Selemia
26 ʼI te temi ʼae neʼe kamata hau ai ia Soakimi,+ foha ʼo Sosiasi, hau ʼo Suta, neʼe palalau leva ia Sehova kia Selemia, ʼo ina ui: 2 “Koʼeni te folafola ʼa Sehova: ‘Ke ke tuʼu ʼi te malaʼe ʼo te fale ʼo Sehova mo ke palalau ʼo ʼuhiga mo* te hahaʼi fuli ʼo te ʼu kolo ʼo Suta ʼae ʼe ʼomai ʼo atolasio ʼi te fale ʼo Sehova. Fakaha age kia natou te ʼu meʼa fuli ʼae ʼe au fakatotonu atu. Pea ʼaua naʼa ke toʼo he kupu ʼe tahi. 3 ʼE lagi natou fakalogo anai mo liʼaki tanatou aga ʼae ʼe kovi. Pea kapau koia, ʼe au fetogi anai taku manatu ʼo ʼuhiga mo te malaʼia ʼae ʼe au fakatuʼutuʼu ke au fakahoko kia natou moʼo tauteaʼi ʼanatou aga ʼae ʼe kovi.+ 4 Ui age kia natou: “Koʼeni te folafola ʼa Sehova: ‘Kotou fakalogo mai, ʼei, kotou fakaʼapaʼapa ki taku lao* ʼae neʼe au foaki atu, 5 pea kotou fakalogo ki ʼaku tagata faifekau te kau polofeta ʼae ʼe au fekauʼi liuliuga atu kae neʼe mole kotou fakalogo ki ai.+ 6 Kapau ʼe mole kotou fakalogo, ʼe au fakaliliu anai te fale ʼaeni ke hage ko Silo.+ Pea ʼe talanoaʼi anai e te ʼu puleʼaga fuli ʼo te kele ia te kolo ʼaia ʼi ʼanatou faitutuku.’ ” ’ ”+
7 Neʼe logo ai te kau pelepitelo, mo te kau polofeta pea mo te hahaʼi fuli ʼae neʼe nonofo ʼi te fale lotu ʼo Sehova ki te ʼu palalau ʼaia ʼa Selemia.+ 8 ʼI te ʼosi fakaha e Selemia ia te ʼu palalau fuli ʼae neʼe fakatotonu age e Sehova ke ina tala ki te hahaʼi fuli, neʼe puke leva ia ia e te kau pelepitelo, mo te kau polofeta pea mo te hahaʼi, ʼo natou ui ki ai: “ ʼE ke mate anai. 9 He koʼe neʼe ke faifakakikite ʼi te huafa ʼo Sehova ʼo ke ui ʼe liliu anai te fale ʼaeni ohage ko Silo pea ʼe maumauʼi mo tuʼu lavaki anai te kolo ʼaeni?” Pea neʼe fakapupu leva ia te hahaʼi fuli kia Selemia ʼi te fale lotu ʼo Sehova.
10 ʼI te logo ʼae ʼa te ʼu tama ʼaliki ʼo Suta ki te ʼu palalau ʼaia, neʼe natou feulufi ai ki tuʼa ʼi te fale hau ʼo hake ki te fale lotu ʼo Sehova pea natou heheka ʼi te huʼaga ʼo te matapa foʼou ʼo te fale lotu ʼo Sehova.+ 11 Neʼe ui leva e te kau pelepitelo mo te kau polofeta ki te ʼu tama ʼaliki pea mo te hahaʼi katoa: “ ʼE tonu ke matehi te tagata ʼaeni.+ Neʼe ina fakakikite he malaʼia ki te kolo ʼaeni. Pea neʼe kotou logo tonu ki ai.”+
12 Neʼe ui leva e Selemia ki te ʼu tama ʼaliki fuli pea mo te hahaʼi katoa: “Ko te ʼu meʼa fuli ʼae neʼe kotou logo ki ai, ko Sehova ʼae neʼe ina fekauʼi au ke au faifakakikite ki te fale mo te kolo ʼaeni.+ 13 Koia ʼi te lakaga nei, kotou fetogi ʼakotou aga mo ʼakotou gaue pea kotou fakalogo kia Sehova tokotou ʼAtua. Pea ʼe fetogi anai e Sehova ia tana manatu ki te malaʼia ʼae neʼe ina fakaha ʼo ʼuhiga mo koutou.+ 14 Koʼeni au, pea kotou fai kia au te meʼa ʼae ʼe kotou manatu ʼe lelei mo totonu. 15 Pea ke kotou iloʼi, kapau ʼe kotou matehi au, ʼe kotou lakahala anai, ia koutou, mo te kolo ʼaeni mo ʼana hahaʼi, he neʼe kotou matehi ia he tagata neʼe mole ina fai he meʼa ʼe kovi, koteʼuhi neʼe ko Sehova totonu ʼae neʼe ina fekauʼi mai au kia koutou ke au fakaha atu ia te ʼu folafola fuli ʼaeni.”
16 Neʼe ui leva e te ʼu tama ʼaliki mo te hahaʼi katoa ki te ʼu pelepitelo pea mo te ʼu polofeta: “ ʼE mole tonu ke matehi te tagata ʼaeni, he neʼe palalau mai kia tatou ʼi te huafa ʼo Sehova totatou ʼAtua.”
17 Pea neʼe tutuʼu ake ni takitaki ʼo te fenua ʼo natou ui ki te hahaʼi katoa ʼae neʼe kua maʼopoʼopo: 18 “Neʼe faifakakikite ia Mikea+ mai Moleseti, ʼi te temi pule ʼo te Hau ʼo Suta ko Esekiasi,+ ʼo ina ui ki te hahaʼi katoa ʼo Suta: ‘Koʼeni te folafola ʼa Sehova ʼo te ʼatu kautau:
“ ʼE fuli anai ia Sione ohage ko he gaueʼaga,
ʼE maumauʼi anai ia Selusalemi,+
Pea ʼe hage anai te moʼuga ʼo te Fale* ko te tumutumu ʼo he kiʼi moʼuga ʼe ʼakauʼia.” ’+
19 “Kae neʼe matehi koa ia ia e te Hau ʼo Suta ko Esekiasi mo te hahaʼi katoa ʼo Suta? Kailoa ia. Neʼe manavasiʼi te hau kia Sehova pea neʼe tagi mamahi kia Sehova. Neʼe fetogi ai leva e Sehova tana manatu ki te malaʼia ʼae neʼe ina fakaha ʼo ʼuhiga mo natou.+ Kae ʼe feafeaʼi kia tatou, ʼe mole tou fakatupu anai koa la he toe malaʼia kia tatou?
20 “Neʼe ʼi ai te tahi tagata neʼe faifakakikite ʼi te huafa ʼo Sehova. Neʼe ko Ulisa, foha ʼo Semaea mai Kiliate-sealimi.+ Neʼe ina toe fakakikite foki ʼe hoko anai he malaʼia ki te kolo mo te fenua ʼaeni, pea neʼe tatau pe ʼana palalau mo ʼae ʼa Selemia. 21 Neʼe logo te Hau ko Soakimi,+ mo ʼana tagata malolohi fuli, mo ʼana tama ʼaliki fuli ki ʼana palalau, pea neʼe kumi e te hau ke ina matehi ia ia.+ ʼI te iloʼi e Ulisa ia te meʼa ʼaia, neʼe mataku ai ʼo hola ki Esipito. 22 Neʼe fekauʼi leva e te Hau ko Soakimi ke olo ki Esipito ia te foha ʼo Akepole ko Elenatane+ pea mo ʼihi tagata. 23 Neʼe natou toe ʼaumai ai mai Esipito ia Ulisa ʼo ʼave ki te Hau ko Soakimi. Pea neʼe fakatotonu e te hau ke matehi ia ia ʼaki te heleta+ mo li tona sino ki te tanuma ʼo te hahaʼi masisiva.”
24 Kae neʼe lagolago ia Asikame,+ foha ʼo Safani+ kia Selemia, ʼo mole tuku ai ia Selemia ki te hahaʼi ʼae neʼe natou fia matehi ia ia.+