Senesi

35 Hili ʼaia, neʼe ui e te ʼAtua kia Sakopo: “Tuʼu ake ʼo alu ki Petele+ pea ke nofo ai. Ke ke fakatuʼu ʼi ai he ʼaletale kia au, te ʼAtua moʼoni, ʼae neʼe ha kia koe ʼi te temi ʼae neʼe ke hola ai mai tou tehina ko Esau.”+

2 Pea neʼe ui leva e Sakopo ki tona loto fale pea mo natou fuli ʼae neʼe fakatahi mo ia: “Kotou toʼo kehe ʼi te lotolotoiga ʼo koutou te ʼu ʼatua matapule,+ pea mo fakamaʼa ia koutou mo fetogi ʼokotou mutuʼi meʼa, 3 pea tou olo ki Petele. ʼE au fakatuʼu anai ʼi ai he ʼaletale ki te ʼAtua moʼoni, ʼae neʼe tali mai ki ʼaku kole ʼi te temi ʼae neʼe au tuʼania ai, pea neʼe nofo mo au ʼi te ʼu potu fuli pe ʼae neʼe au alu ki ai.”*+ 4 Koia, neʼe natou foaki ai kia Sakopo te ʼu ʼatua matapule fuli ʼae neʼe natou maʼu pea mo te ʼu foʼi hau ʼae neʼe tautau ʼi ʼonatou taliga. Neʼe tanu* e Sakopo te ʼu meʼa ʼaia ʼi te lalo fuʼu ʼakau lahi ʼae neʼe ovi ki Sekemi.

5 ʼI tanatou olo, neʼe fakatupu e te ʼAtua ia te mataku ʼa te hahaʼi ʼae neʼe maʼuʼuli ʼi te ʼu kolo ʼae ʼi ʼonatou tafaʼaki. Neʼe mole natou tuli ai te ʼu foha ʼo Sakopo. 6 Pea neʼe tau leva ia Sakopo mo te hahaʼi fuli ʼae neʼe fakatahi mo ia ki Lusi,+ ʼae ko Petele, ʼi te fenua ʼo Kanaane. 7 Neʼe ina fakatuʼu ai he ʼaletale pea neʼe ina fakahigoaʼi te koga meʼa ʼaia ko Ele-petele,* he neʼe ha te ʼAtua moʼoni kia ia ʼi ai ʼi te temi ʼae neʼe hola ai mai tona tehina.+ 8 Ki muli age, neʼe mate ia Tepola,+ te fafine ʼae neʼe ina taupau ia Lepeka, pea neʼe tanu leva ia ia ʼo ovi ki Petele, ʼi he lalo fuʼu sene. Koia, neʼe fakahigoa ai ko Alone-pakute.*

9 Neʼe toe ha te ʼAtua kia Sakopo ʼi tana liliu mai Patane-alame pea neʼe ina tapuakiʼi ia ia. 10 Neʼe ui e te ʼAtua kia ia: “Ko tou higoa ko Sakopo.+ ʼE mole ke toe higoa anai ko Sakopo, kae ʼe ke higoa anai ko Iselaele.” Pea neʼe ina fakahigoaʼi leva ia ia ko Iselaele.+ 11 Neʼe hoko atu e te ʼAtua: “Ko au te ʼAtua Mafimafi.+ Ke liliu tou hakoga ʼo kaugamalie. ʼE ke liliu anai ko te tamai ʼo he ʼu puleʼaga ʼe kaugamalie,+ pea ʼe hifo mai anai mai ia koe he ʼu hau.*+ 12 ʼE au foaki atu anai te fenua ʼae neʼe au foaki kia Apalahamo mo Isaake, pea ʼe au toe foaki anai ki tou hakoga.”+ 13 Neʼe mavae leva ia te ʼAtua mai te koga meʼa ʼae neʼe palalau ai mo ia.

14 Neʼe fakatuʼu leva e Sakopo he pou ʼi te koga meʼa ʼae neʼe palalau ai te ʼAtua ki ai, neʼe ko he pou maka. Pea neʼe ina huaʼi ki ai he molaga vino pea mo he lolo.+ 15 Pea neʼe haga fakahigoaʼi aipe e Sakopo te koga meʼa ʼae neʼe palalau ai te ʼAtua ki ai ko Petele.+

16 Neʼe natou mavae leva mai Petele. ʼI tanatou kei mamaʼo mo Efata, neʼe kamata fanau ia Lasele, pea neʼe kinakina ʼaupito. 17 Kae ʼi tana mamahi fanau, neʼe ui age e te fafine faifanau: “ ʼAua naʼa ke mataku he ʼe ke toe fanauʼi anai he tahi tamasiʼi tagata.”+ 18 Pea ʼi tana logoʼi ʼae kua vave mate, neʼe ina fakahigoaʼi tana tamasiʼi ko Pene-oni,* kae neʼe fakahigoaʼi e tana tamai ko Pesamino.*+ 19 Neʼe mate leva ia Lasele pea neʼe tanu ʼi te ala ʼae ʼe alu ki Efata, ʼae ko Petelehemi.+ 20 Neʼe fakatuʼu e Sakopo he pou ʼi tona fale maka. ʼE ko te pou ʼaia ʼo te fale maka ʼo Lasele ʼo kaku mai ki te ʼaho nei.

21 Hili ʼaia, neʼe alu leva ia Iselaele ʼo fakatuʼu tona fale la ʼo mamaʼo mo te tule ʼo Etele. 22 ʼI te tahi ʼaho, ʼi te kua nofo ʼa Iselaele ʼi te fenua ʼaia, neʼe alu ia Lupeni ʼo momoe mo Pila, te fafine ʼa tana tamai, pea neʼe logo ia Iselaele ki ai.+

Neʼe maʼu e Sakopo ʼona foha ʼe toko 12. 23 Neʼe ina maʼu mo Lea ia tona ʼuluaki foha ko Lupeni,+ pea hoa ki ai ia Simeone, mo Levi, mo Suta, mo Isakale pea mo Sepulone. 24 Neʼe ina maʼu mo Lasele ia Sosefo pea mo Pesamino. 25 Neʼe ina maʼu mo Pila, te fafine faifekau ʼa Lasele ia Tane pea mo Nefetali. 26 Neʼe ina maʼu mo Silipa, te fafine faifekau ʼa Lea ia Kate pea mo Asele. Neʼe ko te ʼu foha ʼaia ʼo Sakopo, ʼae neʼe tutupu ʼi Patane-alame.

27 Ki muli age, neʼe tau leva ia Sakopo kio Isaake tana tamai ʼi Mamele,+ ʼo ovi ki Kiliate-alepa, ʼae ko Hepelone, ia te koga meʼa ʼae neʼe nonofo ai ia Apalahamo mo Isaake ohage ko ni matapule.+ 28 Neʼe maʼuli ia Isaake ia taʼu ʼe 180.+ 29 Neʼe loaloaga mo fiafia te maʼuli ʼo Isaake pea neʼe mate leva, pea neʼe tuku fakatahi ia ia mo ʼana kui.* Neʼe ʼavaifo ia ia e ʼona foha ko Esau mo Sakopo.+