ʼUluaki Hau

8 ʼI te temi ʼaia, neʼe fakatahiʼi e Salomone+ te kau takitaki ʼo Iselaele, ia te ʼu pule telepi fuli pea mo te ʼu pule famili ʼo Iselaele.+ Neʼe natou ʼomai ki te Hau ko Salomone ʼi Selusalemi ke ʼave te aleka ʼo te fuakava ʼa Sehova ʼae neʼe tuku ʼi te Kolo ʼo Tavite,+ ia Sione.+ 2 Neʼe fakatahitahi te ʼu tagata fuli ʼo Iselaele ia muʼa ʼo te Hau ko Salomone ʼi te ʼaho lahi* ʼo te mahina ʼo Etanime,* ʼae ko te fitu mahina.+ 3 Neʼe ʼomai ai te kau takitaki fuli ʼo Iselaele, pea neʼe fata e te kau pelepitelo ia te Aleka.+ 4 Neʼe natou ʼave te Aleka ʼo Sehova, mo te fale la ʼo te fono+ pea mo te ʼu meʼa taputapu kehekehe fuli ʼae neʼe ʼi te fale la ʼaia. Neʼe ʼave te ʼu meʼa ʼaia e te kau pelepitelo pea mo te kau Levite. 5 Neʼe pauʼi leva e te Hau ko Salomone ia Iselaele katoa, pea neʼe natou olo fakatahi ai kia muʼa ʼo te Aleka. Neʼe lahi ʼaupito te ʼu ovi mo te ʼu pipi ʼae neʼe sakilifisioʼi,+ ʼo mole feala ai tona lau.

6 Neʼe ʼave leva e te kau pelepitelo ia te aleka ʼo te fuakava ʼa Sehova+ ki te Potu Taputapu ʼAupito, ia te koga fale taupotu ʼo te fale lotu. Neʼe natou tuku ki tona nofoʼaga, ʼi te ʼu lalo pakakau ʼo te ʼu kelupimi.+

7 Neʼe folahi te ʼu pakakau ʼo te ʼu kelupimi ʼi ʼoluga ʼo te tuʼuʼaga ʼo te Aleka, koia neʼe malumalu ai te Aleka pea mo ʼana ʼakau ʼamo ʼuhi ko te ʼu kelupimi.+ 8 Neʼe loloa te ʼu ʼakau ʼamo+ ʼaia ʼo feala ke ha te ʼu muliʼi meʼa ʼo te ʼu ʼakau ʼaia ki te Potu Taputapu ʼae ʼi muʼa ʼo te koga fale taupotu, kae neʼe mole ha ia ki tuʼa. Pea ʼe kei tuʼu ai ʼo kaku mai ki te ʼaho nei. 9 Neʼe mole he meʼa ʼi te loto Aleka, gata pe ki te ʼu lauʼi maka ʼe lua+ ʼae neʼe tuku e Moisese ki ai+ ʼi Olepe, ʼi te temi ʼae neʼe fai ai e Sehova he fuakava+ mo te hahaʼi ʼo Iselaele ʼi tanatou mavae mai te fenua ʼo Esipito.+

10 ʼI te temi ʼae neʼe mavae ai te kau pelepitelo mai te fale taputapu, neʼe ʼaofi e te ʼao+ ia te fale ʼo Sehova.+ 11 Neʼe mole feala ke hoko atu e te kau pelepitelo tanatou gaue ʼuhi ko te ʼao, he neʼe fonu te fale ʼo Sehova ʼi te kololia ʼo Sehova.+ 12 Neʼe ui leva e Salomone: “Sehova e, neʼe ke ui ʼe ke nofo anai ʼi te fakapoʼuli gaogao.+ 13 Neʼe au laga he fale taulekaleka maʼa koe, he koga meʼa ke ke nofo ai ʼo talu ai.”+

14 Koia, neʼe maliu leva te hau ʼo haga ki te hahaʼi katoa ʼo Iselaele, ʼo tapuakiʼi natou, kae natou tutuʼu.+ 15 Neʼe ina ui: “Ke vikiʼi ia Sehova te ʼAtua ʼo Iselaele, ia ia totonu ʼae neʼe ina fai te fakapapau* kia Tavite, taku tamai pea neʼe ina fakahoko e ia totonu,* ʼo ina ui: 16 ‘Talu mai te ʼaho ʼae neʼe au fakamavae ai ia Iselaele, taku hahaʼi mai Esipito, neʼe mole au filifili he kolo ʼi te ʼu telepi fuli ʼo Iselaele ke laga ai he fale ke fakamaʼuhigaʼi ai toku huafa,+ kae neʼe au filifili ia Tavite ke pule ki Iselaele, taku hahaʼi.’ 17 Pea neʼe loto moʼoni ia Tavite, taku tamai ke ina laga he fale ke fakakololiaʼi ai te huafa ʼo Sehova, te ʼAtua ʼo Iselaele.+ 18 Kae neʼe ui e Sehova kia Tavite, taku tamai: ‘Neʼe ke loto moʼoni ke ke laga he fale ke fakakololiaʼi ai toku huafa, pea neʼe ko he meʼa lelei ia. 19 Kae ʼe mole ke laga anai te fale, ʼe ko tou foha totonu ʼae ka tupu anai* ʼae ka ina laga he fale ke fakakololiaʼi ai toku huafa.’+ 20 Pea neʼe fakahoko e Sehova te fakapapau ʼae neʼe ina fai, he neʼe au fetogi ia Tavite, taku tamai ʼo au heka ʼi te hekaʼaga fakahau ʼo Iselaele, ohage pe ko tona fakapapauʼi e Sehova. Neʼe au toe laga foki he fale ke fakakololiaʼi ai te huafa ʼo Sehova, te ʼAtua ʼo Iselaele+ 21 pea neʼe au teuteuʼi ʼi ai he nofoʼaga maʼa te Aleka ʼae neʼe tuku ai ʼi loto ia te fuakava+ ʼae neʼe fai e Sehova mo ʼatatou kui ʼi tana fakamavae natou mai te fenua ʼo Esipito.”

22 Neʼe tuʼu leva ia Salomone ʼi te muʼa ʼaletale ʼo Sehova ia muʼa ʼo te hahaʼi katoa ʼo Iselaele, pea neʼe ina hiki ake ʼona nima ki te lagi,+ 23 ʼo ina ui: “Sehova e, te ʼAtua ʼo Iselaele, ʼe mole he tahi age ʼAtua ʼe hage ko koe+ ʼi te lagi ʼi ʼoluga peʼe ʼi te kele ʼi lalo, ʼi tau taupau te fuakava mo tau fakaha tou ʼofa agatonu+ ki ʼau hahaʼi faifekau ʼae ʼe haʼele ʼi ʼou muʼa ʼaki ʼonatou loto katoa.+ 24 Neʼe ke fakahoko te fakapapau ʼae neʼe ke fai ki tau tagata faifekau ko Tavite, taku tamai. Neʼe ke fai e koe totonu te fakapapau,* pea ʼi te ʼaho ʼaeni neʼe ke fakahoko e koe totonu.*+ 25 Pea ʼi te lakaga nei, Sehova e, te ʼAtua ʼo Iselaele, ke ke fakahoko te fakapapau ʼae neʼe ke fai ki tau tagata faifekau ko Tavite, taku tamai, ʼi tau ui age ki ai: ‘Kapau ʼe tokakaga ʼou foha ki ʼonatou ala, ʼo natou haʼele agatonu ʼi ʼoku muʼa ohage pe ko tau haʼele agatonu ʼi ʼoku muʼa, ʼe ʼi ai tuʼumaʼu pe anai ʼi ʼoku muʼa he tagata ʼi tou hologa ʼe heka anai ʼi te hekaʼaga fakahau ʼo Iselaele.’+ 26 Koia, ʼAtua ʼo Iselaele, fakalelei siʼou loto, kae ke hoko moʼoni te fakapapau ʼae neʼe ke fai ki tau tagata faifekau ko Tavite, taku tamai.

27 “Kae ʼe nofo moʼoni anai koa te ʼAtua ʼi te kele?+ Koʼeni ko te lagi ʼo te ʼatu lagi ʼe mole lahi feʼauga ke ke nofo ai,+ ʼo feafeaʼi age la te fale ʼaeni neʼe au laga!+ 28 ʼI te lakaga nei, Sehova e, siʼoku ʼAtua, ke ke tokagaʼi taku faikole mo taku kole atu tou manavaʼofa, pea ke ke fagono ki taku kole tokoni atu pea mo taku faikole ʼae ʼi ʼou muʼa ʼi te ʼaho nei. 29 ʼOfa pe ke sio ʼou mata ʼi te ʼaho mo te po ki te fale ʼaeni, ke ke fagono ai ki taku faikole moka au haga mai ki te koga meʼa ʼaeni,+ he neʼe ke ui ʼo ʼuhiga mo te koga meʼa ʼaeni: ‘ ʼE tuʼu ai anai toku huafa.’+ 30 Pea ke ke fagono ki taku kole atu tou manavaʼofa pea mo te faikole ʼae ʼe fai e Iselaele, tau hahaʼi, moka natou haga mai ki te koga meʼa ʼaeni, pea ʼofa pe ke ke logo mai mai tou nofoʼaga ʼae ʼi selo.+ ʼEi, ʼofa pe ke ke logo pea mo ke fakamolemole.+

31 “Ka agahala he tagata ki tona tehina pea ʼe tonu ke ina fai he fakapapau,* pea ʼe ʼi ai tona maʼua ʼuhi ko tana fakapapau* ʼaia, pea kapau ʼe haʼu ki tou muʼa ʼaletale ʼi te fale ʼaeni ʼuhi ko te fakapapau* ʼaia,+ 32 ʼofa pe ke ke fagono mai mai te lagi pea mo ke fakamauʼi ʼau hahaʼi faifekau, ʼo ke tala te hala* ʼa te tagata agakovi pea mo ke tauteaʼi ia ia ʼo mulimuli ki te meʼa ʼae neʼe ina fai, pea mo tala te faitotonu ʼa te tagata ʼae neʼe mole ina fai he meʼa ʼe kovi* pea mo ke fakapale ia ia ʼo mulimuli ki tana faitotonu.+

33 “Kapau neʼe mole malo ia Iselaele, tau hahaʼi ʼi ʼonatou fili he neʼe natou agahala tuʼumaʼu pe kia te koe,+ pea kapau ʼe natou toe liliu atu ʼo fakakololiaʼi tou huafa+ pea mo natou faikole mo kole atu tou manavaʼofa ʼi te fale ʼaeni,+ 34 ʼofa pe ke ke fagono mai mai te lagi pea mo ke fakamolemole te agahala ʼa Iselaele, tau hahaʼi, pea ke ke toe fakaliliu natou ki te fenua ʼae neʼe ke foaki ki ʼanatou kui.+

35 “Kapau ʼe mole ava te lagi ʼo mole to te ʼua+ he neʼe natou agahala tuʼumaʼu pe kia te koe,+ pea kapau ʼe natou faikole ʼo haga ki te koga meʼa ʼaeni, mo natou fakakololiaʼi tou huafa pea mo maliu kehe mai tanatou agahala he neʼe ke fakamalaloʼi* natou,+ 36 ʼofa pe ke ke fagono mai mai te lagi pea mo ke fakamolemole te agahala ʼo ʼau hahaʼi faifekau, ia Iselaele, tau hahaʼi, he ʼe ke akoʼi anai kia natou+ te ala ʼae ʼe lelei pea ʼe tonu ke natou haʼele ai. Pea ke ke fakato te ʼua ki tou fenua+ ʼae neʼe ke foaki age ki tau hahaʼi ko he tofiʼa.

37 “Kapau ʼe to ʼi te fenua he hoge,+ peʼe ko he taʼi mahaki, peʼe hoko he maumau ʼi te ʼu gaueʼaga ʼuhi ko he ʼu matagi vevela, peʼe ko he mahaki,+ peʼe ko he ʼu tuʼuga heʼe, peʼe kapau ʼe ʼohofi e ʼonatou fili he kolo ʼi te ʼu kolo ʼo te fenua, peʼe kapau ʼe hoko he tahi age faʼahiga malaʼia peʼe mahaki,+ 38 pea kapau ʼe fai e he tagata peʼe ko Iselaele katoa hanatou faikole, peʼe natou kole atu tou manavaʼofa+ (he ʼe tahi iloʼi pe te mamahi ʼae ʼi tona loto),+ ʼo natou hiki ʼonatou nima ʼo haga mai ki te fale ʼaeni, 39 ʼofa pe ke ke fagono mai mai te lagi, mai tou nofoʼaga,+ pea mo ke fakamolemole+ mo ke tokoni kia natou. Pea ke ke fakapale te tagata takitokotahi ʼo mulimuli ki tana aga,+ he ʼe ke iloʼi tona loto (ko koe tokotahi pe ʼae ʼe ina iloʼi moʼoni te loto ʼo te tagata fuli),+ 40 ke natou manavasiʼi ai kia te koe ʼi te ʼu ʼaho fuli ʼae ʼe natou maʼuʼuli ai ʼi te fenua ʼae neʼe ke foaki ki ʼamatou kui.

41 “Pea ko te matapule ʼae ʼe mole kau ki Iselaele, tau hahaʼi, ʼae ʼe haʼu mai he fenua mamaʼo ʼuhi ko tou huafa*+ 42 (koteʼuhi ʼe natou logo anai ki tou huafa lahi+ pea mo tou nima mafimafi) pea kapau ʼe haʼu pea mo faikole ʼo haga ki te fale ʼaeni, 43 ʼofa pe ke ke fagono mai mai te lagi, mai tou nofoʼaga,+ pea ke ke fai te ʼu meʼa fuli ʼae ʼe kole atu e te matapule, ke iloʼi ai e te hahaʼi fuli ʼo te kele tou huafa pea ke natou manavasiʼi kia te koe,+ ohage pe ko Iselaele, tau hahaʼi, pea ke natou iloʼi ai ʼe fakakololiaʼi tou huafa ʼi te fale ʼaeni neʼe au laga.

44 “Kapau ʼe olo tau hahaʼi ki he faʼahi pe ʼo tauʼi ʼonatou fili,+ pea kapau ʼe natou faikole+ kia Sehova ʼo natou haga ki te kolo ʼae neʼe ke filifili+ pea mo te fale ʼae neʼe au laga ke fakakololiaʼi ai tou huafa,+ 45 ke ke fagono mai mai te lagi ki tanatou faikole, mo tanatou kole atu tou manavaʼofa, pea ke ke fakahoko maʼa natou te faitotonu.

46 “Kapau ʼe natou agahala kia te koe (koteʼuhi ʼe mole he tagata ʼe hao ʼi te agahala),+ ʼo ke ita ai kia natou pea mo tuku natou ki ʼonatou fili, pea ʼave popula ai natou e ʼonatou fili ki tonatou fenua, pe ʼe mamaʼo peʼe ovi mai,+ 47 pea kapau ʼe natou fakakaukau poto ʼi te fenua ʼae neʼe ʼave popula natou ki ai,+ pea mo natou toe liliu atu+ ʼo kole atu tou manavaʼofa ʼi te fenua ʼo ʼonatou fili,+ ʼo natou ui: ‘Neʼe matou agahala pea mo fai te aga ʼae ʼe kovi, neʼe matou agakovi,’+ 48 pea kapau ʼe natou toe liliu atu kia te koe mo tonatou loto katoa+ mo tonatou maʼuli* katoa ʼi te fenua ʼo ʼonatou fili ʼae neʼe natou ʼave popula natou, pea mo natou faikole atu kia te koe ʼo natou haga ki tonatou fenua ʼae neʼe ke foaki ki ʼanatou kui, mo te kolo ʼae neʼe ke filifili pea mo te fale ʼae neʼe au laga ke fakakololiaʼi ai tou huafa,+ 49 fakalelei siʼou loto, ke ke fagono mai mai te lagi, mai tou nofoʼaga,+ ki tanatou faikole mo tanatou kole atu tou manavaʼofa, pea ke ke fakahoko maʼa natou te faitotonu 50 pea mo ke fakamolemole ki tau hahaʼi ʼae neʼe agahala kia te koe, ʼo ke fakamolemole te ʼu agahala fuli ʼae neʼe natou fai kia te koe. ʼE ke fai anai he meʼa ke manavaʼofa ʼonatou fili kia natou, pea ʼe natou manavaʼofa anai kia natou+ 51 (koteʼuhi ʼe ko tau hahaʼi mo tou tofiʼa,+ ia natou ʼae neʼe ke fakamavae mai Esipito,+ mai te gutuʼumu haka ukamea).+ 52 ʼOfa pe ke ke fagono moka au kole atu ia tou manavaʼofa,+ pea mo kole atu e Iselaele tau hahaʼi ia tou manavaʼofa, ʼo ke fagono ʼi te temi fuli pe ʼae ʼe natou pauʼi atu ai kia te koe.*+ 53 Koteʼuhi, Tuʼi ʼAliki ko Sehova, neʼe ke tuku keheʼi natou mai te hahaʼi fuli ʼo te kele ke natou liliu ko tou tofiʼa,+ ohage ko tau fakaha ʼaki ia Moisese, tau tagata faifekau ʼi te temi ʼae neʼe ke fakamavae ai ʼamatou kui mai Esipito.”

54 Pea ʼi te ʼosi momoli pe e Salomone tana faikole katoa ʼaia kia Sehova pea mo tana kole tona manavaʼofa, neʼe tuʼu ake leva mai ia muʼa ʼo te ʼaletale ʼo Sehova, ʼae neʼe tuʼutuli ai mo hiki ake ʼona nima ki te lagi.+ 55 Neʼe tuʼu ai ʼo ina tapuakiʼi te hahaʼi katoa ʼo Iselaele, ʼo ina ui ʼaki he leʼo lahi: 56 “Ke vikiʼi ia Sehova, ʼae neʼe ina foaki he nofoʼaga ke fimalie ai ia Iselaele, tana hahaʼi, ohage pe ko tana fakapapau.+ Neʼe mole to noa he folafola ʼe tahi ʼi te ʼu fakapapau taulekaleka fuli ʼae neʼe ina fai ʼaki ia Moisese, tana tagata faifekau.+ 57 ʼOfa pe ke nofo ia Sehova totatou ʼAtua mo tatou, ohage pe ko tana nofo mo ʼatatou kui.+ Ke ʼaua naʼa mavae ia tatou pea mo ina liʼaki tatou.+ 58 ʼOfa pe ke ina fakamaliu ʼotatou loto kia te ia,+ ke tou haʼele ʼi ʼona ala fuli pea mo taupau ʼana fakatotonu, mo ʼana lekula, pea mo ʼana fakamau, ʼae neʼe ina fakatotonu ke mulimuli ki ai ʼatatou kui. 59 Pea ʼofa pe ke manatuʼi e Sehova ʼi te ʼaho mo te po ʼaku folafola ʼaeni neʼe au fai ʼi taku kole kia Sehova tona manavaʼofa, ke ina fakahoko ai te faitotonu maʼaku pea mo Iselaele, tana hahaʼi, ʼo mulimuli pe ki te ʼu meʼa ʼae ʼe ʼaoga ʼi te ʼaho fuli, 60 ke iloʼi ai e te hahaʼi fuli ʼo te kele ko Sehova ʼe ko te ʼAtua moʼoni.+ ʼE mole ʼi ai he tahi age ʼAtua!+ 61 Koia, ke katoa* ʼokotou loto+ kia Sehova totatou ʼAtua, ʼo kotou haʼele ʼi ʼana lekula pea mo taupau ʼana fakatotonu, ohage pe ko takotou fai ʼi te ʼaho nei.”

62 Neʼe momoli leva e te hau pea mo Iselaele katoa he toe sakilifisio lahi ia muʼa ʼo Sehova.+ 63 Neʼe momoli e Salomone kia Sehova he ʼu sakilifisio ʼo te tokalelei:*+ Neʼe ina momoli he ʼu pipi ʼe 22 000 pea mo he ʼu ovi ʼe 120 000. Neʼe fakatapuʼi ai e te hau pea mo te kau Iselaele fuli te fale ʼo Sehova.+ 64 ʼI te ʼaho ʼaia, neʼe fakamaʼoniʼoniʼi e te hau te lotomalie ʼo te malaʼe ʼae ʼe tuʼu ʼi te muʼa fale ʼo Sehova, he neʼe tonu ke ina momoli ʼi ai te ʼu holokoseta, mo te ʼu molaga meʼa kai pea mo te ʼu koga ʼae ʼe gako ʼo te ʼu sakilifisio ʼo te tokalelei, he neʼe veliveli fau te ʼaletale kapa+ ʼae ʼe tuʼu ia muʼa ʼo Sehova ke hili ki ai te ʼu holokoseta, mo te ʼu molaga meʼa kai pea mo te ʼu koga ʼae ʼe gako+ ʼo te ʼu sakilifisio ʼo te tokalelei. 65 ʼI te temi ʼaia, neʼe fai ai e Salomone te ʼaho lahi+ mo Iselaele katoa, ko he toe hahaʼi kaugamalie mai Lepo-hamate* ki te Vai Tafe* ʼo Esipito,+ ia muʼa ʼo Sehova totatou ʼAtua, lolotoga ʼaho ʼe 7 pea mo te tahi age ʼu ʼaho ʼe 7, ʼo fakatahiʼi ai ko ʼaho ʼe 14. 66 Pea ʼi te ʼaho leva ʼae neʼe hoa mai ki ai,* neʼe ina fekauʼi te hahaʼi ke olo ki ʼonatou ʼapi. Neʼe fakaha e te hahaʼi ki te hau tanatou fakaʼamu ʼae ke ina maʼu te tapuakina ʼa te ʼAtua pea neʼe natou toe liliu fiafia ki ʼonatou ʼapi pea mo lotofiafia ʼuhi ko te ʼu lelei fuli+ ʼae neʼe fai e Sehova kia Tavite, tana tagata faifekau pea mo Iselaele, tana hahaʼi.