Sopo

 2 ʼE mate anai te vale ʼuhi ko tona ita,

Pea ʼe mate anai ia ia ʼae ʼe hoko tui ʼuhi ko tona maheka.

 3 Neʼe au sio ki te mafola ʼo te ʼu aka ʼo te vale,

Kae neʼe malaʼia fakafokifa leva tona nofoʼaga.

 4 ʼE tuʼutamakiʼia ʼona foha,

Pea ʼe gaohi koviʼi natou ʼi te matapa ʼo te kolo+ kae ʼe mole haofaki natou e he tahi.

 5 ʼE kai e te tagata pakupaku te meʼa ʼae ʼe utu e te vale,

ʼE ina toe toʼo mo te meʼa ʼae ʼe homo ʼi te ʼu ʼakau talatala,

Pea ʼe faʼao te ʼu koloa ʼo te vale mo ʼona foha.

 6 ʼE mole homo mai te efu te ʼu meʼa ʼae ʼe kovi,

Pea ʼe mole tupu te malaʼia mai te kele.

 7 Neʼe tupu te tagata ke mamahi

Ohage ko te viligia ʼo te mafisifisi ʼo te afi ʼi te ʼaele.

 8 Ka na ko au la koe, ʼe au tagi ki te ʼAtua,

Pea ʼe au fakaha anai ia meʼa fuli ki te ʼAtua.

 9 ʼE ina fai ni meʼa lalahi pea mo ni meʼa ʼe mole feala he mahino ki ai,

Pea ʼe ina toe fai mo ni meʼa fakaofoofo ʼe mole malau.

10 ʼE ina fakato te ʼua ki te kele

Pea mo fakavai te ʼu gaueʼaga.

11 ʼE ina hiki ake ia natou ʼae ʼe liliki,

Pea ko natou ʼae ʼe lotovaivai, ʼe ina hiki natou ki he koga meʼa ʼe haofaki ai natou.

12 ʼE ina fakato noa te ʼu fakatuʼutuʼu ʼa te kau kaka,

ʼO mole fua lelei ai te gaue ʼo ʼonatou nima.

13 ʼE ina maʼutoka te kau popoto ʼi ʼanatou puleʼaki kaka,+

ʼO mole hoko ai ʼanatou fakatuʼutuʼu.

14 ʼE natou tuta ki te fakapoʼuli kae ʼe kei ʼaho

Pea ʼe natou haʼele taufa ʼi te hoʼata ohage ko te poʼuli.

15 ʼE ina haofaki te hahaʼi mai te heleta ʼae ʼe haʼu mai ʼonatou gutu,

Pea ʼe ina haofaki te kau masisiva mai te nima ʼo te kau toʼa.

16 Koia ʼe maʼu e natou ʼae ʼe liliki he ʼamanaki,

Kae ʼe mapunuʼi te gutu ʼo te kau heʼe faitotonu.

17 Ke ke tokaga lelei ki te meʼa ʼaeni: Manuʼia te tagata ʼae ʼe akonakiʼi e te ʼAtua,

Pea ʼaua naʼa ke liʼaki tou fakatonutonuʼi e te Mafimafi!

18 ʼE ina haʼi te lavea ʼo natou ʼae neʼe ina fakamamahiʼi,

ʼE ina fakalavea natou, kae ʼe ina toe fakamalolo pe.

19 ʼE ina haofaki anai koe mai ni malaʼia ʼe ono,

Pea ʼe mole hoko anai he meʼa kia koe ʼi te fitu malaʼia.

20 ʼI te temi hoge, ʼe ina toe totogi anai koe mai te mate,

Pea ʼi te tau, ʼe ina toe totogi anai koe mai te malohi ʼo te heleta.

21 ʼE ina haofaki anai koe mai te ʼalelo ʼae ʼe fakatupu mamahi ohage ko he huipi,+

Pea ka hoko mai te maumau ʼe mole ke tuʼania anai.

22 ʼE ke kataʼi anai te maumau mo te hoge,

Pea ʼe mole ke mataku anai ʼi te ʼu manu ʼo te vao.

23 ʼE mole fai atu anai he meʼa ʼe kovi* e te ʼu foʼi maka ʼo te ʼu gaueʼaga,

Pea ʼe ke maʼuli tokalelei anai mo te ʼu manu ʼo te vao.

24 ʼE ke iloʼi anai ʼe mole hoko he tuʼutamaki ki* tou fale la,

Pea ka ke vakavakaʼi tou koga meʼa lunaʼia, ʼe mole puli anai he meʼa.

25 ʼE kaugamalie anai ʼau fanau

Pea ʼe kaugamalie anai tou hakoga ohage ko te lahi ʼo te vao ʼakau.

26 ʼE ke alu anai ki te faitoka kae ʼe kei ke malohi,

Ohage ko ni fuhiga fulumeto ʼe utu ʼi tona temi totonu.