Got bol Kameim Enjol Mambnem Aijep Karkar Endel

1-2. (a) Kenem enjol walem bol nalmal ding nameimen? (b) Nawal pende kenem enjol bol ding mal esmen?

JOHOVA erkelnge nim se yuwei a olom pemili kerma ende, kanka mem senge olom lotu erngonjup bar tuwal won, e olom bol kamonjup enjol millien puli pra tuwal meim eri. (Dan. 7:​9, 10) Kenem enjol ne buro pismen kunum, nalmal enjep kenem bol ding mal nameim buro pismen. Ende embe mal, enjol walem kanan keswei molo kenem kol meimen e ngom. (Jop 38:​4, 7) Enjep dongal kerma wei pa kenem ngonom. Enjep mambnem dulto karkar ere kuru meim.—Luk 9:26.

² Kenem sin alamb bol ding mal ma, weieri kenem enjol bol ding mal nameimen ba wal pende ding mal esmen. Ende embe mal, Johova mambnem ka pende paim enjol walem karkar esim kenem esmen eri. Enjol walem priari meim mal kenem priari meimen. Enjol dingding ne kangjep paim, mambnem aijep jeljel paim, ala Johova konganem jeljel esim, kenem pra embe esmen eri. Ala wal ende, enjol walem bol ding mal esmen e, wal porpor Ersem Ye lotu erngomon.—1 Pita 1:12.

3. Johova bol kamonjup enjol walem bol kenem nawal duwom enamen?

³ Wusngam puli kenem enjol walem kin ding mal meimen, embe pile kenem erdongal enambe enjep kin wal kerma pende duwom enamen eri. Yu duwom yipe enamen bar, Johova bol kamonjup enjol walem molmene kele, alamb kanka kane, akilgi ne, ombol erkerambe kongrikeisen kuru senda ne esim omukro, nalmal karkar enamen mal kanamen.

ENJOL WALEM MOLMENE KESIM

4. (a) Enjol walem molmene kesim nalmal tanim? (b)  Nalende enjol walem molmene mem sim? (Buk Song 89:7)

⁴ Johova bol kameim enjol walem molmene mem karkar esim. Weieri enjep wal puli pilkane esim, dongal kerma paim, bunuman kapaim ba Johova yu dom kunum kunum karkar esim. (Sng. 103:20) Enjep Johova kongan ende ngonom esim kunum, enjep enjep dongal kerma paim ne kangjep ambil min nakesim, alamb enjep kangjep kanam moma wal kerma ne napisim. Kunum kunum kapile molo Johova kongan ngonom esim.a (Stt. 32:​24, 29; 2 Kin. 19:35) Kongan esim bar Johova mongse kangem kerma sinda nepisim. Nalende enjol walem molmene wei kesim? Nalenem, enjep Johova kanka kane olom bol molmene wei kesim.—Buk Song 89:7 gere.

5. Enjol ende yune aposol Jon erkun erim kunum, molmene mem nalmal tanim? (Piksa pra kane.)

⁵ Wal ende min wom kunum enjol ende, molmene mem tanim yu bolom omukro kanamen. Kongar 96 C.E. kunum, enjol ende kangem nakanmen, wur kumbanj mal wusngama wal jel mal ende tane aposol Jon ngom. (Rev. 1:1) Jon wal wur kumbanj mal kanim bar nalerim? Olom enjol e lotu erngonal ne erim. Ba, Got bol kamom enjol e wamnam nim, “Embe nandel! Pane embe nim: Embe wei nandel! Na kongan ye ende nim na angnem man bol ding mal . . . Got mongse lotu erngondol!” (Rev. 19:10) Yu embe nim molmene wei kel nim! Enjol e kangem ambil min kerambe kangem kerma sinal ne napim. Olom wamnam aposol Jon nengo Johova mongse lotu erngondol panim. Ala ding kunum Jon wal ei mal nakanim. Weieri enjol e Johova konganem kunum kanan erim dongal kerma pa Jon ngom, ba olom molmene wei kele na, nim kongan ding ye panim. Jon tuwa semom kunum enjol e yu nengo erkun enal ne erim, ba yu omblombol nanim. Enjol e mambnem ka karkar ere yu nim. Olom pilkane erim Jon peng mene kem nalerim, wur kumbanj mal kanim bar malmal ere embe erim.

6. Enjol walem molmene kesim mem kenem nalmal karkar enamen?

⁶ Kenem enjol molmene kesim mem nalmal karkar enamen? Kenem pra Johova konganem ende erpe woka pumdal, kenem kenem kangem nom sinamen ne nanamen. (1 Kor. 4:7) Ala wal ende, kenem Johova konganem kunum kanan esmen, ala kongan pende esmen ga ende enam kaple nanem ne napisamen. Kun paim kenem Johova konganem puli enjin dal, molmene wei kele kangem napaim alamb mal moramen. (Luk 9:48) Enjol walem esim mal, kenem alamb ende pakeronamen. Kenem kenem kangem nom sinamen ne nanamen.

7. Ende pilsinam yu nengo erkun enamen ne enjin dal, nalmal molmene mem taninamen?

⁷ Pilgi ding angjen ambanjen man mo, ngaljen man yu nengo erkun enamen ne pinjin dal—molmene mem taninamen. Kenem yu dongal ne ende ngo erkun enamen. Ba enjol mambnem ka karkar ere yune Jon ngo erkun erim mal, yu ninamen bar erkelpe enjep kes pilninam kanpol tonamen. Ala kenem molsino alamb ende ngomon ne napinjin dal, pilsinam yu Baibel a-meim ne ngonamen kunum, molmene kele mambnem ka karkar enamen.—Kol. 4:6.

ENJOL WALEM ALAMB KANKA KANIM

8. (a)  Luk 15:10 taninde pilkane esmen, enjol walem alamb kanka kanim nalmal tanim? (b) Baibel yu neori kesmen bar enjol walem, kongan nalmal ere kenem pakerom? (Garwom piksa kane.)

⁸ Enjep alamb kanka kanim. Sin kerma ende enem alamb kumbol to akronom kunum—enjol walem kawei pisim, e embe mal sipsip ende seyem Johova bol wonom mo, ende nomolpa enem bar wal pende erkun ere seyem yuwei a wonom kunum, kenem kapismen eri. (Luk 15:10 gere.) Enjol walem Got Gapman-yu neori kesmen bar, kumbol weingo kongan esim. (Rev. 14:6) Enjep alamb ende, meim bar kun pu Baibel yu neori nakesim ba, enjol kol taninambe pablisa walem pu, Johova ye nalmal duwom erkanal ne pisem alamb meim bar pum. Enjol mambnem embe enjip dungola nakamen. Johova wusngam pende karkar ere embe enem eri—e olom murmulom dongal wusngama—kongan ga pakerondo alamb yu pisam ne kapile meim bar pum. (Apo. 16:​6, 7) Ba, Baibel yu neori kesmen kunum enjol walem kongan kerma ere, kenem pakerom. Embe pile, kenem Baibel yu ka neori keramen kunum, enjol walem kenem pakeronam ne pilgi wei ninamen.—Boks a yu pengem “Yane Ninjip Pundom Ngom,” pane paim kane.b

9. Enjol walem alamb kanka kanim mem, kenem nalmal karkar enamen?

⁹ Enjol walem alamb kanka kanim mem, kenem nalmal karkar enamen? Ende kongrikeisen a oiro sijel kenjip, ala siyem nim paninambe pisamen kunum, enjol walem esim mal kawei pisamen. Siyem ninjip alamb kapane, olom kanka kanmen mem taninamen. (Luk 15:​4-7; 2 Kor. 2:​6-8) Ala wal ende enjol esim mal, Baibel yu kumbol weingo neori keramen. (Ekl. 11:6) Enjol walem kenem Baibel yu ka neori kesmen bar pakerom mal, kenem pra wusngam pende kansi pilgi ding angjen ambanjen man, Baibel yu neori kesim bar pakeronamen eri. Ende embe mal, pablisa kolnga ende Baibel yu neori kera bar pakeronamen. Ala kunum pende ne, angjen ambanjen man tuwa seim na keswos nganja paim ga, pakeropo Baibel yu neori keram eri.

10. Sara bol wal min wom bar kenem nawal duwom esmen?

¹⁰ Wal pende min wo erkelde, Johova konganem puli enamen kaple narim dal, nal enamen? Kenem wusngam pende kansi, enjol walem bol tapro Baibel yu neori kesmen kongan enamen ne enamen. Pilgi ding ambanjen ende India meim kangem Sara,c olom bol wal min wom mal omukro kandpe. Olom kongan painia erim kongar 20-poro wopungo bulto, kes kerma ende si kol punda kaple narim wur eri pamom. Pilkane esmen olom kumbol ombun keswei sim. Ba pilgi ding angam ambam man kanka mem tane olom pakeronjup, ala Baibel kunum kunum gerim bar erkelnge bunuman dulto si kapile mom. Olom wusngam kol ende kansi Baibel yu neori kera pam. Olom ami nemol pepe bora kaple narim, telepon a mongse Baibel yu neori kera kaple erim. Embe pile, olom yem pu kanja ga telepon a yu nengom, ala yu nengom ga, alamb pende yuwei pisam ne kapinjip alamb meim eri pane olom ngonjup. Embe erim bar nawal kamin wom? Oll pende tuwalto Sara yu duwom erngonda alamb 70-poro monjup—olom porpor yu duwom erngonda kaple narim! Embe pile ga pende omukro kongrikeisen a ga monjup yu duwom erngoya nim. Yu duwom enjip ga puli, yipe kongrikeisen make paim bar wom. Pilgi ding angjen ambanjen man pende Sara bol ombun ding mal pande, ombol ere Baibel yu neori keram ne esim bar, enjol walem enjep pakeronam kawei pisim!

ENJOL WALEM AKILGI NIM MEM TANIM

11. Got bol kamonjup enjol akilgi wei ninjip mem nalmal taninjip?

¹¹ Kenem akilgi ninamen mal, Got bol ka monjup enjol ta kawei nim. Kongar tausen puli tuwalto enjep akilgi ne mambnem dulto karkar ere, lo tokele mambnem kes enjip bar tuwal napunjup. Seten na enjol pende, Got bulngo konganem ere ere enjip opyem ere sikenjip, enjep kanjip eri. (Stt. 3:1; 6:​1, 2; Jut 6) Baibel taninde pilkane esmen, Got bol kamom enjol ende, Got yu tokem enjol ende dongal kerma pam bol kunum puli nganmal erim padom. (Dan. 10:13) Ala wal ende, Adam na Iv kunum wo piwonom, enjol walem kanim alamb apal eri, kapile Johova lotu wei erngom. Wal embe mal min wonom ba Johova bol kameim enjol kapile Johova konganem kunum kunum kumbol weingo esim. Enjep pilkane esim kunum kun sende, mambnem dulto nasim alamb Got to porne sikera.

12. Nawal kenem pakerondo akilgi ninamen?

¹² Enjol walem akilgi nim mem kenem nalmal karkar enamen? Enjol walem bol wal min wom mal, kenem bol opyem ere wal napaim mal enam eri. Ba enjep pisim mal, kunum kun sende mambnem kes porpor paim Got to sikera ne pilgi ninamen. Embe pile, Got kin kamonjup enjol enjip mal, kenem “kongan ka pende esmen wakro sinakeramen.” (Gal. 6:9) Ala Got yu dongal ne enem pakerono akilgi ninam padom. (1 Kor. 10:13) Embe pile, kenem yane ne Johova ngopo murmulom dongal wusngama pakerondo, wimuk wamnam nane kapile moramen. (Gal. 5:22; Kol. 1:11) Johova bol pilgi weine kisal nagorol. Johova kunum kunum nim pakero dongal ngonda.—Hib. 13:6.

ENJOL WALEM KONGRIKEISEN PAKERONAMBE JENGIMB NARO KASEIM

13. Nal kongan kerma ende yipe kunum pordom bar, enjol walem esim? (Matyu 13:​47-49)

¹³ Yipe kunum pordom bar, Johova enjol walem kongan kawei wei ende ngom. (Matyu 13:​47-49 gere.) Alamb millien puli, mal tambem yemyem sepunom bar Got yu ka pisam kapisim. Pende ombol ere wo Kristen ka ende meim, ala pende embe nasim. Enjol walem Johova kongan ende ngom esim e, enjep pu mambnem dulto esim alamb meim bar, “alamb kes tuwal meim sinam.” Enjol kongan embe enam pakero kelde kongrikeisen kantawol enambe jengimb namoro ka senda. Yu embe nimen, ga pende kenem bol makenaro sepjip ga, ala yem nawonam ne napisamen, mo kongrikeisen tuwalto ombun ende min nawonda pananimen eri. Ba pilkane esmen, enjol walem kongan ombol wei ere erkerambe kongrikeisen jengimb namoro ka senda ne esim.

14-15. Enjol walem kongrikeisen jengimb namoro ka senda ne esim mem, kenem nalmal karkar enamen? (Piksa pra meim kane.)

¹⁴ Enjol walem kongrikeisen jengimb namoro ka senda ne esim mem, kenem nalmal karkar enamen? Kenem ombol wei ere Johova bol senomon mem kantawol ka ere, erkelpe dongal panda ne enamen. Embe enamen Johova kanka kanem alamb bol tapro, wal ende erkelpe olom bol senomon mem tokes moksa wal tuironamen, embe erkelpe kongrikeisen ka sende jengimb namora. (Sng. 101:3) Ala pilgi ding ga pakeropo, Johova bol seno kameim mem ambilgi ninam. Ende embe mal, pilgi ding angjen mo ambanjen ende sin kerma ende erim paninambe pinjin dal, nal enamen? Olom kanka kanmen mem erkelde, nim pu elda walem kane nenga ninamen. Olom elda walem ne nangom dal, kenem kenem pu nengonamen. Pilgi ding angjen mo ambanjen Johova bol senom mem tokes mokum, ala wamnam pake sinda kapismen!—Jems 5:​14, 15.

¹⁵ Wandil wei ende sin kerma erim dal, olom kongrikeisen a oiro sijel keram. Wal embe min wonda kunum oiro sijel kenjip ga kin “tap naronamen.”d (1 Kor. 5:​9-13) Mambnem embe enamen bar kongrikeisen jengimb namora. Ala wal ende oiro sijel kesim ga bol tapnaromon bar enjep pilngo kanka mem tanimen. Kenem mambnem embe enamen erkelde, enjep bunuman dulto si ala seyem Johova bol wonam. Enjep ala seyem kongrikeisen a wonjup dal, kenem kapisamen, Johova kapisa ala enjol walem kawei wei pisam eri.—Luk 15:7.

16. Nal wusngam pende nim ombol ere, enjol walem mambnem aijep karkar endel?

¹⁶ Johova kankere enjol walem kongan nalmal esim duwom erkane, kongan ai esmen bar kawei wei pisamen! Enjep mambnem aijep ka pende paim kenem karkar enamen, e embe mal, molmene mem, alamb kanka kanim mem, akilgi nim mem, ala ombol ere erkerambe kongrikeisen jengimb namoro ka senda nepisim mem. Johova bol kameim enjol mambnem aijep karkar enjin dal, kenem pra Johova pemili aiyem tuwal molo, olom lotu aimanj aimanj erngo mol punamen.