Selemia
16 Neʼe toe palalau mai ia Sehova, ʼo ina ui: 2 “ ʼE mole tonu ke ke ʼohoana, pea ʼe mole tonu ke ke maʼu ni foha mo ni ʼofafine ʼi te koga meʼa ʼaeni. 3 Koʼeni te folafola ʼa Sehova ʼo ʼuhiga mo te ʼu tama mo te ʼu taʼahine ʼae ʼe tutupu ʼi heni, mo ʼanatou faʼe ʼae neʼe natou fanauʼi natou pea mo ʼanatou tamai ʼae neʼe natou maʼu ai te maʼuli ʼi te fenua ʼaeni: 4 ‘ ʼE natou mamate anai ʼi ni mahaki kovi+ pea ʼe mole tagiʼi mo tanu anai natou e he tahi. ʼE natou liliu anai ko he meʼa fakagako kele.+ ʼE natou mamate anai ʼi te heleta mo te hoge,+ pea ʼe kai anai ʼonatou sino mate e te ʼu manulele mo te ʼu manu ʼo te vao.’
5 Koʼeni te folafola ʼa Sehova:
‘ ʼAua naʼa ke ulu ki he ʼapi ʼe fai ai he kai ʼo he ʼavaifo
Pea ʼaua naʼa ke tagi mo natou ʼae ʼe putu peʼe ke fakaha age kia natou ʼou ʼofa.’+
ʼE ui e Sehova: ‘Neʼe au toʼo toku tokalelei mai te hahaʼi ʼaia,
Mo toku ʼofa agatonu pea mo toku manavaʼofa.+
6 ʼE mate anai te tagata maʼuhiga ohage pe ko te tagata malalo ʼi te fenua ʼaia.
ʼE mole tanu anai naua,
ʼE mole tagiʼi anai naua
Pea ʼe mole hifi anai e he tahi tona sino peʼe ina tele tona ʼulu maʼa naua.*
7 ʼE mole foaki anai e he tahi he meʼa kai ki te kau putu
Moʼonatou fakafimalieʼi ʼi te mate ʼo ʼonatou kaiga.
Pea ʼe mole foaki anai e he tahi te ipu vino ʼo te fakafimalie
Kia natou ʼae kua hala mo tamai peʼe hala mo faʼe.
8 ʼAua naʼa ke ulu ki he fale ʼe fai ai he kaitahi
ʼO heka ʼo kai pea mo inu fakatahi mo natou.’
9 “Koʼeni te folafola ʼa Sehova ʼo te ʼatu kautau, te ʼAtua ʼo Iselaele: ‘ ʼI te koga meʼa ʼaeni, ʼi takotou kei maʼuʼuli pea ʼi ʼokotou muʼa, ʼe au fakagata anai te ʼu kalaga fakafiafia. ʼE mole toe logo anai ki te leʼo ʼo te tagata ʼohoana peʼe ko te leʼo ʼo te fafine ʼohoana.’+
10 “Ka ke tala anai te ʼu folafola fuli ʼaia ki te hahaʼi ʼaeni, ʼe natou fehuʼi atu anai: ‘He koʼe neʼe fakaha e Sehova ia te toe malaʼia ʼaia ʼo ʼuhiga mo matou? Kotea te hala mo te agahala neʼe matou fai kia Sehova tomatou ʼAtua?’+ 11 ʼE ke tali anai kia natou: ‘ “Neʼe liʼaki au e ʼakotou kui,”+ ko te ui ʼaia ʼa Sehova, “pea neʼe natou haga fakalogo ki ʼihi ʼatua mo tauhi pea mo tulolo ʼi ʼonatou muʼa.+ Kae neʼe natou liʼaki au pea neʼe mole natou fakalogo ki taku lao.+ 12 Neʼe kovi age takotou aga ʼi ʼakotou kui.+ ʼE kotou uigataʼa ʼo kotou mulimuli ki ʼokotou holi kovi kae ʼe mole kotou fakalogo kia te au.+ 13 Koia ʼe au li anai koutou ki tuʼa ʼi te fenua ʼaeni pea ʼe au ʼave anai koutou ki he fenua neʼe mole kotou iloʼi ʼo feia mo ʼakotou kui.+ ʼI te fenua ʼaia, ʼe kotou tauhi anai ki ʼihi ʼatua, ʼaho mo te po,+ he ʼe mole au toe ʼofa anai kia koutou.” ’
14 “ ʼE ui e Sehova: ‘ ʼE ʼi ai anai he ʼaho ʼe mole natou toe ui ai: “ ʼE matou fakapapau ia muʼa ʼo Sehova te ʼAtua maʼuli, ʼae neʼe ina fakamavae te hahaʼi ʼo Iselaele mai Esipito!”+ 15 Kae ʼe natou ui anai: “ ʼE matou fakapapau ia muʼa ʼo Sehova, te ʼAtua maʼuli, ʼae neʼe ina ʼaumai te hahaʼi ʼo Iselaele mai te fenua ʼo te potu noleto pea mo te ʼu fenua fuli ʼae neʼe ina fakamavetevete ai natou!” ʼE au fakaliliu anai natou ki tonatou fenua, ʼae neʼe au foaki ki ʼanatou kui.’+
16 ‘ ʼE au fekauʼi anai ni tagata gelu ʼe kaugamalie
Ke olo ʼo puke natou,’ ko te ui ʼaia ʼa Sehova.
‘Pea ʼe au toe fekauʼi anai ni tagata kapu manu ʼe kaugamalie
Ke olo ʼo kapu natou ʼi te ʼu moʼuga, ʼi te ʼu kiʼi moʼuga
Pea ʼi te ʼu ava ʼo te ʼu ʼutu.
17 ʼE au sio ki te ʼu meʼa fuli ʼae ʼe natou fai.
Neʼe mole ʼūgia he meʼa kia au
ʼO feia ki ʼanatou hala.
18 ʼE au foaki anai te totogi katoa ʼae ʼe tuha mo tanatou hala pea mo tanatou agahala,+
He neʼe natou ʼulihi toku fenua* ʼaki ʼanatou fakatata mate mo fakalialia.
Neʼe natou fakafonu toku fenua ʼaki ʼanatou meʼa ʼae ʼe au fehiʼa ki ai.’ ”+
19 Sehova e, toku malohi mo toku kolo tau,
Te koga meʼa ʼae ʼe feala ke au hola ki ai ʼi toku temi mamahi,+
ʼE ʼomai anai kia koe te ʼu puleʼaga mai te ʼu potu taupotu ʼo te kele
Pea ʼe natou ui anai:
“Ko te tofiʼa ʼae neʼe maʼu e ʼamatou kui, ʼe ko he loi,
ʼE ko he meʼa ia ʼe vaʼiganoa ʼe mole matou maʼu ai he meʼa ʼe lelei.”+
20 ʼE feala koa ki te tagata ke ina faʼu ni ʼatua?
ʼE mahino papau ia ʼe mole ko ni ʼatua.+
21 “Koia ʼe au fakaha age anai kia natou,
ʼEi, ʼi te lakaga nei, ʼe au fakaha anai kia natou toku malohi mo toku mafimafi,
Pea ʼe natou iloʼi ai anai ko toku huafa ʼe ko Sehova.”