Selemia
19 Koʼeni te folafola ʼa Sehova: “Alu ki he tagata faʼu ipu kele ʼo totogi mai ai he ʼaiʼaga vai kele.+ ʼAve ni takitaki ʼo te hahaʼi pea mo ni takitaki ʼo te kau pelepitelo, 2 pea ke alu ki te potu fenua lauveliveli ʼae ko te Foha ʼo Hinome,*+ ʼi te huʼaga ʼo te Matapa ʼo Te ʼu Kogaʼi Ipu Kele. ʼE ke tala anai ʼi ai te ʼu folafola ʼae ka au ui atu. 3 ʼE ke ui age anai kia natou: ‘Kotou fagono ki te ʼu folafola ʼa Sehova, ia koutou, ʼu hau ʼo Suta pea mo koutou, hahaʼi ʼo Selusalemi. ʼE ui e Sehova ʼo te ʼatu kautau, te ʼAtua ʼo Iselaele:
“ ‘ “ ʼE au fakato anai ki te koga meʼa ʼaeni ia he malaʼia ʼe punamaʼuli ai anai ia natou fuli ʼae ka natou logo ki ai, 4 he neʼe natou liʼaki au+ pea neʼe natou fetogi te koga meʼa ʼaeni ʼo mole kei au iloʼi pe la.+ ʼE natou momoli ʼi ai ni sakilifisio ki ʼihi ʼatua, ko ni ʼatua neʼe mole iloʼi e natou, mo ʼanatou kui pea mo te ʼu hau ʼo Suta. Pea neʼe natou fakafonu te koga meʼa ʼaeni ʼaki te toto ʼo te hahaʼi ʼae neʼe mole natou fai he meʼa ʼe kovi.+ 5 Neʼe natou laga te ʼu faʼahi maʼoluga ʼo Paale ke tutu ai ʼonatou foha ko he sakilifisio maʼa Paale.+ Kae neʼe mole au fakatotonu te faʼahi ʼaia, neʼe mole au talanoa ki ai pea neʼe heʼeki au manatu pe la ki ai.” ’+
6 “ ‘ ʼE ui e Sehova: “Koia kotou fagono! ʼE hoko mai anai he ʼaho ʼe mole toe fakahigoaʼi anai te koga meʼa ʼaeni ko Tofete peʼe ko te potu fenua lauveliveli ʼo Te Foha ʼo Hinome, kae ʼe fakahigoaʼi anai ko te Potu Fenua ʼo Te Mātea.+ 7 ʼE au fakato noa anai te ʼu fakatuʼutuʼu ʼa Suta pea mo Selusalemi ʼi te koga meʼa ʼaeni. ʼE au tuku anai te hahaʼi ki te ʼu heleta ʼo ʼonatou fili pea ki te ʼu nima ʼo natou ʼae ʼe natou fia matehi natou, pea ʼe au tuku anai ke kai ʼonatou sino mate e te ʼu manulele pea mo te ʼu manu ʼo te vao.+ 8 ʼE au fakaliliu anai te kolo ʼaeni ʼo fakaʼofaʼofa pea ʼe sisio anai ki ai te hahaʼi mo he fehiʼa. ʼEi, ko natou fuli ʼae ka fakalaka ai ʼe natou sisio anai ʼaki he fakalialia, pea ʼe natou vaʼi anai ʼuhi ko te ʼu malaʼia fuli ʼae neʼe hoko ki ai.+ 9 Pea ʼe au fafaga anai natou ʼaki te sino ʼo ʼonatou foha pea mo ʼonatou ʼofafine. ʼEi, ʼe tahi kai anai e te tagata te sino ʼo tona tatau. ʼE natou lotovaivai anai ʼi te ʼa takai ʼo te kolo. ʼE ʼa takai anai natou e ʼonatou fili mo natou ʼae ʼe natou fia matehi natou.” ’+
10 “ ʼE ke foaʼi anai te ʼaiʼaga vai ia muʼa ʼo te ʼu tagata ʼae ka olo mo koe. 11 ʼE ke ui anai kia natou: ‘Koʼeni te folafola ʼa Sehova ʼo te ʼatu kautau: “ ʼE au laliki anai te hahaʼi ʼaeni pea mo te kolo ʼaeni, ohage ko he tahi ʼe ina foaʼi te ipu ʼae neʼe faʼu e he tagata faʼu ipu kele ʼo mole feala hona toe faʼu. Pea ʼe natou tanu anai te ʼu mate ʼi Tofete ʼo kaku ki te mole kei maʼu he koga meʼa.” ’+
12 “ ʼE ui e Sehova: ‘ ʼE au fakahoko anai te faʼahi ʼaia ki te koga meʼa ʼaeni mo ʼona hahaʼi ke liliu te kolo ʼaeni ohage ko Tofete. 13 ʼE heʼe maʼa anai te ʼu fale ʼo Selusalemi pea mo te ʼu fale ʼo te ʼu hau ʼo Suta ohage ko te koga meʼa ʼae ko Tofete,+ ʼei, te ʼu fale fuli ʼae neʼe momoli ʼi te ʼu ʼato ni sakilifisio ki te foʼi kautau katoa ʼo te ʼatu lagi*+ pea mo liligi ni molaga meʼa inu ki ʼihi ʼatua.’ ”+
14 ʼI te toe liliu mai ʼa Selemia mai Tofete, ʼae neʼe fekauʼi ki ai e Sehova ke alu ʼo faifakakikite, neʼe tuʼu leva ʼi te malaʼe ʼo te fale lotu ʼo Sehova mo ina ui ki te hahaʼi fuli: 15 “Koʼeni te folafola ʼa Sehova ʼo te ʼatu kautau, te ʼAtua ʼo Iselaele: ‘ ʼE au fakato anai ki te kolo ʼaeni pea mo te ʼu kiʼi kolo fuli ʼi ʼona tafaʼaki te ʼu malaʼia fuli ʼae neʼe au fakaha ʼo ʼuhiga mo ia, he neʼe natou uigataʼa pea neʼe mole natou fia tokagaʼi ʼaku folafola.’ ”+