit know how to do all the work for the holy place just as Jehovah don command.”

2 So Moses call Bez′al·el and O·ho′li·ab and every man wey sabi handwork wey Jehovah don put sense for im heart, everybody wey im heart move-am to give imself to do the work. 3 Then, them collect all the contribution from Moses wey Israel people don bring for the work of the holy place. But this people continue to bring the offerings wey their heart move them and give Moses every morning.

4 Then after them start the holy work, all the people wey sabi handwork start to come one by one, 5 and them tell Moses say: “The people de bring plenty things pass wetin we need for the work wey Jehovah don command say make we do.” 6 So Moses command say make them make announcement for the whole camp say: “Men and women, make una no bring anything again for the holy contribution.” With that one, them stop the people make them no bring anything again. 7 The things wey them bring dey enough to do all the work and e even plenty pass wetin them need.

8 So all the people wey sabi handwork use ten tent cloths to make the tabernacle, and use quality linen wey them twist, blue thread, purple wool, and red material, to make the cloths. E* weave cherubs ontop of them. 9 Each tent cloth long reach 28 cubits* and wide reach 4 cubits. All the tent cloths na the same size. 10 Then e join five of the tent cloths together and e still join the other five tent cloths together. 11 After that one, e use blue thread make holes for the edge of one tent cloth where e go join. E do the same thing for the outside edge of the tent cloth, for the place wey match where e go join. 12 E make 50 holes for one tent cloth, and 50 holes for the other edge of the tent cloth for the place where e go join so that the holes go dey opposite each other. 13 At last, e use gold make 50 hooks and join the tent cloths together with the hooks, so that the tabernacle come be one.

14 Then e use goat hair make tent cloths for the tent ontop the tabernacle. E make 11 tent cloths. 15 Each tent cloth long reach 30 cubits and wide reach 4 cubits. The 11 tent cloths na the same size. 16 Then e join five of the tent cloths together and join the other six tent cloths together. 17 The next thing wey e do na say, e make 50 holes for the outside edge of the tent cloth for where e join, and e make 50 holes for the edge of the other tent cloth wey join with-am. 18 And e use copper make 50 hooks to join the tent together to become one.

19 E use ram skins wey them dye with red color to make cover for the tent, and e use sealskins to make cover wey them go put ontop of that one.

20 Then e use acacia wood make frames for the sides of the tabernacle, and them stand straight. 21 Each frame high reach ten cubits and e wide reach one and half cubits. 22 Each frame get two legs* wey join to each other. Na so e make all the frames for the tabernacle. 23 So e make the frames for the left side* of the tabernacle, 20 frames wey face left.* 24 Then e make 40 silver base wey get hole s to put under the 20 frames. E make two base under one frame for the two legs of the frame, and each frame wey de follow get two base under-am for the two legs to enter. 25 For the other side of the tabernacle wey be the right side,* e make 20 frames 26 and their 40 silver base, two base dey under one frame and two base dey under each of the other frames.

27 For the back of the tabernacle,* e make six frames. 28 E make two frames as corner posts for the tabernacle for the two corners for back. 29 The posts dey double from bottom go reach the up side, and join together for the first ring. Na so e do with the two corner posts. 30 So them be eight frames together with their 16 silver base. Two silver base dey under each frame.

31 Then e use acacia wood make long sticks, five of the long sticks connect the frames for one side of the tabernacle, 32 and five long sticks connect the frames for the other side of the tabernacle, and five long sticks connect the frames for the back of the tabernacle.* 33 Then e make the middle long stick to pass the center of the frames, from one end go reach the other end. 34 E cover the frames with gold, and e use gold make their rings to hold the long sticks, and e cover the long sticks with gold.

35 Then e make the curtain with blue thread, purple wool, red material, and quality linen wey them twist. E weave cherubs ontop-am. 36 Then e make four acacia pillars for-am and cover them with gold, and e still use gold make hooks, and e make four silver base for the pillars. 37 The next thing wey e do na say, e make screen* for the domot of the tent with this things wey them weave together: blue thread, purple wool, red material, and quality linen wey them twist, 38 e still make five pillars for-am and their hooks. E use gold cover their top and the things wey them take connect them,* but their five base na copper.