Selemia
2 Neʼe palalau mai ia Sehova, ʼo ina ui: 2 “Alu ʼo tala te logo ʼaeni ki te hahaʼi ʼo Selusalemi: ‘Koʼeni te folafola ʼa Sehova:
“Neʼe mole au galoʼi tou ʼofa* ʼae kia au ʼi tou temi tupulaga,+
Te ʼofa ʼae neʼe ke fakaha mai ʼi tatā fakatahi,+
ʼE au manatuʼi neʼe ke muliʼi au ʼi te toafa,
ʼI he kele neʼe mole nunusi ai te pulapula.+
3 Neʼe maʼoniʼoni ia Iselaele maʼa Sehova.+ Neʼe ko te ʼu ʼuluaki fua ʼo tana taʼukai.” ’
‘Neʼe lakahala ia natou fuli ʼae neʼe natou faigaʼi ke natou kai.
Neʼe hoko kia natou te malaʼia,’ ko te ui ʼaia ʼa Sehova.”+
4 Kotou fagono ki te logo ʼa Sehova, hakoga ʼo Sakopo,
Mo koutou fuli, ʼu famili ʼo te hahaʼi ʼo Iselaele.
5 Koʼeni te folafola ʼa Sehova:
“Kotea te kovi ʼae neʼe au fai ki ʼakotou tamai+
Ke natou fakamamaʼo ai ia te au,
Pea ke natou muliʼi ai ni fakatata vaʼiganoa+ ʼo natou liliu ai ko ni hahaʼi ʼe mole honatou ʼuhiga?+
6 Neʼe mole pe la natou feuiʼaki: ‘ ʼE ʼifea ia Sehova,
Ia Ia ʼae neʼe ina fakamavae matou mai Esipito,+
ʼAe neʼe ina takitaki matou ʼi te toafa,
ʼI te kele magemage ʼaia+ mo makafaʼafaʼa,
ʼI te kele ʼaia ʼe taʼi laʼa+ mo fakapoʼuli gaogao,
ʼI te kele ʼaia ʼe mole fakalaka ai he tahi
Pea ʼe mole nofoʼi e he tahi?’
7 Koia neʼe au ʼave koutou ki he fenua ʼo ni gaueʼaga,
Ke kotou kai ʼona fua mo fiafia ʼi ʼona fua lelei.+
8 Neʼe mole feuiʼaki pe la e te kau pelepitelo: ‘ ʼE ʼifea ia Sehova?’+
Neʼe mole iloʼi au e te kau faiako ʼo te Lao,
Neʼe talagataʼa te ʼu tauhi ovi kia te au,+
Neʼe faifakakikite te kau polofeta ʼi te higoa ʼo Paale,+
Pea neʼe natou muliʼi ni ʼatua neʼe mole natou maʼu ai he meʼa ʼe lelei.
9 ʼE ui e Sehova: ‘Koia ʼe au toe tukugakoviʼi anai koutou,+
Pea ʼe au tukugakoviʼi anai te ʼu foha ʼo ʼokotou foha.’
10 ‘Kae kotou fakalaka ʼi te tai ʼo kaku ki te ʼu matatai* ʼo Kitimi+ mo sisio.
ʼEi, kotou fekauʼi he tahi ke alu ki Keta+ ʼo fakasiosio lelei
Mo vakaʼi pe neʼe kua hoko he meʼa feia.
11 Neʼe kua siʼaki koa e he puleʼaga ʼona ʼatua kae atolasio ki ni meʼa ʼe mole ko ni ʼatua?
Kae neʼe fetogi e taku hahaʼi toku kololia ʼaki ni meʼa vaʼiganoa.+
12 Lagi, sio mo punamaʼuli.
Ke ke mataku ʼi he toe meʼa fakalialia,’ ko te ui ʼaia ʼa Sehova,
13 ‘He neʼe fai e taku hahaʼi ni meʼa kovi ʼe lua:
Neʼe natou lituʼa kia te au, te matapuna ʼo te vai maʼuli,+
Neʼe natou keli* ni tane vai,
Ni tane makafaʼafaʼa ʼe mole taʼofi ai te vai.’
14 ‘Ko Iselaele ʼe ko he tagata faifekau koa peʼe ko he kaugana neʼe tupu ʼi te ʼapi ʼo tona pule?
He koʼe leva ia neʼe kaihaʼa ia ia?
15 ʼE gugulu kia ia te ʼu laione kei mui,+
Neʼe natou gugulu malohi.
Neʼe natou fakaliliu tona fenua ko he meʼa fakalialia.
Neʼe natou tutu ʼona kolo ʼo mole kei nofoʼi.
16 ʼE kakai ʼi tou ʼulu te hahaʼi ʼo Nofi*+ mo Takepanese.+
17 Neʼe mole ko koe koa la ʼae neʼe ke fakahoko te faʼahi ʼaia
ʼI tau lituʼa kia Sehova tou ʼAtua,+
ʼI te temi ʼae neʼe ina takitaki ai koe ʼi te ala?
18 Koia ʼi te temi nei, he koʼe ʼe ke kumi te ala ʼo Esipito,+
Pea koʼe ʼe ke fia inu ki te ʼu vai ʼo Sihole?*
19 ʼE tonu ke akonakiʼi koe e tau agakovi,
Pea ke fakatonutonuʼi koe e tau heʼe agatonu.
Ke ke iloʼi mo mahino ki te kovi mo te kona+
ʼO te lituʼa kia Sehova tou ʼAtua.
Neʼe mole ke manavasiʼi tuʼa tahi kia te au,’+ ko te ui ʼaia ʼa te Tuʼi ʼAliki ko Sehova ʼo te ʼatu kautau.
20 ‘ ʼI te temi muʼa, neʼe au maumauʼi tau ʼakau ʼamo+
Pea neʼe au motuhi ʼou seini.
Kae neʼe ke ui: “ ʼE mole au tauhi anai kia te koe.”
Neʼe ke takoto mo faiaga,+
ʼI te ʼu kiʼi moʼuga fuli pea ʼi te ʼu lalo fuʼu ʼakau fuli ʼae ʼe maʼuli lelei.+
21 Neʼe au to koe ohage ko he fuʼu vite ʼe lelei ʼaupito,+ ko he faʼahiga huli ʼe lelei.
Koia he koʼe neʼe ke liliu ʼi ʼoku muʼa ko he fuʼu vite vao?’+
22 ʼE ui e te Tuʼi ʼAliki ko Sehova: ‘ ʼE ke ʼuli tuʼumaʼu pe ʼi ʼoku muʼa ʼuhi ko tau hala,+
Tatau aipe pe ʼe ke maʼanu ʼaki te sota peʼe lahi tau fakaʼaogaʼi te topa.’
23 ʼE feafeaʼi hau ui: ‘ ʼE mole au ʼuli au,
Neʼe mole au mulimuli au ʼi te ʼu Paale’?
Sio ki tau aga ʼae neʼe ke fai ʼi te potu fenua laulelei.
Fakakaukauʼi te meʼa ʼae neʼe ke fai.
ʼE ke hage ko he kamelo fafine gaholo kei mui,
ʼE feleleʼaki faʼifaʼitaliha ʼi te ʼu ala,
24 Ohage pe ko he asino fafine vao kua mahani ʼi te toafa,
ʼAe ʼe manava ki te matagi ʼo mulimuli ki tona holi.
Ko ai ʼae ʼe ina lava taʼofi moka vela ʼona holi?
ʼE mole kinakina anai ia natou ʼae ʼe natou kumi ia ia.
ʼI te temi ʼo ʼona holi, ʼe natou maʼu anai ia ia.
25 Tuʼu muʼa naʼa ke haʼele kiliʼi vaʼe
Pea naʼa magemage tou kia ʼi tou fia inu.
Kae neʼe ke ui koe: ‘Kailoa, ʼaua naʼa ke fakakinauʼi au!+
26 Ohage ko he tagata kaihaʼa ʼe ufiufi ʼi tona maʼutoka,
Neʼe toe feia mo te ufiufi ʼo te hahaʼi ʼo Iselaele,
Ia natou, mo ʼonatou hau pea mo ʼonatou tama ʼaliki,
Mo ʼonatou pelepitelo pea mo ʼonatou polofeta.+
27 ʼE natou ui ki he fuʼu ʼakau: ‘Ko koe taku tamai,’+
Pea ki he foʼi maka: ‘Ko koe ʼae neʼe ke fakatupu au.’
Kae neʼe natou lituʼa kia te au mo haga kehe.+
ʼE natou ui anai ʼi tonatou temi mamahi:
‘Fai he meʼa, haofaki matou!’+
28 Kae kofea te ʼu ʼatua ʼae neʼe ke faʼu?+
Ke natou fai he meʼa mo kapau ʼe feala ke natou haofaki koe ʼi tou temi mamahi.
Suta, kua kaugamalie ʼou ʼatua ohage pe ko te lahi ʼo ʼou kolo.+
29 ‘He koʼe ʼe kotou tukugakoviʼi tuʼumaʼu ia au?
He koʼe ʼe kotou agatuʼu fuli kia te au?’+ ko te ui ʼaia ʼa Sehova.
30 Neʼe au ta ʼokotou foha kae neʼe mole hona ʼuhiga.+
Neʼe mole natou tokagaʼi tuʼa tahi taku fakatonutonu.+
Ko te heleta pe ʼa koutou ʼae neʼe matehi ʼaki ʼakotou polofeta,+
Ohage ko he laione ʼi tana kumi tana meʼa kai.
31 Taʼiake, fakakaukauʼi te folafola ʼa Sehova.
Kua au liliu koa maʼa Iselaele ohage ko he toafa
Peʼe ko he fenua fakapoʼuli fakamataku?
He koʼe neʼe ui e taku hahaʼi:
‘ ʼE matou taka faʼifaʼitaliha,
ʼE mole matou toe ʼomai anai kio koe’?+
32 ʼE galoʼi koa e he taʼahine taupoʼou ʼona meʼa fakateuteu,
Peʼe ko he fafine ʼohoana ʼona kiliʼi pipi?*
Kae kua fualoa toku ia galoʼi e taku hahaʼi.+
33 Fafine, ʼe ke faiva ʼi te kumi ke ʼofainaʼi koe!
Neʼe ke ako te ʼu kaka ʼo te agakovi.+
34 Ko tou tapaʼi kofu,
Kua pulepule ʼi te toto ʼo te hahaʼi masiva pea mo natou ʼae neʼe mole natou fai he meʼa ʼe kovi.+
Logo la neʼe mole au maʼutoka te hahaʼi ʼaia ʼe natou ulufi fakamalohi tou ʼapi,
Kae ʼe totototo pe tou tapaʼi kofu.+
35 ʼE ke ui koe: ‘ ʼE mole au lakahala.
Lagi kua maliu kehe tona ita ia au.’
Koʼeni ʼe au fakatuʼā ia koe
Koteʼuhi ʼe ke ui neʼe mole ke agahala.
36 ʼE mole ke fakakaukau koa koe ʼi tau maʼuli heʼe agatonu?
37 Ko te tupuʼaga la ʼaia, ʼe ke toe mavae ufiufi anai mo ʼou nima ʼi tou ʼulu,+
He neʼe liʼaki e Sehova ia natou ʼae ʼe ke falala ki ai.
Pea ʼe mole anai honatou ʼaoga tuʼa tahi kia koe.”