Leviticus

3 “‘If im offering na peace sacrifice,* and if na bull or cow e de give as the offering, whether na man animal or woman animal, e go give animal wey dey well for body for front of Jehovah. 2 Make e put im hand ontop the head of im offering and make them kill the animal for the domot of the tent of meeting, and the sons of Aaron wey be the priests, go sprinkle the blood for all the sides of the altar. 3 E go give part of the peace offering as offering wey them make with fire to Jehovah: the fat wey cover the intestines, all the fat wey surround the intestines, 4 and the two kidneys with the fat wey dey ontop them wey near the waist. E go still remove the fat wey dey ontop the liver, together with the kidneys. 5 The sons of Aaron go burn-am to make smoke comot from ontop the altar, ontop the offering wey them de burn, wey them put ontop the wood wey dey ontop the fire; na offering wey them make with fire as something wey get better smell* to Jehovah.

6 “‘If the offering wey e go give as peace sacrifice to Jehovah na sheep or goat, make e give the one wey dey well for body, whether na man animal or woman animal. 7 If na young ram e de give as im offering, then e go give-am for front of Jehovah. 8 E go put im hand ontop the head of the offering, and them go kill-am for front of the tent of meeting. The sons of Aaron go sprinkle im blood for all the sides of the altar. 9 E go give the fat from the peace sacrifice as offering wey them make with fire to Jehovah. E go remove all the fat from the tail near the backbone, the fat wey cover the intestines, all the fat wey surround the intestines, 10 and the two kidneys with the fat wey dey ontop them wey near the waist. E go still remove the fat wey dey ontop the liver, together with the kidneys. 11 And the priest go burn-am to make smoke comot from ontop the altar as food,* offering wey them make with fire to Jehovah.

12 “‘If im offering na goat, then e go give-am for front of Jehovah. 13 E go put im hand ontop im head, and them go kill-am for front of the tent of meeting, and the sons of Aaron must sprinkle the blood for all the sides of the altar. 14 The part wey e go give as im offering wey them make with fire to Jehovah na the fat wey cover the intestines, all the fat wey surround the intestines, 15 and the two kidneys with the fat wey dey ontop them near the waist. E go still remove the fat wey dey ontop the liver, together with the kidneys. 16 The priest go burn them to make smoke comot from ontop the altar as food,* na offering wey them make with fire wey get better smell.* Na Jehovah get all the fat.

17 “‘This one na law wey go last for long time for all una generations, for all the place them wey una go stay: Make una no ever chop any fat or any blood at all.’”