Carry Body Down and Accept Wetin You No Know

1. How Jehovah make us, and why e make us like this?

JEHOVAH make us for wonderful way: We fit think, learn new things, and use wetin we learn. But why e make us like this? E want make we learn about-am, and e want make we de use the things wey we de learn from Bible to make better decisions as we de serve-am.—Prov. 2:​1-5; Rom. 12:1.

2. (a) Wetin we need to understand about ourself? (Job 37:​23, 24) (Still check the picture.) (b) How we de gain if we gree say we no know everything?

² Na true say Jehovah create us to fit learn new things, but e still get plenty things wey we no know. (Read Job 37:​23, 24.) Think about Job example. Jehovah ask Job plenty question and this one make Job know say e still get plenty things wey e no know. This thing wey happen make Job carry body down and correct the way e de think. (Job 42:​3-6) We too go gain well-well if we gree say e get some things wey we no know. E go help us de carry body down and trust say Jehovah go always tell us wetin we really need to know to fit make better-better decisions.—Prov. 2:6.

3. Wetin we go talk about for this article?

³ For this article, we go talk about some things wey we no know and how this one fit make-am hard for us to do the correct thing sometimes. We go still talk about why e good say we no know some things. This things wey we go learn go help us fit trust say Jehovah go always tell us everything wey we really need to know, because na im be “the Person wey know everything.”—Job 37:16.

WE NO KNOW WHEN THIS WORLD GO END

4. As e dey for Matthew 24:​36, wetin be one thing wey we no know?

⁴ Read Matthew 24:36. We no know when this world go end. When Jesus dey this earth, e no even know the “day and [the] hour” wey e go end.a E later tell im apostles say na only Jehovah get the right to choose the time wey some things go happen. (Acts 1:6, 7) Jehovah don decide the time wey e go end this Satan world, but we no go fit know when this one go happen.

5. Wetin fit happen to us because we no know when the end of this world go come?

⁵ With wetin Jesus talk, we no know how long we go need to wait before the end of this world go come. Because of this one, e fit no dey easy for us to continue to de wait, especially if e don tey wey we don de expect the end to come. Apart from this one, if our family or other people de laugh us because the end never come, e fit still make-am hard for us to wait. (2 Pet. 3:3, 4) We fit de think say if we know the exact day wey the end go come, e go make-am dey easy for us to fit wait and endure when people de laugh us.

6. Why e good say we no know when this world go end?

⁶ The truth be say, because we no know when this world go end, we get the chance to show say we de worship Jehovah because we love and trust-am. To serve Jehovah forever, na wetin dey our mind, no be to serve-am reach when the end go come. So Instead make we de worry about when “the day of Jehovah” go come, e go better make we de think about the better-better things wey go happen after that day. This one go help us continue to de near Jehovah more, trust-am, and do everything wey we fit do to make-am happy.—2 Pet. 3:​11, 12.

7. Wetin be some things wey we know?

⁷ Instead of us to de think about the things wey we no know, e dey important make we de think about the things wey we know. For example, we know say the last days start for 1914. Bible talk plenty things wey show say na 1914 the last days start, and e still talk plenty things wey go happen after that year. Because this things happen as Bible talk, we dey sure say “the great day of Jehovah don near.” (Zeph. 1:14) We still know the work wey Jehovah want make we do. E want make we de tell everybody about the “good news of the Kingdom.” (Matt. 24:14) For this our time, we de use more than 1,000 language preach this good news for about 240 lands. We no need to know the “day and [the] hour” wey this world go end before we go put body for the preaching work.

WE NO KNOW HOW JEHOVAH GO HELP US

8. Wetin “the work of the true God” mean? (Ecclesiastes 11:5)

⁸ We no fit know everything about “the work of the true God.” (Read Ecclesiastes 11:5.) When Bible talk about “the work of the true God,” e de talk about the things wey Jehovah de do, or the things wey e de allow so that wetin e get for mind go fit happen. We no fit know all the reasons wey de make Jehovah allow some things to happen, or all the things wey e go do to help us. (Ps. 37:5) Bible talk say we no know “the work of the true God,” just as we no know how pikin de grow inside im mama belle. Even science people never fit understand everything about how pikin de grow inside im mama belle. Na so e still be for us too, we no know everything about how Jehovah go do some things.

9. Because we no know how Jehovah go help us, how this one fit affect us?

⁹ Sometimes, we fit no know how Jehovah go help us. We fit feel like this if we plan to do more for Jehovah but we no fit do wetin we plan, or when we de go preaching well-well but we no get any Bible student. Apart from this one, if we de do any work for Jehovah organization and we de face problem for the work, we fit still feel say Jehovah no de help us. When we no know how Jehovah go help us, this one fit make-am hard for us to make some decisions. For example, we fit de fear to leave some things so that we go fit do more for Jehovah work, like to go place where them need more publishers to preach.

10. Because we no know wetin Jehovah go do for some kind situation, which better-better character this one de help us get?

¹⁰ Because we no know wetin Jehovah go do for some kind situation, this one de help us carry body down. And this one de help us understand say Jehovah always know wetin go better for us. (Isa. 55:8, 9) Apart from this one, e de help us trust Jehovah more say na im go fit always handle matter for the best way. So when we get fine experience for preaching or for any other work wey we de do for Jehovah organization, na Jehovah we de give the praise. (Ps. 127:1; 1 Cor. 3:7) And if things no happen the way we expect, make we remember say Jehovah de see everything. (Isa. 26:12) So we go do our part and leave the rest for Jehovah. And even if Jehovah no do miracle to help us the way e de do for Bible time, we dey sure say e go help us.—Acts 16:​6-10.

11. Which important things we know about Jehovah?

¹¹ We know say Jehovah love us, e get sense pass us, and e de always do the correct thing. We know say e really value wetin we de do for-am, and for our brothers and sisters. And we still know say Jehovah de always bless im servants wey de worship-am well.—Heb. 11:6.

WE NO KNOW WETIN GO HAPPEN TOMORROW

12. With wetin James 4:​13, 14 talk, wetin we no know?

¹² Read James 4:​13, 14. We no know wetin go happen to us tomorrow. For this world, many things fit happen to us. Some na wetin we no expect or wetin we no fit control. (Eccl. 9:11) Because of this one, we no go fit know whether the things wey we plan go succeed, or if we go even dey alive reach the time wey we plan to do them.

13. Because we no know tomorrow, how this one fit affect us?

¹³ Because we no know wetin go happen tomorrow, life fit hard us. How this one fit happen? If we de worry about bad things wey fit happen, this one fit make us no de happy. Another thing be say, wetin we no expect fit happen anytime and this one fit turn our life upside down. And if things no go the way we expect, this one fit make us dey sad and even make life tire us.—Prov. 13:12.

14. Wetin go fit make us happy? (Still check the picture.)

¹⁴ When we de endure problem, this one de show say we de serve Jehovah because we love-am and no be because of wetin we want gain from-am. Bible show say we no suppose expect Jehovah to protect us from all the problems wey we de face. E still show say no be Jehovah de plan anything wey de happen for our life. Jehovah know say we fit dey happy even if we no know everything wey go happen to us for future. But we go de happy if we de follow Jehovah advice. (Jer. 10:23) To show say we de leave things for Jehovah hand when we de make decision, e go good make we no de overworry about wetin fit happen. Instead, make we get the kind character wey James talk about when e talk say: “If na wetin Jehovah want, we go dey alive and do this one or that one.”—Jas. 4:15.

15. Wetin we know about our future?

¹⁵ The truth be say, as we de wake up everyday, we no even know wetin go happen to us that day, but we know say Jehovah don promise us life wey no go end—whether for heaven or for earth. We still know say Jehovah no go fit lie and nothing go fit stop-am to do everything wey e don promise. (Titus 1:2) Na only Jehovah go fit “talk how [something] go end,” and na only-am go fit talk wetin go happen for future. For Bible time, all the things wey e talk say go happen, really happen as e talk them. The things wey e don promise for future go happen too. (Isa. 46:10) We dey sure say nothing go fit stop the love wey Jehovah get for us. (Rom. 8:​35-39) Even if we face problem, Jehovah go comfort us and give us the sense and power wey we need to endure. True-true, Jehovah go help us and bless us.—Jer. 17:7, 8.

WE NO GO FIT REALLY UNDERSTAND HOW JEHOVAH KNOWS US REACH

16. As Psalm 139:​1-6 talk, wetin be some things wey Jehovah know wey we no go fit understand finish?

¹⁶ Read Psalm 139:​1-6. Because na Jehovah make us, e really know us well. E know the things wey don happen to us wey don affect how we be for body, how we de feel, and even how we de think. When we de try to talk something but we no fit talk-am well, Jehovah know wetin we really want talk. And e still know the things wey we do and why we do them. As King David talk, Jehovah get the power to help us and e always dey ready to help us. Jehovah na the almighty God wey make the heaven and earth, and na im high pass. How you de feel as you know say this God really care about you? We de feel like David wey talk say: “This kind [thing] too much for me. E too high for me to understand.”—Ps. 139:6.

17. Why e fit hard us to believe say Jehovah really know us well?

¹⁷ E fit be say because of our culture, things wey don happen for our family, or because of wetin we believe before, e fit de hard us to believe say Jehovah really care about us. Or we fit de feel say because of the mistake wey we don make before, we no go fit dey close to Jehovah. If we de feel like this, make we know say we no dey alone, even David feel like this too. (Ps. 38:​18, 21) Another thing be say, person wey de do im best to change im life to fit make God happy, fit de think say, ‘If God really understand me, e for just accept me the way I be, instead make e expect me to stop to do some things wey e know say go hard me to stop.’

18. Why e good for us to understand say Jehovah know us pass the way we know ourself? (Still check the picture.)

¹⁸ E good for us to understand say Jehovah know us pass the way we know ourself, and say e fit see better-better things about us wey we no go fit see. E de see our mistake and e understand why we de feel the way we de feel and why we do the things wey we do, e really love us. (Rom. 7:15) When we know say Jehovah de see the kind person wey we really be for inside and say we really want serve-am well, this one de help us fit hold Jehovah tight and de happy as we de worship-am.

19. Wetin be some things wey we know about Jehovah?

¹⁹ We know say Jehovah na love, and we dey sure about this one. (1 John 4:8) We know say Jehovah de tell us wetin we fit do and wetin we no suppose do because e love us and want make we enjoy better life. We know say Jehovah want make we get life wey no go end. Because of this one, e send Jesus to die for our sin. Because Jesus don die for us, we know say even if we make mistake, we fit still worship Jehovah the way e want. (Rom. 7:​24, 25) Another thing wey we still know be say, “God big pass our heart and e know everything.” (1 John 3:​19, 20) Jehovah de see everything about us and e trust say we go fit worship-am well.

20. Wetin go help us no worry about things wey we no know?

²⁰ Jehovah de tell us everything wey we really need to know. So we no need to worry about the things wey we no know, instead e go better make we de think about the things wey we know. If we do like this, we de show say we de carry body down and say we really trust Jehovah, “the Person wey know everything.” (Job 36:4) Even though say we no know some things now, we know say Jehovah go continue to teach us new things forever. And we really de happy because we know say for future, we no go ever stop to learn new-new things about Jehovah wey be our wonderful God.—Eccl. 3:11.