Senesi

18 Hili ʼaia, neʼe ha ia Sehova+ kia ia ʼo ovi ki te ʼu fuʼu ʼakau lalahi ʼo Mamele,+ neʼe heka ʼi te huʼaga ʼo tona fale la ʼi te temi ʼae neʼe sisiga ai te laʼa. 2 Neʼe hiki ake ʼona mata pea neʼe sio ki te tutuʼu mamaʼo mai ʼa he ʼu tagata ʼe toko tolu.+ ʼI tana sio ʼaia kia natou, neʼe lele ʼo fakafelaveʼi kia natou, pea mo tulolo ki te kele. 3 Pea neʼe ina ui: “Sehova, fakalelei siʼou loto, kapau ʼe ke ʼofa ia au, fakalaka age muʼa io ʼoku. 4 Fakalelei siʼou loto, ke ʼaumai he moʼi vai ke fufulu ai ʼokotou vaʼe,+ pea kotou malolo muʼa ʼi te lalo fuʼu ʼakau ʼaeni. 5 Ke au ʼaumai he moʼi pane ke kotou toe maʼu ai foki hokotou malohi,* he neʼe kotou ʼomai ki heni, ki takotou tagata faifekau. Pea hoki hoko atu leva tokotou fagona.” Neʼe natou ui: “ ʼIo, ke ke fai te meʼa ʼae kua ke ui mai.”

6 Neʼe alu fakavilivili ai ia Apalahamo ki te fale la kia Sala, pea neʼe ina ui age: “Foimo alu ʼo toʼo he ʼu fua* falena lelei ʼe tolu, ʼo ke natu pea ke fai he ʼu foʼi pane.” 7 Pea neʼe lele leva ia Apalahamo ʼo filifili ʼi tana faga manu he vitulo kei mui, ʼe kano malū mo kano lelei. Neʼe ina foaki age ki tana tagata faifekau ke ina teuteuʼi fakavilivili. 8 Neʼe ina toʼo leva te potilo, mo te huʼa pipi pea mo te vitulo kei mui ʼae neʼe ina teuteuʼi, ʼo ina tuku ki ʼonatou muʼa. Pea neʼe tuʼu leva ʼi ʼonatou tafa, ʼi te lalo fuʼu ʼakau kae natou lolotoga kakai.+

9 Pea neʼe natou ui age kia ia: “ ʼE ʼifea tou ʼohoana ko Sala?”+ Neʼe ina tali age: “Koʼe age ʼi te fale la.” 10 Neʼe ui leva e he tahi ia natou: “ ʼI te taʼu ka haʼu, ʼi te temi pe ʼaeni, ʼe au toe liliu moʼoni mai anai, pea ʼe maʼu anai e tou ʼohoana ko Sala hana tamasiʼi tagata.”+ Kae neʼe fakalogo mai e Sala ʼi te huʼaga ʼo te fale la, ʼae neʼe lituʼa mai ki ai te tagata. 11 Neʼe kua vaivavai ʼosi ia Apalahamo mo Sala,+ ʼo mole kei feala ai kia Sala ke maʼu fanau.*+ 12 Koia neʼe kata ai ia Sala, ʼo ina ui ʼi tona loto: “Kua au finematuʼa, pea kua matuʼa siʼoku ʼaliki. ʼE au maʼu moʼoni anai koa te fiafia ʼaia?”+ 13 Neʼe ui leva e Sehova kia Apalahamo: “He koʼe neʼe kata ia Sala? He koʼe neʼe ina ui: ‘ ʼE au fanauʼi moʼoni anai koa he tamasiʼi kae kua au finematuʼa?’ 14 ʼE faigataʼa koa la he meʼa kia Sehova?+ ʼI te taʼu ka haʼu, ʼi te temi pe ʼaeni, ʼe au toe liliu mai anai, pea ʼe maʼu anai e Sala hana tamasiʼi tagata.” 15 Neʼe mataku ai ia Sala, ʼo ina ui: “Kailoa, neʼe mole au kata!” Kae neʼe ui age e te ʼAtua: “Neʼe ke kata moʼoni.”

16 Ki muli age, neʼe tutuʼu ake te ʼu tagata pea neʼe natou olo ai. Neʼe alu ia Apalahamo mo natou, pea neʼe sisio te ʼu tagata ʼaia ki Sotoma.+ 17 Neʼe ui e Sehova: “ ʼE au fufu anai koa kia Apalahamo te meʼa ʼae ka au fai?+ 18 ʼE liliu moʼoni anai ia Apalahamo ko he puleʼaga lahi mo malohi, pea ʼe maʼu tapuakina* anai te ʼu puleʼaga fuli ʼo te kele ʼaki ia ia.+ 19 Koteʼuhi neʼe au filifili ia ia ke feala hana fakatotonu ki ʼona foha mo tona loto fale ke natou mulimuli ki te ala ʼo Sehova, ʼo natou fai te meʼa ʼae ʼe totonu,+ ke feala ai kia Sehova hana fakahoko te meʼa ʼae neʼe ina fakapapau ʼo ʼuhiga mo Apalahamo.”

20 Neʼe ui leva e Sehova: “ ʼE au logo ki te lauga leʼo lahi ʼa te hahaʼi ʼo ʼuhiga mo Sotoma mo Komola,+ pea kua lahi ʼaupito te agahala ʼo te ʼu kolo ʼaia.+ 21 ʼE au hifo anai ʼo vakaʼi pe ʼe hage ʼanatou aga ko te ʼu kalaga ʼae kua kaku mai kia te au. Pea kapau ʼe mole koia, ʼe au iloʼi pe anai.”+

22 Neʼe mavae leva te ʼu tagata mai ai ʼo olo ki Sotoma, kae neʼe nofo ia Sehova+ mo Apalahamo. 23 Pea neʼe fakaovi age ia Apalahamo, ʼo ina ui: “ ʼE ke pulihi moʼoni anai koa te tagata faitotonu mo te tagata agakovi?+ 24 Kapau la ʼe maʼu ʼi te kolo he ʼu tagata faitotonu ʼe toko 50, ʼe ke pulihi anai koa te hahaʼi ʼo te kolo ʼaia? ʼE mole ke fakamolemole anai koa kia natou, ʼuhi ko te ʼu tagata faitotonu ʼe toko 50 ʼae ʼe nonofo ʼi ai? 25 ʼE mole feala anai ke ke matehi fakatahi te tagata faitotonu mo te tagata agakovi, ke tatau ai te ikuʼaga ʼo te tagata faitotonu pea mo te tagata agakovi!+ Kailoa, ʼe mole feala ia.+ ʼE mole fai anai koa e te Tuʼi Fakamau ʼo te kele katoa te meʼa ʼae ʼe totonu?”+ 26 Neʼe ui leva e Sehova: “Kapau ʼe au maʼu ʼi te kolo ko Sotoma he ʼu tagata faitotonu ʼe toko 50, ʼe au fakamolemole anai ki te hahaʼi fuli ʼo te kolo ʼaia ʼuhi ko natou.” 27 Kae neʼe toe ui age e Apalahamo: “Fakalelei mai Sehova, kae tuku ke hoko atu taku palalau kia te koe, logo la ko au ʼe ko he tagata efu. 28 Kapau la ʼi te ʼu tagata faitotonu ʼaia ʼe toko 50, ʼe puli ai he toko nima, ʼe ke maumauʼi anai koa te kolo katoa ʼuhi ko te toko nima ʼaia?” Neʼe ina tali age: “ ʼE mole au maumauʼi anai te kolo mo kapau ʼe au maʼu ʼi ai he toko 45.”+

29 Kae neʼe ina toe ui age kia te ia: “ ʼE feafeaʼi la mo kapau ʼe maʼu ʼi ai he toko 40?” Neʼe ina tali age: “ ʼE mole au maumauʼi anai ʼuhi ko te toko 40 ʼaia.” 30 Kae neʼe ina hoko atu: “Fakalelei siʼou loto Sehova, ʼaua naʼa ke ita,+ kae tuku ke hoko atu taku palalau. ʼE feafeaʼi la mo kapau ʼe maʼu pe ʼi ai he toko 30?” Neʼe ina tali age: “ ʼE mole au maumauʼi anai mo kapau ʼe au maʼu ai he toko 30.” 31 Kae neʼe ina toe hoko atu: “Fakalelei mai Sehova, kae tuku ke hoko atu taku palalau kia te koe. ʼE feafeaʼi la mo kapau ʼe maʼu pe ʼi ai he toko 20?” Neʼe ina tali age: “ ʼE mole au maumauʼi anai ʼuhi ko te toko 20 ʼaia.” 32 Neʼe ina ui leva: “Fakalelei siʼou loto Sehova, ʼaua naʼa ke ita, kae tuku pe ke au toe palalau tuʼa tahi atu. ʼE feafeaʼi la mo kapau ʼe maʼu pe ʼi ai he toko hogofulu?” Neʼe ina tali age: “ ʼE mole au maumauʼi anai ʼuhi ko te toko hogofulu ʼaia.” 33 ʼI te ʼosi palalau ʼa Sehova mo Apalahamo, neʼe mavae leva+ pea neʼe toe liliu ia Apalahamo kio ia.