ʼUluaki Hau

20 Pea neʼe fakatahiʼi e Pene-atate, te Hau+ ʼo Silia+ tana foʼi kautau katoa pea mo te tahi ʼu hau ʼe toko 32, mo ʼanatou hosi pea mo ʼanatou saliote tau. Neʼe alu ai leva ʼo ʼa takai+ pea mo tauʼi ia Samalia.+ 2 Neʼe ina fekauʼi leva he ʼu tagata ʼave logo ke olo ki te kolo, ʼo ui age kia Akapo, te Hau+ ʼo Iselaele: “Koʼeni te meʼa ʼae ʼe ui e Pene-atate: 3 ‘Ko tau siliva mo tau aulo ʼe ʼaʼaku, ʼo feia mo ʼou ʼohoana ʼae ʼe finemui pea mo ʼou foha ʼae ʼe talavou.’ ” 4 Neʼe tali age e te hau ʼo Iselaele: “Siʼoku ʼaliki te hau, ko au pea mo ʼaku meʼa fuli ʼe ʼa koe, ʼo mulimuli pe ki tau palalau.”+

5 Ki muli age, neʼe toe liliu age te ʼu tagata ʼave logo pea mo ui: “Koʼeni te meʼa ʼae ʼe ui e Pene-atate: ‘Neʼe au fakaha atu: “ ʼE ke foaki mai anai tau siliva, mo tau aulo, mo ʼou ʼohoana pea mo ʼou foha.” 6 Kae apogipogi, ʼi te hola pe ʼaeni, ʼe au fekauʼi anai ʼaku hahaʼi faifekau ke natou olo atu, pea ʼe natou kumi fakalelei anai ʼi tou fale pea mo te ʼu fale ʼo ʼau hahaʼi faifekau, pea ko te ʼu meʼa fuli ʼae ʼe maʼuhiga kia koe, ʼe natou ʼave anai.’ ”

7 Neʼe pauʼi leva e te hau ʼo Iselaele te kau takitaki fuli ʼo te fenua pea neʼe ina ui age: “Fakalelei siʼokotou loto, kotou tokagaʼi pea mo sisio ki te loto ʼa te tagata ʼaeni ke ina fakahoko he malaʼia, he neʼe ina kole mai ʼoku ʼohoana, mo ʼoku foha, mo taku siliva pea mo taku aulo, pea neʼe mole au fakafisi age ki ai.” 8 Neʼe ui age leva e te kau takitaki pea mo te hahaʼi fuli: “ ʼAua naʼa ke fakalogo ki ai, pea ʼaua naʼa ke tali he meʼa.” 9 Koia, neʼe ina ui age ki te ʼu tagata ʼave logo ʼa Pene-atate: “Kotou fakaha ki siʼoku ʼaliki te hau: ‘Ko te ʼu meʼa fuli ʼae neʼe ke ʼuluaki kole mai kia au, ʼe au fai anai, kae ko te meʼa leva ʼaeni, ʼe mole au tali anai.’ ” Neʼe olo ai te ʼu tagata ʼave logo ʼo fakaha age ki ai.

10 Neʼe fakaha age leva e Pene-atate te logo ʼaeni ki ai: “ ʼE au maumauʼi anai ia Samalia, pea ʼe kaugamalie ʼaupito taku foʼi kautau, koia ʼe mole feʼauga anai te efu ʼae ka toe ʼi ai moʼo foaki ki ʼaku tagata takitahi. Ke tauteaʼi lahi au e te ʼu ʼatua mo kapau ʼe mole au fai te faʼahi ʼaia!” 11 Neʼe tali e te hau ʼo Iselaele: “Kotou ui age ki ai: ‘ ʼAua naʼa ke laupisiʼi ia koe ohage kua ke malo ʼi te tau kae heʼeki kamata te tau.’ ”+ 12 ʼI te temi ʼae neʼe logo ai ki te ʼu palalau ʼaia, neʼe lolotoga inu mo te ʼu hau ʼi ʼonatou fale la,* pea neʼe ina ui ki ʼana hahaʼi faifekau: “Kotou nofo teuteu ki te tau!” Neʼe natou nofo teuteu ai ke natou ʼohofi te kolo.

13 Kae neʼe fakaovi age he polofeta kia Akapo, te Hau+ ʼo Iselaele, ʼo ina ui: “Koʼeni te folafola ʼa Sehova: ‘ ʼE ke sio koa ki te foʼi kautau kaugamalie ʼaia? ʼE au tuku atu anai ia natou ki ʼou nima ʼi te ʼaho nei, pea ʼe ke iloʼi anai ʼe ko au ia Sehova.’ ”+ 14 Pea neʼe fehuʼi age e Akapo: “Ko ai ʼae ka ke fakaʼaogaʼi anai?” Neʼe ina tali age: “Koʼeni te folafola ʼa Sehova: ‘Ko te kau gaue ʼa te kau ʼaliki ʼo te ʼu potu fenua.’ ” Pea neʼe ina fehuʼi age: “Ko ai ʼae ka ina kamata te tau?” Neʼe ina tali age: “Ko koe!”

15 Neʼe lau leva e Akapo te kau gaue ʼa te kau ʼaliki ʼo te ʼu potu fenua, pea neʼe natou toko 232. Hili ʼaia, neʼe ina lau leva te ʼu tagata Iselaele fuli, neʼe ko te toko 7 000. 16 Neʼe natou mavae mai te kolo ʼi te fetapa, kae lolotoga inu ia Pene-atate ki tana konahia ʼosi ʼi te ʼu fale la.* Neʼe ko ia mo te ʼu hau ʼe toko 32 ʼae neʼe tokoni ki ai. 17 Neʼe muʼamuʼa te kau gaue ʼa te kau ʼaliki ʼo te ʼu potu fenua ʼi tanatou mavae ʼaia. ʼI te temi pe ʼaia, neʼe fekauʼi ai e Pene-atate he ʼu tagata ʼave logo. Pea neʼe natou fakaha age leva: “ ʼE mavae he ʼu tagata mai Samalia.” 18 Neʼe ina ui: “Kapau ʼe natou ʼomai ʼo kumi te tokalelei, kotou puke maʼuli natou. Pea kapau ʼe natou ʼomai ki te tau, kotou toe puke maʼuli natou.” 19 Kae ʼi te temi ʼae neʼe natou mavae ai mai te kolo, ia te kau gaue ʼa te kau ʼaliki ʼo te ʼu potu fenua pea mo te ʼu kautau ʼae neʼe mulimuli ia natou, 20 neʼe natou tahi matehi tona fili. Neʼe feholaki leva te kau Silia,+ pea neʼe tuli natou e te kau Iselaele, kae neʼe hola ia Pene-atate, te Hau ʼo Silia ʼi he hosi pea mo he ʼu tagata heka hosi. 21 Kae neʼe alu te hau ʼo Iselaele ʼo tau pea neʼe malo ʼi ʼona fili ʼae neʼe heka hosi pea mo taki saliote tau. Neʼe lahi ai te mātea ʼi te kau Silia.

22 Ki muli age, neʼe fakaovi age te polofeta+ ki te hau ʼo Iselaele, ʼo ina ui age ki ai: “Alu ʼo fakamalohiʼi tau kau solia pea mo fakakaukauʼi te meʼa ʼae ka ke fai,+ he ʼe ʼi te kamata ʼo te taʼu ʼaeni ka haʼu,* ʼe toe liliu mai anai te hau ʼo Silia ʼo tauʼi koe.”+

23 Pea neʼe ui leva e te hahaʼi faifekau ʼo te hau ʼo Silia ki ai: “Ko tonatou ʼAtua ʼe ko he ʼAtua ʼo te ʼu moʼuga. Ko te tupuʼaga la ʼaia ʼo tanatou malolohi age ia tatou. Kae kapau ʼe tou tauʼi natou ʼi he potu fenua laulelei, ʼe tou malolohi age anai ia natou. 24 Koia, ke ke fai te faʼahi ʼaeni: Ke ke fetogi te ʼu hau fuli+ ʼaki te ʼu kovana ke natou takitaki te kau solia. 25 Pea ke ke fakatahiʼi* leva he foʼi kautau ke hage ko te foʼi kautau ʼae kua puli, ʼo feia mo te lahi ʼo te ʼu hosi mo te ʼu saliote tau. Tou tauʼi natou ʼi he potu fenua laulelei, pea ʼe mahino papau ia ʼe tou malolohi age anai ia natou.” Neʼe fakalogo ai ki tanatou tokoni, pea neʼe ina fai te faʼahi ʼaia.

26 ʼI te kamata ʼo te taʼu,* neʼe pauʼi e Pene-atate te kau Silia pea neʼe natou olo ki Afeke+ ʼo tauʼi ia Iselaele. 27 Neʼe toe pauʼi mo te hahaʼi ʼo Iselaele pea neʼe foaki age hanatou meʼa kai, pea neʼe olo ai leva ʼo tauʼi natou. ʼI te temi ʼae neʼe fakatuʼu ai e te hahaʼi ʼo Iselaele tonatou nofoʼaga ʼi ʼonatou muʼa, neʼe hage te kau Iselaele ko he ʼu kiʼi faga tao ʼe lua, kae neʼe hahaʼi te fenua katoa ko te kau Silia.+ 28 Neʼe fakaovi age te tagata ʼa te ʼAtua moʼoni ki te hau ʼo Iselaele, ʼo ina ui: “Koʼeni te folafola ʼa Sehova: ‘Neʼe ui e te kau Silia: “Ko Sehova ʼe ko he ʼAtua ʼo te ʼu moʼuga, pea ʼe mole ko he ʼAtua ia ʼo te potu fenua laulelei,” koia, ʼe au tuku anai te foʼi kautau kaugamalie ʼaeni ki ʼou nima,+ pea ʼe mahino ia, ʼe kotou iloʼi anai ʼe ko au ia Sehova.’ ”+

29 Neʼe natou fehagaʼaki lolotoga ʼaho ʼe fitu, pea ʼi te fitu ʼaho, neʼe kamata ai leva te tau. ʼI te ʼaho pe ʼe tahi, neʼe matehi e te hahaʼi ʼo Iselaele ia te toko 100 000 kau solia Silia ʼae neʼe haʼele lalo. 30 Pea neʼe feholaki te toe ʼo te kau solia ki te kolo ko Afeke.+ Kae neʼe holo te kaupa ʼo te kolo ki te ʼu tagata ʼe toko 27 000 ʼae neʼe kei toe. Neʼe toe hola foki mo Pene-atate ʼo hu ki te kolo, pea neʼe alu ʼo nono ʼi he koga fale taupotu.

31 Koia, neʼe ui age e ʼana hahaʼi faifekau: “Neʼe matou logo ko te ʼu hau ʼo Iselaele ʼe ko he ʼu hau lotomanavaʼofa.* Koia, fakalelei siʼou loto, kae tuku ke matou haʼi ki ʼomatou koga loto he taga,* mo he ʼu maea ki ʼomatou ʼulu pea ke matou olo ki te hau ʼo Iselaele. ʼE lagi ina tuku anai koe ke ke* maʼuli.”+ 32 Neʼe natou haʼi ai te taga ʼaia ki ʼonatou koga loto, mo he ʼu maea ki ʼonatou ʼulu pea neʼe olo ai ki te hau ʼo Iselaele ʼo ui age ki ai: “Koʼeni te meʼa ʼae ʼe ui e tau tagata faifekau ko Pene-atate: ‘Fakalelei siʼou loto, kae ke ke tuku au ke au maʼuli.’ ” Neʼe ina tali age: “ ʼE kei maʼuli koa ia ia? ʼE ko toku tehina ia ia.” 33 Neʼe hage ai ki te ʼu tagata ʼaia neʼe ko he fakailoga pea neʼe natou tui ki ʼana palalau, ʼo natou ui: “ ʼEi, ko Pene-atate ʼe ko tou tehina.” Neʼe ina ui age kia natou: “Kotou olo ʼo ʼaumai ia ia.” Neʼe haʼu leva ia Pene-atate kia ia, pea neʼe fakaheka e Akapo ia ia ki te saliote.

34 Pea neʼe ui e Pene-atate ki ai: “ ʼE au liufaki atu anai te ʼu kolo ʼae neʼe toʼo e taku tamai mai tau tamai. Pea ʼe feala anai hau fakatuʼu he ʼu fakatauʼaga koloa* ʼi Tamaso, ohage pe ko tona fai e taku tamai ʼi Samalia.”

Neʼe tali e Akapo: “ ʼE au tuku anai koe ke ke alu ʼuhi ko te fuakava ʼaeni ʼe ta fai.”

Neʼe ina fai ai he fuakava mo ia pea neʼe ina tuku ke alu.

35 Neʼe ui e he tahi ʼo te ʼu foha ʼo te kau polofeta*+ ki te tahi age tagata: “Fakalelei siʼou loto, kae ke ke taʼi au,” he neʼe ko te fakatotonu ʼaia mai ia Sehova. Kae neʼe mole loto e te tagata ʼaia ke ina taʼi ia ia. 36 Koia, neʼe ina ui age ki te tagata ʼaia: “ ʼI te temi pe ʼae ka ke mavae ai, ʼe matehi anai koe e he laione he neʼe mole ke fakalogo ki te leʼo ʼo Sehova.” ʼI tana ʼosi mavae, neʼe ʼohofi ia ia e he laione ʼo ina matehi.

37 Neʼe maʼu leva e te polofeta te tahi age tagata, pea neʼe ina ui age ki ai: “Fakalelei siʼou loto, kae ke ke taʼi au.” Neʼe taʼi ia ia e te tagata ʼo lavea ai.

38 Neʼe alu ai leva te polofeta ʼo fakatalitali ʼi te ala ki te hau, pea neʼe ina haʼi ʼona mata ke mole iloʼi ia ia. 39 ʼI te fakalaka ʼa te hau, neʼe kalaga age ki ai: “Neʼe au alu ki te faʼahi ʼae neʼe malohi ai te tau, pea neʼe haʼu he tagata ʼo ʼaumai te tahi age tagata pea neʼe ina ui mai: ‘Ke ke leʼo te tagata ʼaeni. Kapau ʼe hola, ʼe toʼo anai tou maʼuli* moʼo fetogi ʼaki tona maʼuli,*+ peʼe ke totogi anai he taleta* siliva ʼe tahi.’ 40 Kae neʼe au fai leva he tahi age gaue, pea fokifa pe kua puli te tagata.” Neʼe ui age e te hau ʼo Iselaele ki ai: “ ʼE ko tou tautea ʼaia, kua ke ʼosi fai e koe totonu tau fakamau.” 41 Neʼe ina foimo toʼo leva te kie ʼae neʼe ina haʼi ʼaki ʼona mata, pea neʼe iloʼi ai e te hau ʼo Iselaele neʼe ko he tahi ʼo te kau polofeta.+ 42 Neʼe ui e te polofeta ki ai: “Koʼeni te folafola ʼa Sehova: ‘Neʼe ke tuku ke hola te tagata ʼae neʼe au fakatotonu ke matehi,+ koia ʼe toʼo anai tou maʼuli* moʼo fetogi ʼaki tona maʼuli,*+ pea ʼe toʼo anai tau hahaʼi moʼo fetogi ʼaki tana hahaʼi.’ ”+ 43 Neʼe alu ai leva te hau ʼo Iselaele ki tona fale ʼi Samalia,+ pea neʼe ita mo lotomamahi.