Study Book for Our Life and Preaching Meeting
AUGUST 3-9
FINE-FINE LESSON FROM BIBLE | EXODUS 13-14
“Dey Strong and See Wetin Jehovah Go Do to Save You”
(Exodus 14:13, 14) Then Moses tell the people say: “Make wuna no fear. Make wuna dey strong and see wetin Jehovah go do to save wuna today. Because this Egypt people wey wuna de see now, wuna no go ever see them again. 14 Jehovah go fight for wuna by e self, and wuna no go need to do anything.”
w13 2/1 4
Moses Really Get Faith
Moses fit no know say Jehovah want divide the Red Sea, and open road for Israel people. But Moses get faith say Jehovah go do something to protect E people. And Moses want make all Israel people still get this kind faith. Bible talk say: “Moses tell the people say: ‘Make wuna no fear. Make wuna dey strong and see wetin Jehovah go do to save wuna today.’” (Exodus 14:13) The thing wey Moses talk make their faith strong? Yes! Bible talk about Moses and all the Israel people say: “Because of their faith, they waka pass the Red Sea like say na dry land.” (Hebrews 11:29) No be only Moses gain from e faith, everybody wey learn from e faith, still gain.
(Exodus 14:21, 22) So Moses stretch e hand ontop the sea; and Jehovah use strong breeze from the east blow the sea go back the whole night, then the sea divide into two part and e make the bottom of the sea turn to dry ground. 22 So Israel people pass the dry ground for the sea as the water stand like wall for their right side and their left side.
Na Almighty But E De Care About People
13 Read Exodus 14:19-22. Just imagine say you dey there with Israel people. You dey between the army of Pharaoh and the Red Sea. You no fit run. Then God do something. The pillar of cloud move from your front go your back. The cloud block Egypt people. Their side dey dark but bright light de shine for your side! Na miracle. Then you see Moses stretch e hand face the sea, and one strong breeze wey them de call east wind open road go the other side for the water. This one make you, your family, your animals, and all the other people waka pass the ground for the sea. And wuna no scatter as wuna pass, wuna arrange well. But at once, you notice something about the place. E no dey cold and potopoto no dey the ground; instead, e dey dry and e strong. E come dey easy for wuna to fit waka pass. So even people wey they no fit waka fast fit cross go the other side and nothing do them.
(Exodus 14:26-28) Then Jehovah tell Moses say: “Stretch your hand ontop the sea so that the water go come back and cover Egypt people, their war chariots and their men wey de use horse fight war.” 27 At once Moses stretch e hand ontop the sea, and as morning de reach, the sea come back to the way e dey before. As Egypt people de run from the water, Jehovah throw them back inside the sea. 28 The water wey de come back cover the war chariots, the men wey dey ontop horse and all Pharaoh army wey follow Israel people enter inside the sea. Nobody among them survive.
w09 3/15 7 ¶2-3
Make You No Ever Forget Jehovah
As Egypt people de struggle with their war chariot, all Israel people cross go the other side of the Red Sea. Moses come stretch e hand ontop the Red Sea, then Jehovah make the water wey stand like wall fall come down. The plenty water fall ontop Pharaoh and e army and cover them. All of them die but Jehovah save Israel people.—Ex. 14:26-28; Ps. 136:13-15.
When all the nation wey dey around hear wetin happen, fear really catch them for long time. (Ex. 15:14-16) After 40 years wey this thing happen, Rahab wey come from Jericho tell two men from Israel say: “All the people for this land no get power again because them de fear wuna. Because we don hear the way Jehovah dry the water for Red Sea for wuna when wuna comot from Egypt.” (Josh. 2:9, 10) Even people wey no de worship Jehovah no forget how Jehovah save e people. What about Israel people? Them get more reason to remember wetin Jehovah do for them.
Fine-Fine Things Wey You See for Bible
(Exodus 13:17) Now, when Pharaoh drive Israel people comot, God no lead them pass the road wey dey Philistia people land, even though say na the road wey near pass. Because God talk say: “This people fit change their mind and go back to Egypt if them meet war for road.”
it-1 1117
Highway, Road
Since olden days, different-different highway and road dey wey people fit pass go different-different city and kingdom for Palestine area. Some of this road na important road for business people. (Nu 20:17-19; 21:21, 22; 22:5, 21-23; Jos 2:22; Jg 21:19; 1Sa 6:9, 12; 13:17, 18; go check KING’S ROAD.) The main road wey people de pass from Egypt to the land of Canaan that time, na the road from Egypt to Gaza and Ashkelon for Philistia. From there, the road bend go Meggido. The road continue from Meggido to Hazor wey dey the north side of the Sea of Galilee and then to Damascus. Na this road wey pass through Philistia short pass if person de travel from Egypt to the Promise Land. But because Jehovah love Israel people e lead them pass another road so that Philistia people no go attack them and make them loose hope.—Ex 13:17.
(Exodus 14:2) “Tell Israel people say make them turn back and form camp for the front of Pihahiroth, between Migdol and the sea and them go face Baal-zephon. Make wuna camp dey near the sea.
it-1 782 ¶2-3
Exodus
Which side for the Red Sea Jehovah fit don open so that Israel people go pass?
When Israel people reach Etham, Jehovah tell them say make them form camp for the side of the wilderness. This na the second place wey Jehovah say make them form camp. After, Jehovah tell Moses say make them “turn back and form camp for the front of Pihahiroth . . . near the sea.” This one make Pharaoh believe say Israel people don confuse. (Ex 13:20; 14:1-3) Some professors talk say e fit be say na el Haj road Israel people pass. Them talk say the Hebrew word wey Jehovah use tell Israel people say make them “turn back” mean say na U-turn them make. No be just to turn go right or left. Wetin them talk show say when Israel people reach somewhere for the north side of the beginning of the river wey the name na Gulf of Suez, them turn round and go the east side of Jebel ʽAtaqah. This one na mountain wey cover the west side of Gulf of Suez. And this one mean say because Israel people really plenty, e go hard for them to quick run if the people wey de pursue them de come from the north side. Because the sea and the mountain don block their way.
This one really resemble wetin Jew people de teach for the time of the apostles. (Go check PIHAHIROTH.) But wetin dey important pass be say e really match with wetin Bible talk, even though wetin plenty professors talk no support-am. (Ex 14:9-16) E fit really be say the place wey Israel people cross the Red Sea really far from the beginning of the Gulf of Suez (or west side of the Red Sea). So Pharaoh and e army no go fit surround Israel people and attack them from the other side.—Ex 14:22, 23.
AUGUST 10-16
FINE-FINE LESSON FROM BIBLE | EXODUS 15-16
“Use Song Praise Jehovah”
(Exodus 15:1, 2) Then Moses and Israel people sing this song to Jehovah say: “Make I sing to Jehovah because e don win this big war. E don throw the horse and people wey de ride-am for inside sea. 2 Jehovah na my strength and power because e don save me. This na my God and I go praise-am; the God of my papa and I go honor-am.
w95 10/15 11 ¶11
Why E Dey Important Make We Fear God Now?
11 As Jehovah destroy Pharaoh and e army for the Red Sea, e make Israel people fear and respect Jehovah more. And e still make people for different-different place for this earth know the kind God wey Jehovah be. (Joshua 2:9, 10; 4:23, 24) This one really make people respect Jehovah pass all the gods for Egypt wey no fit save the people wey de worship them. All the lie-lie god, Pharaoh and e army wey the people trust, fail. (Psalm 146:3) Na this one make Israel people use song praise Jehovah. Their song show say them really de fear the living God wey get power to save e people!
(Exodus 15:11) O Jehovah, who among all the gods be like you? Who really be like you? You don show say na you holy pass. You na God wey de do wonderful things, and na you we go fear and praise with song.
(Exodus 15:18) Jehovah go rule as king forever and ever.
w95 10/15 11-12 ¶15-16
Why E Dey Important Make We Fear God Now?
15 If to say we join the people wey cross the Red Sea with Moses, we for still join sing say: “O Jehovah, who among all the gods be like you? Who really be like you? You don show say na you holy pass. You na God wey de do wonderful things, and na you we go fear and praise with song.” (Exodus 15:11) Since that time, plenty people don feel the same way. For the book of Revelation, apostle John talk about the group of anointed Christians wey de sing. E talk say: “Them de sing the song of Moses, the slave of God and the song of the Lamb.” Wetin be this song wey them de sing? Them de sing say: “Jehovah God, the Almighty, all your work really big and good. King wey de live forever, all your ways correct and dey righteous. Who no go really fear you, Jehovah and praise your name as na only you no de leave your people?”—Revelation 15:2-4.
16 Today truth from Bible don free Jehovah people from lie-lie religion. And they really like the things wey Jehovah don make and the laws wey e don give them. Because them know God law and de do wetin e want, them don stop to live the kind life wey people for this wicked world de live. Every year, thousands of people de come out from this wicked world, clean theirself and join Jehovah clean organization. Small time, Jehovah go destroy lie-lie religion and this wicked world. Then all servant of Jehovah go live forever for the new world wey bad things no go dey.
(Exodus 15:20, 21) Then Miriam wey be Aaron sister and prophet, take tambourine, and all the women take their own tambourine and join [Miriam] de dance. 21 Miriam sing to answer the men say: “Sing to Jehovah, because e don win this big war. E don throw the horse and people wey de ride-am for inside sea.”
it-2 454 ¶1
Music
E be like say for Israel that time, many times when people de sing together, them de divide them into two group. When the first group sing the first line, the second group go sing the second line. Another style na say, one person fit de sing the main part of the song, the rest go answer with the chorus. E fit be say na this one Bible call “answer.” (Ex 15:21; 1Sa 18:6, 7) The way they write some chapters for the book of Psalms really describe this style wey people de use sing. One example na Psalm 136. The way they describe the two big group of choir wey sing to thank Jehovah for the time of Nehemiah and when them de commission the wall of Jerusalem, show say na this style they use sing.—Ne 12:31, 38, 40-42; go check SONG.
it-2 698
Woman Wey Be Prophet
Na Miriam be the first woman wey Bible call prophet. And e clear say Miriam use song tell people message from Jehovah. (Ex 15:20, 21) Na this one make Miriam and Aaron tell Moses say: ‘Jehovah no still de use us?’ (Nu 12:2) Jehovah use prophet Micah talk say when e lead Israel people comot from Egypt, e send Moses, Aaron and Miriam to them. (Mic 6:4) Na true say Jehovah use Miriam tell people e message, but e friendship with Jehovah no reach Moses friendship with Jehovah. When Miriam no gree stay the place wey Jehovah put-am, Jehovah really deal with-am.—Nu 12:1-15.
Fine-Fine Things Wey You See for Bible
(Exodus 16:13) So that evening, quail fly come and cover the whole camp and for morning, dew cover the whole ground for the camp.
w11 9/1 14
You Know?
Why God choose quail as meat for Israel people when them dey wilderness?
When Israel people comot from Egypt, na two times Jehovah give them plenty quail as meat.—Exodus 16:13; Numbers 11:31.
Quail na small bird wey dey about 7 inches (18 cm) and around the weight of one apple or 100 g. Quail dey plenty area for the west side of Asia and Europe. Because quail na bird wey de travel, them de fly go North Africa and Arabia for cold season. For the season wey them de travel, plenty quail de fly pass the waterside for Mediterranean Sea and Sinai Peninsula.
The New Westminster Dictionary of the Bible talk say quail “de fly fast and really sabi fly and e de like to fly for the direction wey breeze de blow. But if breeze change direction, or the bird them tire as them de fly, they go fall for ground and e go be like say they don die.” Before they continue their journey, they go rest for ground for one or two days. So, this one de make-am easy for hunters to catch them. For around 1920, Egypt de sell three million quail every year as meat to other country.
The two times wey Israel people chop quail na for the season wey plant de grow (springtime). Na true say quail de always fly pass Sinai area that time, but na Jehovah make the heavy breeze push the bird them come the camp of Israel people.—Numbers 11:31.
(Exodus 16:32-34) Then Moses talk say: “Jehovah don command say, ‘Make wuna put-am make e full one omer measure and keep-am for all wuna generation, so that them go see the bread wey I give wuna chop for inside wilderness, the time wey I bring wuna come out of Egypt.’” 33 So Moses tell Aaron say: “Take one jar and put one omer measure of manna for inside and put-am for the front of Jehovah and e go dey there for all wuna generation.” 34 Aaron put-am for front of the Testimony so that e no go spoil, just as Jehovah tell Moses.
w06 1/15 31
Question Wey Some People Don Ask
Small time after Jehovah save Israel people from Egypt, they start to complain about food. So Jehovah give them manna. (Exodus 12:17, 18; 16:1-5) Then, Moses tell Aaron say: “Take one jar and put one omer measure of manna for inside and put-am for the front of Jehovah and e go dey there for all wuna generation.” The verse still talk say: “Aaron put-am for front of the Testimony so that e no go spoil, just as Jehovah tell Moses.” (Exodus 16:33, 34) Na true say Aaron gather the manna and put-am for inside jar that time. But them need to wait until Moses make the Ark and put the two stone tablet inside Ark, before they put the jar wey manna dey inside, for the front of the Testimony.
AUGUST 17-23
FINE-FINE LESSON FROM BIBLE | EXODUS 17-18
“Brothers Wey No De Do Pass Their Power De Train Other People and Give Them Work”
(Exodus 18:17, 18) Moses father-in-law tell [Moses] say: “This thing wey you de do no good. 18 You go tire, you and this people wey dey with you, because this work too plenty for you, you no go fit do everything by yourself.
w13 2/1 6
Moses Na Person Wey Really Love People
Moses show say e really love other Israel people. They see-am clear say na Jehovah de use Moses lead them. So when they get problem, they go bring-am come meet Moses so that e go judge the case for them. Bible talk say: “The people continue to stand for e front from morning go reach evening.” (Exodus 18:13-16) Imagine as Moses go just de listen to the people from morning till night as them de talk their problems. This one no be small work! Even with this one, Moses happy to help the people because e love them.
(Exodus 18:21, 22) But make you select people wey go fit do the work and wey get the fear of God. Men wey people trust and wey hate bribe. You go make them chiefs for thousands of people, chiefs for hundreds of people, chiefs for fifty-fifty people and chiefs for ten-ten people. 22 Make them judge the people when problem dey, and make them bring the hard one to you, but make them judge the small-small ones. Share the work with other people so that things go easy for you.
w03 11/1 6 ¶1
To Trust People Dey Important If Person Want Dey Happy
Before Moses choose the men, they don show say they get character wey Jehovah like. They don show for their life say them de fear God. So because of their love for Jehovah wey be their God, they no want do anything wey go make Jehovah vex. E really dey clear for everybody say the men de do everything wey they fit do to make sure say wetin Jehovah want happen. As them hate bribe, they use that one show say if they give them power, they no go use the power anyhow. They no go start to misbehave and use the power for only theirself, their family or friends.
(Exodus 18:24, 25) At once, Moses listen to e father-in-law and do everything wey e talk. 25 Moses choose men wey go fit do the work from all the tribe of Israel, e put them in charge of the people, as chiefs for thousands of people, chiefs for hundreds of people, chiefs for fifty-fifty people and chiefs over ten-ten people.
w02 5/15 25 ¶5
Righteous People No De Do Wayo
Moses na another example of person wey de carry body down and wey no de do pass e self. The time wey only Moses be de judge case for all Israel people, the work no really easy for-am. Then e father-in-law, Jethro give-am advice. E talk say make Moses share some part of the work give some men wey go fit handle-am. Moses see say e really need to share the work with other people, so e do wetin Jethro talk. (Exodus 18:17-26; Numbers 12:3) E dey easy for person wey no de do pass e self to train other people and give them work. This person no go fear say e no go get power over some of the things wey e be de control. (Numbers 11:16, 17, 26-29) But e always ready to help other people grow as them de worship Jehovah. (1 Timothy 4:15) E no go good if na so we still be?
Fine-Fine Things Wey You See for Bible
(Exodus 17:11-13) When the hand of Moses dey up, Israel people go de win, but if e hand come down, Amalek people go de win. 12 When hand tire Moses, they put stone for ground make e sitdown ontop. Then Aaron hold one hand and Hur hold the other one so that the hand no go come down till evening. 13 Na so Joshua use sword win Amalek and e people.
w16.09 6 ¶14
“No Allow Your Hand Come Down”
14 When Israel people and Amalek people de fight war, Aaron and Hur support Moses so that they go win. For this our time, make we try think about how we fit support and help people. Which kind people we fit help? People wey de suffer because they don old, wey de sick, people wey their family de worry because them de worship Jehovah, people wey no get anybody to spend time with, or people wey their person die. We fit still help young people wey other people de try push to do bad things. Or wey people de push to “succeed” for this wicked world, whether na to go big-big school, or to make plenty money, or to get big position for work place. (1 Thess. 3:1-3; 5:11, 14) Do things wey go show brothers and sisters say you really care about them, whether for Kingdom Hall, for preaching, when wuna de enjoy, or when you de talk with them for phone.
(Exodus 17:14) Now, Jehovah tell Moses say: “Write this thing for book as reminder and make you still tell Joshua, say ‘I go remove everything wey go make people remember Amalek from this earth.’”
it-1 406
Books of the Bible
The things wey Moses write no be from e own mind, na from God. Na part of Bible, and we fit use-am worship Jehovah well. And from the things wey dey the part of the Bible wey Moses write, we no get doubt say na true. No be Moses make e self leader and commander to the people of Israel. In fact, the first time wey Jehovah tell Moses say e go lead the people of Israel, Moses no gree. (Ex 3:10, 11; 4:10-14) So na God choose Moses as leader and give-am the power to do miracle. The miracles wey Moses do even make the magic priests of Pharaoh confess say na God give Moses the power wey e use do the miracles. (Ex 4:1-9; 8:16-19) Moses no become spokesman for Israel people and writer because na wetin e don de find for long time. But na wetin God tell Moses e talk and God use e holy spirit move Moses to talk and later write the Bible books wey e write.—Ex 17:14.
AUGUST 24-30
FINE-FINE LESSON FROM BIBLE | EXODUS 19-20
“Wetin You Fit Learn From the Ten Commandment?”
(Exodus 20:3-7) Make you no ever worship any other god except me. 4 “Make you no make for yourself any image or something wey resemble anything for heaven or for the earth or for inside water under the earth. 5 Make you no bow down for them or allow anything tempt you make you worship them, because I be Jehovah your God. Na only me wey be your God, you must worship, na wetin I want be that. I de punish children for the sin of their papa them, even grandchildren and great-grandchildren if they hate me. 6 But I de show love wey no de fail for people wey love me and de obey my commandment, go reach their thousand-thousand generation. 7 “Make you no ever use the name of Jehovah your God anyhow, because Jehovah must punish person wey use e name anyhow.
w89 11/15 6 ¶1
Wetin You Learn From the Ten Commandments?
The first four commandment show us wetin we go do for Jehovah. (One) Jehovah still want make we worship only-am as our God. (Matthew 4:10) (Two) Jehovah no want make any of e servants worship idol. (1 John 5:21) (Three) Make we respect the name of God; make we no ever use-am anyhow. (John 17:26; Romans 10:13) (Four) Make we use all our life de do things wey concern the worship of God. Make we no de do like say na we righteous pass, so that we go enter “God’s rest.”—Hebrews 4:9, 10.
(Exodus 20:8-11) “Remember say Sabbath day na holy day. 9 You go use six days do all the work wey you want do, 10 but the seventh day na Sabbath for Jehovah your God. Make you no do any work, whether you, your son, your daughter, your slave whether na man or woman, your animal, or stranger wey de stay for the place wey you de stay. 11 Because na six days Jehovah use make heaven and earth, and the sea and everything for inside, and e start to rest for the seventh day. Na e make Jehovah bless the Sabbath day and make-am holy.
(Exodus 20:12-17) “Honor your papa and mama, so that you go live long for the land wey Jehovah your God de give you. 13 “Make you no kill person. 14 “Make you no sleep with person wey no be your husband or wife. 15 “Make you no thief. 16 “Make you no lie say person do wetin e no do. 17 “Make e no hungry you to take the house of another man. Make e no hungry you to take the wife of another man, e slave whether na man or woman, e bull or e donkey, or anything wey another man get.”
w89 11/15 6 ¶2-3
Wetin You Learn From the Ten Commandments?
(Five) One thing wey de make family dey as one, na when children de obey their papa and mama. And Jehovah de bless this kind children. The command to obey papa and mama na the first command wey Jehovah add blessing join for pikin wey obey. Jehovah promise say ‘things go go well’ for pikin wey obey this command, and ‘e go live long for this earth.’ (Ephesians 6:1-3) Now, we dey for “the last days” of this wicked world. If young people today obey Jehovah, them get hope say they go live forever.—2 Timothy 3:1; John 11:26.
If we love our neighbor, we no go ever do them bad things. We no go (Six) kill, (Seven) sleep with person wey no be our husband or wife, (Eight) thief, and (Nine) lie say person do wetin e no do. (1 John 3:10-12; Hebrews 13:4; Ephesians 4:28; Matthew 5:37; Proverbs 6:16-19) Which reason de make us do the things wey we de do? For the (Number Ten) commandment, Jehovah talk say make we no get long-throat for things wey no be our own. This one de remind us say Jehovah want make the reason why we de do the things wey we do, always good for e eye.—Proverbs 21:2.
Fine-Fine Things Wey You See for Bible
(Exodus 19:5, 6) Now if wuna go obey everything wey I talk and keep my agreement, wuna go surely become my special property among all the people, because the whole earth na my own. 6 Wuna go be kingdom of priests and holy nation for me.’ Na this things you go tell Israel people.”
it-2 687 ¶1-2
Priest
Christians Wey Jehovah Anoint as Priests. Jehovah promise Israel people say if they do wetin e want, e go make them E “kingdom of priests and holy nation.” (Ex 19:6) But the priest them wey come from the family of Aaron, no go be priests forever. They stop to be priest when the arrangement of other priests wey Jehovah don choose start to work. (Heb 8:4, 5) So the priests wey come from Aaron family go stop this work when the Law covenant don end and the new covenant start to work. (Heb 7:11-14; 8:6, 7, 13) Na only Israel people Jehovah first give this favor to be priest for the Kingdom wey E don promise. As time de go, Jehovah invite people from other nation make they still enjoy this favor.—Ac 10:34, 35; 15:14; Ro 10:21.
Israel people wey accept Jesus as the Messiah, no plenty. This one make the people of Israel no get enough members wey go form the real kingdom of priests and the holy nation. (Ro 11:7, 20) Because Israel people no use all their heart de worship Jehovah, E use prophet Hosea warn them plenty years ago. Hosea talk say: “Because you no gree learn about me, I no go still gree make you continue to work as my priest; And because you don forget the law of your God, me myself go forget your pikin them.” (Ho 4:6) This one match wetin Jesus tell the leaders for Jew people their religion, e tell them say: ‘They go take the Kingdom of God from wuna and give-am to people wey de do wetin God want.’ (Mt 21:43) But when Jesus dey this earth, e follow the Law and e support the priests from Aaron family. When e cure people wey get leprosy, e tell them say make they go meet the priest and do the sacrifice wey they suppose do.—Mt 8:4; Mr 1:44; Lu 17:14.
(Exodus 20:4, 5) “Make you no make for yourself any image or something wey resemble anything for heaven or for the earth or for inside water under the earth. 5 Make you no bow down for them or allow anything tempt you make you worship them, because I be Jehovah your God. Na only me wey be your God, you must worship, na wetin I want be that. I de punish children for the sin of their papa them, even grandchildren and great-grandchildren if they hate me.
w04 3/15 27 ¶1
Lesson From the Book of Exodus
20:5—How e be say Jehovah de punish generation of grand pikin them for sin wey their papa them do? When person don grow and get sense, na the way e de behave and e character God go use judge-am. But when the whole nation of Israel start to worship other gods, them and their generations after them, really suffer. Because of this one, to worship Jehovah well really hard for the good people wey love Jehovah.
AUGUST 31–SEPTEMBER 6
FINE-FINE LESSON FROM BIBLE | EXODUS 21-22
“Show Say Life Dey Important to You as E Dey for Jehovah”
(Exodus 21:20) “If person use stick beat e slave whether na man slave or woman slave, and the slave die for e hand, them must revenge the death of the slave.
it-1 271
Beating
Hebrew person wey get slave fit use stick beat e slave, if the slave no de obey or stubborn. But if the slave die as e de beat-am, they go kill the owner. If the slave stay for one or two days before e die, then e go show say the owner no get-am for mind to kill the slave. The owner get right to punish the slave because na “e money” e use buy the slave. E clear say no master go want use e own hand destroy e property, or kill e slave because na e go suffer-am. And if the slave die after one or two days, person fit no know whether na the beating kill the slave or na another thing. So, if the slave die after one or two days, they no go kill e master.—Ex 21:20, 21.
(Exodus 21:22, 23) “If two men de fight and they hit woman wey get belle and e born before the time wey e suppose born, if the pikin no die, the person wey hit her go pay for the damage wey the husband of the woman go charge-am; and e must pay-am through the judges. 23 But if the pikin die, then you must use life pay for life,
lvs 95 ¶16
Life Dey Important to You as E Dey to Jehovah?
16 The life of everybody dey important to Jehovah. Even pikin wey still dey inside belle dey special to Jehovah. For the Law wey God give Moses, e talk say if person hit any woman wey get belle by mistake, and the woman or the pikin inside e belle die, Jehovah go judge that person as person wey don kill. This one mean say, even if this thing happen by mistake the person must use e life pay. (Read Exodus 21:22, 23.) Even pikin wey still dey inside belle, God de see-am as person. Since you don know this one, how you think say Jehovah de feel when person remove belle? How you think say e de feel as e de see the plenty pikin them wey people de abort every year?
(Exodus 21:28, 29) “If bull use e horn attack person and the person die, they must stone the bull until e die and they no go chop-am; but make wuna no punish the owner. 29 But if na so this bull de always do and they don warn the owner but e no control the animal, and the animal kill person, they go stone the bull till e die and still kill the owner.
w10 4/15 29 ¶4
Jehovah Want Make You Protect Yourself and Other People
The Law still talk about wetin they go do to animal wey attack person. If bull attack and kill person, the owner go kill the bull to protect other people. When the owner kill the animal, na big money e loss because e no fit chop-am or sell-am to other people. But what if the owner of the bull no control-am after e wound person? If that bull later kill person, they go kill the bull and still kill the owner. This law go don make person wey no like to control e animal, think twice.—Ex. 21:28, 29.
Fine-Fine Things Wey You See for Bible
(Exodus 21:5, 6) But if the slave no gree go and de talk say, ‘I love my master, my wife and my pikin them; I no want make my master free me,’ 6 e master must bring-am come for front of the true God. Then the master go make the slave stand for door or door post, and e go use big needle put hole for the slave ear, and the slave go be e own forever.
w10 1/15 4 ¶4-5
Why E Dey Important Make We Give Our Life to Jehovah?
4 For person to give Jehovah e life, no be just promise for mouth na serious thing. But how we fit gain when we give our life to Jehovah? For example, make we think about wetin person fit gain when e make promise to another person and do wetin e promise. The first example na when we and person na friend. If we want really enjoy our friendship with another person, we must de do wetin go show say we be better friend. This one mean say we go make sure say nothing spoil our friendship. We go de show our friend say we love-am. Two people wey Bible talk say they be better friend na David and Jonathan. Them even make agreement say their friendship go last forever. (Read 1 Samuel 17:57; 18:1, 3.) For our time, to see friends wey love each other like David and Jonathan no easy. But many people wey their friendship de last, na people wey really de do their best to make sure say nothing spoil their friendship.—Prov. 17:17; 18:24.
5 The Law wey Jehovah give Israel people still talk about another way wey people de gain when they make promise. If slave want continue de stay with e master because the master de treat-am well, e go make agreement with e master say e go be e slave forever. The Law talk say: “If the slave no gree go and de talk say, ‘I love my master, my wife and my pikin them; I no want make my master free me,’ e master must bring-am come for front of the true God. Then the master go make the slave stand for door or door post, and e go use big needle put hole for the slave ear, and the slave go be e own forever.”—Ex. 21:5, 6.
(Exodus 21:14) If person over vex for another person sotey e kill-am and no be by mistake, wuna must kill this person even if na for my altar wuna go go take the person.
it-1 1143
Horn
Wetin Bible talk for Exodus 21:14 fit mean say even if na priest kill person wey no be by mistake, the priest must die. And say even if person go hold the horn them for altar when e kill person, e must die because no be mistake e use kill the person.—Compare 1Ki 2:28-34.