LESSON 28
Show Say You Love Wetin Jehovah and Jesus Don Do for You
When your friend give you one fine gift, how you de feel? E dey clear say e de make you happy and you want show your friend say you like-am as e give you the gift. Jehovah and Jesus don give us the best gift wey we fit ever get. Wetin be this gift and how we fit show say we like the gift?
1. Wetin be one way wey we fit show say we love wetin God and Jesus don do for us?
Bible promise say “anybody wey e continue to get faith for [Jesus]” fit live forever. (John 3:16) Wetin e mean to get faith? This one mean say we need to do something more than just to believe for Jesus. We still need to show our faith with the kind thing wey we de choose and de do. (James 2:17) When we show our faith with wetin we de do and talk, this one go make us be tight friends with Jesus and e Papa, Jehovah.—Read John 14:21.
2. Which special occasion de help us to show say we love wetin Jehovah and Jesus don do for us?
The evening before Jesus die, e tell e disciples another way wey them fit show say they love wetin e don do for them. E tell them make they come together for one occasion wey Bible call “the Lord’s Evening Meal,” and they still de call-am the Memorial of the death of Christ. (1 Corinthians 11:20) Jesus be want make e apostles and all true Christians remember say e give e life for us. So e command them say: “Make wuna de do this one to remember me.” (Luke 22:19) When you go the Memorial, you de show say you like the strong love wey Jehovah and Jesus get for us.
LEARN MORE THINGS
Learn other ways wey you fit show say you love the strong love wey Jehovah and Jesus don show for us. Learn why the Memorial of the death of Christ really dey important.
3. Wetin we fit do to show say we love wetin Jehovah and Jesus don do for us?
Think-am say person save your life from danger. You go just forget wetin the person do for you? Or you go look for ways to show the person say you like wetin e don do for you?
Jehovah don really save us. Read 1 John 4:8-10, and talk about this questions:
Why the death of Jesus na special gift?
How you de feel about wetin Jehovah and Jesus don do for you?
How we fit show say we love wetin Jehovah and Jesus don do for us? Read 2 Corinthians 5:15 and 1 John 4:11; 5:3. After you don read each scripture, talk about this question:
From the Bible verse wey you don read, wetin we fit do to show say we like wetin Jehovah and Jesus don do?
4. Follow the example of Jesus
Another way to show say we love wetin Jehovah and Jesus don do for us na to follow the example of Jesus. Read 1 Peter 2:21, and talk about this question:
How you fit really follow the example of Jesus?
Jesus love the Word of God, e preach the good news, and e help other people
5. Make you go the Memorial of the death of Jesus
If you want see wetin happen for the first time wey Jesus start the Lord’s Evening Meal, read Luke 22:14, 19, 20. Then talk about this questions:
Wetin happen for that Lord’s Evening Meal?
Wetin the bread and the wine stand for? —Check verse 19 and 20.
Jesus want make e disciples de do the Memorial one time every year for the day wey e die. Na wetin make Jehovah Witness people de gather together to do the Memorial every year just as e command us make we de do-am. To learn about this important meeting, play the VIDEO. Then talk about the question for under.
Wetin de happen for Memorial?
The bread and the wine stand for something. The bread stand for the perfect body of Jesus wey e sacrifice for us. The wine stand for e blood
SOME PEOPLE DE TALK SAY: “The only thing wey you fit do make God save you na to believe in Jesus.”
How you fit use John 3:16 and James 2:17 to show say person go need to do more?
WETIN THIS LESSON TEACH
We de show say we love wetin Jesus don do for us as we de show faith for Jesus and go the Memorial of e death.
Wetin You Don Learn
Wetin e mean to show faith for Jesus?
How you go show say you like wetin Jehovah and Jesus don do for you?
Why e dey important make we de go the Memorial of Jesus death?
LEARN OTHER THINGS
Wetin the death of Christ de move us to do?
Learn more about faith and how we fit show say we get faith.
“Show Say You Get Faith for the Things Wey Jehovah Don Promise” (The Watchtower, October 2016)
From the story wey the title na “I De Feel Say I Dey Clean, I Dey Alive, and Complete” see how the life of one woman better when e learn how e fit gain from the death of Jesus Christ.
“Bible De Help People Change Their Life” (The Watchtower, August 1, 2011)
Learn why na only small number of people de chop the bread and de drink the wine for Memorial.