Wetin We Fit Learn From the Words Wey Some Servants of Jehovah Talk Before Them Die?

1. Why we fit learn from people wey old pass us?

ALL of us need advice from other people to fit make better decisions. Elders or other mature brothers and sisters for congregation fit give us this kind advice. If e be say them old pass us well-well, make we no just think say na old school advice them de give us. Jehovah want make we learn from people wey old pass us. Because them don live for many years, this one don make them get plenty experience about life and them don get sense well-well.—Job 12:12.

2. Wetin we go talk about for this article?

² For Bible time, Jehovah use old people wey serve-am well to encourage im people. Think about the example of Moses, David, and apostle John. Them no live for the same time and their condition no be the same. When the time wey them go die don de near, them give better advice to young people. The three of them talk about why e dey important to obey God. Jehovah make sure say their better advice dey Bible so that we go fit learn from them. Whether we dey young or old, we fit gain as we de study the advice wey them give. (Rom. 15:4; 2 Tim. 3:16) For this article, we go talk about the advice wey this three men give, and we go see wetin we fit learn from wetin them talk.

‘YOU GO LIVE FOR LONG TIME’

3. Which different-different work Moses do for Jehovah and Israel people?

³ Moses use all im life work for Jehovah. E do the work of prophet, judge, leader, and Jehovah use-am write plenty things. Moses really get plenty experience for life! E lead Israel people comot from Egypt where them be slave and e see plenty miracles wey Jehovah do. Jehovah use-am write the first five books for Bible and Psalm 90. And e fit be say na im still write Psalm 91 and the book of Job.

4. Which people Moses encourage, and why e encourage them?

⁴ Small time before Moses die when e dey 120 years, e gather all Israel people together to remind them of the things wey Jehovah don do for them, wey them see with their own eye. Many years before this time, some of them see many miracles wey Jehovah do and how e punish Egypt people. (Ex. 7:3, 4) For example, many of them waka pass the Red Sea when Jehovah divide the water and them see how Jehovah destroy Pharaoh and im army. (Ex. 14:​29-31) When them dey the wilderness, Jehovah protect and care for them. (Deut. 8:3, 4) Now, Israel people don ready to enter the Promise Land, and Moses want use this chance wey e get to encourage them before e go die.a

5. Which encouragement Moses give Israel people for Deuteronomy 30:​19, 20 before e die?

⁵ Wetin Moses talk? (Read Deuteronomy 30:​19, 20.) E remind Israel people say them go get wonderful future for the Promise Land, and say Jehovah go bless them and them go live for long time for the land. The Promise Land really fine and the ground de produce plenty food! Moses talk how the place be. Moses talk say the place get big and important cities wey Israel people no build, houses wey get better-better things wey them no work for, wells wey them no dig, and vine farms and olive trees wey them no plant.—Deut. 6:​10, 11.

6. Why Jehovah allow other nations to carry Israel people as slave?

⁶ Another thing be say, Moses give Israel people warning. For them to fit continue to live for the Promise Land, them need to obey all the things wey Jehovah command them. So, Moses tell them say make them “choose life.” Them fit do this one if them listen to Jehovah and “hold-am tight.” But Israel people no obey Jehovah. Because of this one, Jehovah later allow Assyria people and Babylon people to carry them as slave.—2 Ki. 17:​6-8, 13, 14; 2 Chron. 36:​15-17, 20.

7. Wetin we fit learn from the things wey Moses tell Israel people? (Still check the picture.)

⁷ Wetin this one teach us? If we obey Jehovah, we go fit live forever. Just like Israel people wey don ready to enter the Promise Land, we too go soon enter the new world wey Jehovah don promise us. That time, the whole earth go be Paradise. (Isa. 35:1; Luke 23:43) Satan and im demons no go dey again. (Rev. 20:2, 3) Lie-lie religion wey de deceive people no go dey again. (Rev. 17:16) Governments wey de suffer people no go dey again. (Rev. 19:​19, 20) Jehovah no go allow anybody wey go cause problem to stay for Paradise. (Ps. 37:​10, 11) Everybody wey go live for Paradise go de follow Jehovah law. This one go make them do things as one and peace go dey. So, everybody go love and trust each other. (Isa. 11:9) E de really hungry us to see that time! Another thing be say, if we obey Jehovah, we go continue to live for Paradise, no be just for hundred years, but forever.—Ps. 37:29; John 3:16.

8. How the promise wey Jehovah make about everlasting life help one missionary? (Jude 20, 21)

⁸ If we continue to think deep about everlasting life wey Jehovah promise, this one go help us continue to obey-am no matter the problem wey we get. (Read Jude 20, 21.) And e fit still help us face any temptation wey de come our way because we no dey perfect. One brother wey don work as missionary for Africa for many years talk say many times e face temptation to do something wey Jehovah no like. E talk say: “I come see say I no go fit live for Paradise if I no obey Jehovah. This one help me to fit fight the temptation and pray to Jehovah well-well about-am. Because Jehovah help me, I continue to serve-am well.”

YOU GO SUCCEED

9. Which problems David face for im life?

⁹ David na king for Israel and e hold Jehovah tight. E still sabi sing song and play music instrument. E de write poem, fight war, and e be prophet. But e face many problems for life. For example, David run for im life and hide for many years because King Saul want kill-am. Even when e don become king for Israel, David still run for im life because im son Absalom want kill-am so that e go become king for Israel. Even with all this problem and the serious sin wey David commit, e continue to hold Jehovah tight till e die. Jehovah talk say, David na “man wey de do wetin de sweet [Im] heart.” So e really make sense for us to listen to David advice!—Acts 13:22; 1 Ki. 15:5.

10. Why David advice im son Solomon wey go be the next king of Israel?

¹⁰ Make we see one example of the advice wey David give im son Solomon wey go be the next king for Israel. Jehovah choose Solomon as the person wey go build temple for Jehovah worship. (1 Chron. 22:5) This one no be small work and e go need Jehovah help to fit rule Israel people. Make we see the advice wey David give-am.

11. As e dey for 1 Kings 2:2, 3, which advice David give Solomon, and wetin happen when Solomon follow this advice? (Still check the picture.)

¹¹ Which advice David give Solomon? (Read 1 Kings 2:2, 3.) David tell Solomon say if e obey Jehovah, e go rule well and Jehovah go bless-am. Jehovah dey with Solomon for many years, e bless-am with many good things and help-am for different-different ways. (1 Chron. 29:​23-25) E build the temple for Jehovah, e write some books for Bible, and other people wey write Bible, write some of the things wey Solomon don talk before. People come know-am as person wey really get sense, and person wey get plenty money and property. (1 Ki. 4:34) But just as David advice-am, Solomon go succeed if e continue to obey Jehovah. But e pain us well-well to know say after some years, Solomon start to worship other gods. Jehovah no come dey with-am again, so e no continue to bless-am with sense to rule Israel people for better way again.—1 Ki. 11:9, 10; 12:4.

12. Wetin we fit learn from David advice?

¹² Wetin this one teach us? When we obey Jehovah, e go help us succeed. (Ps. 1:​1-3) The truth be say, Jehovah no promise say e go bless us with plenty money and property or make people know us like Solomon. But if we obey Jehovah, e go give us sense wey go help us fit de make better decision. (Prov. 2:6, 7; Jas. 1:5) Jehovah advice for Bible fit help us make better decision about work, school, money, and things wey we de do to enjoy ourself. When we follow im advice, e go protect us from anything wey fit spoil our friendship with-am and we go get everlasting life. (Prov. 2:​10, 11) E go still help us get better friends and our family go de happy.

13. Wetin help Sister Carmen to fit succeed for life?

¹³ One sister for Mozambique wey im name na Carmen think say, if e go university e go succeed for life. So e go university go study about how to draw and build house. E talk say: “I really love wetin I be de learn, but e de take plenty time and power from me. I de stay for school from 7:30 for morning go reach 6:00 for evening. E de hard me to go meeting and my friendship with Jehovah no come strong again. For inside my heart, I know say I no de follow Jehovah advice.” (Matt. 6:24) Sister Carmen pray about the matter and e do research for our book them. E still talk say: “Some elders and my mama give me better advice, so I decide to leave university and start to serve Jehovah full-time. I dey sure say I make the best decision and I no regret-am at all.”

14. Wetin be the main thing wey Moses and David advice Jehovah people?

¹⁴ Moses and David love Jehovah and them know say e dey important to follow im advice. So before them die, them encourage other people to copy their example as them obey Jehovah. But them still warn the people say if them stop to obey Jehovah, e no go continue to bless them and give them the things wey e don promise. E really dey important for us to follow their advice today. Many-many years later, another servant of Jehovah still talk about why e dey important for us to continue to obey Jehovah.

“NOTHING DE MAKE ME HAPPY PASS” THIS ONE

15. Wetin apostle John see when e dey alive?

¹⁵ John na one of Jesus apostle and e still be Jesus tight friend. (Matt. 10:2; John 19:26) John dey with Jesus when e de preach for this earth and e see plenty miracles wey Jesus do. John continue to dey with Jesus even when e no easy. E see as them kill Jesus and e see Jesus after e come back to life. E still see as the Christian congregation de grow, and because e live long, e see how Christians preach the good news “for everywhere under heaven.”—Col. 1:23.

16. Which people don gain from the things wey apostle John write?

¹⁶ When apostle John don old, e get the honor to write the book of Revelation. (Rev. 1:1) E still write the book of John. Na im still write first, second, and third John. Third John na the letter wey e write give one Christian wey im name na Gaius. Apostle John love Gaius like im own pikin. (3 John 1) By that time, John go don get plenty Christians wey e love as if them be im children. The things wey John write don encourage plenty of Jesus disciples even for this our time.

17. As e dey for 3 John 4, wetin make John happy?

¹⁷ Wetin John write for im letter? (Read 3 John 4.) E write say e de make-am happy when e de see brothers and sisters de obey Jehovah. That time, some people for congregation de teach lie-lie things and de cause serious problem. But other brothers and sisters continue to “follow the truth.” Them de obey Jehovah and de “follow the things wey God don command.” (2 John 4, 6) This Christians make apostle John and Jehovah happy.—Prov. 27:11.

18. Wetin we fit learn from the things wey apostle John write?

¹⁸ Wetin this one teach us? When we de obey Jehovah, this one go make us and other people happy. (1 John 5:3) For example, we de happy when we know say we de make Jehovah happy. Jehovah self de happy when e see say we no de do wetin bad, and we de obey im command. (Prov. 23:15) The angels for heaven de happy too. (Luke 15:10) And we too de happy when we see say our brothers and sisters continue to hold Jehovah tight when people de suffer them or when them de face temptation. (2 Thess. 1:4) For future, when Jehovah go destroy this Satan world, we go happy say we survive because we hold Jehovah tight.

19. How sister Rachel de feel when e de see the people wey e help to learn about Jehovah? (Still check the picture.)

¹⁹ When we teach other people about Jehovah, this one de really make us happy. One sister for Dominican Republic wey im name na Rachel, know say na big honor e get to teach other people about Jehovah. This sister don help many people start to serve Jehovah. E talk say: “Mouth no fit talk how I de happy when I de see say the people wey I teach about Jehovah de continue to love-am, hold-am tight, and de change things for their life so that them go fit make Jehovah happy. This joy pass any work wey I do to fit teach them.”

CONTINUE TO LEARN FROM THE WORDS WEY SOME SERVANTS OF JEHOVAH TALK BEFORE THEM DIE

20. How our condition take resemble Moses, David, and John own?

²⁰ Moses, David, and John live for Bible time, and the way life be that time dey different from this our time. But e get many things wey make our condition resemble their own. Them serve Jehovah, and we de serve Jehovah too. Just like them, we de pray to Jehovah and de trust the better advice wey e de give us. And like them, we dey sure say Jehovah de bless people wey de obey-am.

21. How Jehovah go bless us if we follow the advice of Moses, David, and apostle John?

²¹ Make we continue to follow the advice of this men wey we don talk about and obey the things wey Jehovah command us. If we do this one, Jehovah go bless us, and help us succeed. We go “live long time,” even forever! (Deut. 30:20) And we go happy say we de make Jehovah happy and e go bless us for wonderful way pass anything wey we fit think of.—Eph. 3:20.