To “Near God Dey Good” for Us!

1-2. (a) Wetin we need to do to fit be tight friend with person? (b) Wetin we go talk about for this article?

THINK about your tight friend wey dey special to you. Wetin you do to fit make una friendship tight? You go don spend time with-am, know some things wey don happen for im life, and still know the things wey e like and the things wey e no like. You see say e get some better-better character wey you go like copy, and this one come move you to really love this your friend.

² To make your friendship with person tight, you need to spend time with the person. Na so e still be if person want be tight friend with God, e go need to spend time with Jehovah to fit near-am. For this article, we go learn how we fit near Jehovah and wetin we go gain if we near-am. But first, we go learn why e good to near our best Friend, Jehovah.

3. Why e dey important to de think deep about wetin we go gain when we near Jehovah?

³ E dey important to think deep about why friendship with Jehovah really good for us. (Ps. 63:​6-8) Why? Make we use this example explain-am. People know say e dey good to de chop the kind food wey go make their body strong, to de do exercise, to get time to rest and de sleep well, and to de drink enough water everyday. But many people no de too put mind for this things and this one no de make their body strong as e suppose be. The truth be say, if person de always think about this things and the gain wey e go get if e de do them, this one go help-am fit do them. Na so e still be, we know say e dey good to be Jehovah friend, but when we think deep about wetin we go gain, this one fit move us to continue to near our Friend, Jehovah.—Ps. 119:​27-30

4. Wetin the person wey write Psalm 73:28 talk?

⁴ Read Psalm 73:28. The person wey write Psalm 73 na Levite wey them choose to de sing for Jehovah temple. E fit be say e don de serve Jehovah for many years. Even with that one, e still see say e dey important to remember and still help other people to know say to “near God” dey good. Why e good to really know Jehovah well and make our friendship with-am strong?

TO “NEAR GOD” DE MAKE US HAPPY

5. (a) Why e de make us happy to really near Jehovah? (b)  As e dey for Proverbs 2:​6-16 how the sense wey Jehovah de give fit help and protect you?

⁵ The more we de near Jehovah, the more we go de happy. (Ps. 65:4) Plenty reasons dey why we go de happy. For example, when we read wetin Jehovah tell us for Bible and obey-am, this one go give us sense. Wetin we de learn from Jehovah de protect us from things wey fit put our life for danger and e de help us no make serious mistakes. (Read Proverbs 2:​6-16.) Na this one make Bible talk say: “Person wey don find sense and get-am, go dey happy. And person wey don get deep sense go dey happy.”—Prov. 3:13.

6. Wetin make the person wey write Psalm 73 dey sad?

⁶ Sometimes, even friends of Jehovah de feel sad. The person wey write Psalm 73 dey sad when e start to think about some things wey de pain-am. E start to jealous wicked people wey no de listen to wetin God talk because for im mind, e just be like say them de enjoy life. E be de think say na people wey like fight-fight and people wey de carry shoulder de always get money, strong body and them no de suffer. (Ps. 73:​3-7, 12) Because of the things wey e see, e be think say gain no dey to serve Jehovah. Wetin e see really pain-am sotey e talk say: “True-true, as I don keep my heart pure, and wash my hand clean to show say I no know anything, na for nothing.”—Ps. 73:13.

7. When we de feel sad, wetin we fit do? (Still check the picture.)

⁷ Even though say the person wey write this psalm dey sad, e do something to change the way e de think. E “enter the holy place of God,” and for there, Jehovah correct the way e de think. (Ps. 73:​17-19) When we dey sad, Jehovah, our best Friend know and understand our situation. If we pray to-am make e help us, and accept the help wey e de give through the Bible and the congregation, this one go give us the power to continue to worship-am even when we dey sad. Even when worry-worry make life tire us, Jehovah go help us to dey calm.—Ps. 94:19.a

TO “NEAR GOD” DE HELP US LIVE BETTER LIFE NOW AND MAKE US GET HOPE FOR THE FUTURE

8. Which other important ways we go gain if we near Jehovah?

⁸ To near God dey good for us for two other important ways. Number one, e de make us enjoy better life now. Number two, e de give us better hope for the future. (Jer. 29:11) Make we talk more about some of this things wey we go gain if we do our best to near Jehovah.

9. When we do our best to be Jehovah friend, how this one de affect our life?

⁹ When we do our best to be Jehovah friend, e de make us live better life now. Many people wey no believe say God dey no know why we dey for this earth and them believe say human being no go dey this earth again for future. But from wetin we learn from Bible, we don really dey sure say na God “be the person wey de reward people wey de use all their heart de look for-am.” (Heb. 11:6) Another thing be say, Jehovah create us to worship-am. So when we use our life worship our Papa for heaven, this one de make us happy.—Deut. 10:​12, 13.

10. As e dey for Psalm 37:​29, wetin Jehovah promise people wey put their future for im hand?

¹⁰ Many people no get hope for the future. The only thing wey dey their mind na to work, marry, get children, and then save for when them no go fit work again. Them no know wetin God don promise about the future. But servants of Jehovah put their future for Jehovah hand. (Ps. 25:​3-5; 1 Tim. 6:17) We trust Jehovah wey be our God and our Friend. And we know say e go do everything wey e don promise us. One of the plenty things wey we go enjoy for Paradise be say we go fit worship Jehovah forever.—Read Psalm 37:29.

11. Wetin de happen when we be friend of God, and how this one de make Jehovah feel?

¹¹ To near God dey good for us for many other ways. For example, Jehovah promise say e ready to forgive our sins when we repent. (Isa. 1:18) Because of this one, we no need to continue to de worry and de feel bad because of the sins wey we don commit for past. (Ps. 32:​1-5) And when we near Jehovah, this one de make-am happy. (Prov. 23:15) Yes, plenty other good things dey wey we de enjoy because we be Jehovah tight friend. Now, make we talk about wetin we fit do to de near God more-more.

HOW WE FIT CONTINUE TO “NEAR GOD” MORE-MORE

12. Wetin you don do to fit near God?

¹² Before you baptize as Jehovah Witness, you don do plenty things to fit become friend of Jehovah. For example, you learn the truth about Jehovah and Jesus Christ, you repent from your sins, you show say you get faith for God, and you do your best to obey God. To fit near God more-more, we must continue to de do this things.—Col. 2:6.

13. Which three things fit help us near Jehovah more-more?

¹³ Wetin go help us to continue to near God more-more? Number one, we must continue to read and study Bible. When we de read Bible, e good make we learn new things about God, but make we no just stop for there. Instead, make we try to understand the way Jehovah de think and wetin e want us to do, and make we live our life the way e want. (Eph. 5:​15-17) Number two, we go make our faith strong if we de think deep about many ways wey God don show im love for us. Number three, we must continue to hate the things wey Jehovah hate and stop to make friends with people wey de do bad things.—Ps. 1:1; 101:3.

14. As e dey for 1 Corinthians 10:​31, wetin be some things wey we fit do everyday to make Jehovah happy? (Still check the picture.)

¹⁴ Read 1 Corinthians 10:31. E dey important for us to do things wey we know say go make Jehovah happy. Na true say e dey important to de go preaching and de attend meeting, but we need to do pass this one. Make wetin we de do everyday be wetin go make Jehovah happy. For example, when we de talk true for everything wey we de do, and de share wetin we get with people, we de make Jehovah happy. (2 Cor. 8:21; 9:7) E still want make we show say we really value the life wey e don give us. We de do this one when we dey careful about how we de chop and how we de drink alcohol, and still de do other things to care for our body. When Jehovah de see say we de try our best to make-am happy for everything wey we de do, even for small-small things, this one go make-am love us more-more.—Luke 16:10.

15. How Jehovah want make we de treat other people?

¹⁵ Jehovah dey kind to everybody, even to people wey no de worship-am. (Matt. 5:45) E want make we dey kind to people. For example, Jehovah want make we “no de talk bad things about anybody” and “no de quarrel-quarrel,” but e want make we “dey gentle with everybody.” (Titus 3:2) So because of this one, we no de ever think say we better pass other people because them no de serve Jehovah. (2 Tim. 2:​23-25) We de near Jehovah more-more when we dey kind and de treat everybody well.

YOU FIT “NEAR GOD” EVEN WHEN YOU MAKE MISTAKE

16. How the person wey write Psalm 73 start to feel after some time?

¹⁶ But what if after some time, you start to feel say you no fit near Jehovah again because of the mistake wey you make? As we don talk before, this kind thing happen to the person wey write Psalm 73. E talk say: “My two leg don almost comot from road; I don nearly slide fall.” (Ps. 73:2) E still talk say im heart dey “sad” and “e no think well” “like animal wey no get sense” for Jehovah eye. (Ps. 73:​21, 22) But this one make-am feel say Jehovah no love-am again or say Jehovah no go forgive-am because of the mistake wey e make?

17. (a) When the person wey write Psalm 73 really feel bad, wetin e do? (b) Wetin we fit learn from wetin happen to-am? (Still check the picture.)

¹⁷ Even if the person wey write Psalm 73 be de feel say Jehovah don leave-am, e dey clear say na only for short time e feel like that. Even when e really feel bad, e see say e dey important to near Jehovah more-more. E talk say: “But now I don continue to dey with you [Jehovah]; you don hold my right hand. You use your advice direct me, and after, you go lead me to get honor.” (Ps. 73:​23, 24) Make we beg Jehovah make e give us power wey we need when we feel say our faith dey weak or when life tire us because of our mistake. (Ps. 73:26; 94:18) Even if we commit serious sin, we fit come back to Jehovah and dey sure say e “ready to forgive” us. (Ps. 86:5) Anytime wey we de really feel bad, na that time we suppose near Jehovah pass.—Ps. 103:​13, 14.

CONTINUE TO “NEAR GOD” FOREVER

18. Why we fit continue to near Jehovah forever?

¹⁸ We fit continue to near Jehovah forever. We no go ever stop to learn about-am. Bible talk say Jehovah ways, the kind sense wey e get, and the things wey e know pass wetin person “fit really understand.”—Rom. 11:33.

19. Wetin the book of Psalms help us dey sure of?

¹⁹ Psalm 79:13 talk say: “We, your people and the sheep wey you de feed, go thank you forever; and we go talk about you from generation to generation.” As you continue to near God more-more, you too fit dey sure say you go receive blessings forever and you go fit talk say: “Na God de protect my heart; na im be my rock and my share forever.”—Ps. 73:26.