You Don De Prepare for Memorial?

The last Passover wey Jesus do na really important one. Since e go soon die, e plan say e go do the Passover with e apostles and start another celebration wey they go de do every year. This one na the Lord’s Evening Meal. So, e send Peter and John make they go arrange the room wey they go use. (Lu 22:7-13; check picture for front cover.) This one de remind us say we need to prepare for the Memorial wey we go do for March 27. Congregations go don already choose brother wey go give the talk, prepare the bread and wine, and arrange other things. But, how each of us fit prepare for the Memorial?

Ready your heart and mind. Read the Memorial Bible reading and think about wetin you fit learn from-am. We fit see the program for Memorial Bible reading for Learn From Bible Everyday. Appendix B12-A and B12-B for our New World Translation Bible still get this program and e show us other things wey happen small time before Jesus die. (Still check April 2020 Life and Preaching Meeting Workbook.) For wuna family worship, wuna fit use Watch Tower Publications Index or Research Guide for Jehovah’s Witnesses, find publication wey talk about why the sacrifice of Jesus dey important.

Invite people for the Memorial. Do your best to join your congregation invite people for Memorial. Think about people wey you fit invite, like your return visits, people wey you don first study Bible with, your neighbors, schoolmates, workmates and family people. Make elders still invite inactive brothers and sisters. Remember say even if person no de stay for your area, you fit know the time and place wey they go do the Memorial for the place wey the person de stay. Just go jw.org, click ABOUT US and select “Memorial.”

Which other thing we fit do to prepare for Memorial?