Sopo
23 Neʼe tali e Sopo:
2 “ ʼI te ʼaho nei, ʼe toe hoko atu pe anai taku meo,+
Kua puli toku malohi ʼuhi ko ʼaku lauga.
3 Ka na neʼe au iloʼi pe la te nofoʼaga ʼo te ʼAtua,+
ʼE au alu anai ki te koga meʼa ʼaia.+
4 ʼE au fakaha anai ki ai toku fihifihia,
Mo fakamatala age ʼaku manatu fuli.
5 Pea ʼe au iloʼi anai tana tali,
Mo tokagaʼi te meʼa ʼae ka ina ui mai.
6 ʼE ina fakaʼaogaʼi anai koa tona mafimafi moʼoku tauʼi?
Kailoa ia, ʼe fakalogo moʼoni anai ki te meʼa ʼae ka au fia fakaha age.+
7 Koia, ʼe feala anai ke felogoi te tagata faitotonu mo ia,
Pea ʼe fakaʼateainaʼi anai au e toku Tuʼi Fakamau ʼo talu ai.
8 Kae kapau ʼe au alu ki te potu esite, ʼe mole nofo ai.
ʼE au toe liliu mai, kae ʼe mole au maʼu ia ia.
9 Ka gaue ʼi te faʼahi hema, ʼe mole au sio ki ai,
ʼE toe feia pe moka alu ki te faʼahi mataʼu, ʼe mole au sio ki ai.
10 Kae ʼe ina iloʼi te ala ʼae neʼe au alu ai.+
Ka ʼosi pe tana ʼahiʼahiʼi au, ʼe au hage anai ko te aulo maʼa.+
11 Neʼe au mulimuli lelei ʼi ʼona lakaʼaga,
Neʼe au alu pe ʼi tona ala, neʼe mole au maliu kehe.+
12 Neʼe au mulimuli ki te fakatotonu ʼae neʼe ina fakaha mai.
Neʼe au taupau lelei ʼana folafola+ ʼo laka age ʼi te meʼa ʼae neʼe tonu ke au fai.
13 Ka ina fakatotonu he meʼa, ko ai ʼae ʼe feala ke fakafeagai ki ai?+
ʼE ina fai pe te meʼa ʼae ʼe loto ki ai.+
14 ʼE ina fakahoko anai te ʼu meʼa fuli ʼae kua ina fakatotonu ʼo ʼuhiga mo au,
Pea ʼe lahi ʼana fakatuʼutuʼu feia.
15 Ko te tupuʼaga la ʼaia ʼo taku tuʼania.
Ka au manatu ki ai, ʼe lahi age taku manavasiʼi kia te ia.
16 Kua au lotovaivai ʼuhi ko te ʼAtua,
Pea ʼe fakamatakuʼi au e te Mafimafi.
17 ʼE ʼuʼufi toku fofoga e te fakapoʼuli,
Kae ʼe mole au nofo fakalogologo.