Study Book for Our Life and Preaching Meeting
© 2025 Watch Tower Bible and Tract Society of Pennsylvania
SEPTEMBER 1-7
FINE-FINE LESSON FROM BIBLE PROVERBS 29
Run From Belief and Tradition Wey Bible No Support
wp16.06 6, box
Vision of Those Wey Dey Heaven
Millions of people be like prisoners wey them chain, them believe say some things de happen just the way them don plan-am and them de fear wicked spirit. Them de use charm, things wey them de drink wey get magic, and things wey them de wear to protect theirself. You no need to do any of those things. Bible make us dey sure say: “The eyes of Jehovah de look every place for the earth, so that e go show e power for people wey de serve-am with all their heart.” (2 Chronicles 16:9) Jehovah, wey be the true God, wey get power pass Satan by far, go protect you if you trust-am.
For Jehovah to protect you, you need to learn about the things wey de make-am happy and do-am. For example, for the apostles time, Christians for Ephesus bring all their books about magic and burn them. (Acts 19:19, 20) For the same way, for God to protect you, you must troway things like charm, anything wey them de wear for body to protect person, juju, magic book, and any other thing wey connect with demon.
Support the Truth About Death
13 If you no dey sure about any tradition or celebration, pray to Jehovah and ask for sense, with the faith say e go answer you. (Read James 1:5.) No stop for there, make you still do research for our publications. If you need to see the elders for your congregation, make you go meet them. Them no go tell you wetin to do, but them fit show you some Bible verse wey fit guide you for this matter, like the ones wey we talk about for here. When you do this things, you de train your “sense,” and this sense go help you “know the difference between good and bad.”—Heb. 5:14.
“I Go Waka for Inside Your Truth”
12 Traditions and celebrations wey God hate. Our family members, workmates and schoolmates fit try to worry us to join them for their celebrations. Wetin we fit do so that we no go join them do traditions and celebrations wey e no honor Jehovah? One thing wey go help us na to always de remember how Jehovah de feel about this traditions. Check some things wey we print for our publications about how the holiday start. This one go help you well-well. When we de remind ourself say we no de celebrate this holiday because e no dey for Bible, we go de get strong mind more-more say we de waka for the way wey “the Lord want.” (Eph. 5:10) When we trust Jehovah and im Word of truth, e go protect us from “fear of men.”—Prov. 29:25.
Fine-Fine Things Wey You See for Bible
it ‘To Overpraise Person’ ¶1
To Overpraise Person
Na to de praise person too much or for way wey no be true. Most times them de do-am to make the person wey them de praise to love imself or dey proud and this one no go end well for-am. The person wey de praise person for this way de do-am to gain favor or collect something from the person wey e de praise, to make the person feel say e dey important or to give-am glory. Most times, them de do this kind thing to make the other person fall for trap. (Pr 29:5) The sense wey people de use praise person like this no come from God but e come from this world, and this one de show say person love only imself, de do partial, and de lie. (Jas 3:17) To de talk wetin no be true, to overpraise person or de give people glory and to talk wetin go make people dey proud no de make God happy at all.—2Co 1:12; Ga 1:10; Eph 4:25; Col 3:9; Re 21:8.
SEPTEMBER 8-14
FINE-FINE LESSON FROM BIBLE PROVERBS 30
“No Make Me Too Poor Or Make Me Too Rich”
w18.01 24-25 ¶10-12
Which Kind Love De Really Make Person Happy?
10 The truth be say, all of us need money. E de help us sometimes. (Eccl. 7:12) But person no need to get everything for-am to really happy. Even if na small e get, e fit happy. (Read Ecclesiastes 5:12.) Agur, wey be Jakeh pikin talk for Bible say: “No make me too poor or make me too rich. Just give me the food wey go belleful me.” We fit understand why e talk say e no want poor too much. E talk say if e too poor, e fit go thief and that one no go make God happy. But wetin make-am pray say e no want get too much money? E say: “So that I no go too rich make I come deny you say, ‘Who be Jehovah?’” (Prov. 30:8, 9) E fit get people wey you know wey de put mind for their money instead of them to trust God.
11 People wey like money too much no fit be God friend. Jesus talk say: “Nobody fit be slave for two oga, because if e hate one, e go love the other one. Or if e serve one with all im heart, e no go respect the other one. Una no fit be slave for God and for Money.” But before e talk this one, e say: “Make una stop to gather better-better things for unaself for this earth, where insect and rust fit spoil them, and where thief fit enter and carry them. Instead, make una gather better-better things for unaself for heaven, where insect and rust no fit spoil them, and where thief no fit enter and carry them.”—Matt. 6:19, 20, 24.
12 Many people wey de serve Jehovah de try to live simple life. This one de make them happy pass before, and e de make them get more time for Jehovah work. E get one brother wey de stay America, im name na Jack. This brother sell im big house and im business because e know say that one go give-am chance to fit join im wife de pioneer. The brother talk say: “E no easy for us to sell our fine house and land wey dey for better place. I remember say wahala for work de always make me squeeze face come house. But my wife wey be regular pioneer de always happy. E de tell me say no oga better pass the one wey e de work for. But now wey I don join-am de pioneer, two of us de work for Jehovah.”
w87 5/15 30 ¶8
Fear Jehovah and You Go De Happy
◆ 30:15, 16—Wetin we learn from this examples?
Them help us see say person wey get long throat no de ever dey okay with wetin e get. Leech (worm wey de suck blood) no de tire to suck blood, and na so people wey get long throat no de tire to gather more money and power. Na so Sheol be too, e no de ever talk say the people wey don die wey them bury inside-am don do. Woman wey no fit born no de tire to cry for pikin. (Genesis 30:1) Dry land de drink any rain water wey fall and e no go tey e go dry again. And fire wey de burn the things wey dey inside-am go send small-small fire comot to burn anything wey fit burn wey dey around-am. Na so person wey get long throat be. But people wey de allow the sense wey God de give to direct them no de allow that kind spirit control them.
w11 6/1 10 ¶4
How You Fit Live Life According to Wetin You Get
De save money before you buy things. Even though some people de think say to save money before you buy something na old school, na one of the best way to dey free from the wahala wey de come when person de buy things for credit. This one don help many people to dey free from credit wahala and other problem wey de follow-am, like to buy with high interest, and this one de make the price of the things wey them de buy increase. Bible describe ant as animal wey get sense, because e de save food when them de do harvest, so that e go see eat for future.—Proverbs 6:6-8; 30:24, 25.
Continue to Be Jehovah Visitor!
18 E dey important make we take time think about how we de feel about money matter. Ask yourself say: ‘I de always think about money and things wey I fit use-am buy? If person borrow me money, e de hard me to pay back because I de think say the person wey borrow me the money no need-am? When I get money, e de make me feel say I better pass other people? E de hard me to use my money help people? I de judge brothers and sisters wey get money as people wey love money pass Jehovah? I de make friends only with rich people?’ E dey important make we ask ourself this questions because Jehovah don honor us to be visitor for im tent. But we fit continue to be Jehovah visitor if we make sure say we no love money. If we do this one, Jehovah no go ever leave us!—Read Hebrews 13:5.
Fine-Fine Things Wey You See for Bible
w09 4/15 17 ¶11-13
Things Wey Jehovah Make Show Say E Get Sense
11 One animal wey be like rabbit, wey them de call rock badger na another small animal wey fit teach us teach important lesson. (Read Proverbs 30:26.) E resemble big rabbit but e get short, round ear and short leg. This small animal de stay for place wey rock dey. The sharp eye wey the rock badger get de help-am well-well. The small hole wey e de pass enter where e de stay de make-am dey safe and de protect-am from other animal wey want attack-am. Them de like to dey together, and this one de help them to fit protect theirself, and e de help them dey warm for cold season.
12 Wetin we fit learn from the rock badger? One thing na say this animal no just de leave imself like that make other animals attack-am. Instead, e de use im sharp eye see them from far, and e de stay near hole and place wey get small passage wey fit protect-am from im enemies. So, we too need to know the things for this Satan world wey fit be danger for us, so that we go fit run from them. Apostle Peter advice Christians say: “Una enemy wey be the Devil, de waka up and down like lion wey de make loud noise, de find person wey e go chop.” (1 Pet. 5:8) When Jesus dey this earth, e dey careful, e make sure say e no fall for all the plan wey Satan make to make-am leave God. (Matt. 4:1-11) Jesus show im followers better example!
13 One way we wey we fit protect ourself from Satan na to de use the things wey Jehovah don give us to protect us. We need to de study God Word and de go meeting. (Luke 4:4; Heb. 10:24, 25) And just as the rock badger de do well when them dey together, we need to dey close to our Christian brothers and sisters so that we fit “encourage each other.” (Rom. 1:12) As we de use the things wey Jehovah don give us to make us dey safe, we de show say we agree with wetin David talk, wey say: “Jehovah na my hard rock and my Savior and the Person wey de protect me. My God na my rock, the place wey I fit hide.”—Ps. 18:2.
SEPTEMBER 15-21
FINE-FINE LESSON FROM BIBLE PROVERBS 31
Wetin We Learn From the Advice Wey One Mama Give Im Son?
w11 2/1 19 ¶7-8
Teach Your Children How to Know Wetin Good and Bad
Teach them the whole truth about sex. E dey important to warn them. (1 Corinthians 6:18; James 1:14, 15) But, the main thing wey Bible talk about sex na say sex na gift from God, no be trap wey Satan de use. (Proverbs 5:18, 19; Song of Solomon 1:2) If you only tell your children about the danger wey dey sex, them fit get wrong idea about-am, and no really understand wetin Bible talk about the matter. One young woman for France, wey im name na Corrina talk say: “My papa and mama de always talk the bad side of sex, and that one spoil my mind about sex matter.”
Make sure say your children understand the whole truth about sex. One mama for Mexico, wey im name na Nadia talk say: “When my children dey around 13-19 years, the thing wey I de always tell them be say, sex na fine thing and e dey normal, and na gift wey Jehovah God give human being make them use enjoy theirself. But e want make them use-am when them marry. If we use-am well e fit make us happy, but if we no use-am well we go suffer.”
Teach Your Children About Alcohol
Make you be the first person wey go start to talk about this matter. One papa for Britain wey im name na Mark talk say: “Children no know the reason why them no suppose drink alcohol and how e de affect people wey drink-am. I ask my son wey dey eight years whether to drink alcohol good or bad. I try to talk this matter the way my pikin go dey free to talk wetin dey im mind.”
You go help your children know how serious the matter be if you talk-am for different-different time. Base on the age wey your pikin dey, de talk about alcohol as you de teach-am about other matter wey e need to know about life, like sex matter and how e fit dey safe when e de waka for road.
Show better example. Children be like sponge. Just like sponge de quick soak water, na so children de quick learn things wey de happen around them. Research show say na papa and mama children de quick learn from pass. This one mean say if alcohol na the main thing wey de make your mind come down or relax, your pikin go think say na alcohol be the solution to all worry-worry wey people de face for life. So make you be better example for your pikin. Make sure say you use alcohol for the correct way.
g17.6 9 ¶5
Teach Children to De Carry Body Down
Encourage them to de give. Show your pikin say “na when person de give e go happy pass when e de receive.” (Acts 20:35) How you fit do this one? Una fit write name of people wey una fit help with transport matter, help go market, or repair things wey spoil for their house. Then carry your pikin follow body as you de help some of them. Make your pikin see-am for your face say you de happy and e de really sweet you as you de care for other people. As you de do this one you de use your example, wey be the best way teach your pikin how to de carry body down.—Bible Advice: Luke 6:38.
Fine-Fine Things Wey You See for Bible
w92 11/1 11 ¶7-8
Education for Bible Time
7 For Israel, papa and mama de start to teach their children from when them small. (Deuteronomy 11:18, 19; Proverbs 1:8; 31:26) E. Mangenot wey sabi Bible matter write for French Dictionnaire de la Bible, say: ‘As the pikin start to de talk, the pikin go start to learn some things from the Law. The mama go repeat one verse for-am; when e don know-am, e go tell-am another one. After, them go write the verses wey the pikin don already know and give-am to-am. Na so them take de teach them how to read, and when them don grow, them go continue to read the law by theirself and de think about-am.’
8 This one de show say the main method wey them de use na to de cram things. The things wey them learn about Jehovah law and the way e deal with im people need to dey for their heart. (Deuteronomy 6:6, 7) Them need to think deep about the things wey them read. (Psalm 77:11, 12) To help young and old people remember, them use different-different method. One of them na song wey go help them learn the different letter for the alphabet, and them arrange each of their song with different letter for the way wey their alphabet be (like Proverbs 31:10-31); another method na to de repeat words wey start with the same letter or sound; and to de use numbers, like the ones wey them use for the last part of Proverbs chapter 30. E sweet us to know say, some people wey go school well-well talk say the Gezer Calendar, wey be one of the example wey old pass of how Hebrew people take de write na wetin one school boy use practice.
SEPTEMBER 22-28
FINE-FINE LESSON FROM BIBLE ECCLESIASTES 1-2
Continue to Train the Next Generation
w17.01 27-28 ¶3-4
“Give This Things to Men Wey Dey Faithful”
3 Many of us like the work wey we de do for Jehovah and we fit no want stop-am. But since Adam time, as people de old and de die go, other people de come. (Eccl. 1:4) As things de change like that, e fit make some things hard for Jehovah people today. Because Jehovah de bless our preaching work, the way we de do-am de change. We de use technology de do some things for the work and new technology de come out every day. This one fit make-am hard for some old people to learn the new way we take de do things. (Luke 5:39) Even if no be so e be for all the old people, young people get power pass old people. (Prov. 20:29) So, when old people train young people to do more work for congregation e de show say the old people love them and want help them.—Read Psalm 71:18.
4 E fit no easy for old people to leave work wey them don de do for young people. Them no want leave the work because them like-am well-well. Other people de worry say if them no dey to direct the work, the young men no go fit do-am well. And other people still feel say them no get time to train people. Even if e be like that, make young men for congregation dey patient if them never give them more work.
Fine-Fine Things Wey You See for Bible
it “Ecclesiastes” ¶1
Ecclesiastes
The Hebrew name Qo·heʹleth (wey mean “Congregator; Assembler; Convener; Convoker”) really match the work wey the king for Israel that time de do. (Ec 1:1, 12) Na the work of the king to make sure say God people dey together and dey faithful to their true King and God. (1Ki 8:1-5, 41-43, 66) So because of this one, na whether the king of Israel lead the nation to worship Jehovah or not go show whether e be good or bad king. (2Ki 16:1-4; 18:1-6) Solomon wey de lead the people to worship God, don already work hard to help the people, their friends, and other people wey come stay for their country to serve God for the temple. So for this book e try to help God people comot their mind from the things wey the world de do and to do the work wey their God want make Im nation wey E don choose do. Na Ek·kle·si·a·stesʹ them translate as Ecclesiastes wey dey our English Bible. And e come from the translation of Qo·heʹleth wey be the first Greek scripture wey them translate from Hebrew. And e ‘mean member of ecclesi (congregation; assembly).’
SEPTEMBER 29–OCTOBER 5
FINE-FINE LESSON FROM BIBLE ECCLESIASTES 3-4
Make Your Marriage Strong
Wetin You Fit Do Make Phone No Too Dey Important to You?
● To use phone with sense fit make marriage sweet well-well. For example, some husband and wife de use their phone talk and send message to each other when them no dey together.
“Small text message wey talk say ‘I love you’ or ‘I de think of you’ fit make una love for each other de strong more-more.”—Jonathan.
● When husband and wife no use phone with sense this one fit affect their marriage. For example, some people de press their phone everytime and this one de reduce the time wey them suppose spend together as husband and wife.
“l dey sure say many times my husband for really like to talk to me if to say l no de press my phone.”—Julissa.
● Some people talk say them fit de press their phone and still de talk about serious matter with their husband or wife at the same time. Sherry Turkle wey study about how human being de behave talk say, “this one na the lie wey people de tell theirself.” Even though say people think say them fit do plenty things at the same time, this one no be better thing. Sherry Turkle still talk say “the more we de try to do plenty things at the same time the more we go de make mistake.”
“To talk with my husband de sweet me well-well, but no be when e de press im phone and still want talk with me. When my husband de do plenty things at the same time, this one de make me feel say e no care if I dey there.”—Sarah.
The point na say: The way you de use phone fit make you enjoy your marriage well-well or e fit cause problem for your marriage.
Make Una Love Continue to Burn Like Fire
12 How husband and wife fit copy the example of Aquila and Priscilla? Think about the things wey you and your husband or wife need to do. Una go fit do-am together instead of to do-am different-different? For example, Aquila and Priscilla preach together. Una get plan to de preach together? Another thing be say Aquila and Priscilla work together. Two of una fit no de do the same work, but una fit de do una house work together? (Eccl. 4:9) When una de do things together, una friendship go tight and una go get chance to talk to each other more. See the example of Brother Robert and Sister Linda wey don marry for more than 50 years. Brother Robert talk say: “Na true say we no get plenty time for sport and other things wey we fit use relax. But when I de wash plate and my wife de rinse or wipe them, or when e join me as I de work for inside our garden, e de really make me happy. This one don make our friendship tight more and our love don continue to grow.”
13 Just because una de stay together no mean say una de spend time together. One sister for Brazil talk say: “Today, because we get plenty things to do, if we no dey careful, we fit start to think say we de spend time with our husband or wife just because say we de stay for the same house. I don learn say I no only need to dey together with my husband, but I still need to listen to-am and talk with-am when we de spend time together.” See wetin Brother Bruno and im wife wey e name na Tays do to make sure say them enjoy the time wey them de spend with each other. Brother Bruno talk say: “When we dey together, we de make sure say our phone no dey with us so that we go fit enjoy our time well together.”
14 But wetin you go do if you and your husband or wife no de enjoy to spend time together? Maybe wetin you like different from wetin e like, or something about-am de make you vex. Wetin fit help you? Remember the fire wey we don first talk about for this article. The fire no go start to catch well-well when you just light-am. You go need to de add firewood small-small to the fire to make-am catch more. As time de go, you go de put big-big firewood for the fire. Na the same thing una fit do, una fit start to spend small time together every day. And when una want spend time together, make una do wetin two of una go enjoy, no be wetin fit make one of una vex. (Jas. 3:18) When una start small-small, una go see say una love fit start to grow again.
Make Una Love Continue to Burn Like Fire
3 If husband and wife want make their love for each other continue to de strong, them need to make their friendship with Jehovah strong. How this one fit help them? When husband and wife love Jehovah, that one go make them quick follow im advice. This one go help them no enter trouble and still help them fit handle any problem wey fit spoil their love for each other. (Read Ecclesiastes 4:12.) People wey love Jehovah de do their best to copy Jehovah example. This one de help them fit treat people with good mind, dey patient, and de forgive. (Eph. 4:32–5:1) When husband and wife de treat each other like this, e go easy for their love to de grow. Sister Lena wey e don pass 25 years since e marry talk say, “E dey easy to love and respect person wey really love Jehovah.”
Fine-Fine Things Wey You See for Bible
it “Love” ¶39
Love
“Time to Love.” Jehovah no de show love to people wey de do wetin e no like, or people wey don decide to de do so-so bad things. Jehovah de show love to everybody until them start to do things wey show say them hate God. When them start to hate God, God go stop to show them love. Both Jehovah God and Jesus Christ love to do wetin correct and them hate wetin dey against law. (Ps 45:7; Heb 1:9) We no suppose show love to people wey really hate the true God. True-true, better result no go come out if we continue to show love to this kind people, because people wey hate God no go fit love God as God love them. (Ps 139:21, 22; Isa 26:10) So God get better reason to hate them, and e get time wey e go punish them.—Ps 21:8, 9; Ec 3:1, 8.
OCTOBER 6-12
FINE-FINE LESSON FROM BIBLE ECCLESIASTES 5-6
How We De Show Deep Respect for Our Great God
w08 8/15 15-16 ¶17-18
De Show Respect to Show Say You De Honor Jehovah
17 We need to show say we get respect when we de worship Jehovah. Ecclesiastes 5:1 talk say: “Watch how you de waka anytime wey you go the house of the true God.” God command Moses and Joshua say make them remove their sandals when them dey for holy place. (Ex. 3:5; Josh. 5:15) Them go do this one to show respect. Priests for Israel must wear knicker wey them sew with linen material “to cover their nakedness.” (Ex. 28:42, 43) This one go help them make them no expose their body when them de serve for the altar. Everybody for the priest family must follow Jehovah law about how to dress and behave.
18 When we de worship God, we must do-am with deep respect. For people to respect us, we must show say we get respect. We no go de pretend say we get respect. This one no be just to de behave for where people dey say we get respect, God still need to see-am for our heart say we get respect. (1 Sam. 16:7; Prov.21:2) Respect suppose dey part of us and affect the way we de behave, our character, our relationship with people, even the way we de see and feel about ourself. True-true, e suppose de show every time and for everything wey we de talk and do say we be people wey get respect. Wetin apostle Paul talk suppose affect our character, the way we de carry ourself, and our dress and the things wey we de do to look fine. E talk say: “We no de do anything to make person fall for any way, so that them no go see any fault for our work.” (2 Cor. 6:3, 4) We need to “make the teaching of God our Savior, de fine more-more.”—Titus 2:10.
w09 11/15 11 ¶21
Use Bible Study Make Your Prayers De Better
21 Jesus de always pray from im heart with strong faith. For example, before e bring Lazarus back to life, “Jesus look heaven and talk say: ‘Papa, I thank you say you don hear my prayer. I know say you de always hear my prayer.’” (John 11:41, 42) Your prayers de show say you get strong faith for God? Study the example wey Jesus show us about how to pray, and you go see say the important things wey e talk for the prayer na make Jehovah name dey holy, make im Kingdom come, and make wetin e want happen. (Matt. 6:9, 10) Think about your own prayers. Them de show say you really want make Jehovah name dey holy, make im Kingdom come, and make wetin e want happen? Na so e suppose be.
w17.04 6¶12
“Do Wetin You Promise”
12 Person wey baptize just de start. Na im make we suppose de do wetin we promise Jehovah even after we baptize. So, we fit ask ourself say: ‘Since I baptize come reach now, the way I de serve Jehovah don better pass before? I still de use all my mind serve Jehovah? (Col. 3:23) I de always pray, read Bible, preach and de try make I no miss meeting? Or I no de too get time for this things again?’ Apostle Peter talk say we fit continue to do well for Jehovah work. Wetin fit help us? E say make we get faith, de learn about God, de endure, and make we use all our mind serve God.—Read 2 Peter 1:5-8.
Fine-Fine Things Wey You See for Bible
Question Wey Some People Don Ask
Ecclesiastes 5:8 de talk about person wey de rule wey de treat poor people anyhow and de do them partial. This person wey de rule suppose remember say, another person wey im position high pass im own, or wey get power pass-am for government, fit de watch-am. And other people fit dey wey their position high pass the position wey all of them get. The sad thing be say, because na man de rule, all this people fit de do bad things for government, and people de suffer because of all the bad things wey them de do.
But even if e be like say hope no dey, e de give us comfort to know say Jehovah de watch people for high position wey de rule today. We fit beg God and tell-am about all the things wey de worry us. (Ps. 55:22; Phil. 4:6, 7) We know say “the eye of Jehovah de look every place for the earth, so that e go show im power for people wey de serve-am with all their heart.”—2 Chron. 16:9.
So, Ecclesiastes 5:8 de make us remember say for government today, person always dey wey e position or power high pass the one wey other people get. The number one important thing na say, this Bible verse fit help us remember say na Jehovah get power and position pass any other person for heaven and earth. E don de use im Son Jesus Christ, to rule as King for the Kingdom. Jehovah de see everybody and everything. E no de do partial at all and e de always do the correct thing. And na so im Son still be.
OCTOBER 13-19
FINE-FINE LESSON FROM BIBLE ECCLESIASTES 7-8
“Go House Wey Them De Cry”
it “Sorrow” ¶9
Sorrow
Time to Cry. Ecclesiastes 3:1, 4 talk say e get “time to cry and time to laugh; time to cry in pain and time to dance.” Because of the condition of man today, person wey get sense go go “house wey them de cry instead of to go house wey them de chop.” (Ec 7:2, 4; compare Pr 14:13.) So wise person go see-am as chance to show how e really de feel and comfort the people wey their person die, instead of to go where e go enjoy imself. This one go help-am think about im own life, say e fit die one day and how to make im friendship with God strong.
Help Other People Manage Stress
15 William na another example. Im wife die some years ago. E talk say: “I de like-am when people tell me good things wey them remember about my wife. This one de make me really know say people be love and respect my wife. This kind of support really help me. The things wey them tell me really comfort me. Na so because my wife really dey precious to me and e don always be part of my life.” Another example na one widow wey im name na Bianca. E talk say: “I de get comfort when other people pray with me and read one or two Bible verse with me. I de like-am when them talk about my husband and listen to me when I de talk about my husband.”
w17.07 16 ¶16
“Cry With People Wey De Cry”
16 Our prayer fit still help people wey their person die. E good make we de remember them for our prayer or pray with them. E fit hard you to pray with them because you think say you go cry. But when you pray with them from your mind, your prayer fit really make their mind come down. No worry even if you cry or your voice de shake. Dalene wey we don talk about before, talk say: “Sometimes when sisters come visit me to tell me sorry, I de ask them if them go like pray with me. When them first start to pray, to talk de hard. But as them de pray de go, their voice go de strong more-more, and their prayer de really come from their mind. Their strong faith and the love wey them show me, don make my faith strong.”
w17.07 16 ¶17-19
“Cry With People Wey De Cry”
17 The time wey something take de pain us for body, dey different from another person own. If person die, many people de go there when e just happen. But as time de go, people fit no too de come again. Many people go don go back to wetin them de do before. But e good make we go when the thing just happen, and when people no de too go there again. Bible talk say: “Real friend de show love all the time, and na brother wey you fit trust when problem dey.” (Prov. 17:17) So make we ready to help people wey their person die, and make their mind come down, until them no too de feel-am again.—Read 1 Thessalonians 3:7.
18 Get-am for mind say e get some kind things wey de make people remember their person wey die. Things like: When e reach the time wey them marry, or when them go another person own. E fit be music, picture, things wey them de do before, one kind smell, wetin them de listen to, or when some kind season reach. E fit start to do things wey only im no de do before, like when e go assembly or Memorial. When e remember, e de really pain-am no be small. One brother wey im wife die talk say: “When e reach the time wey we de celebrate our marriage, I know say e go hard for me. True-true, e no easy for me at all. But some brothers and sisters come arrange one small party. And them invite my tight friends come so that I no go dey alone.”
19 Remember say e good to always encourage people wey their person die. Make we no just wait for only the time wey special thing de happen. Junia wey we talk about before, talk say: “E good to de spend time with people and help them, even when special thing no de happen. All this things de make them happy, and e de make their mind come down.” Na true say we no fit comot all the things wey de pain them for mind. And we no go fit make them stop to remember their person wey die. But we fit do something wey go make their mind come down. (1 John 3:18) Gaby wey we talk about before talk say: “When my husband die, Jehovah use the elders take help me. Them help me know say Jehovah really love me. I thank Jehovah well-well.”
Fine-Fine Things Wey You See for Bible
“Na Love “Go Make Everybody Know Say Una Be My Disciples”
18 Sometimes, we fit think say we need to talk with the brother or sister wey make us vex. But before we talk with the person, make we first ask ourself this questions: ‘I really understand wetin happen?’ (Prov. 18:13) ‘E do-am by mistake?’ (Eccl. 7:20) ‘I don make this kind mistake before?’ (Eccl. 7:21, 22) ‘If I go talk with-am, e go cause more problem?’ (Read Proverbs 26:20.) When we take time think about this questions, we fit see say e go better make we forget about the matter because of the love wey we get for the brother or sister.
OCTOBER 20-26
FINE-FINE LESSON FROM BIBLE ECCLESIASTES 9-10
De See Your Problem for the Correct Way
w13 8/15 14 ¶20-21
No Ever “Vex for Jehovah”
20 Blame who you suppose blame. Why we go do like that? The truth be say some of our problem fit be our fault. If na so e be, we need to accept our mistake. (Gal. 6:7) No try to blame Jehovah for your problems. Why e no go make sense to blame Jehovah? Think about this example: Motor fit get the power to drive for high speed. What if the driver drive the motor pass the speed wey e suppose drive-am as e de drive for road wey bend and e get accident? We go talk say na the person wey do the motor cause the accident? No! When Jehovah create us, e give us the chance to choose wetin we go do. But e don still give us advice wey fit help us make better decision. So why we go blame the Person Wey Create us for our own mistakes?
21 But no be say all the problem wey we de get na we de cause-am. Some things de happen because wetin person no expect de happen to everybody. (Eccl. 9:11) And make we no ever forget say Satan the Devil na the main person wey de make bad things happen. (1 John 5:19; Rev. 12:9) Na im be our enemy—no be Jehovah!—1 Pet. 5:8.
Jehovah Value Us When We Dey Humble
10 E go still dey more easy for us to endure problems for life when we dey humble. The truth be say, sometimes, we go fit see things wey we feel say partial dey inside or them no correct. Wise King Solomon talk say: “I don see servants de ride horse but masters de waka with leg just like servants.” (Eccl. 10:7) Sometimes, even when person really sabi do things, e no de always get praise from people. And sometimes, when person no really sabi do things, e de receive more praise from people. Even with that one, Solomon know say na fine thing for us to accept things the way them be, instead of us to allow bad condition for life de make us overvex. (Eccl. 6:9) If we dey humble, e go make-am dey more easy for us to accept things for life the way we see-am.
w11 10/15 8 ¶1-2
You De Gain From the Things Wey You De Use Enjoy Yourself?
THINGS wey them write for Bible show say Jehovah no only want make we live, but e still want make we enjoy life. For example, Psalm 104:14, 15 talk say: Jehovah de make “food . . . grow come out from ground and wine wey de make the heart of man glad. Oil wey de make the face of man shine and food wey de keep the heart of man alive.” True-true, na Jehovah de make things wey we plant grow to produce food, oil, and wine wey we de use. But wine still de make “the heart of man glad.” E no de only make us live, but e still de make us happy. (Eccl. 9:7; 10:19) Yes, Jehovah want make we dey happy, ‘make our heart full with joy.’—Acts 14:16, 17.
2 So e no bad if sometimes we plan to “look the birds well,” or “the flowers for bush” or to enjoy some other things wey fit make the way we de live our life better. (Matt. 6:26, 28; Ps. 8:3, 4) Better life na “gift from God.” (Eccl. 3:12, 13) When we de see the time wey we de use enjoy ourself as part of the gift from God, e go help us fit de use the time do things wey go make our God happy.
Fine-Fine Things Wey You See for Bible
it “Gossip, Lie-lie to Spoil Person Name” ¶4, 8
Gossip, Lie-lie to Spoil Person Name
If person de gossip, e fit turn to bad talk wey fit spoil another person name, and this person wey de talk wetin go spoil another person name fit enter trouble. This one really show say wetin Ecclesiastes 10:12-14 talk na true, e say: “Person wey no get sense de talk things wey go cause trouble for imself. The first things wey de come out from im mouth na things wey no make sense, and the last words wey e de talk na mad man word wey de cause trouble. But person wey no get sense always get wetin to talk.”
Even though say sometimes gossip no de cause trouble, e fit make person talk wetin no be true to spoil person name. But lie-lie to spoil person name always dey bad because e go make the other person feel bad and e de always cause wahala. E fit be say the person no get-am for mind to spoil the other person name and e fit still be say na im plan be that. Whether na im plan or no be im plan, the person wey de lie de put imself for position wey dey against God, because e “de do things to scatter brothers” and this one dey among the things wey God really hate. (Pr 6:16-19) Them de call person wey de lie to spoil person name “slanderer” or “accuser” for English and those words for Greek na di·aʹbo·los. Them still use this words for Bible as title for Satan the “Devil,” wey be the person wey don lie pass to spoil God name. (Joh 8:44; Re 12:9, 10; Ge 3:2-5) This one help us see where this bad character come from.
OCTOBER 27–NOVEMBER 2
FINE-FINE LESSON FROM BIBLE ECCLESIASTES 11-12
Take Care of Yourself and Enjoy Good Life
g 3/15 13 ¶6-7
Fresh Air and Sunlight, Na Medicine Wey De Kill Disease?
Light from the sun still de kill disease. The Journal of Hospital Infection explain say plenty things wey dey air wey fit cause sickness no de survive when sun beat them.
How you fit gain from this one? You fit want go outside where you fit spend some time for sun and breath fresh air. E fit dey good for you.
Life Na Gift From God, Value-am
6 Even though say Bible no be book wey doctor de use treat people, e tell us how Jehovah want make we care for ourself. For example, Jehovah use Bible advice us say: “Remove from your body things wey fit cause problem for you.” (Eccl. 11:10) To de overchop and overdrink de cause problem for person life and Bible condemn-am. (Prov. 23:20) Jehovah want make we de control ourself when we want choose wetin we go chop and drink and how them go plenty reach.—1 Cor. 6:12; 9:25.
7 We need to use our sense well to make decision wey go show say we value the life wey Jehovah give us. (Ps. 119:99, 100; read Proverbs 2:11.) For example, we need to dey careful about wetin we de chop. If the food wey we like well-well fit make us sick, we go show say we get sense if we run from-am. We still de show say we get sense when we sleep well, de always do exercise, dey neat, and always make our house clean.
“De Do Wetin the Word of God Talk”
2 Jehovah servants na people wey de happy well-well. Why? Because we get plenty reason to de happy. But one important reason why we de happy be say, we de read Bible everyday and we de do our best to do wetin we learn.—Read James 1:22-25.
3 We de gain plenty things when we de do wetin we learn from Bible. For example, when we do wetin we learn from Bible, we de make Jehovah happy and that one go make us happy too. (Eccl. 12:13) Another thing be say, when we de do wetin we learn from Bible, e go make our relationship with our family members better, and make our friendship with brothers and sisters for congregation better. We dey sure say this one go don happen to you. Another thing be say, e de help us fit run from the problem wey people de face because them no obey Jehovah law. This na exactly wetin King David talk. After e talk about Jehovah law, commandment, and judgement for one of im song, e talk for the end say: “Plenty blessing dey when person obey them.”—Ps. 19:7-11.
Fine-Fine Things Wey You See for Bible
it “Na God Use Im Spirit Move Them” ¶10
Na God Use Im Spirit Move Them
E dey clear say the men wey God use write im word for Bible no be machine wey just de write wetin person de talk. We read about apostle John say God use one angel “give-am” the Revelation with “signs” and then John come start to “talk about everything wey e see, wey be, wetin God talk and the message wey come from Jesus Christ.” (Re 1:1, 2) God use im holy spirit carry John “come the Lord day” and them tell-am say: “Write wetin you de see for scroll.” (Re 1:10, 11) So, God see-am say e go really make sense to allow the men wey e use write Bible to use their sense select the words wey them go use describe the vision wey e de show them (Hab 2:2), but e always direct and guide them so that wetin them de write no go only just be true but e go still be the way Jehovah want-am. (Pr 30:5, 6) We fit see the better work wey the people wey God use write Bible do for Ecclesiastes 12:9, 10, them think well, take their time check, and arrange the “sweet words and to record correct words wey be truth.”—Compare Lu 1:1-4.