Copy the Way Jehovah and Jesus De Think

1-2. Wetin e mean to love Jehovah, and how Jesus show say e love Jehovah with all im mind?

JESUS explain the command wey dey important pass when e talk say: “You must love Jehovah your God with all your heart, and with all your soul and with all your power and with all your mind.” (Luke 10:27) So we need to love Jehovah with everything wey we get. This one mean say the kind things wey we want, the way we de feel, and the way we de use our power go show say we love God. We still need to use our mind wey be the way we de think, to show say we love Jehovah. The truth be say, we no go fit know how Jehovah de think finish. But we fit know how Jehovah de think if we study “the mind of Christ” because Jesus de really think like im Papa.—1 Cor. 2:16 and study note “we do have the mind of Christ” for English.

² Jesus use all im mind love Jehovah. E know wetin Jehovah want make e do and e ready to do-am even though say this one go make-am suffer. Because wetin dey Jesus mind na to do wetin im Papa want, e no allow anything to comot im mind from wetin e want do.

3. Wetin apostle Peter learn from Jesus, and wetin Peter encourage other Christians to do? (1 Peter 4:1)

³ Apostle Peter and other apostles get the chance to spend time with Jesus and to learn how e de think. For the first letter wey apostle Peter write, e encourage Christians to ready theirself to think the way Jesus de think. (Read 1 Peter 4:1.) When Peter write this letter, the word wey e use wey them translate as “make una ready unaself” de describe soldiers wey ready with weapons to fight war. So when Christians copy the way Jesus de think, this one go make them dey ready to fit fight any temptation wey fit make them sin.—2 Cor. 10:​3-5; Eph. 6:12.

4. Wetin we go learn for this article?

⁴ How Jesus de think and how we fit copy im example? For this article, we go talk about: (1) how we fit copy the way Jehovah de think wey go help us de think as one, (2) how we fit de carry body down, and (3) how prayer fit help us to de reason well.

COPY THE WAY JEHOVAH DE THINK

5. Give example wey show say one time Peter no think the way Jehovah de think.

⁵ E get one time wey Peter no think the way Jehovah de think. Jesus don tell im apostles say e go need to go to Jerusalem, and for there, leaders for religion go arrest-am, suffer-am, and them go kill-am. (Matt. 16:21) Peter know say Jesus na the Messiah wey Jehovah don promise say go save God people. So e fit don hard Peter to believe say Jehovah go allow make people kill-am. (Matt. 16:16) So Peter call Jesus go one corner and tell-am say: “Lord, pity yourself. This thing no go happen to you at all.” (Matt. 16:22) For this matter, Peter and Jesus no think for the same way because Peter no think the way Jehovah de think.

6. How Jesus show say e de think the way Jehovah de think?

⁶ Jesus know wetin im Papa de think about the matter and e think like im Papa. Jesus tell Peter say: “Comot from my front Satan! You de block my way, because you de think the way people de think, no be the way God de think.” (Matt. 16:23) Jesus know say to fit do wetin Jehovah want, e go need to suffer and die. So, e no gree follow Peter advice even though say Peter get good mind. Peter learn say e need to de think the way Jehovah de think. And this na important lesson wey we too need to learn.

7. How Peter later show say e want de think the way Jehovah de think? (Check picture for front cover.)

⁷ Later, Peter show say e want de think the way Jehovah de think. When Jehovah time reach to allow people wey no be Jew to become Christian, e tell Peter say make e preach to Cornelius. Cornelius go be one of the first people wey no be Jew wey become Christian. Jew people no de like do anything with people wey no be Jew, so Peter need to adjust the way e de think so that e go fit preach to people wey no be Jew. So when Peter see the way Jehovah de think for this matter, e change the way e de think. Because of this one, when Cornelius tell Peter say make e come visit-am, Peter just go, e no talk say: “I no go come.” (Acts 10:​28, 29) E preach to Cornelius and everybody for Cornelius house, and them baptize.—Acts 10:​21-23, 34, 35, 44-48.

8. How we fit show say we de think the way Jehovah de think? (1 Peter 3:8)

⁸ After some years, Peter encourage Christians to “get one mind.” (Read 1 Peter 3:8.) We fit get one mind with our brothers and sisters if we copy the way Jehovah de think as e dey for Bible. For example, Jesus tell im disciples say make them put the Kingdom of God as number one thing for their life. (Matt. 6:33) Because of this one, one publisher for your congregation fit decide say e go start to pioneer or do some other work for full-time service. Instead make you tell-am wetin go discourage-am, talk things wey go encourage-am and try to support-am.

DE CARRY BODY DOWN

9-10. How Jesus show say e really de carry body down?

⁹ The night before Jesus die, e teach Peter and the other apostles one important lesson about to de carry body down. Before this time, Jesus don send Peter and John to go arrange the things wey them go need to do the last Passover wey e go do with them before e die. Some of the things wey them fit don arrange na basin and towel wey person fit use wash the leg of visitor. Who go come do this work wey servants suppose do?

¹⁰ Because Jesus de carry body down, e no waste time to do this work. E go don shock im apostles to see as Jesus de do this work wey servants suppose do. Jesus comot the cloth wey e wear ontop, tie towel for im waist, put water inside the basin, and start to wash their leg. (John 13:4, 5) E fit don take some time for Jesus to wash the leg of the 12 apostles, even the leg of Judas wey go betray-am. Even with this one, Jesus carry body down wash their leg. Then Jesus sofri explain to them say: “Una understand wetin I do for una so? Una de call me ‘Teacher’ and ‘Lord,’ and una correct, because na wetin I be. So, if me, wey be Lord and Teacher wash una leg, una suppose to wash each other leg too.”—John 13:​12-14.

11. How Peter show say e don learn how to de carry body down? (1 Peter 5:5) (Still check the picture.)

¹¹ Peter learn from the way Jesus de carry body down. After Jesus don go back to heaven, Peter do one miracle to cure one man wey no fit waka since the time wey them born-am. (Acts 1:8, 9; 3:2, 6-8) Plenty people see this miracle and them gather around Peter. (Acts 3:11) But Peter no want accept the praise wey this people de give-am even though say e grow up for area wey people de like make them praise them. Instead, Peter carry body down and tell the people to praise Jehovah and Jesus. E talk say: “Through [Jesus] name, and because of the faith wey we get for im name, this man wey una see and know, God don make-am strong.” (Acts 3:​12-16) Later, Peter write to Christians why e dey important to de carry body down. The word wey e use when e write the letter de remind us of the time wey Jesus tie towel for im waist and wash the leg of im apostles.—Read 1 Peter 5:5.

12. How we fit copy Peter example, and continue to learn to de carry body down?

¹² We fit learn how to carry body down from Peter example. Remember say no be only wetin we de talk de show say we de carry body down. The word wey Peter use wey we translate as “to de carry body down” fit still mean the way person de see imself and other people for im heart. We de do things to help other people no be because we want make people praise us, but na because we love Jehovah and people. If we de happy to serve Jehovah and help our brothers and sisters for any way wey we fit, whether people de see us or them no de see us, e de show say we de carry body down.—Matt. 6:​1-4.

“DE REASON WELL”

13. Wetin e mean for person to “de reason well”?

¹³ Wetin e mean for person to “de reason well”? (1 Pet. 4:7) Christian wey de reason well go check wetin Jehovah de think about any matter before e make decision. This kind Christian know say nothing for this world better pass im friendship with Jehovah. E no go de think say e know everything, e go understand say some things dey wey e no know. And e go de show say e need Jehovah help as e de pray to-am make E direct-am.a

14. How Peter show say e no depend on Jehovah?

¹⁴ The last night before Jesus die, e warn im apostles say: “For this night, all of una go fall because of wetin go happen to me.” Peter answer-am say: “Even if all the other people fall because of wetin go happen to you, I no go ever fall!” That night Jesus advice some of im disciples say: “Make una continue to watch and continue to pray.” (Matt. 26:​31, 33, 41) If to say Peter follow that advice, e dey possible say e for get the strong heart wey e need to fit talk say e be Jesus disciple. But Peter talk say e no know Jesus and e later regret-am.—Matt. 26:​69-75.

15. For the night before Jesus die, how e show say e de reason well?

¹⁵ Jesus de always beg Jehovah for help. Even though say Jesus dey perfect, e pray plenty times to Jehovah the night before e die. This one help-am get the strong heart wey e need to fit do wetin Jehovah want make e do. (Matt. 26:​39, 42, 44; John 18:4, 5) We dey sure say Peter no forget the many times wey e see Jesus de pray that night.

16. How Peter show say e don learn to de reason well? (1 Peter 4:7)

¹⁶ After some time, Peter learn to de pray more to Jehovah so that Jehovah go help-am. After Jesus come back to life, e appear to Peter and the other apostles and tell them say them go receive holy spirit to help them fit preach the good news. But Jesus tell them say make them wait for Jerusalem until them receive the holy spirit. (Luke 24:49; Acts 1:4, 5) Wetin Peter do as e de wait? Peter and other Christians “continue to pray.” (Acts 1:​13, 14) Later, when Peter write im first letter, e encourage Christians make them continue to pray to Jehovah for help. And this one go show say them de reason well. (Read 1 Peter 4:7.) Peter don learn to de depend on Jehovah and this one make-am fit help and support im brothers and sisters.—Gal. 2:9.

17. Even if we think say we fit do some things by ourself, wetin we still need to do? (Still check the picture.)

¹⁷ To show say we de reason well, we must always de pray to Jehovah. We need to continue to pray to Jehovah even if we think say we fit do some things by ourself. So when we need to make important decision, we need to pray to Jehovah make e direct us because we know say Jehovah know pass us.

18. How we fit adjust the way we de think to be like Jehovah own?

¹⁸ We really thank Jehovah say e make us for way wey we fit copy im better example. (Gen. 1:26) Na true say we no fit copy the way Jehovah de think for perfect way. (Isa. 55:9) But like Peter, we fit adjust the way we de think to fit copy the way Jehovah de think. We fit do this one when we continue to learn to think the way Jehovah de think, do our best to de carry body down, and de reason well.