Senesi

27 ʼI te kua matuʼa leva ʼa Isaake pea mo tana mole kei lava sio, neʼe ina pauʼi tona foha lahi ko Esau+ ʼo ina ui age: “Siʼoku foha!” Neʼe ina tali age: “Ko au!” 2 Neʼe ina hoko atu: “Kua au matuʼa leva. ʼE mole au iloʼi toku ʼaho mate. 3 Koia, fakalelei siʼou loto, ke ke toʼo ʼi te lakaga ʼaeni ʼau mahafu, ia tau ʼaiʼaga nahau mo tau nahau, pea ke alu ʼo kumi mai he manu maʼaku.+ 4 Pea ke ke teuteuʼi te meʼa kai kano lelei ʼae ʼe au fia kai ai, pea ke ʼaumai leva kia au. ʼE au kai anai pea ʼe au* tapuakiʼi anai ia koe ʼi muʼa ʼo taku mate.”

5 Kae ʼi te temi ʼae neʼe palalau ai ia Isaake ki tona foha ko Esau, neʼe fakalogo mai e Lepeka. Pea neʼe alu ia Esau ʼo kapu manu, ke ina ʼaumai ai he kanoʼi manu ki tana tamai.+ 6 Neʼe ui e Lepeka ki tana tama ko Sakopo:+ “Neʼe au logo ki te ui e tau tamai ki tou tehina ko Esau: 7 ‘Ke ke ʼaumai he kano’i manu pea mo ke teuteuʼi he meʼa kai kano lelei maʼaku. Ke au kai pea ke au tapuakiʼi ia koe ia muʼa ʼo Sehova, ʼi muʼa ʼo taku mate.’+ 8 Pea ʼi te temi nei, siʼaku tama, ke ke fakalogo lelei mai pea mo ke fai te ʼu meʼa ʼae ʼe au fakatotonu atu.+ 9 Fakalelei siʼou loto, kae ke ke alu ʼo toʼo mai ʼi te faga manu he ʼu tao ʼe lua ʼe kei mui pea mo sino lelei, ke au teuteuʼi ʼaki he meʼa kai kano lelei ʼe fia kai ki ai tau tamai. 10 Pea ke ʼave leva ke kai e tau tamai, pea ke ina tapuakiʼi ia koe ʼi muʼa ʼo tana mate.”

11 Pea neʼe ui e Sakopo ki tana faʼe ko Lepeka: “Ko toku tehina ko Esau ʼe fulufulu,+ kae ʼe mole au fulufulu au. 12 ʼE feafeaʼi mo kapau ʼe fāfā mai taku tamai?+ ʼE mahino papau ia, ʼe ina ui anai ʼe au manukiʼi ia ia, pea ʼe ko he malaʼia anai ka hoko kia au kae mole ko he tapuakina.” 13 Neʼe tali age e tana faʼe ki ai: “Siʼaku tama, ke hoko kia au te malaʼia ʼaia. Kae ke ke fai te meʼa ʼae ʼe au ui atu pea ke alu ʼo kumi mai te ʼu tao ʼae ʼe kei mui.”+ 14 Koia neʼe alu ai ʼo kumi mai mo ʼave ki tana faʼe, pea neʼe teuteuʼi e tana faʼe te meʼa kai kano lelei ʼae ʼe fia kai ai tana tamai. 15 Hili ʼaia, neʼe toʼo e Lepeka te ʼu kofu matalelei ʼo tana tama lahi ko Esau ʼae neʼe tuku ʼi te loto fale, pea neʼe ina fakatui ki tana tama muli ko Sakopo.+ 16 Neʼe ina toe ʼai mo te ʼu fulu ʼo te ʼu tao kei mui ki ʼona nima pea mo te faʼahi ʼo tona kia ʼae neʼe mole fulufulu.+ 17 Pea neʼe ina foaki leva ki tana tama ko Sakopo te meʼa kai kano lelei ʼae neʼe ina teuteuʼi pea mo he foʼi pane.+

18 Neʼe alu ai ki tana tamai pea neʼe ina ui age: “Siʼaku tamai!” Neʼe ina tali age: “Ko au! Ko ai ia koe, siʼoku foha?” 19 Pea neʼe tali age e Sakopo ki tana tamai: “ ʼE ko au ia Esau, tou foha lahi.+ Neʼe au fai te meʼa ʼae neʼe ke ui mai. Koia, fakalelei siʼou loto, ke ke tuʼu ake ʼo kai te moʼi kanoʼi manu ʼae neʼe au ʼaumai, pea ke ke* tapuakiʼi ia au.”+ 20 Pea neʼe ui age e Isaake ki tona foha: “Siʼoku foha, ʼi vave leva ʼo tau maʼu te manu!” Neʼe ina tali age: “Neʼe tokoni mai ia Sehova tou ʼAtua ke au maʼu te manu ʼaia.” 21 Pea neʼe ui e Isaake kia Sakopo: “Siʼoku foha, fakalelei siʼou loto, ke ke hoho mai muʼa ke au fāfā atu kia koe, ke au iloʼi ai pe ʼe ko koe moʼoni ia Esau toku foha peʼe kailoa.”+ 22 Neʼe hoho ai ia Sakopo ki tana tamai ko Isaake, ʼae neʼe fāfā kia ia. Hili ʼaia, neʼe ina ui: “Ko te leʼo ʼe ko te leʼo ʼo Sakopo, kae ko te ʼu nima ʼe ko te ʼu nima ʼo Esau.”+ 23 Neʼe mole ina iloʼi ia ia he neʼe fulufulu ʼona nima ohage ko te ʼu nima ʼo tona tehina ko Esau. Neʼe ina tapuakiʼi ai ia ia.+

24 Hili ʼaia, neʼe ina fehuʼi age ki ai: “ ʼE ko koe moʼoni koa toku foha ko Esau?” Neʼe ina tali age: “ ʼEi, ko au.” 25 Neʼe ina ui leva ki ai: “Siʼoku foha, ʼaumai te moʼi kanoʼi manu ke au kai, pea ʼe au* tapuakiʼi anai ia koe.” Neʼe ina ʼaumai ai pea neʼe ina kai, pea neʼe ina toe ʼaumai mo he moʼi vino ke ina inu. 26 Neʼe ui leva e Isaake tana tamai kia ia: “Siʼoku foha, fakalelei siʼou loto, ke ke hoho mai muʼa pea ke ʼuma mai kia au.”+ 27 Neʼe hoho ai ʼo ʼuma ki ai, pea neʼe fakamanumanu e Isaake ʼona kofu.+ Neʼe ina tapuakiʼi ia ia ʼo ina ui:

“Koʼeni, ko te mamanu ʼo toku foha ʼe hage ko te mamanu ʼo he moʼi kele lunaʼia neʼe tapuakiʼi e Sehova. 28 ʼOfa pe ke foaki atu e te ʼAtua moʼoni te hahau ʼo te lagi,+ mo te ʼu kele ʼae ʼe maʼuli lelei,+ mo he meʼa kai* ʼe lahi pea mo he vino foʼou.+ 29 Ke tauhi koe e te hahaʼi pea ke tulolo te ʼu puleʼaga ʼi ʼou muʼa. Ke ke pule ki ʼou tehina, pea ke tulolo te ʼu tama ʼo tau faʼe ʼi ʼou muʼa.+ Ke malaʼia ia ia ʼae ʼe ina lotokoviʼi koe, pea ke tapuakina ia ia ʼae ʼe ina tapuakiʼi koe.”+

30 Neʼe kua ʼosi tapuakiʼi e Isaake ia Sakopo. Pea neʼe liliu mai leva ia tona tehina ko Esau mai tana alu ʼo kapu manu+ kae neʼe hoki mavae atu pe ia Sakopo mai ia Isaake. 31 Neʼe ina toe teuteuʼi foki he meʼa kai kano lelei, ʼo ina ʼave ki tana tamai. Pea neʼe ina ui age: “Siʼaku tamai, ke ke tuʼu ake ʼo kai te moʼi kanoʼi manu ʼaeni neʼe au haʼu mo ia, ke feala hau* tapuakiʼi ia au.” 32 Pea neʼe fehuʼi age e tana tamai ko Isaake ki ai: “Ko ai ia koe?” Neʼe ina tali age: “Ko au ia Esau, tou foha lahi.”+ 33 Pea neʼe kamata tete malohi ia Isaake, ʼo ina ui: “Kae ko ai koa ʼae neʼe alu ʼo kapu manu pea mo ʼaumai te moʼi kanoʼi manu kia au? Neʼe kua au ʼosi kai ʼi muʼa ʼo tau haʼu, pea neʼe au tapuakiʼi ia ia, koia ʼe tapuakina moʼoni anai ia ia ʼaia!”

34 ʼI te logo ʼa Esau ki te ʼu palalau ʼo tana tamai, neʼe kalaga leʼo lahi ʼi te lahi ʼo tona mamahi, ʼo ina ui ki tana tamai: “Siʼaku tamai, ke ke toe tapuakiʼi foki pea mo au!”+ 35 Kae neʼe ina ui age ki ai: “Neʼe agakaka tou tehina pea neʼe haʼu ke ina maʼu te tapuakina ʼae neʼe tonu ke ke maʼu.” 36 Neʼe ina tali age: “ ʼE tonu aipe tona fakahigoaʼi ko Sakopo.* ʼE ko te tuʼa lua ʼaeni ʼo tana toʼo te meʼa ʼae neʼe tonu ke au maʼu.+ Neʼe ina ʼuluaki toʼo toku ʼuhiga ʼuluaki tupu,+ pea ʼi te ʼaho nei leva, kua ina toe toʼo foki toku tapuakina!”+ Pea neʼe ina hoko atu: “Pe neʼe mole ke tuku mai koa koe he tapuakina maʼaku?” 37 Kae neʼe tali age e Isaake kia Esau: “Koʼeni, kua au fakanofo ia ia ke pule kia koe,+ pea neʼe au foaki age kia ia ʼona tehina fuli ke natou liliu ko hana hahaʼi faifekau, pea neʼe au foaki age te meʼa kai* mo te vino foʼou.+ Koia, siʼoku foha, kotea la he tahi age meʼa ke au foaki atu maʼa koe?”

38 Pea neʼe ui e Esau ki tana tamai: “Siʼaku tamai, ʼe ko te tapuakina pe koa ia ʼe tahi ʼae ʼe ke maʼu? Siʼaku tamai, ke ke toe tapuakiʼi foki mo au!” Neʼe tagi leʼo lahi leva ia Esau.+ 39 Koia, neʼe ui age e tana tamai ko Isaake kia ia:

“ ʼE mole ke nofo anai ʼi he kele ʼe maʼuli lelei, pea ʼe mole ke maʼu anai te hahau ʼo te lagi.+ 40 ʼE ke maʼuli anai ki tau heleta+ pea ʼe ke kaugana anai ki tou tehina.+ Kae ʼi te temi ʼae ʼe mole kei ke lava katakiʼi ai, ʼe ke fasiʼi anai te ʼakau ʼamo ʼae neʼe ina hili ki tou kia.”+

41 Kae neʼe fehiʼa ia Esau kia Sakopo ʼuhi ko te tapuakina ʼae neʼe foaki age e tana tamai ki ai,+ pea neʼe haga ui pe e Esau ʼi tona loto: “Kua ovi mai pe te temi putu ʼae ki taku tamai.+ Hili ʼaia, ʼe au matehi anai toku tehina ko Sakopo.” 42 ʼI te temi ʼae neʼe fakaha age kia Lepeka te ʼu palalau ʼae neʼe fai e tana tama lahi ko Esau, neʼe ina fekauʼi atu aipe he tahi ke alu ʼo kumi mai tana tama muli ko Sakopo. Pea neʼe ina ui age ki ai: “Koʼeni, ʼe fia lagavaka tou tehina ko Esau kia koe pea ʼe ina fia matehi ia koe.* 43 Koia siʼaku tama, ke ke fai te meʼa ʼae ʼe au ui atu. Ke ke hola ki toku tokolua ko Lapane ʼi Halani.+ 44 Ke ke nofo ai ʼi he kiʼi temi, ʼo kaku ki te malū ifo ʼo te ita ʼo tou tehina, 45 ʼei, ʼo kaku ki te mole kei ita ʼo tou tehina kia koe, pea ke ina galoʼi te meʼa ʼae neʼe ke fai kia ia. Pea ʼe au fekauʼi anai he tahi ke alu atu ʼo kumi mai koe. ʼE mole au loto ke kolua mamate ʼi he ʼaho pe ʼe tahi!”

46 Hili ʼaia, neʼe haga ui pe e Lepeka kia Isaake: “Kua au fakalialia ki toku maʼuli ʼuhi ko te ʼu ʼofafine ʼo Heti.+ Kapau ʼe ʼohoana Sakopo mo he ʼofafine ʼo Heti, ohage ko te ʼu taʼahine ʼaeni ʼo te fenua, ʼe lelei age pe ke au mate!”+