Study Book for Our Life and Preaching Meeting
MARCH 2-8
FINE-FINE LESSON FROM BIBLE | GENESIS 22-23
“God Tell Abraham Make E Sacrifice E Pikin”
(Genesis 22:1, 2) Now after this things don happen, the true God test the faith of Abraham, e talk say: “Abraham!” And e answer God say: “I dey here!” 2 Then God talk say: “Abeg carry your only pikin, Isaac, wey you really love. Make you travel go the land of Moriah, and for there, make you sacrifice-am ontop one of the mountain wey I go show you.”
w12 1/1 23 ¶4-6
Why God Say Make Abraham Sacrifice E Pikin?
Think about wetin Jehovah tell Abraham. E talk say: “Abeg carry your only pikin, Isaac, wey you really love, and . . . make you sacrifice-am.” (Genesis 22:2) You see wetin Jehovah call Isaac? E say Isaac na pikin wey Abraham “really love.” Jehovah know say Isaac na really special pikin to Abraham. Jehovah still know the way e de feel about e own Son, Jesus. Jehovah really love Jesus. And na two times e talk direct from heaven say Jesus na ‘e Son, wey e really love.’—Mark 1:11; 9:7.
For the verse, Jehovah still use the word “abeg” as e de talk with Abraham. One Bible professor talk say God talk “abeg” because e know say wetin e say make Abraham do, really hard. This thing wey Jehovah say make Abraham do, go don really pain Abraham. Na the same thing too go don happen to Jehovah when e see Jesus suffer and die. We no go fit really know the kind pain wey Jehovah feel that time. We dey sure say Jehovah never feel that kind pain before and e no go ever feel-am again.
When we think about wetin Jehovah say make Abraham do, e fit worry us. But make we no forget say Jehovah no allow Abraham make e use Isaac do sacrifice. E no allow Abraham suffer the worst pain wey any papa or mama fit suffer; e save Isaac life. But, when e reach the turn of e own Son, Jehovah no save the life of e Son. E allow Jesus die for us. (Romans 8:32) Why Jehovah gree to suffer this kind pain? E do-am so that “we fit get life.” (1 John 4:9) This one de make us remember say Jehovah really love us. So, make we show say we love Jehovah too!
(Genesis 22:9-12) Finally them reach the place wey the true God don show Abraham, so e build altar for there and arrange the firewood ontop. E tie Isaac hand and leg and put Isaac ontop the firewood wey dey ontop the altar. 10 Then Abraham stretch e hand and take the knife wey e want use kill e pikin. 11 But the angel of Jehovah call Abraham from heaven, and talk say: “Abraham, Abraham!” and Abraham answer say: “I dey here!” 12 Then the angel tell Abraham say: “Make you no kill the boy, and make you no do anything at all to the boy, because now I don know say you de fear God as you no hide your only pikin from me.”
(Genesis 22:15-18) And the angel of Jehovah call Abraham from heaven for the second time, 16 and talk say: “Jehovah talk say, ‘I de use myself swear say because of this thing wey you do, and as you no hide your only pikin from me, 17 I go bless you and I go make your pikin plenty like the stars for heaven and like sand-sand for the side of sea, and your pikin go take over all the city of e enemy them. 18 And through your pikin, all country for this earth go get blessing for theirself because you don listen to my voice.’”
w12 10/15 23 ¶6
Obey God and You Go Enjoy the Blessings Wey E Don Promise
6 Because people no dey perfect, Jehovah still use oath when e make some promise for Bible. For example, when e de talk about one king for Israel, e swear say, “As far as I dey alive.” (Ezek. 17:16) For Bible, e pass 40 times wey Jehovah swear when e make promise. One example wey we know well na the promise wey Jehovah promise Abraham. When Abraham still dey alive, Jehovah add other promise join this promise. All this promise, show say the Pikin wey Jehovah talk about for Genesis 3: 15, go come from the family of Abraham through e pikin, Isaac. (Gen. 12:1-3, 7; 13:14-17; 15:5, 18; 21:12) Then Jehovah tell Abraham make e do something wey really hard. E say make Abraham sacrifice Isaac. Abraham no waste time, e do wetin Jehovah talk. But as e want sacrifice Isaac, the angel of God stop-am. This thing make Jehovah swear and promise Abraham say: “I de use myself swear say because of this thing wey you do, and as you no hide your only pikin from me, I go bless you and I go make your pikin plenty like the stars for heaven and like sand-sand for the side of sea, and your pikin go take over all the city of e enemy them. And through your pikin, all country for this earth go get blessing because you don listen to my voice.”—Gen. 22:1-3, 9-12, 15-18.
Fine-Fine Things Wey You See for Bible
(Genesis 22:5) So Abraham tell e servants say: “Make wuna wait here with this donkey, but me and the boy go go that side go worship God and come back to meet wuna.”
w16.02 11 ¶13
Jehovah Call Abraham ‘E Friend’
13 Before Abraham leave e servants wey follow them go the place, e tell them say: “Make wuna wait here with this donkey, but me and the boy go go that side go worship God and come back to meet wuna.” (Gen. 22:5) Wetin Abraham mean? E de lie to e servants say Isaac go come back when e know say na Isaac e want sacrifice? No! Bible help us understand why Abraham talk say Isaac go come back. (Read Hebrews 11:19.) Abraham know say even if Isaac die, God go bring Isaac back to life. Wetin make Abraham get this kind faith? Na because Jehovah don first make e and Sarah born pikin, even though they don old. (Heb. 11:11, 12, 18) This one make Abraham dey sure say nothing wey Jehovah no fit do. E dey sure say even if Isaac die that day, Jehovah go resurrect Isaac so that all the things wey Jehovah don promise, go happen. No wonder Bible call Abraham ‘the papa of all the people wey get faith.’
(Genesis 22:12) Then the angel tell Abraham say: “Make you no kill the boy, and make you no do anything at all to the boy, because now I don know say you de fear God as you no hide your only pikin from me.”
it-1 853 ¶5-6
Jehovah De Know and De Decide Everything Before E Happen?
Jehovah de select wetin e want know. Plenty people believe say God know and de decide everything before e happen. Na true? Even though God get the power to know everything, e de select wetin e want know. And wetin God choose to know must agree with the righteous laws wey e don set and the kind person wey Bible talk say e be. Some Bible verse show say instead of wetin people talk, God decide wetin e go do about some things, as the things de happen, no be before e happen.
Na e make Genesis 11:5-8 talk say na the time wey people start to build the tower of Babel, God look wetin de happen for this earth and decide wetin e go do to stop their wicked work. Na after people for Sodom and Gomorrah, don de do bad things Jehovah tell Abraham say e want go see (e use e angels) whether na true. E talk say, ‘I want go see whether they really de do bad things as I de hear. And if no be so, I go know.’ (Ge 18:20-22; 19:1) God first talk say e know Abraham. But when Abraham don almost sacrifice Isaac, God talk say, “Now I don know say you de fear God as you no hide your only pikin from me.”—Ge 18:19; 22:11, 12; compare Ne 9:7, 8; Ga 4:9.
MARCH 9-15
FINE-FINE LESSON FROM BIBLE | GENESIS 24
“Isaac Don Get Wife!”
(Genesis 24:2-4) So Abraham tell e servant, the one wey dey in charge of everything wey e get, and wey old pass all the servants for e house say: “Abeg put your hand under my thigh, 3 I want make you swear to Jehovah, the God wey make heaven and earth say you no go take any of the girls from this Canaan wey I de stay, as wife for my son. 4 But you must go my country go meet my family people and marry wife from there for my son, Isaac.”
wp16.3 14 ¶3
‘Yes, I Go Go’
Abraham make Eliezer swear say e no go choose wife for Isaac from the women of Canaan. Why e do-am? Na because people for Canaan no de fear and worship Jehovah. Abraham know say when time reach, Jehovah go punish Canaan people for the bad things wey them de do. Abraham no want make Isaac, e son wey e really love, become in-law to this kind people and follow their bad life. E still know say Isaac get special work wey go make the things wey Jehovah don promise happen.—Genesis 15:16; 17:19; 24:2-4.
(Genesis 24:11-15) When e reach there, e make the camels kneel-down for near one well wey dey outside the city. And that time na evening time when the women de come fetch water. 12 Then e pray say: “Jehovah the God of my master Abraham, abeg help me make I succeed today, and show my master Abraham your love wey no de fail. 13 Now, I stand near this well, and the daughters of the men wey dey this city, go come out to fetch water. 14 Make e be say the young woman wey I go tell say, ‘Abeg bring your pot down and give me water to drink,’ and e answer say, ‘Drink and I go still give your camels water to drink,’ make e be the woman wey you don choose for your servant Isaac; and when e happen I go know say you don show your love wey no de fail to my master.” 15 As e still de pray, Rebekah come, and e carry water pot for e shoulder. And Rebekah na the daughter of Bethuel. Bethuel na the son wey Milcah born for Nahor, the brother of Abraham.
wp16.3 14 ¶4
‘Yes, I Go Go’
Eliezer tell Bethuel and Laban say when e reach the well wey dey near Haran, e pray to Jehovah. And the prayer just be like say e de tell Jehovah to choose the young woman wey Isaac go marry. Why we talk like that? Eliezer beg Jehovah make e do-am so that the girl wey e want make Isaac marry, go come fetch water for the well. And when e beg the girl for water, make the girl gree give-am water and still give e camels. (Genesis 24:12-14) And who be the girl wey come do exactly as e pray? Na Rebekah! Just imagine how Rebekah go feel if e be dey one corner de hear wetin Eliezer de tell e family people.
(Genesis 24:58) So them call Rebekah and ask-am say: “You go follow this man go?” E answer say: “Yes, I go follow-am go.”
(Genesis 24:67) After that one, Isaac take Rebekah enter the tent of Sarah e mama. Na so Rebekah take become e wife; and e come really love Rebekah. And na that time Isaac heart come cool after e mama die.
wp16.3 14 ¶6-7
‘Yes, I Go Go’
Before Eliezer start this journey, e don first ask Abraham say: “What if the woman no gree follow me come?” Abraham answer say: “Then you dey free from this oath.” (Genesis 24:39, 41) And for the house of Bethuel, wetin the young woman go decide still dey important. Eliezer really happy say e don get wetin e come find. So, the next morning e talk say e want go back to Canaan with Rebekah at once. But the family of Rebekah want make e stay with them for at least ten days. So, to end the matter them talk say: “Make we call the young woman and ask-am.”—Genesis 24:57.
Anything wey Rebekah answer now, go really change e life. So wetin e go talk? E go talk say because of e papa and brother, e no go fit follow Eliezer go where e never go before? Or e go happy to dey part of this arrangement wey dey clear say na Jehovah de direct-am by e self? Wetin Rebekah answer show how e feel about this journey wey go change everything for e life. E just answer say: “Yes, I go follow-am go.”—Genesis 24:58.
Fine-Fine Things Wey You See for Bible
(Genesis 24:19, 20) After e give the man water drink, e talk say: “I go still fetch water make your camels drink until them belleful.” 20 So quick-quick e pour the water wey dey inside the pot for the place wey the camels go drink-am, and e run go fetch water for the well plenty times until all the camel don drink water.
wp16.3 12-13
‘Yes, I Go Go’
One evening when Rebekah go fetch water, one old man meet-am and beg say: “Abeg give me small water make I drink.” Na small thing the man ask for and e talk-am with respect. Rebekah see say the man travel come from far place. So, e no waste time put e water-pot down and give the man water to drink. E no just give-am small water, but e let the man drink belleful. E still see say the ten camels wey the man carry kneel-down near the well, and no water dey the place wey the camels fit drink water from. Rebekah know say the man de look-am and e want help the man as e power reach. So e talk say: “I go still fetch water make your camels drink until them belleful.”—Genesis 24:17-19.
Rebekah no just talk say e go give the ten camels water. But e talk say e go give them water until them belleful. If water de really hungry camel, e fit drink more than 25 gallons (95 L) of water! So if the ten camels be really want drink water, e go take Rebekah long time to give them water belleful. But, e be like say the camels no too hungry for water. Rebekah know this one when e talk say e go give them water? No! E ready to do everything wey e fit do to help this old man wey e never see before. And the man accept the help. E just dey one corner de look Rebekah as e de run go the well plenty times to fetch water for the camels.—Genesis 24:20, 21.
wp16.3 13, ftn.
‘Yes, I Go Go’
Evening don already reach. Bible no talk say Rebekah no quick go house because e de help Eliezer. E no still talk say by the time e help Eliezer finish, e family people don sleep; or say them come find-am because e don comot for house since and e never come back.
(Genesis 24:65) Then e ask the servant say: “Who be that man wey de waka for the field come meet us?” The servant talk say: “Na my master.” So e take e veil and use-am cover e self.
wp16.3 15 ¶3
‘Yes, I Go Go’
At last, the day wey we first talk about for the beginning of this topic, reach. As them reach Negeb for evening, Rebekah see one man wey de waka for the field. E resemble person wey de think about something. Bible talk say, “Quick-quick e jump down from the camel.” E be like say e no even wait make the camel kneel down, before e come down. Then e ask the servant say: “Who be that man wey de waka for the field come meet us?” When Eliezer talk say na Isaac, then Rebekah cover e head with veil. (Genesis 24:62-65) Why? E do-am to show say e respect this man wey e want marry. Some people for our time fit talk say wetin Rebekah do, na old-fashion. But, the truth be say whether we be man or woman, we fit learn from the example wey Rebekah show. Rebekah really put body down! This one na really fine character wey everybody need.
MARCH 16-22
FINE-FINE LESSON FROM BIBLE | GENESIS 25-26
“Esau Sell E Right as Firstborn”
(Genesis 25:27, 28) As the boys continue to de grow, Esau na person wey really sabi hunt animal, e de always dey bush. But Jacob na innocent man wey de stay for tent. 28 Isaac really love Esau because e de bring bush meat make e chop, but Rebekah love Jacob.
it-1 1242
Jacob
Jacob really different from Esau. But na Esau their papa like pass. And Bible talk say Esau sabi hunt animal. So, Esau no de fit stay one place, e de waka-waka de hunt animal. But Jacob “na innocent [Heb., tam] man wey de stay for tent.” Na shepherd and na e de take care of the things wey de happen for house, and Rebekah really love Jacob. (Ge 25:27, 28) For other verse for Bible, them use the Hebrew word tam talk about people wey God de see as good people. For example, Bible talk say: “People wey like to kill, hate innocent people.” But Jehovah give innocent people hope, when e talk say for future innocent people go really get peace. (Pr 29:10; Ps 37:37) Job really worship Jehovah with strong faith. Bible talk say na innocent man [Heb., tam] and say e dey righteous.—Job 1:1, 8; 2:3.
(Genesis 25:29, 30) One day, Jacob de cook stew when Esau come back from bush and e de really hungry. 30 So Esau tell Jacob say: “Abeg, quick give me some of the stew wey you de cook, because I de really hungry!” This na the reason why e name na Edom.
(Genesis 25:31-34) So Jacob talk say: “First sell your right as firstborn to me!” 32 And Esau talk say: “Hungry want kill me! Wetin I go use birthright do?” 33 Jacob still talk say: “First swear!” So [Esau] swear, and sell e right as firstborn to Jacob. 34 Then Jacob give Esau bread and stew. E chop and drink, and e waka comot. So Esau show say e no value e birthright.
Why We Suppose Show Say We Value the Good Wey People Do?
11 The bad thing be say, some people for Bible no show say they value wetin God do for them. One example na Esau. E papa and mama love and respect Jehovah, but Esau no value holy things. (Read Hebrews 12:16.) So how this kind mind wey Esau get come show? E sell e birthright to Jacob wey be e younger brother just because of one plate of stew. (Gen. 25:30-34) After, Esau feel bad for the thing wey e do, e regret-am. But because e no appreciate the thing wey e first get, e no get any reason to complain when e no receive the blessing wey e suppose get because of the birthright.
it-1 835
First son, First pikin
From the beginning, na the first son de get respect pass for family. When e papa die, na e go take e papa position as head of the family. And na e own share of their papa property de plenty pass. (De 21:17) For example, when Joseph and e brothers de chop for Egypt, Reuben sitdown near Joseph, because na Reuben be first son of their papa. (Ge 43:33) For Bible, no be every time them de honor first son. When Bible de list the name of the people for family, e fit no start with the name of the first son. Plenty times, na the son wey e faith for Jehovah strong pass, them de first write instead of the firstborn.—Ge 6:10; 1Ch 1:28; compare Ge 11:26, 32; 12:4; check BIRTHRIGHT; INHERITANCE.
Fine-Fine Things Wey You See for Bible
(Genesis 25:31-34) So Jacob talk say: “First sell your right as firstborn to me!” 32 And Esau talk say: “Hungry want kill me! Wetin I go use birthright do?” 33 Jacob still talk say: “First swear!” So [Esau] swear, and sell e right as firstborn to Jacob. 34 Then Jacob give Esau bread and stew. E chop and drink, and e waka comot. So Esau show say e no value e birthright.
(Hebrews 12:16) And make sure say nobody dey among wuna wey de do sex wey no clean, or anybody wey no value holy things, like Esau, wey sell e right as firstborn because of food.
w17.12 15 ¶5-7
Question Wey Some People Don Ask
Now make we go back to Hebrews 12:16, e talk say: “Make sure say nobody dey among wuna wey de do sex wey no clean, or anybody wey no value holy things, like Esau, wey sell e right as firstborn because of food.” Wetin this verse de talk about?
Apostle Paul no de talk about the family line of the Messiah. But e de advice Christians say make they worship Jehovah well. This one go help them “to get the favor of God.” Because if they do sex wey no clean, they no go get the favor from God. (Heb. 12:12-16) And e go make them be like Esau wey show say e “no value holy things.” But e choose to do wetin no dey holy.
Esau live for the time of Abraham, Isaac and other faithful servants of Jehovah. So e fit even be say Esau de do sacrifice to Jehovah sometimes. (Gen. 8:20, 21; 12:7, 8; Job 1:4, 5) But because e de only think of wetin e body want, e loss everything because of one plate of stew. E fit be say e de run from the suffer wey God talk say Abraham pikin them go face. (Gen. 15:13) Esau still show say e no value holy things when e go marry two women wey no de worship Jehovah. This one cause pain for e papa and mama. (Gen. 26:34, 35) But Jacob show say e really different from Esau. E marry woman wey de worship Jehovah.—Gen. 28:6, 7; 29:10-12, 18.
(Genesis 26:7) When the men of the place continue de ask [Isaac] about e wife, e go talk say: “Na my sister.” E de fear to talk say, “Na my wife,” because e tell e self say, “This men for this place fit kill me because of Rebekah,” because Rebekah really fine.
it-2 245 ¶6
Lie
Bible condemn lie. So, e mean say when some kind people wey no suppose know the truth about some things ask us about-am, we must tell them? No! Jesus Christ don warn us say: “No give wetin dey holy to dogs, and no throw things wey dey special to you for pigs, so that they no go match-am with their leg, and turn round tear you open.” (Mt 7:6) Because of this one, Jesus no de talk everything or give direct answer when some kind people ask-am question. Because e know say if e answer them, them fit use-am cause serious problem. (Mt 15:1-6; 21:23-27; Joh 7:3-10) This na the same reason why Abraham, Isaac, Rahab, and Elisha give some people answer wey no correct or no tell them everything wey them know about some matter.—Ge 12:10-19; chap 20; 26:1-10; Jos 2:1-6; Jas 2:25; 2Ki 6:11-23.
MARCH 23-29
FINE-FINE LESSON FROM BIBLE | GENESIS 27-28
“Jacob Get the Blessing Wey E Suppose Get”
(Genesis 27:6-10) So Rebekah tell Jacob wey be e pikin say: “I hear now-now as your papa de tell your brother Esau say, 7 ‘Go kill animal come and cook better food for me. Then I go chop so that I go bless you for the front of Jehovah before I die.’ 8 So my pikin, open your ear hear wetin I want talk and do wetin I tell you. 9 Abeg, go the place wey all the animals dey and bring two young goat from there, the ones wey good pass, so that I go use them cook better food for your papa, just the way e de like-am. 10 Then you go take-am go give your papa make e chop so that e go bless you before e die.”
w04 4/15 11 ¶4-5
Rebekah—Woman Wey Get Faith and De Take Action
Bible no talk if Isaac know say Esau must dey under Jacob. But Rebekah and Jacob know say na Jacob suppose get the blessing of firstborn. So when Rebekah hear as Isaac de tell Esau say make e go hunt animal and use-am cook better food, so that e go chop and bless Esau, Rebekah do something quick-quick. Na from the time wey Rebekah dey young, e get the mind to do the correct thing. E tell Jacob say make e bring two young goats so that e go use them cook better food for Isaac, just the way e de like-am. Then the next thing wey Jacob go do na to do like say e be Esau so that e go get the blessing. But Jacob tell e mama the danger wey fit happen. E papa fit know say no be Esau, and this one go make Isaac curse Jacob. Then Rebekah talk say: “Make the curse wey e fit curse you, come ontop my head.” Then Rebekah cook the food, arrange Jacob make e be like Esau, and give Jacob the food make e carry-am go give Isaac e husband.—Genesis 27:1-17.
Bible no talk why Rebekah do wetin e do. Plenty people don talk say wetin Rebekah do bad, but Bible no condemn-am. Even when Isaac know wetin Jacob do, e no still condemn-am, even self, Isaac give Jacob more blessing. (Genesis 27:29; 28:3, 4) Rebekah know wetin Jehovah don talk about e two pikin. So wetin Rebekah do na to make sure say the right person get the blessing, and na Jacob be that right person. Wetin Rebekah do no dey against wetin Jehovah want.—Romans 9:6-13.
(Genesis 27:18, 19) So [Jacob] go meet e papa and talk say: “Papa!” and e papa answer say: “I dey here my pikin, which pikin you be?” 19 Jacob tell e papa say: “Na me, Esau, your firstborn. I don do wetin you say make I do. Abeg sitdown well make you chop the animal wey I kill so that you go bless me.”
w07 10/1 31 ¶2-3
Question Wey Some People Don Ask
Bible no talk all the reason wey make Rebekah and Jacob do wetin them do, but e show say no be wetin they don plan say they go do. Make we always remember say Bible no praise them or condemn them for wetin them do. And Bible no use them as example of people wey lie and deceive other people. But Bible help us know some things about this matter.
First, Bible make-am clear say na Jacob be the right person wey suppose get the blessing, no be Esau. Before this thing happen, Jacob don buy the birthright from e twin brother Esau. Because Esau no value holy things, e sell e birthright because e de hungry. So e “show say e no value e birthright.” (Genesis 25:29-34) As Jacob go meet e papa so that e go get the blessing, na the right thing wey be e own, e go take.
(Genesis 27:27-29) So [Jacob] near e papa and e papa kiss-am then use nose smell the scent of e cloth. Then e bless [Jacob] and talk say: “See the scent from my pikin body, e just be like the scent of the bush wey Jehovah don bless. 28 Make the true God give you dew from heaven and land wey de produce well for this earth and plenty food and new wine. 29 Make people work for you, and make nations bow down to you. Make you be the master of your brother and make your mama pikin them bow down to you. Curse go dey for the head of anybody wey curse you, and anybody wey bless you go get blessing.”
it-1 341 ¶6
Blessing
For Abraham time, papa de normally bless e pikin them before e die. This blessing really dey important and serious to them that time. So Isaac bless Jacob but e think say na Esau e bless because e blind and don old. Isaac talk say Jacob go get favor and rich pass e brother Esau. E beg Jehovah say make the thing wey e talk happen to Jacob as e talk. (Ge 27:1-4, 23-29; 28:1, 6; Heb 11:20; 12:16, 17) After Isaac know say na Jacob e bless no be Esau, e still give Jacob more blessing. (Ge 28:1-4) Before Jacob die, e first bless Joseph two pikin before e bless e own pikin them. (Ge 48:9, 20; 49:1-28; Heb 11:21) Na the same with Moses, before e die, e bless the nation of Israel. (De 33:1) All this blessing wey we don talk about, concern wetin go happen for future to people wey go get the blessing. Sometimes, when person de bless another person, e go put e hand ontop the head of the person wey e de bless.—Ge 48:13, 14.
Fine-Fine Things Wey You See for Bible
(Genesis 27:46–28:2) After that one happen, Rebekah continue to tell Isaac say: “I hate my life because of this children of Heth. Wetin I gain if Jacob marry Heth pikin, just like all this girls from this land?”
28 So Isaac call Jacob. E bless Jacob and tell Jacob say: “Make you no ever marry Canaan pikin. 2 Make you go the house of Bethuel, your mama papa, wey dey Paddan-aram. For there, make you marry Laban pikin. [Laban] na your mama brother.
w06 4/15 6 ¶3-4
How Husband and Wife Fit Get Good Discussion
Isaac and Rebekah de get good discussion? After their pikin Esau marry two women wey be Heth children, serious problem come dey the family. Rebekah “continue to tell” Isaac say: “I hate my life because of this children of Heth. Wetin I gain if Jacob marry Heth pikin?” (Genesis 26:34; 27:46) E talk wetin de worry e heart, and e make-am clear.
Isaac tell Jacob wey be Esau twin brother say make e no marry Canaan pikin. (Genesis 28:1, 2) Rebekah really make wetin dey e mind clear. Isaac and Rebekah talk about their family problem and solve the problem. This one na example for us today. What if husband and wife get problem and they no fit solve-am? Wetin they fit do?
(Genesis 28:12, 13) Then e dream, for the dream, e see ladder wey stand for this earth but the top reach heaven; and angels of God de waka go up and come down for the ladder. 13 And see! Jehovah dey up after the ladder, and e talk say: “Na me be Jehovah the God of Abraham your papa and the God of Isaac. I go give you and your pikin them this land wey you lie down so.
w04 1/15 28 ¶6
Lesson From the Book of Genesis—II
28:12, 13—This dream about “ladder” wey Jacob dream, wetin e de show? E fit be say this “ladder” be like stones wey them arrange like step wey de go up. E show say message from heaven de reach this earth and message from this earth, de reach heaven. As angels de waka go up and come down for the ladder, e show say angels de do important work. Them de carry message between Jehovah and e friends wey dey this earth.—John 1:51.
MARCH 30–APRIL 5
FINE-FINE LESSON FROM BIBLE | GENESIS 29-30
“Jacob Marry”
(Genesis 29:18-20) As Jacob don love Rachel, e talk say: “I ready to work for you for seven years because of your pikin Rachel.” 19 Then Laban talk say: “E better make I give my pikin to you than to another man. So make you continue to stay with me.” 20 So Jacob work for seven years because of Rachel, but because e really love [Rachel], e just be like say na small time.
w03 10/15 29 ¶6
Jacob Value Things Wey Concern God
Engagement de start that time when person don pay bride-price to the family of the girl. After, for the Law wey Jehovah give the people of Israel, na 50 silver shekels be bride-price for virgin wey person don sleep with. One professor wey e name na Gordon Wenham talk say “that na the highest price wey person fit pay as bride-price” and say most people own “really low.” (Deuteronomy 22:28, 29) Because Jacob no get money to pay for the bride-price, e tell Laban say e go work for seven years so that e go fit marry e pikin. Wenham still talk say “since na from half shekel to one shekel ordinary laborer de receive for one month for Babylon that time, (so e mean say na 42 to 84 shekels the laborer go get for seven years) the price wey Jacob want pay as e go work for Laban na really good one for Rachel bride-price.” Laban no waste time to accept-am.—Genesis 29:19.
(Genesis 29:21-26) Then Jacob tell Laban say: “My work don complete, so give me my wife so that I fit sleep with-am.” 22 So Laban gather all the men for the place and do party. 23 But for evening, e decide to give e pikin Leah to Jacob so that e go sleep with-am. 24 Laban still give Zilpah wey be e servant girl to Leah as e servant. 25 For morning, Jacob see say na Leah! So e ask Laban say: “Why you do me like this? No be because of Rachel I work for you? So why you deceive me?” 26 Laban talk say: “Our tradition for here no de allow make the younger woman marry before the firstborn.
w07 10/1 8-9
The People of Israel Come From Two Sisters Wey Peace No Dey Among Them
Leah join for the plan to deceive Jacob? Or e only obey wetin e papa talk? What about Rachel? E know about the plan? If e know, how e feel about-am? E go turn against this kind papa wey e get? Bible no give us the answers to all this questions. No matter wetin Rachel and Leah think about the matter, for the end, e really make Jacob vex. When Jacob know about-am, no be Rachel and Leah e vex for but na their papa. E talk say: “Why you do me like this? No be because of Rachel I work for you? So why you deceive me?” Wetin Laban talk? E talk say: “Our tradition for here no de allow make the younger woman marry before the firstborn. Make you first celebrate the week of this woman. And after, you go get the other woman after you don work for me for another seven years.” (Genesis 29:25-27) Na so they push Jacob to marry pass one woman, and this one really cause serious jealousy between the women.
it-2 341 ¶3
Marriage
Marriage party. For Israel, they no get one particular way wey people de do marriage party but wedding na really time for happiness. For the wedding day, they go do big preparation for the house of the woman wey want marry. The woman go bathe and rub cream wey really get good scent. (Compare Ru 3:3; Eze 23:40.) Sometimes, e go get other women wey go help the bride wear the breastbands and long white gown. Plenty time, they go really design the gown as the woman get money reach. (Jer 2:32; Re 19:7, 8; Ps 45:13, 14) E go still wear plenty different-different kind of jewelries, if e get. (Isa 49:18; 61:10; Re 21:2) Then e go use cloth wey light cover e self from head go reach e leg. (Isa 3:19, 23) This one help us see why e easy for Laban to fit deceive Jacob, and why Jacob no know say na Leah they give-am, no be Rachel. (Ge 29:23, 25) Before Rebekah reach where Isaac dey, e cover e head. (Ge 24:65) This one de show say the woman put e self under the man.—1Co 11:5, 10.
(Genesis 29:27, 28) Make you first celebrate the week of this woman. And after, you go get the other woman after you don work for me for another seven years.” 28 Jacob do as e talk and celebrate the week of the woman. After, e give e pikin Rachel to Jacob as wife.
Fine-Fine Things Wey You See for Bible
(Genesis 30:3) So e talk say: “See Bilhah wey be my servant, make you sleep with-am so that e go born pikin for me and so that with e help, I go still get children.”
it-1 50
To Adopt Pikin
Rachel and Leah accept the pikin wey their servants born for Jacob as their own pikin them. (Ge 30:3-8, 12, 13, 24) This pikin them still get from the property wey Rachel and Leah pikin them get. Na Jacob be their papa and since na Rachel and Leah get the servant them, the pikin wey the servants born na for Rachel and Leah.
(Genesis 30:14, 15) Now when Reuben de waka the time wey them de do wheat harvest, e see mandrakes for farm. So e bring-am come give e mama, Leah. Then Rachel tell Leah say: “Abeg, give me some of your pikin mandrake.” 15 So Leah tell Rachel say: “E no mean anything to you as you take my husband? You want still take my pikin mandrakes join?” So Rachel talk say: “No problem, make you sleep with-am this night, but you go give me your pikin mandrakes.”
w04 1/15 28 ¶7
Lesson From the Book of Genesis—II
30:14, 15—Wetin fit be the reason why Rachel exchange e chance to sleep with Jacob and get belle, with mandrake fruit? For Bible time, people de use fruit of mandrake as medicine to make person sleep or as pain killer. They still believe say the fruit de make person hungry for sex and say e fit make woman get belle. (Song of Solomon 7:13) Even though Bible no talk why Rachel want the mandrake, e fit be say e think say the fruit go help-am get belle and end the shame wey e get as e never born. Even with this one, e take some years before Jehovah make Rachel born.—Genesis 30:22-24.