Senesi

23 Pea neʼe mate leva ia Sala ʼi tona taʼu 127.+ 2 Neʼe mate ia Sala ʼi Kiliate-alepa,+ ʼae ko Hepelone,+ ʼi te fenua ʼo Kanaane,+ pea neʼe putu ia Apalahamo mo tagi. 3 Hili ʼaia, neʼe mavae leva mai te koga meʼa ʼae neʼe tuku ai te sino ʼo tona ʼohoana, ʼo alu ʼo palalau ki te ʼu foha ʼo Heti.+ Neʼe ina ui age kia natou: 4 “Ko au ko he matapule ʼe maʼuli ʼi te lotolotoiga ʼo koutou.+ Koia, fakalelei siʼokotou loto, kae kotou fakatau mai kia au he moʼi kele ke au ʼavaifo ai toku ʼohoana.” 5 Neʼe tali age e te ʼu foha ʼo Heti kia Apalahamo: 6 “Siʼoku ʼaliki, ke ke fakalogo mai. Kia matou, ko koe ko he pule neʼe filifili e te ʼAtua.*+ Ke ke tuku te sino ʼo tou ʼohoana ki he fale maka pe ʼi ʼomatou fale maka ʼae ʼe lelei tukupau. ʼE mole he tahi ia matou ʼe ina fakafisi atu anai tona fale maka, ke tuku ai te sino ʼo tou ʼohoana.”

7 Koia neʼe punou ai ia Apalahamo ia muʼa ʼo te hahaʼi ʼo te fenua, ia te ʼu foha ʼo Heti,+ 8 pea neʼe ina ui age kia natou: “Kapau ʼe kotou* fakagafua mai ke au ʼavaifo toku ʼohoana, kotou fakalogo mai. Kotou kole kia Efelone, te foha ʼo Tesokale, 9 ke ina fakatau mai kia au te ʼana ʼo Makepela, ʼae ʼe ina maʼu pea ʼe tuʼu ʼi te tuʼakoi ʼo tona moʼi kele. Ke ina fakatau mai kia au ʼi ʼokotou muʼa, pea ʼe au foaki katoa anai tona totogi.+ Pea ʼe au maʼu ai anai hoku moʼi kele ke au ʼavaifo ai toku ʼohoana.”+

10 Kae neʼe heka pe ia Efelone ʼi te lotolotoiga ʼo te ʼu foha ʼo Heti. Koia neʼe tali age e Efelone, te tagata Heti kia Apalahamo kae logo ki ai te ʼu foha ʼo Heti, pea ia muʼa ʼo natou fuli ʼae neʼe hu ʼi te matapa ʼo tona kolo:+ 11 “Kailoa siʼoku ʼaliki. Ke ke fakalogo mai. ʼE au foaki atu te moʼi kele pea mo te ʼana ʼae ʼe tuʼu ʼi ai. ʼE au foaki atu ia muʼa ʼo taku hahaʼi. Alu ʼo tuku ki ai te sino ʼo tou ʼohoana.” 12 Neʼe punou ia Apalahamo ia muʼa ʼo te hahaʼi ʼo te fenua, 13 pea neʼe ina ui kia Efelone kae logo ki ai te hahaʼi: “Fakalelei siʼou loto, kae ke ke fakalogo mai. ʼE au foaki katoa atu anai te totogi ʼo te moʼi kele. Ke ke tali te siliva ʼaia, ke feala ai haku ʼavaifo toku ʼohoana ʼi ai.”

14 Neʼe ui e Efelone kia Apalahamo: 15 “Siʼoku ʼaliki, ke ke fakalogo mai. Ko te totogi ʼo te moʼi kele ʼaia ʼe ko sikele* siliva ʼe 400, kae ʼe mole hona ia ʼuhiga. Koia alu ʼo ʼavaifo ai tou ʼohoana.” 16 Neʼe mahino ia Apalahamo ki te ʼu palalau ʼa Efelone, koia neʼe ina fua ai te mamafa ʼo te siliva ʼae neʼe ina fakaha age kae neʼe logo ki ai te ʼu foha ʼo Heti. Neʼe ko sikele* siliva ʼe 400 ʼo mulimuli ki te mamafa ʼo te siliva ʼae neʼe fakaʼaogaʼi e te hahaʼi fakatau koloa.+ 17 Neʼe fakamoʼoni ai leva ko te moʼi kele ʼo Efelone ʼi Makepela, ʼae ʼe haga ki Mamele, te moʼi kele mo te ʼana ʼae ʼe tuʼu ʼi ai pea mo te ʼu fuʼu ʼakau fuli ʼo te moʼi kele, 18 neʼe totogi e Apalahamo ia muʼa ʼo te ʼu foha ʼo Heti pea mo natou fuli ʼae neʼe hu ʼi te matapa ʼo te kolo. 19 Hili ʼaia, neʼe tuku leva e Apalahamo te sino ʼo tona ʼohoana ko Sala ʼi te ʼana ʼae ʼe tuʼu ʼi te moʼi kele ʼo Makepela, ʼae ʼe haga ki Mamele, ʼae ko Hepelone, ʼi te fenua ʼo Kanaane. 20 Koia, neʼe fakamoʼoni ai e te ʼu foha ʼo Heti kua maʼu e Apalahamo te moʼi kele mo te ʼana ʼae neʼe tuʼu ʼi ai, ke ʼavaifo ai tona ʼohoana.+