Sopo
3 ʼE tuʼa lahi anai koa hana lauga atu,
Peʼe palalau agalelei atu anai?
4 ʼE ina fai anai koa he fuakava mo koe,
Ke liliu ai ko hau kaugana ʼi tona maʼuli katoa?
5 ʼE ke gaoʼi anai koa mo ia ohage ko hau gaoʼi mo he manulele?
ʼE ke haʼi anai koa ʼaki he maea moʼo fakagaoʼi ʼaki ʼau kiʼi taʼahine?
6 ʼE fakatau anai koa e he kau gelu?
ʼE vaevae anai koa ʼi ni hahaʼi faikoloa?
7 ʼE ke fana anai koa tona kili ʼaki ni kauʼi nahau?+
ʼE ke huki anai koa tona ʼulu ʼaki ni tao?
8 Hili tou nima ki ai,
ʼE ke manatuʼi anai tau fetau mo ia pea ʼe mole ke toe fai anai!
9 ʼE vaʼiganoa ʼau faiga ʼae ke ke puleʼi.
ʼE ke mataku* pe anai ʼi tau sio ki ai.
10 ʼE mole faiga he tahi ke ina fakatupu hona ita.
Koia ko ai ʼae ʼe feala ke fakafeagai mai?+
11 Ko ai ʼae neʼe ina ʼuluaki foaki mai he meʼa, ke au toe liufaki age?+
Ko meʼa fuli ʼae ʼe maʼu ʼi te lalo lagi ʼe ʼaʼaku ia.+
12 ʼE mole au nofo fakalogologo anai ʼo ʼuhiga mo ʼona koga sino,
Mo tona malohi, pea mo te taulekaleka ʼo tona faʼu.
13 Ko ai ʼae neʼe ina toʼo tona kofu tuʼa?
Ko ai ʼae ka ulu ki ʼona kaugao moka fakamaga?
14 Ko ai ʼae ʼe feala ke ina avahi te ʼu matapa ʼo tona gutu?
ʼE fakamataku ʼona nifo.
15 ʼI tona tuʼa ʼe fakaʼatu ai ʼona ʼuno,*
ʼE pipiki maʼu fakatahi.
16 ʼE fehokohokoleleiʼaki ʼae ki ʼae
Ke mole feala ai he ulu ʼo te ʼaele.
17 ʼE fepipikitahiʼaki,
ʼE mole feala ia ke mavete.
18 Ka mafatua, ʼe hage ʼe tapa te malama,
Pea ʼe hage ʼona mata ko te ʼu kave ʼo te laʼa ʼi te mafoata.
19 ʼE mavae mai tona gutu ni hila,
Pea ʼe mafisifisi.
20 ʼE puhiʼi mai te kohu mai ʼona poga ihu,
Ohage ko he gutuʼumu ʼe hokohokoʼi ʼaki ni kaho.
21 Ka manava ʼe ulo te ʼu mamala,
Pea ʼe haʼu he afi mai tona gutu.
22 ʼE malohi ʼaupito tona kia,
Pea ʼe matataku ia natou fuli ʼae ʼe felaveʼi mo ia.
23 ʼE fefeka tona kili,
Ohage ko he lauʼi ukamea ʼe mole feala ke gaugaue.
24 ʼE fefeka tona mafu ohage ko he foʼi maka,
ʼEi, ʼe fefeka ohage ko he maka momosi fulumeto.
25 Ka tuʼu ake, maʼia mo te kau malolohi ʼe matataku,
Ka tapalutu ʼi te vai, ʼe tupu ai tanatou lotovaivai.
26 ʼE mole feala ke malo he tahi ia ia mo tana heleta,
Peʼe ko he tao, peʼe ko he kauʼi nahau.+
27 ʼE hage kia ia te ukamea ko he luna,
Pea ʼe hage te kapa ko he ʼakau popo.
28 ʼE mole hola ia moka fanahi ʼaki he kauʼi nahau,
Ka tukiʼi, ʼe hage kia ia te ʼu maka ʼo te makamaka ko he luna moamoa.
29 ʼE hage kia ia te koga ʼakau ko he luna moamoa,
Pea ʼe ina vaʼi te logoaʼa ʼo te tao.
30 ʼE hage ʼe teuteuʼi tona fatu ʼaki ni kogaʼi ipu masila,
ʼE takoto ia ʼi te pela ohage ko te saliote ʼae ʼe molomoloki ʼaki te fulumeto.+
31 ʼE ina fakapohu te tai ohage ko te fakapula ʼo he kulo,
ʼE hou te tai moka ulu ki ai ohage ko te natu ʼo he kulo fai lolo magoni.
32 Ka kāuga ʼe fiho te tai ʼi tana fakalaka,
ʼO tou ui ai ʼe ʼulu hina te tai.
33 ʼE mole ʼi ai hona fakatatau ʼi te kele,
Ko he manu ia neʼe fakatupu ke mole mataku ki he meʼa.
34 ʼE ina hihilaʼi te ʼu manu fuli ʼae ʼe fialahi.
Ko te hau ia ʼo te faga manu malohi fuli ʼo te vao.”